الحقوووني تكفوووون ... طيري بيروح من يدي .!!

[turky2010]

السلام عليكم ورحمة الله وبركاتة ..

مساكم / صبحكم الله بالخيير ..

بدون ما اطول عليكم ابي مساعدتكم ككل

موضوعي باين من عنوانة طيري ما أدري وش فيه اليوم مو طبيعي

أمس لاحظت أنه ما له صوت ابد .. واليوم الفاجعة .. طيري راحت قوتة وصار ضعيف جدا
حتى حاولت ازعله واخوفة ابيه يعضني ماقدر
وبالغصب يتحرك حركته مرررررة قليله ...

والله اني خايف عليه ما ادري وش فيه . تكفووون يا أهل الخبرة قولو لي وش الحل .
والله نفسيتي تعبت .. وخايف عليه من المووت
توني شايفه يدخل راسة كله داخل الأكل حقة ولا يتحرك

[eaglesa38]

وعليكم السلام ورحمة الله وبركاته

عزيزي هل طيرك فيه اسهال او زكام؟
راقب البراز اذا تشوفه سائل شفاف مثل الماء بنسبة عالية ونقطة او خيط اخضر
فهذا يعني انه مصاب باسهال
والاسهال يفقد الطير الرغبة في الاكل وايضا يفقده قوته ويكون في حالة خمول

انصحك لازم توكله بابرة الغر
اشتر له ذرة + باليله (حمص) المطبوخ الجاهز
واخفقهم في خلاط الي للعصير مع اضافة قليل من الماء حتى يكون نام وثقيل شوي
وقم بغر الطير اربع مرات حتى يعود الى وضعه الطبيعي


تحياتي

[turky2010]

الله يعطيك العافية .. ماقصرت

لكن بالنسبة للبراز . انا ملاحظ انو ثقييل ومصفر شوي

الله يستر...

[مـحـمـاس الـمـنـحـاس]

اخوي ممكن نعرف نوع طيرك وعمره

[turky2010]

أهلين اخوي محماس . آسف ما أطلعتكم على الطير ..<< لا تلومه من زوود الفجعه..

الطير كاسكو . أفريقي محجل
وعمرة تقريبا داخل على 9 شهوور

وترى الحين طالع فووق القفص ومنزل راسه وجسمه على القفص .

[yasserالكاسر]

اخوي مر معاي نفس الحاله بطيــر غيني..
السبب ديدان بالبطن..
ولازم تأكله بالابره..والا لاقدر الله بيموت..وحاول تاكله بالقوه ..وطمنا عليه

[مـحـمـاس الـمـنـحـاس]

عمره دخل على 9شهور
يعني لون عينه رمادي ماهو اسود؟
طيب خيوو
الطير وش اللي متغير عليه؟
المكان متغير؟او الجو متغير؟او الاكل ؟
وهل تعرض الطير لأي تيارات هوائيه؟او انت روشته قريب؟؟

[turky2010]

اخوي ..

ماصار ولا شي من اللي ذكرتة وهذا اللي مجنني ...

[مـحـمـاس الـمـنـحـاس]

والله غريبه
عالعموم وانا اخوك انا لاني بيطري
ولا اقول لك اني عالم

لكن مربي طيور ومحترف ومعاشر الطيور من مده ماهي بسيطه
وبنصحك بطريقه مجرربه وفعاله وانا استخدمها دايما

فيه علاج عند البيطريين
مضاد حيوي اسمه اسبكتولين
<<وتأكد انه مايكون صناعه اردنيه لأنه اذا اردني فهو المقلد مو الاصلي>>
واعط الطير مقدار1.5سم بالفم واذا تعبان مرره خلها2سم
بأذن الله بتلاحظ التغيير في حاله الطير خلال ساعات بسيطه
المهم لاتكرر العلاج بالفم مره وحده وبس بعدها خلها2سم في المشربيه حقت المويه لمده5ايام
والله يكتب لك الاصلح
هذي صوره للعلاج

http://www.2zoo.org/get-3-2010-2zoo_org_v04b88ul.gif (http://www.2zoo.org)
اتمنى لطيرك الشفاء العاجل
وطمني عنه عن طريق الرسايل الخاصه
<<اذا الله نفعك به وتعافا طيرك لا ابي منك مدح ولا شي كل اللي ابيه منك قوله((الله يرحم والديه ويحرمهم عن النار))وبس>>

[turky2010]

ماقصرتو الله يعطيكم العافية .. تعبتكم يا أخواان ...

الطير مات .. والله سهران معه طول الليل ما ادري وش اسوي له
والمشكله انو ماكان فيهه اي بيطري في ذاك الوقت .. طلعت فيه ادور اي مكان للطيور .. لكن لأسف مالقيت الكل مقفل ..

الله يعوضني خير .. والحمد لله على كل حال

أشكركم على إهتمامكم .. أخوكم ( تركي )