اي سوال عن الصقور والشرياص .. تفضل ((ارجو التثبيت))

[S7S7]

بسم الله الرحمن الرحيم


السلام عليكم ورحمة الله وبركاته



نظرا لكثرة الاستفسارات عن الصقور والشرياص نزلت الموضوع لاي شخص عنده استفسار عن الصقور(الشاهين ,الحر ,الوكري,الجير وغيرها) والشرياص



في انتظار استفساراتكم

[عرباوي]

ممكن اعرف شلون ادرب الشرياص و شلون اخلي يتزوج بس شلون اعرف لانه ذكر اكبر من النثيه او ابي صور

[الكنق]

انا عندي اسئله كثييييييييييره بس تحملني


الشنذره كم اعطي الطير منها


انا عندي شيهانه بحريه ووتاخر ماتقرنس وش اسوي عشان تقرنس بدري

هل من العادي اني اربط الطير بشمس بس اخلي عنده ماء

وشلون اعرف ان الشيهانه تامه

لاجاء وقت الحباري عادي اهدها عليهن على طول من المربط للحبارى

الشيهانه البحريه تمسك احبارى

وشلون اعرف الذكر من الانثى من الطيور

يعني الحر ذكر والانثى شيهانه

وشكرا تراني عليييييييييييييييييييييييمي

[S7S7]

اخووي عرباوي تدريب الشرياص يكون انك اول ماتشتري الطير تحطه بغرفه وتجوعه يوم بعدين تحط على يدك لحم وتبعد عنه مسافة متر وتشوووف يجي على يدك او لا ولو ماجاء تعيد نفس الحركه من بكرا ولو ماجاء قرب الحم الى عند فمه ولما يبدا ياكل ارفعه على يدك وخله ياكل من يدك ولايطير بالاكل ولما يخلص من الاكل رجعه على الوكر وبرقعه ومن بكرا جرب تخليه يجي على يدك مع الاكل وكل يوم نفس الطريقه وبعدها جرب تلمسه على صدره


اما التزاوج تخلي الجوز بالغرفه وتطلقهم وبعد فتره لما يتعوديون على بعض بتزاوجون بس لازم مكان وقش عشان يقدرون يسوون عش


اما معرفة الجنس تلقا راس الرجال فيه لون رصاصي اما الانثى يكوون لون الراس نفس الجسم


بالتوفيق

[S7S7]

اخوووي بالنسبه للشنذره :

تعرف اخووي مدى اهميت الشناذر للطير بعد الربطه ولي يحذف الشبيكا وهي الشحوم المتركبه من عقب الربطه الله يعزكم
فهناك طرق ولكل صقار طريقته ويجت التأكد من الامور التاليه قبل شنذرة الطير:
تأكد من ان الطير ماهوب صنيع ولاضعيف فكم طير مات بسبت شنذرته وهو ضعيف.
تأكد من الطير ماهوب عالف.
وتأكد من ان الطير مابذل مجهود اما بمكافخ ولا دعو فلا بد يكون الطير مرتاح.
فهناك من يشنذر بالكبسول الجديد الي يجي باللون الاحمر والابيض التي طلعت من تالي
والبعض وانا من مفضلي هذي الطريقه ألا وهي
شندرت الطير بالشب الابيض وإليكم طريقته لمن يجهل طريقته
تكسر كسره من الشب وتقوم بحطها بشكل دارئي بدون زوائد تسبب بجرح فم الطير عند ادخالها ويفضل ان تكون بحجم مناسب كا اكبر من عين الطير بقليل
وبعد هذا تضع الشاش الابيض عليها ووضع طبقه واحده وربطه بخيط زين ماينفك لكي تجمع الشحوم ويحذفها مره واحده
والبعض من الطيور مايحذف من اول مره فبعض الطيور مايحذف شبيكاه ألا بالمره الثانيه او الثالثه
وسمعت ان منهم يطول الخيط ليكون خارج من بوز الطير ويكون من فوق اللسان لكي لاتأخر الطير يسحب الخيط ويخرجها بنفسه وهذي من بنظري ان لها مضار على الطير ولانصح بها ابداً
والكبسول لايحتاج لشاش
فا قبل وضع الشناذره تجهز برواز من الماء ووضع الشناذره بالماء لكي لاتكون حرشه على الطير
فتدخل الشناذر بمعلف الطير واحرص على ان تكون باخص بالشغله لان فيه منسم للمعلف وللرئه
وبعده تضغط برواز الماء بفم الطير ليتافاعل الشب مع الماء ويعطي منوج افضل
وبعده تبرقع الطير وتبعده عن الازعاج افضل وريثما تشوف الطير بيرجع الله يعزكم تحل برقعه وتبتعد عنه وبعد مايحذف بنص ساعه او ساعه تعلفه بهبر بدون عضم لأن معلف الطير ضعف عقب الشناذره فهي حاره على الطير واذا شفت الطير خاطره ماهوب الي يسرعقب الشناذره عطه حليب السعوديه فهو يبرد على الطير
تنبيه
عدم تدعو الطير لمدة ثلاث ايام متتاليه
ويفضل اعطاء الطير سكر نبات بعده باسبوع ويكون الطير جاهز من ناحيه شهوته للعلف


اما بالنسبه لطيرك الي مابعد قرنس ارفع عليه العلف ونزله يعني اليوم تعطيه سمانه كامله وبكرا نص سمانه

اما انك تربط الطير بالشمس يمكن يظر الطير بس لازم يتخلل غرفة المقيض شووي شمس ومكيف صحراوي وارضيه رمل احمر صاافي

اما كيف تعرف ان الشيهانه تامه من راعيها

لازم تجردها قبل لاتهدها اما بالتلواح او بالحمام المنتوفه شوووي وكل يوم تنتف اقل حتى تفكها لطير سلم كامل ريشها

الشيهانه البحريه تصيد الحبارى

لا لا الطير الوافي الي يكون قياسه كبير يعني 17 *17 وفوق يكون غالبا انثى واما 16 *16 وتحت

غالبا رجال

وياليت تحط صور لطيره وللمقيض

والله يباركلك بطريتك وتاكل من صيدها ان شاء

[S7S7]

ارجوا من الاداره ازالة الموضوع باسررررع وقت

[خبيرفي الطيوروالحيوانات]

طيب كم اسعار الشرياص في المدينة

[S7S7]

حتى الاداره مفهييين

[تركي العلي]

مشكوووووووووووووووووووور

[احمد الشرريف]

يعطيك العافيهـ

[العملس]

الى الامام اخي

[من دون وجاى]

الف شكر على المعلومات

[وسمي الخالدي]

مشكوووووووووووووور

[ahmedkamal18]

تسلم على الافادة

[kingx]

كيف بدي اعرف الصقر من غيره من الجوارح مثل الباشق او الصقيري لانه احترت بالطير الي عندي وراح احاول انزل الصور

[S7S7]

من عيون الصقر .. دائما الصقر لون عيونه اسووود ساده

نزل صورة الطير الي عندك واعلمك بنوعه بالتوفيق