أرجو المساعده فالمكاو والكاسكو

[Fahdaaan]

السلام عليكم ورحمة الله وبركاته على كل خواني وأخواتي الأعضاء

حبايبي إذا تذكرو من فتره كنت طالب رأيكم هل آخذ كاسكو ومكاو أو آخذ كاسكو وكوكاتو

والحمد لله رب العالمين الله وفقني وخذت كاسكو عمره حوالي 4 إلى 5 أشهر ومكاو جرين وينج عمره حوالي 7 أشهر

الكاسكو حليو ويخليني أمسح على ريشه مع أنه مرات يبي يعض وعضته مو ذاك الزود لأنه صغير بس لما أطلعه غصب يعض بقوه شوي

أما المكاو ما يبي حد يمسه (شايف نفسه :D) لكن لما أفتح باب القفص وأعطيه تفاحه أو فول سوداني يآخذها مني وعلى فكره اللي باعه لي قال لي أنه كان أليف مره ومتعود على الإستاند وكانو يمسحو عليه بس أنا قلت يمكن لأن متغير عليهم المكان لأن صارلهم عندي حوالي أسبوع وشوي بس

اللي أطلبه منكم يا ريت أحد يعطيني طريقه أدرب فيها هالطيرين على أنهم يطلعو على اليد وكيف ممكن أمسح عليهم من غير ما يتهجمو بالعربي يكونو أليفين مره وكل الطرق اللي ممكن أنها تساعدني وتخلي الطيور مرتاحه ومستانسه

أنتظر ردكم على موضوعي الله لا يهينكم فأقرب وقت ممكن

تحياتي

[مجنون فلته]

السلام عليكم

اخوي خلهم بعد فتره شوي اسبوع واهم من نفسهم راح يتعودون عليك

وطلعهم يوميا وقسم الوقت بينهم لتدريبهم واحد واحد

يعني طلعهم العب معاهم اكلهم دلعهم بيتعودون عليك

وحاول انك تخليه يصعد على يدك واذا صعد اعطه دقيقه وحط يدك الثانيه اله وخله يصعد عليها وكرر عليه الحركه

بالتوفيق

[kaka99914]

الله يحفظهم لك... بالنسبة للكاسكو مع الوقت راح يتعود عليك بس مسألة وقت... اما بالنسبة للمكاو اللي اعرفه انه يتعود على اللي رباه وصعب يتعود على احد ثاني وإن شاء الله الاعظاء يفيدونك

[Fahdaaan]

أشكركم أخواني على ردودكم وإسمحو لي على الإنقطاع

الحمد لله الكاسكو صرت أطلعه وأحطه على الستاند أول الأيام كان على طول يبي ينزل منه بس الحمد لله الحين صار يبقى فتره أطول بس هم يبي ينزل أما المكاو بصراحه فاجأني مره خذته لمحل طيور عأساس يقصو ريشه تخيلو ساعتين وأنا بس أحاول أني أطلعه من قفصه للقفص اللي بشيله فيه وكنت مفكر أني لما أروح للمحل أعرض عليه أنه يآخذه مني ويعطيني كوكاتو مع ان الجرين وينج مكاو اغلى لأنه طلع لي قرون لكن المفاجأه جات لما وصلنا محل الطيور أول ما فتحو القفص اللي مآخذه فيه طلع ووقف على القفص وحاولو يمسحو عليه وفعلا إنصدمت أنه سمح لهم أنهم يمسحو عليه ومن يومها كنت أكلمه وأقوله وهو فالقفص إذا بتخليني أمسح عليك راح أفتح لك القفص وإذا لأ ما راح تطلع وفعلا فالبدايه يحاول أنه يعض بس فالأخير يخليني أمسح عليه وأطلعه بس للحين أخاف من منقاره وقالو لي فالمحل أنه ما يعض بس يحاول يخوفك فحاول لا تخاف منه وفعلا والحمد لله بدأنا نصير أصحاب لدرجة أن الأهل فالبيت صارو يقولو لي شو سالفة الطيور لما تدخل البيت أو تمر عندهم يجعدو يصفرو :)

دعواتكم أخواني واللي عنده أفكار ممكن أني أطبقها بالأخص للمكاو أتمنى ما يبخل علي

إسمحو لي على الإطاله :shy:

تحياتي