عاجل : كاسكوي مريض

[kolombos]

السلام عليكم

اخواني
من اسبوعين شريت كاسكو افريقي عمره تقريبا 8 شهور
اول ما شريته كان بصحة وحيوية و يصفر

من امس و اليوم حالته صارت مو طبيعية
صاير خامل
مايبي يلعب
وما ياكل
وما يصفر
وبادي عليه التعب و الاجهاد

واحس ان بادي عليه اعراض المرض
ولكن البراز ( عزكم الله ) عادي .. اخضر و ابيض
ومافيه حرارة بمنطقة الراس او الرجل

الاكل اللي اقدمه له الاكل العادي الحب الشمسي المخلوط
و اعطيه بين فترات الجوز و البسكوت و عصير برتقال

سؤالي
في شي من الاكل اللي قاعد ياكله يأثر على صحته ؟

وياليت تفيدوني هالاعراض اللي يعاني منها ( عدم الاكل و الخمول ) شنو سببها؟

وهل في اكل معين او دواء تنصحوني فيه ؟

واتمنى الرد في اسرع وقت ممكن

[عبووووووودي]

حطه بالشمس لمده ثلاث ايام كل يوم نص ساعه ورجعه البيت

[كاسكـــو]

اعرضه على بيطري افضل اذا كان مريض

واشرح له الحاله وراح يعطيك العلاج المناسب

[ابو محمــد]

نفس كلام اخوي كاسكو وده للمختص قبل ما تتطور الحاله ولا تتردد لان الطير الرمادي ما يبين عليه المرض بسرعه ويكابر فارجو منك الذهاب بأسرع وقت ممكن

[مطلوب أفريقي]

شكلك ماتعطيه راحة كافية ..

لازم ينام 10 ساعات بظلام .. يعني لازم تغطيه ببطانية او فوطة عشان ينام ويرتاح ..

اكيد ارهاق .. وتأكد من البيطري اكثر

حاول تنوع له الاكل اعطيه تفاح طلعه بالشمس ..

لا تخليه يشوف ناس غيرك هاليومين ..

الكاسكو يبيله رعاية خاصة على فكرة ..

وطمنا يالغالي

[kolombos]

مشكورين على ردودكم

الصراحة امس بالليل عطيت الكاسكو شوية بطاط مهروس
ولاحظت الصبح انه يرجع ( تكرمون يطلع القيئ من منقاره ) ولاحظت اللون يكون رمادي مايل للاسود

وكلت الكاسكو سريلاك بالابرة الصبح لانه مو راضي ياكل شي
وكنت خالط بالسريلاك دوا اسمه BOGENA MULTI-VIT + VITAMINE A

وبعدها شربته ماي مخلوط معاه دوا اسمه SANTALINA K3 MET ANTIBIOTCUM
شربته بحدود واحد ونص ملل

ولقيته خامل ويبي ينام

خليته علشان ينام و لما رحت اتطمن عليه لقيته يرجع السيريلاك مع بعض الشغلات الرمادية

الحمدلله مافي حرارة بجسمه و البراز اخضر وابيض
بس ملاحظ ان اطراف ريوله ( رجوله ) بارده
مع اني مدفيه

ولي الحين الكاسكو خامل و صعب عليه يصفر و ما يرضى ياكل شي

اتمنى تفيدوني بهالحالة
من شنو تكون ؟
وشنو الحل ؟

[حسين بن عاقول]

ياخوي شنو سويت الكاسكو جبده قلبت من اللي تعطيه ، إمنع عنه الأكل لمدة يوم وراقب عيونه ، وعطه بس ماي بدون أي إضافات بطنه مخربطه شوي ، وبعد جذيه بس حلقة موز وحده في اليوم بس ، والشمس بعد زينه تنشطه شوي وخله يرجع يرتاح . هذا والله أسأل أن يتم نعمته علينا وعلى طيورنا . سلامات يالحبيب.

[kolombos]

مشكورين على دعواتكم ....

اليوم رحت البيطري ( الدهماء )

الدكتور شاف عيونه و حلجه من داخل و قال لي .. شكله ماكل شي مو زين او بسبب تغير الجو عليه

وعطاني دوا اسمه HK333
ودوا ثاني بودر ... وحبوب
قال لي اخلط الدوا الاول مع البودر و حبة وحدة في شوية ماي واعطيه كل ساعتين 1 ملل من هالدوا

و اخليه ياكل سيريلاك

واذا ماصار زين خلال هالـ 3 ايام ... اراجع البيطري مرة ثانية

ملاحظة : من 3 ايام بديت اعطيه حب شمسي مخلط شاريه من سوق اليمعه ( الجمعه )

الظاهر الكاسكو مريض من هالحبوب لانها غير مغطية وغير مغلفة غير عن اللي بالجمعيات

[ابو محمــد]

هااااااااااااااا عرفت وش المشكله نوع الحبوب اللي تعطيه ممكن ويكون مو نظيف رح للمحلات اللي تبيع بالجمله والمفرق وخذ حبوب مشكله بالفواكه فيها جميع الفواكه وشرط تكون من انتاج امريكا أو بلجيكا وسعر الكيس الكبير 220 ريال.

[kolombos]

صباح الخير

اخواني
ملاحظ على الكاسكو الحين ( من بعد مابديت اعطيه المضاد الحيوي و الادوية اللي وصفها البيطري )
ارتفعت حرارة الكاسكو
وصار ما يقدر يتحرك الا بصعوبة ومافيه شدة يوقف
وغير هذا ريوله ( رجوله ) اليسار لينة حيل وما يقدر يوقف عليها

فهل هذا طبيعي بسبب المضاد الحيوي ؟

والكاسكو موراضي ياكل اي شي وبالغصب اقدر اخليه ياكل بالابرة شوية سيريلاك ( قبل ما اعطيه الدوا ) مثل ماقال البيطري

وامس بالليل عطيته شوية برتقال واستانس عليه بسبب العصير اللي داخل البرتقاله

ياليت اللي عنده فكرة عن الاعراض اللي ذكرتها اذا كانت طبيعية نتيجة المضاد الحيوي او لا ؟

ومشكورين

[kolombos]

مساء الخير

امس رحت بيطيري ثاني ( مستشفى رويال ) و الدكتور قال لي ان الطير حايشه فيروس و الفيروس ماله علاج

وقال ان هذا الفيروس منتشر بشكل كبير بحيث ان 80% من الطيور المستوردة فيها هالمرض او حاملة لها وما يظهر على الطير بسرعه الا بعد اجهاد وجهد وبعدها تبتدي تظهر اعراض المرض

ونصحني اني افحص الطير ( اسوي تحليل دم ) قبل ما اشتري اي طير

وما وصف لي اي علاج بس قال لي اعطيه سوائل وقال لي ان الطير راح يموت

وللاسف كلامه كان صحيح و اليوم الظهر توفى كاسكوي

وقال لي سبب الشلل في ريوله ( رجوله ) بسبب مشكلة في الكلية وبما ان اعصاب الرجل قريبة من الكلية وفيها تضخم علشان جذي ماكان قادر يحركها

وايضا من البراز ( عزكم الله ) اللي كان يغلب عليه اللون الابيض قال ان المشكلة اما في الكلية او الكبد

وقال لي ان المضاد الحيوي اللي وصفه البيطيري الاول كان قوي عليه وممكن يكون هذا هو السبب في مشكلة الكلية

والحمدلله على كل حال
ومشكورين على ردوكم

و الدرس المستفاد ... اخذ الحذر عند استخدام المضاد الحيوي حتى ولو كان تحت اشراف الدكتور لان الدكتور وصف المضاد من غير ما ياخذ بالاعتبار وزن وعمر الطير

والابتعاد عن الاكل المخلوط اللي ينباع بالجملة ( بالخيشة ) لانه معرض لامراض كثيرة
ممكن الفيران تكون ماكله منه او فيه تراب و غيره من البكتيريا

وعدم اجهاد الطير لانه يحتاج كمية كافية من النوم يوميا في مكان مظلم وهادي لانه شديد الحساسية لاي صوت او حركة

بالاضافة الى تقديم الاكل و الماء في فترات معينة يوميا لان بقاء الاكل و الماي في القفص لفترة طويله يعرضها للبكتيريا و الجراثيم

[مطلوب أفريقي]

ماعليه اخوي .. الموت حق ^_^

<< ما اتخيل كاسكوي يموت

بصراحة شي صعب لكن الله يستر ويوفقك بالطير الثاني ان شالله

واشكرك اخوي ع النصايح