شحن الطير هل هو مضر له ..!

[مطلوب أفريقي]

السلام عليكم ورحمة الله وبركاته .

كيفكم اخواني ان شالله تمام ..؟

يا حبايبي انا شريت كاسكو من واحد من القطيف ,, المشكله اني واعدته يوم الاربعاء أجيه وأشوفه وأعطيه الفلوس وآخذه ..

لكن يوم السبت انا عندي اختبار قانون تجاري وصعب وما اقدر اروح للقطيف أبد هالوقت ..!

قال لي اشحنه عادي ..!

بس انا خايف اعطيه الفلوس ولما يوصلني ألاقيه مريض او تعبان مع انه صور لي الطير 4 صور وشكله نشيط ومافيه أي عيب صراحة ..

شرايكم أتوكل على الله وأشحنه ماراح يضره ..!

واذا فيه طريقة أضرب فيها عصفورين بحجر ياليت تقولونها ..
يعني انه يجيني ومكشوف عليه ..! او مضمون

رايكم يا جماعة في الشحن بشكل عام ..!

هل يضر بالطير او لا


اتمنى ألاقي جواب عاجل من ذوي الخبرات

[رعووودي]

شوف اخوي

انت لما تسافر بطايره كرسي مريح وكل شي ومع ذلك تتبهذل وتحس عظامك تعابانه

اجل كيف الطير قفص صغير والناس الي بيشحنوه يمكن مايراعونه وبيرمونه رمي للشاحنات

اذا انت من جده او اي مدينه خذلك طيرك من نفس المدينه وخاصه الكاسكو متوافر وباسعار جميله

او انك تتفق مع الرجال وترسله عربون مثلا 500 ريال وقله الباقي بعد الاختبارات بمرك واخذه بس احجزه لي

[كاسكـــو]

طيب انت بالرياض ليش ماخذت لك واحد من الرياض

بالعكس عندنا طيور حلوه وخصوصا ايام الخميس والجمعه .. ولو تروح قسم البيع بتحصل هناك ناس من الرياض

ماشاء الله يعرضون طيور حلوه تقدر تتواصل معهم يدبرون لك طير مناسب .. وانت وقرارك فكر

[مطلوب أفريقي]

فكرة العربون حلوة اخوي وممتازة مره بعد ..

يعطيك العافية

أخوي كاسكو الي بالرياض اغلى من الي بالقطيف ..

بشكل عام.. وهذا حلو سعره يعني مناسب لي ..

[حب استطلاع]

مطلوب أفريقي
السلام عليكم ورحمة الله وبركاته .

كيفكم اخواني ان شالله تمام ..؟


وعليكم السلام
أبشرك نحمدووووووووووووه

بس انا خايف اعطيه الفلوس ولما يوصلني ألاقيه مريض او تعبان مع انه صور لي الطير 4 صور وشكله نشيط ومافيه أي عيب صراحة ..

شرايكم أتوكل على الله وأشحنه ماراح يضره ..!


شوف أخوي لازم تعرف إن الصور مهما كانت نقاوتها ما راح تعطيك حجم ونظافة الطير فعلاً
يعني الشوف على الطبيعة أضمن بإذن الله
الشي الثاني إذا تضمن الرجال ما يعطيك ركبه :rolleyes:
وأنك تثق في إختياره
يعني يقولك راح أنقيلك طير نظيف
توكل على الله وأشحنه

رايكم يا جماعة في الشحن بشكل عام ..!

هل يضر بالطير او لا

الشحن يكلف حتى 7 كيلو جرام مبلغ ( 145 ريال )
ومن ناحية إنه يضر بالطير أو لا
أنا أستقبلت طيور مشحونه من جده والدمام
والحمد لله مافيه مشكلة بشرط
تبعد عن الرحلات إللي تكون في الحر
يعني إذا وفق الله وشحنت
لا تختار الرحلات إللي تكون في النهار
وأختر الرحلات إللي تكون في الليل أفضل
لأنهم في الشحن بعد وصول الطائرة تبقى الشحنة فيها ما يقارب الساعتين
فتخيل إنك شحنت طيرك الساعة 1 الظهر
كيف بيكون وضعه بدون ماء
بالتوفيق أخــوي

[PrEsIdEnT]

انا اشتريت ببغاء كاسكو من الرياض فرخ عمره تقريبا من 7 الى 8 شهور ب 800 ريال


صدقني الاسعار بسوق الحمام بالرياض رخيصه مره حتى صاحب الببغاء يحلف لي انه مكسبه بالببغاء 50 ريال


بالتوفيق

[مطلوب أفريقي]

--------------------------------------------------------------------------------

انا اشتريت ببغاء كاسكو من الرياض فرخ عمره تقريبا من 7 الى 8 شهور ب 800 ريال


صدقني الاسعار بسوق الحمام بالرياض رخيصه مره حتى صاحب الببغاء يحلف لي انه مكسبه بالببغاء 50 ريال


بالتوفيق

انا قلبت السوق كله ايام الاربعاء والخميس والجمعه اسبوعين ورى بعض ..!

مالقيت شي نظيف الا بـ 1300 وفيها

وانا شريته من الرجال خلاص بالنسبة لهذا الموضوع .. انا بس افكر في طريقة الوصول له ..

...

أخوي حب استطلاع ..

أشكرك جداً على المعلومات المميزة .. هو يقول 100 ريال ماراح تضر اشحنه لك ..

وارسل لي واحد من الشباب بالمنتدى يقول باروح اشوف الطير لك .. الله يجزاه خير والله انه كفو ^_^

والله ماني متطمن على الشحن شكلي بأخلي احد اخوياي يروح يجيبه من هناك

انا اعرف ناس بالشرقية بس مشكلتهم مايعرفون شي بالطيور

يعني احتمال اخلي احد يجيبه لي ..!

بس الله يستر من تاليتها

[مطلوب أفريقي]

انا اشتريت ببغاء كاسكو من الرياض فرخ عمره تقريبا من 7 الى 8 شهور ب 800 ريال


صدقني الاسعار بسوق الحمام بالرياض رخيصه مره حتى صاحب الببغاء يحلف لي انه مكسبه بالببغاء 50 ريال


بالتوفيق

أخوي انا لقيت هالاسعار الي هي الكينيات ( التمنة )

اخاف انك تقصدها ..!

[سكر]

الله يوفقك في اختباراتك

والشحن ان شاء الله ما يضر,,

اعمل بالأسباب وربي يكتب مافيه الخير

وفر له غطاء أثناء الشحن من باب الأحتياط

وخلي الغطاء مبلل بالماء اذا كنت خايف من الحر,,,

تحياتي