الببغاء فقد الذاكرة.. مساعدة يالربع...

[elite hunting]

السلام عليكم ورحمة الله وبركاته

أنا عندي ببغاء له تقريباً عندي 4 شهور وكان جايني صامت ومتوحش طبعاً دربته والفضل لرب العالمين ثم لكم وبدى يصفر وتطلع منه بعض الكلمات مثل يعقوب وصراخه يملاء البيت ...

وصلت لمرحلة ان ابدأ اطلعه من القفص طبعاً انا قاص جناحيه من شهر تقريباً بس ماقال شيء ، المشكلة اني وصلت لمرحلة اخراجه من القفص مع كثرة الجعير والعض لكن طلعته وحطيته على الحامل خليته تقريباً ساعة بعدين بديت اشيله غصب عليه عشان امشيه في البيت يحاول يطير لكن انا ماسكه مع رجوله فما يقدر ...

المهم : بعد 3 مرات اشيله وارجعه جته حاله هستيرية وأول مرة يعض مثل كذا قطع اصابعي وطلع الدم منها والله ولو تشوفون حالة يدي الحين يرثى لها الحال الزبدة فيه وحدة حسيت انه اكل اللحم فيها وفكيت رجولي وخبط على البلاط ....

المهم قام يجعر وأنا من العصبية قمت وشلته غصب عليه وبشراسة وكان مرة خايفة ورميته بالقفص وهاوشته وابعدت القفص في مكان ضيق وبعيد بالبيت <<<<< يسمع بالعقاب

المهم من ذاك اليوم الين الحين وهو ساكت له 5 أيام على هالسكوت ومايبي أحد يقرب منه وأحس ان واحد من أجنحته مرتفع عن الثاني من الخلف بس اني مسكته ولا قال شيء واذا احد قرب له يجعر ولا عاد سمعنا ولا تصفيرة وحدة بس لادخلت يدي مافيه أمل يعض يجعر ويقرب ليدي ويفتح فمه بس مايعض ..

وش الحل يااخوان

[ابو محمــد]

الحل قبل كل شيء الرأفه بالحيوان
وكيد منصدم منك ورايح يعضك عضه ماراح تنساها بس احذر.

[QatarVow]

حرام عليك حاول تعطينه الاكل الي يحبة حاول تمسح على راسه

[sarah99]

ليش تعاملة بعصبية ياخوي انت تعرف الطيور مو بسهولة تولف ومحتاجة صبر وطولة بال من راعية
الله يهديك بس

[elite hunting]

والله ياناس إني متحسف عليه

وينتفض والله شكلي ابوديه للبيطري اليوم ...

الحل ياشباب مع الطير

اتوقع انه داخله برد

لان صوته مثل الصوت اللي يكون لواحد داخله برد

[عاشقة الطيور]

وعليكم السلام ورحمة الله وبركاته

اخوي انت عذبته ماعاقبته تصرفك غـــــــــــلــــــــط ... ادري ان عضته تعور وايد بس بعد هذي مب عذر والي سويته فيه مب شوي غصب الطير بيخاف ومابتكلم

ولاتنسى هالنوع من الطيور حساسه ... حاول تتقرب منه وتدربه من البدايه وهالفتره لطلعه وان شاءالله يرجع مثل قبل بس لتعيدها مره ثانيه

[xX7oSaMXx]

والله من بعد الخبطه سويتله فرومات لذاكره هههههههه مسكين راح فيها


الله يعينك وشف اقرب بيطري يمكن جناحه منكسر ؟ ولا شي

[elite hunting]

والله وديته للبيطري

قال انه تعبان ومعاه اسهال <<< خبركم اخوكم مايفهم فيهم

عاد عطاني فيتامينات وقالي تراه حساس وقال ترى عمره صغير وانا احسب عمره ابو 50 سنة

وعلاج ماادري وشو وقال لا تجونه خلوه لين هو يشتاق لكم

واستمر على العلاج 5 أيام وبيرجع اوكي

والله اني متندم عليه مرة

[elite hunting]

وعليكم السلام ورحمة الله وبركاته

اخوي انت عذبته ماعاقبته تصرفك غـــــــــــلــــــــط ... ادري ان عضته تعور وايد بس بعد هذي مب عذر والي سويته فيه مب شوي غصب الطير بيخاف ومابتكلم

ولاتنسى هالنوع من الطيور حساسه ... حاول تتقرب منه وتدربه من البدايه وهالفتره لطلعه وان شاءالله يرجع مثل قبل بس لتعيدها مره ثانيه

والله أول مرة انعض مثل العضة هذي ولحد الحين لاف يدي من الجرح اللي سواه

[سكر]

السلام عليكم ورحمة الله وبركاته

أخوي الكريم,,, أنصحك انت أولاً انك تنسى هذا الموقف وتتعامل معاه كأنه أليف وبشكل عادي,,,,

أبي منك تطلعه من القفص,,, وتحاول تطلعه على يدك بس بكل هدوووووووء

أهم كلمة في الموضوع,, الهدووووووووء

يعني حاول تكون مثل الأفلام البطئية,,, افتح القفص بهدوء وطلعه بهدوء وأعطيه يدك بهدوء, وطلعه على يدك بهدوء,,,

حتى اذا حسيت انه بيعضك,, لا تخاف ولا تسحب يدك,,, ما بيعضك,,

اذا سحبتها اسحبها ببطء شديد و نزلها بهدوء,,,, بإذن الله ما بيعضك,, إلا إذا كانت حركتك سريعة,,

وعلى مسؤوليتي,,,

خلي كل شي تعمله بالبطيء الممل, وما يكون فيه أحد معاك أثناء التجربة,,,

وأنتظر ردك بعد التجربة يا قمر

تحياتي

[عاشق الكوكاتو m]

طيرك يعاني من صدمه عاطفيه
الحل انك تاخذ مسدس ربع وتطلق عليه في الجو اذا صحى من صدمته
ولا حط الطلقه فراسه واشتر غيره

[اختها]

طيرك يعاني من صدمه عاطفيه
الحل انك تاخذ مسدس ربع وتطلق عليه في الجو اذا صحى من صدمته
ولا حط الطلقه فراسه واشتر غيره

!!!!!!!!!
متأكد انك انسان ؟ .. بس لانها حيوانات ماتدافع عن نفسها تعاملونها بـ هالطريقه !! حسبي الله ونعم الوكيل

[سور الذكريات]

السلام عليكم


اخوي الله الله بطولة البال

ولا تنسى هالحيوانات امانه باعناقنا يوم القيامه

وثالث شي انا وغيري جربنا العضات والله كنت اسوي مثل افلام الكلاتون

الف عن الطير يمين او شمال واصيح صيحه بداخلي وما اطقه

اهو الان بحاجه انك تعيد من اول وجديد زرع الثقه فيك انت من قبل الطير


الله يكون بعونك

تحياتي

[houston]

الله يهديك ..

[elite hunting]

والله اني ماادري وش اسوي

وانتم حسبتوني ماعندي رأفة ولا متوحش

ياناس والله اداريه أكثر من اللي عندي في البيت ولا عمري سويت له شيء يكفي اني علمته اشياء كثيرة بوقت انا اعده قصير مو مثل اول ماشريته كأن متوحش بمعنى الكلمة وراعيه يبي الفكة منه ...

بس هذا الموقف صار غصب هو لو عظني بالقفص اكيد ماراح يصير شيء بس انا كنت مطلعة على يدي وصار اللي صار ,,,,

على العموم انا بسوي اللي قال لي أخوي سكر بس أفضل انها تكون بعد فترة العلاج اللي هي 5 أيام وهو اليوم بس اذا جيته أنا حول القفص يطلع تصفيرة بس جداً ضعيفة ويالله تنسمع وأي أحد ثاني يجعر بوجهه...

[ابولمعه]

انصحك تعالج يدك ولا تسكت عليها

[ملسون]

ترويض الطيور يحتاج لصبر كبييييير
وقلب اكبر
ويبدو انك غير صبور
"مارس هواية صيد السمك اولا لتكتسب الصبر.. وبعد ارجع لطيرك"

[سكر]

يا جماعة اشفيكم طايرين على الرجال؟؟؟

هو ناقص ؟

الآدمي واضح في كلامه تأثره وضميره يأنبه,, وببغائه تعبان

وش الفايدة من العتاب؟ يعني بكلامكم انتم ساعدتموه أو ساعدتم أحد ثاني؟

أتمنى من الجميع الإيجابية في الرد,,,

(((لا تحرم الآخرين من الأمل,, فقد يكون هو كل ما يملكونه)))

تحياتي

[سور الذكريات]

يداً بيد يا سكر

ونحنا منك نستفيد


ولكن من باب الايضاح ولعل التخويف في بعض الاحيان دافع للأمل

[خالد شاهين]

اخي اصبر علية وعاملة بلطف وحنية والصبر مفتاح الفرج ان شاللة ان يشفى وراح يرجع مثل اول اليف جدا ولكن عليك ان تحسسة انك مهتم لة وخاصة بفترة مرضة .

[زياد محمد]

آخوي لاتزعل من ردودنا من صآلحك ترى :D
1 مفروض ماتقص جناحه.
2مفروض ماتطلعه بالغصب.
3مفروض ماتصرخ عليه لانها هذي الطيور الآفريقية ماتجي بعصبية.
4عقآبك له غلط انك تطلعه من المكآن اليي هو فيه >> مثل الطردة ;)
5آتبع الي قآلوو عليه الآخوآن وغير آسلوبك تمام من العصبية ;) الى الحنية :p

[elite hunting]

والله اليوم فيه تحسن كبير

الاسهال خف والحمد لله

وهو قبل مايصير الموقف هذا ماكان ينزل راسه لأحد اليوم يخليني امسح على راسه بس متردد يخليني ثواني بعدين يوخر ويجعر بس بصوت خفيف جداً بس مو مثل أول أخف حدة بكثير وأكل من يدي كشمش وحب شمسي ...

بس باقي للحين ماسمعت له صوت الطبيب يقول فيه خشخشة في صدره وإن شاء الله تروح مع الوقت بس أهم شيء ان حالته أحسن بس صار مآخذ علي كثير الأيام هذي ....

وإن شاء الله يرجع مثل أول وأحسن وأحس انه يتكلم بس المشكلة ان صوته رايح مثل لما يكون أحدنا في التهاب في حلقهـ ...

وسمعته يتكلم بس شيء غير مفهوم ...

[سكر]

ما شاء الله تبارك الله

الحمد لله على منه وفضله,,,

والله فرحت لك من قلبي,,,

واصل يا غالي على الدواء مثل ما قال لك الطبيب, ولا توقف حتى لو خف,,, إلا إذا انتهت المدة اللي قال لك عليها البيطري

ولا تستعجل على كلامه الحين,,,

ركز على صحته وربي يوفقك


تحياتي

[elite hunting]

الله يعطيك العافية أخوي سكر

عاد ابنزل صورته عن قريب ان شاء الله

والله يعين بس،،،

[الوفاء1]

السلام عليكم

حمدلله على سلامة الببغاء
وبشر كيف حال ايدك من بعد العضه سلامات

انا توني مشتريه ببغاء يهبل ماشاء الله عليه اخذته يجعر والحين من اسبوع خف التجعير وان اخاف من العض بس اكله بايدي طول الوقت

ولف الحين ويخليني احك راسه
بس توه ما يصفر الا اذا طار وجلس على المروحه يادوب شوي خفيف
كيف اخليه يصفر ويتكلم
وياليت تنزل الصور وتطمنا عليه اول باول

[iam moon]

حرام عليك حتا لو عضك اتحمل الكاسكو حساس مرررررررررررررررررررررررررررررررررررررررررررره حاول تعطيه الاكل الي يحبه شيله بمنشفه وحطه على صدرك بلمنشفه وخرج راسه وحسحس على راسه وبعدين شيل المنشفه حبه حبه وحسحس على جسمه كله واعطيه الاكل بيدك وامشي على كلام سكر الهدوووووووووووووووووووووووووء

[elite hunting]

هذي صورتين للشيخ وفيه مقطع فيديو له

عاد اعذروني على التصوير ماسك الباب بيد والكاميرا بيد

http://up3.m5zn.com/9bjndthcm6y53q1w0kvpz47xgs82rf/2009/6/17/02/t1hx4843b.jpg

http://up3.m5zn.com/9bjndthcm6y53q1w0kvpz47xgs82rf/2009/6/17/02/zlfgt5ldn.jpg

وهذا رابط مقطع الفيديو على اليوتيوب:
http://www.youtube.com/watch?v=Prq4r--MZ3o

[iam moon]

حلو ماشاالله

[elite hunting]

والله اظنه بدى يتنيشط لأنه عضني اليوم بعد

شكلها على سوق الخميس الجاي - بإذن الله - .

[سكر]

هههههههههه

سوق الخميس قفلووهـ,, البلديه جات وطردتهم,,,

والله لو انت عندي كنت اشتريته منك

لأنه ما شاء الله تبارك الله ممتاز وما يتفوت,,

بس انت شكلك تلتمس فيوزاتك من فترة لفترة هههههههه

بعدين انت ملاحظ طريقتك في المسح؟؟؟

انت لو تدري وش جالس تسوي كان عظيت نفسك هههههه

أولاً اصبعك الإبهام واقف,, والببغاء ما يدري هذا الأصبع ليش جالس يهاجمه!!!!

أصلا هو ما يدري انه اصبع,, هو يشوف كائن في وضع الإستعداد للهجوم,, والتحرش,,

وكردة فعل غريزية,, لازم هو يتبنى نفس الموقف,,,

ثاني شي,, حركتك سريعة وانا جالس أقول لك ركززززززززززز على الهدوووء

وكل شوي تسحب يدك بسرعة لما تحس انه بيعضك,, وهذا أكبر غلط لأنك كذا تستفزه وتزيد من وتيرة الإرتباك والحذر عنده,,,

طول بالك وراجع نصيحتي لك اللي كتبتها في أول رد على هذا الموضوع,,, وربي يوفقك يا قمر


تحياتي

[elite hunting]

والله انك ضحكتني ياسكر ماعاد امسك نفسي أما تلتمس فيوزاتي ههههههههه

طيب اصبعي الابهام وش اسوي فيه اقصه يعني هههههههه

طيب والله فهمت ابنزل الابهام واصير احكه كنه يستاهل هو ووجهه

وبحركة خفيفة وأخف من الخفيفة وخله يعض اصلاً تعودنا

بس والله انه مزاجي يعني لا صار فيه النوم يطاوعك تسوي اللي تبي فيه لو تشيله وتقلبه ماقال لأ بس لازم يكون فيه النوم ،،،

أنا أبي اعرف بس راعيه الأول وش كان يسوي فيه والله شاريه وهو حالته حالته وقفص مايقدر يتحرك فيه الحين قفص وش كبره وستاندات وحركات بس ماش الرجال ماطاوعني للحين ،،،

بس ابتابع معك واشوف...

[سكر]

هههههههههه

سامحني بس لأني ارتحت لك طيحت الميانة,,,

ولأني شفت الشباب طاحو فيك يهاوشونك قلت والله لأجبر بخاطرك هههههههه

شوف يا قمر,,, كتبت لك في الرد السابق انه ما بيعض,,,

بس لو تتبع اللي قلته لك بالحرف, صدقني ما بيعضك,,,

وإذا عضك معناته انه فيه شي ما طبقته صح أو ما فهمته صح

أبغى منك تقرا كلامي الأول بتأنّي,,

وبعدين اذا هو يسمح لك وقت ما يكون نعسان,,, فهذا أفضل شي,,,

وهذا دليل على ان ببغائك ما بينه وبين الترويض إلا شعرة,,,

وانت لازم تكون حساس ومتعاطف معاه,, إذا شفته مو رايق لا تدربه,,,

وإذا كان نعسان استغل هذا الوقت بالترويض والمسح بلطف,,,

ربي يوفقك يا قمر,,

تحياتي....

[كشكوش]

ههههههههههههههههههههههههههههههههههه
تستاهل تعامل معاه بهدوء
ويبالك ذبيحه عشان ترضيه
وان شاء الله يرجع احسن من الاول

[elite hunting]

الحمد لله الحين الوضع تمام وعال العال

رجع مثل أول وأحسن يعني يصفر ويلعب وكل شيء وأمس تكلم وقال يعقوب وتصفيرات جديدة يعني الحمد لله

المشكلة :
انه لحد الحين يخاف أحد يمسكه ولا يلمسه بس أقل من أول يعني يخليك شوي تلمسه بعدين يهون

أنا ابشتري شكلي واحد ثاني صغير واحطه معه ويكون وليف عشان يمكن يرتاح ويوالف هو بعد ...

[سكر]

الحمد لله على فضله وكرمه

هذا دليل ان الخطأ ممكن يتصلح,,,

ورد على كل اللي قالك خلاص مافيه فايده,,,

أتمنى ان الكل يستفيد من تجربتك, ونكون إيجابيين دائماً,,,

ربي يوفقك ويبارك فيك يا قمر,,

تحياتي

[elite hunting]

والله الحمد لله حتى الحين صار ياكل تفاح وأشياء نحطله ياكلها

وصار ياكل من فمي بس يكون جوعان أمسك الحب بين شفايفي ويجي يركض وياخذها مني