جاني هديه

[عاشقة الببغا]

السلام عليكم جاني ببغاء هديه بس مزعج شكله انه صيد جديد ولايرضى احد يمسكه ويعظ ويجعر بصوت مره قوي الحين صارله اسبوع عندي وشوي هدى بس مستحيل يرضي امسكه وابي مساعده شلون يرضي امسكه وش اسوي عشان ميصارخ وابي اعرف عمره لون عيونه ابيض واخر سوال انا عندي واحد ثاني اليف مره عندي من عمره شهرين والحين عمره ثمانيه شهور ولا تكلم مته بيتكلم ومشكورين مقدما

[ابو محمــد]

الف مبروك الطير ويتربى بعزك
عمره اقل من سنه ونص

التدريب يكون بعد اسبوعين او ثلاث ع حسب نفسيه الطير

طريقه تدريب الببغاء الجديد

1-ارفع الطير في مكان يكون مثل الممر او الصاله بمستوى رأسك


2-لا تبدأ معه التدريب الا بعد اسبوعين او ثلاثه


3-انت من يضع له الاكل والماي واذا عطيته الماي كرر كلمه ماي ماي ماي واتركه


4-لا تعرضه للتيارات الهوائيه او المكيف ولا تروشه نهائيا في هذه الفتره


5-حاول تقعد معه ويكون هو اللي يراقبك فقط وانت تجاهله


6-اذا شفت الطير بدأ يشقلب او حركه زايده في القفص شغل له نغمه جوال ولاحظ انتباهه لك


7-اذا قربت منه وقام يجعر لا تتحرك وكأنك لم تسمع منه شيء وخلك ثابت حتى يسكت واذا سكت اتركه وارجع له بعد ربع ساعه


8-بعد اسبوعين يبدا الجد وتبدأ تشيل منه الاكل في الليل فقط


9-اذا طلع الفجر نزل القفص عندك في الارض وحاول تكون انت وياه في الغرفه ولا في احد يلفت انتباهه وسكر النوافذ واتركه ربع ساعه حتى يروح الخوف


10-افتح باب القفص اذا كان له باب من الامام وحط حاويه الاكل فاضيه
11-ارجع له بعد 5 دقايق وابدأ دخل يدك طبعا راح يجعر لا تخاف ابد وخل يدك ثابته حتى لو طاح من القفص او جعر والفول السوداني في يدك وابتسم وكلمه بصوت هادي ولا تطالع في عينه عشان ما يرتبك زياده


12-اكيد ما راح يأكل لكن الجوع يجبره يتجرأ


13-خذ حب شمسي او فول سوداني وابدأ قرمشها باسنانك راح يتعجب ويصير عند استفهام
14-اذا حاولت ولا أخذ من يدك سكر باب القفص وحط في الحاويه حبه وحده فول سوداني


15 اكيد راح يتجرأ ويأكلها وينتظر منك الثانيه والثالثه


16-بعد انت وشطارتك تبدأ تحاول تعطيه بيدك ويمكن ياكلها ويقطها اكثر من عشر مرااات لا تيأس لأنه مثل ما قلت لك عنيد شوي


طبعا كل هذا يجي بالتدريب لكن لا ترهقه ابد مجرد تشوفه يلهث رجع القفص مكانه وابدأ معه بعد ساعه او يوم ثاني واهتم فيه بالتغذيه والفتمينات .


ملاحظه: اهم مافي التدريب اترك الطير ينام اقل حاجه من 10 ساعات الى 12 ساعه

[عاشقة الببغا]

مشكور اخوي بومحمدومن الحين ببدا اطبق والله يعطيك العافيه

[كوالا]

ابو محمد كفى ووفى

وعقبال نشوف صور طيرك وتقولين انه تكلم

[مجنون فلته]

كفى ووفى بو محمد

مبروك على الطير

[عاشق الكاسيكو 11]

بس ابي ازود كلمة على رد ابو محمد

لا تخلى المبزرهــ يجون عندهــ وقعدوون يزعجونهـ احتمال تسبب لهــ ربكهــ

وبس :)

تخياتي :)