اشتريت انثى هملايا عمرها سنه و لا عندي خبره

[هيمالي]

السلام عليكم


اشتريت قطه هملايا بيضا باسود , مدري وش نوعها بالضبط , لكن خشمها مو مضغوط مره و لا هو مستقيم مره

يقولي البياع ان عمرها سنه , بس انا خايف انها اكثر , كيف اعرف عمرها ؟


و المشكله اني اشتريتها من مجل مو نظيف , و خايف ان يكون فيها مرض او شي


و فيها تكتلات شعر ,

لا تقولون لي ليش تشتريها بحاله , لان المدينه اللي انا فيها كل المحلات اللي فها مو نظيفه و فيهم غشامه , لكن مبين ان القطو حليو


الحين وش اسوي فيه ؟ كم احممه و كيف اقص اظافره و اقص التكتلات ؟

خايف يعضني :(

و امس وصخ الموكيت , و اليوم حبسته بالحمام مع سطل فيه تراب عادي , لاني ما حصلت تراب طبي :( لكنه بدا يبول فيه

اسئلتي كثيره و بحطها الحين مره وحده لاني محتار و مو عارف اسوي شي خصوصا اني اول مره اربي القطو




1 - كيف احممه ؟
2- كيف اقصص اظافره ؟
3 - وش اسوي مع تكتلات الشعر ؟
4 وش اوكله ؟ حاليا اسلق له لحم دجاج و كبده دجاج , و ش اسوي كمان ؟
5 -كيف اخليه يتعود ع التراب , مع ان عمره سنه !! :(
6 - كيف اعرف عمره ؟
7 - وش اعطيه ادويه ؟ مع اني احس انه مو مريض , لكن يمكن يكون فيه دود مثلا لان صاحب المحل كان يوكله كبده نيه , :mad:
8 وش حكايه زيت الزيتون مع القطط ؟ احطه له بالمويه عشان يشربه و يطول شعره ؟
9 - كيف انظف اذنه و عيونه ؟
10 - كيف اعرف ان كان مريض او لا ؟
11 - كيف اعرف ان كان جيعان ؟
12 - كيف اعرف ان كان يبغى الحمام ؟
13 - كيف افسر تصرفاته ؟ مثل انه يجي يتحكحك فيني , او انه يطلع صوته و يتمسكن :D


مع العلم اني بمدينه مقطوعه , يعني صعب احصل اغراض للقطوه , لذلك حاولو قدر الامكان تشوفون لي حلول بديله من اشياء تتوفر بالسوبرماركت

الف الف الف شكر لكم

[هيمالي]

لو قصيت التكتلات مثلا , كم يحتاج الشعر حتى ينمو من جديد ؟


مشكووورين مقدما :freind:

[Ava]

ــآلـفـــ مبروِوِكـ

أجوبتي أغلبها روابط لمواضيع موجودهـ بالمنتدى ;)

1 - كيف احممه ؟

كيف تحمم قطتك ؟ " طريقة الاستحمام " (http://www.2zoo.com/vb/showthread.php?t=4744)

فيديو تحميم القطط (http://www.2zoo.com/vb/showthread.php?t=18052)

2- كيف اقصص اظافره ؟

" عملية قص الاظافر " الطريقه & الصور . (http://www.2zoo.com/vb/showthread.php?t=6215)

3 - وش اسوي مع تكتلات الشعر ؟

ممكن تقصها ..

4 وش اوكله ؟ حاليا اسلق له لحم دجاج و كبده دجاج , و ش اسوي كمان ؟

دراي فود في المحلات التجاريه , دجاج مسلوق ...

5 -كيف اخليه يتعود ع التراب , مع ان عمره سنه !!

يكفي تعلمه المكان اللي فيه التراب

6 - كيف اعرف عمره ؟

أتوقع من أسنانه بس ما يعرف لها الا البيطري و الخبير , ممكن تحط صورته و الإعضاء راح يقولون لك

7 - وش اعطيه ادويه ؟ مع اني احس انه مو مريض , لكن يمكن يكون فيه دود مثلا لان صاحب المحل كان يوكله كبده نيه ,

اذا مو تعبان خلاص مو لازم تعطيه ادويه , بس اذا تبي ترتاح وديه للبيطري خليه يكشف عليه check up

8 وش حكايه زيت الزيتون مع القطط ؟ احطه له بالمويه عشان يشربه و يطول شعره ؟

زيت الزيتون تحطه بالاكل بس و لا تكثر نقطتين تكفي

9 - كيف انظف اذنه و عيونه ؟

الاذن / طريقة تنظيف اذن القطط (http://www.2zoo.com/vb/showthread.php?t=14525)
العيون / قطنه او عود اذان , حط عليه شوية مويه و امسح بخفيف


10 - كيف اعرف ان كان مريض او لا ؟

اذا كان خامل ما يلعب أو ما ياكل .. تقريباً هاذي اوضح شيء

11 - كيف اعرف ان كان جيعان ؟

بالعاده القطط تطلب الاكل , " قطتي تلف حول رجولي و تماوي و تقوس ظهرها "

12 - كيف اعرف ان كان يبغى الحمام ؟

علمها مكان الحمام و خلي الغرفه اللي فيها الحمام بابها مفتوح و هي اذا احتاجت راح تروح بنفسها

13 - كيف افسر تصرفاته ؟ مثل انه يجي يتحكحك فيني , او انه يطلع صوته و يتمسكن

تتودد لك

[هيمالي]

الف شكر ava

قبل شوي حممت القطوه انا و صاحبي , و يالله مسكناها , تبي تعض :mad:

و من شريتها و هي تحاول تعض احيانا , هل هذا الشي عادي ؟

و المشكله ان فيها كثير تكتلات شعر و لا حولنا بيطري زي الناس , و قمت حاولت اقص الشعر و جرحت الجلد :( من جهه الجوع , الجلد انسلخ و صار الكوع يطلع كل ما مشت و نزفت شي بسيط لكن وقف ,

وش الحل مع هالمصيبه ؟ :(

[OUT]

اكيد بتعضك لأنك جديد عليها وعلى البيت

اشتري مرهم جروح للأطفال

ونظف الجرح

وعشان ترتاح

احلق لها على الصفر ماعدا الراس والرجلين والذيل

وخلها حاليا تتعود على البيت وعليك بعدين روشها

[آنـــــو]

::

يعطيك الف عافيه Ava و OUT


آخوي هيمالي مرحبا فيك

مبرووك علـ القطوه بس ماعرفت هي آنثى آو ذكر مره تتكلم بصيغة نثيه ومر ذكر !!

1 - كيف احممه ؟

فادتك Ava ماقصرت وممكن تاخذ لها شامبو من الصيدليه البشريه نيزورال آو فافو مرره زين لو فيها فطريات بيقضي عليها


3 - وش اسوي مع تكتلات الشعر ؟

حاول تقص اللي تقدر عليه وبشويش وبحذر مو لازم تشيل التكتلات بيوم واحد آو ساعه وحده

قص شووي وأذا شفتها عصبت فكها ولا راقت وهدت آمسكها مره ثانيه وقص شوي

وقص العقده من النص والباقي منها فككها بيدك آو بمشط

ولاززم تمشيط يووومي ولو باليوم مرتين الى 3 مرررات آحسن وآحسن التمشيط يمنع ويفك العقد

لو كلللش ماتسمح لك القطوه والعقد كثيررره وديها البيطري يساعدك آما يخدرها ويحلقها كامل آو يشيل عقدها بس عـ حسب طلبك

قبل مده كانت عندي قطوه فيها عقد وآظافرها طويله وماتسمح لي آسنعها

وديتها البيطري وعطاها آبرة تخدير لساعه بس وخذيتها البيت وقصيت آظافيرها وشلت العقد بسهوله وعـ راحتي

تخدير كامل آبرتين وتخدير خفيف آبره وحده ومدته ساعه لو حبيت وديها البيطري يخدرها وآشتغل فيها على راحتك ..



4 وش اوكله ؟ حاليا اسلق له لحم دجاج و كبده دجاج , و ش اسوي كمان ؟

آيوه دجاج مسلوق مع خضروات آو ممكن المتبقي من آكلكم بشرط تغسل اللحمه من البهارات وتشيل الجلد والعظم

وفيه دراي فود بتحصله بآي سوبر ماركت خذ لها نوعيه طيبه وآبتعد عن الويسكاس



5 -كيف اخليه يتعود ع التراب , مع ان عمره سنه !!

لأن البيت جديد عليها خلي مكان حمامها قررريب منها حتى تتعود على المكان وتحفظه

وبعدها تقدر تغير مكانه ..


6 - كيف اعرف عمره ؟

بالنسبه للعمر مره قالي البيطري أذا كانت آسنان القطوه صفرا وراس الأنياب مكسور شووويه طررفه يعني عمرها من سنه ونص وفوق

وتفضل هالأقتباس يمكن يفيدك فـ تحديد عمرها


معادله الاضراس المؤقته

2* (قواطع 3/3 انياب 1/1اضراس اماميه 3/3)=28

معدله الاضراس الدائمه

2*(قواطع3/3 انياب 1/1 اضراس اماميه 4/4 اضراس 2/3)=42

الاسنان المؤقته بعمر الاسابيع
قواطع 2-4
انياب 3-4
اضراس اماميه 4-6
اضراس غير موجوده

بعمر ال8 اسابيع تكتمل الاسنان اللبنيه (المؤقته)

الاسنان الدائمه بعمر الاشهر
قواطع 3-4
انياب 4-5
اضراس اماميه 5-6 بعمر الست اشهر توجد الاسنان الدائمه كاملا
اضراس 5-7

بعمر السنه تكون الاسنان بيضاء اللون ونظيفه

بعمر 1_2 تكون الاسنان يكون بعض الصفار على الاضراس بعض حمض الطرطير (حمض يوجد على الاسنان اصفر اللون )

بعمر 3_5سنوات يصبح الصفار على اغلب الاسنان

بعمر 5_10 يوجد بعض الصباغ على اللثه والاسنان تكون مهترئه

بعمر 10_15 يوجد حمض الطرطير بشكل كثيير وبعض الاسنان مفقوده وتكون الاسنان مهترئه

والبيطري راح يعطيك العمر الأقرب لها من خلال فحص آسنانها




7 - وش اعطيه ادويه ؟ مع اني احس انه مو مريض , لكن يمكن يكون فيه دود مثلا لان صاحب المحل كان يوكله كبده نيه ,

دام مافيها آي علامات مرض وخمول آو فقدان شهيه آن شاءالله طيبه وماتحتاج لأدويه

الا حبة ديدان من آي صيدليه بيطري آو عياده لأن الأكل النيء يسبب ديدان وبكتيريا ..



8 وش حكايه زيت الزيتون مع القطط ؟ احطه له بالمويه عشان يشربه و يطول شعره ؟

3 نقط يومياً آو ملعقه صغيره مره آو مرتين بالآسبوع

وظيفته يحسن الجلد والشعر ويعطيه لمعه ويقلل من تساقطه ويمنع مشكلة الهيربول ( كرات الشعر )



9 - كيف انظف اذنه و عيونه ؟

العين بمناديل آو قطنه تبللها بمويه دافيه آو شاي مر (بدون سكر) وتنظف لها عيونها

ولو فيها آفرازات بنيه وهي تجي بالقطط الفطس نظف لها عيونها بحليب دافي راح يشيل الآثر البني آن شاءالله

وتنظيف الأذن تفضل بالأضافه للرابط اللي آضافته آختي Ava

طريقة تنظيف الأذن من الشمع والجرب بالصور

http://www.2zoo.com/vb/showthread.php?t=95609




10 - كيف اعرف ان كان مريض او لا ؟

تكون خامله وفاقده الشهيه بالأضافه لعلامات ثانيه من الآستفراغ آو الآسهال آو إفرازات بالعين والآنف

الشعر مايكون بصحته يكون باااهت وقليل .. كثيررر علامات

وتفضل هالموضوع بيفيدك آكثر

http://www.2zoo.com/vb/showthread.php?t=113410




11 - كيف اعرف ان كان جيعان ؟

القطط لو فيها تاكل 24 ساعه ماتقول لا

فـ لذلك حددها لها عدد وجباتها من 3 الى وجبتين باليوم

مثلاً بالنهار دجاج وبالليل كمشة دراي فوود وبين الوجبات آعطيها بيضه مسلوقه آو توست مع جبنه



12 - كيف اعرف ان كان يبغى الحمام ؟

بتشوفها تدور بمكانها وتماوي آو تحفر بالآرض بآيدها ,, مثل ماقلت لك خلي حمامها قريب منها ومابتسويها بآي مكان



13 - كيف افسر تصرفاته ؟ مثل انه يجي يتحكحك فيني , او انه يطلع صوته و يتمسكن

آيوه تتمسح فيك وتخرخر



و المشكله ان فيها كثير تكتلات شعر و لا حولنا بيطري زي الناس , و قمت حاولت اقص الشعر و جرحت الجلد من جهه الجوع , الجلد انسلخ و صار الكوع يطلع كل ما مشت و نزفت شي بسيط لكن وقف ,

وش الحل مع هالمصيبه ؟

الله يهديك هي مايبلها عجاله عـ العموم سبق جاوبت على العقد فوق

وبالنسبه للجرح عقمه بمويه وملح آو بيتادين آو آيودين من الصيدليه البشريه مرتين باليوم

ولا تتهورون بالهداوه قصوا لها


وبالتوفيق

::

[هيمالي]

Ava

OUT

آنــو



يا حبي لكم , كفيتو و وفيتو

الف الف شكر لكم

قريبا بنزل لكم صوره كاترينا ( ادلعها كاتيا ) يا حبي لها :freind:

و اذا عندي استفسار زود بغثكم ترا :D
مع اني طالب طب بشري , لكن لاحظت ان فسيلوجيا و باثولجيا القطط تختلف عن الانسان كثير , خصوصا بحكايه تجلط الدم و المناعه و التغذيه و العمليات الايضيه !!

نشوفكم على خير