الهولندي ( انشلت ارجوله ) .. الحقوني وش هالحظ ..

[medozoom]

سلام عليكم ورحمه الله وبركاته

الطير ماله اسبوعين حتى ما كملنا موضوع المباركه لي على هالرابط

http://www.2zoo.com/vb/showthread.php?t=116341

يا جماعه الخير اليوم جيت من الدوام والطير زين شوي دخلت ايدي عنده وشلته على ايدي المهم شوي إلا وحده من ارجوله احسها انكمشت استغربت صار ما يقدر يوقف عليها شوي وقفت الرجل مره

قبل نص ساعه الرجل الثانيه وقفت والحين ارجوله الثنتين انشلت ترى والله حرام حرق قلبي

كلمت ........ قالي الدكتور هذا اسمه السامونيلا ( شلل فجائي )

ما ادري وش اسوي

تكفون

[ابو محمــد]

لا حول الله ولا قوه الا بالله ,,

الله يعينك ع بلواك الحمد لله ع كل حال.

والله ما ادري شقول لك بس انشاء الله يشفيه..

حاول تقرأ عليه سوره البقره يمكن عين صابته.

[النادره]

السالمونيلا كان في عصفور ربيته و صاب الثانــــي ..
و أعطاني له مضاد في المويه .. وعلى فكرة تراه معدي .. إذا عندك طيور ثانية بعدهـــم الين ربي يشفيه ..

[طير جديد]

الله يساعدك اخوي
ويشافي طيركـــــ

[maged571]

هلا اخووي .. . .

الله يستر عليك وعلى طيرك .. .
وان كانها عين الحمد لله بالطير ولا بك .. . (( خساره طير ولا خسارتك يالغلا .. ))

اما بخصووص الطير ياليت لو توصف الحاله بالضبط ...


يعني ...
انت حاول تسحب رجله .. وشووف انعكاسها ..
اذا ما يسحبها ..

جرب جيب ابره معقمه واضرب برأس الابره على الرجل من تحت وشووف الانعكاسات يعني يتألم أو لا .. ؟


اذا ما يتألم فهذا والله العالم اعصاب .. وفيه ادويه مقويه للأعصاب وفيتامين و املاح وتمارين .. يعني مد رجوله ورجعها ... كم مرره باليووم ...

اما اذا مديت رجله ويسحبها فهذا مهو اعصاب هذا عضلات ..
فيه ادويه باسطه للعضلات ومراهم مضاده وادويه مرخيه للعضلات ...


بخصوص سالمونيلا ..
علاجه مضادات حيويه .. بس تراه يبي يطوول يعني يأخذ له من 10 - 14 يووم واكثر .. يوصل الى شهر ..

عندك مضادات الحيويه كثير .. اشهرها التيراميسن أو الاوكسي ..وانا انصحك بالتيراميسن

واحررص على نظافه القفص ..
يعني نضفه كل يووم مرتين الى ثلاث مرات ...

وحاول تركز على اكله يكون نظيف .... خالي من الميكرووب ..

واذا عنده اسهال .. ركز على المووويه علشان يعوووض ..



والله الشااافي ... .

هذا المعلومه اللي عندي ...
وانا اسف ان كاني اخطيت بشيء فأنا بشر أخطي فلا تلمني ...


والله اعلم ..

[أبو ريـــــــــــــان]

الله يعينك هذا الموضوع اتمنى يفيدك

http://www.2zoo.com/vb/showthread.php?t=66594

http://www.2zoo.com/vb/showthread.php?t=87359

[الكنق]

الله يصبرك على بلواك


معوض خير ان شاء الله

ماتدري يمكنها خيره

الله يعوضك بأفضل منه

[@برنس الطيوور@]

الله يصبرك على مصيبتك ...

انشااء الله مشاافى ..

[صوغة]

مسكين هالطير

الله يشفيه ولا تتخلى عنه جعل في رعايتك له كل الاجر

والله يعينك ولاحول ولاقوة الا بالله

[فارس مجهول]

الله يشفيه ,, ويخليه لك طير روعه ماشاء الله تبارك الله
وحسبي الله ونعم الوكيل !!

[الباروني]

بسم الله الرحمن الرحيم
اخوي انا خبرتي بالببغاء خبره قليله مالي 5 ايام شاري كاسيكو لكن المشكلة الي واجهت طيرك كيد صارت لدجاجة عندي وانا عمري 8 سنوات المشكلة هي ان الدجاجة كانت ماشاء الله تبارك الله يوم تبيض ويوم لا
وفجأة قمت الصبح لقيته ماتمشي بس قاعدة وتسحب نفسه بالجنحان عشان تأكل وتشرب وتعرف انا صغير
وابلشت الوالد ابيه يبيعة ولا يصرفه لكن الوالدة الله يعافية ووالداتكم جابت حلبه وكبته لدجاجه والدجاجة ماقصرت
دقت بالحلبه لين قالت آمين وسبحان الله 3 ايام والدجاجة تمشي ولا فيه ازين منه لكن انا مأدري هل الحلب مضر
للببغاء ولا لا واذا هو مو مضر وكل الببغاء بالقوه وبأذن الله بتشوف فايدة لأن جسم الببغاء صغير وراح يبين علطول

[سكر]

لا حول ولا قوة إلا بالله

والله شي يعور في القلب,,,

ما أقول غير الله يعوضك خير ويكون في عونك,,,

لو أنا مكانك أراجع راعيه ونتفاهم على تبديلهـ,,

وحاول تآخذ معلومات أكثر عن هذا المرض,, وطرق علاجة وأسبابه,,

والله قلبي عورني يا محمد

لكن اصبر والله يكتب مافيه الخير

تحياتي

[حب استطلاع]

الله يعوضك خير
وأعراض مرض السالمونيلا
في البداية تلاحظ الطير ( نافش ريشه )
وإذا كان مع مجموعة طيور تلاحظه منزوي لحاله
وتقل شهيته للأكل ويكثر من شرب الماء
والدليل على إصابته بالسالمونيلا
هو لون الإخراج ( أعزكم الله ) يكون أخضر سائل ( بدون اللون الأبيض ) ولونه غامق
بعد كذا يتطور المرض من إهتزاز واضح في رقبة الطير وعدم توازن
يعني ما يقدر يثبت نفسه
إلى شلل بالأرجل
ولا يقوى الطير على الوقوف
وواضح إن مرض طيرك في مراحله الأخيرة
المطلوب الآن تعطيه مضاد للسالمونيلا عن طريق العضل ( في منطقة الصدر )
وإذا كان مختلط مع طيور أخرى تعطيها تحصين بنفس الطريقة
والمضاد تقدر تسأل أي صيدلية بيطرية عنه
بالتوفيق يا رب

[مجنون الامازون]

شئ يعور القلب .. ما اقول الا انو ربنا يصبرك يا محمد .. وعلى فكرة يا صاحبي ترى العين حق .. وطيرك ما شاء الله جميل ..

لكن انا اايد كلام (سكر) انك روح تبدله او انك ترجعه .. واذا لم تنجح هذه الطرق ما عليك الا انك تصبر وتعالجه الا ان يتعافى ..

روح العيادة البيطرية الموجودة في شارع الستين خلف (عيادات عيد كلينك) في هناك دكتور بريطاني مرة ممتاز .. والشفاء بيد الله اولا و اخرا .. وشوف ايش يقول .. وما تشوف شر ان شاء لله.

[medozoom]

اشكر لكم شعوركم الطيب والحمد لله على كل حال

البارح اخذت مضاد وحطيه بابره مخلوط مع مويه واسقيته الدوا

وبعدين عطيته سيرلاك بالابره وفكيت منقاره واكل الحمد لله

لكن ارجوله هي الي معذبتني

الرجل ابدا ما تتحرك والطير والله ما كان فيه ولا شي جماعه

الطير كان سليم وماكل كويس وكل شي اوك لكن قدر الله وما شاء فعل راح اجتهد معاه إلى ان يكتب الله ما يريد

اخوي سكر واخوي مجنون .. والله الطير غالي لكن انا متاكد اني لو رحت المحل بيقولي انت لك 3 اسابيع الطير اخذته من عندي سليم لانه من جد اخذت الفرخ سليم ويلعب ويحاول يقلد البلو فرنتد فـ الاصوات يعني كلش سليم وانا مهتم فيهم كويس وما لاحضت عليه ولا شي يدل على مرض الطير نشيط ونفش ري راسه مره وحده طفيت المكيف رجع زين وبس واخراجه كان كويس ما فيه اسهال ولا شي
صدق عور قلبي

لكن كل واحد ينال نصيبه

ربنا ما يوقعكم بمثل هالامور وانتبهوا على طيوركم

لكم محبتي وصدق مودتي

[ابو محمــد]

هاااا يا ميدو زووم بشر كيف حال طيرك انشاء الله احسن والله قاعد احاتيه ولو عندي حل كان

ساعدتك باللي اقدر عليه تكفى طمني.

[هاوي طير]

خللك على المضاد وان شاء الله تشوف خير
والله يعيينك على متابعته ومراقبة الطير

[o9Liii]

أسأل الله العلي القدير أن يشفيه ويعيد الحياه إلى رجوله إنه على كل شيئ قدير

واصبر ولك الأجر والثواب بإذن الله

[حب استطلاع]

يا أخي مشكلة إللي يجي مطفي النور
ويرفع موضوع له شهرين
والمصيبة يرد كأن الموضوع ماله إلا ساعة :D

[ابو محمــد]

خخخخخخخخخخخخخخخخخخخخخخخ

لا تعليق ((لا تقلب المواجع خلني قد نسيت))

[شوو تايم]

لاحول الله مرض اول مره اسمع فيه

الله يشافيه يارب

ويشافي طيري ويجبر بخواطرنا اللهم امين

[حب استطلاع]

خخخخخخخخخخخخخخخخخخخخخخخ

لا تعليق ((لا تقلب المواجع خلني قد نسيت))

أبو محمد خبري فيها
لا تزيد المواجع خلني قد نسيت *** لا تقلب بقلبي صفحة الذكريات :D

[ابو محمــد]

احم احم هاااا>>>من قال هااا سمع

حب استطلاع اعتزلنا من زمان>>>صااادوه

[حب استطلاع]

احم احم هاااا>>>من قال هااا سمع

حب استطلاع اعتزلنا من زمان>>>صااادوه

ههههههههههههه
الله يسعدك يا أبو محمد