[بعد قرائتك لهالموضوع بتتغير نظرتك للهوايه-نقاش]5 دقايق لو سمحت

[LoveNight]

السلام عليكم جميعا ..


اتمنى فعلا ان الجميع يشارك فيه الموضوع لنخرج بافضل نتيجه .. الموضوع للفائده العامه وليس لابداء رايي الشخصي ..

من المعروف ان اي هوايه تدخل في حيز الرأي الشخصي او التجربه الشخصيه فقط لايصل ابدا الى الاحترافيه او الى نتيجه جيده الا في ماندر ..

في هوايتنا تربيه الببغاء مثلا.. لاحظت من فتره ان الغالبيه يجون للمنتدى ويطرحون افكارهم او ارائهم الشخصيه ويتعمم على الجميع .. والامثله كثيره في هالموضوع خصوصا في مايتعلق بالاكل والعلاجات والتربيه والخ ..


اغلب المواضيع والحلول والافكار تجارب شخصيه بعيده تماما عن التجارب العلميه المثبته والصحيحه .. ومو شرط انك جربت شي ولا مات طيرك معناته انه شي صحيح ..

انا هنا ما اتكلم عن هل اللي تسويه لطيرك او تجربه عليه جاب نتيجه او لا .. انا اتكلم هل اللي تسويه صحيح ولا غلط ؟

ليش نشوف المربين بالخارج طيورهم تعيش فترات طويله جدا وصحتها من اروع مايكون !


انت لما تدعي انك محب للببغاء وخصوصا لنوع معين .. مفترض انه يكون عندك درايه بالاساسيات اللي تحتاجها لتربيه هذا الطير ..

محد فكر ان الاهمال قد يترتب عليه ذنب اذا مات عندك وانك مسؤول امام الله عن هذي الروح .. الواحد بس يفكر يقتني طير على شان يجرب تربيته او يجيبه لعياله ومايكمل مسكين فتره بسيطه الا هو ميت ..

وبالاخير كلها الف ولا الفين ريال ماتفرق عندنا !

اكثر شي يضايقني ان كل حاجه عندنا عشوائيه ومثل ماذكرت قبل تعتمد على الآراء الشخصيه ..

يعني مثلا لو رحت الحين وشريت ببغاء وقال كلمتين وجيت نزلت موضوع .. ماتدري الا عشرين واحد جا يسالك بالخاص وبالعام .. يشوفونك خلاص صرت الحين خبير وفاهم واي شي تقوله لهم يسوونه وهكذا تتواصل الاراء الشخصيه الخاطئه لين تنتشر بين الهواه ..

واغلب المعلومات عندنا تنتشر بهالطريقه .. كلام في كلام وينتشر ..

اقرب لكم الصوره اكثر بمثال بعيد شوي حتى لا احد يزعل .. الحين لو فكرت مثلا تشتري ديناصور وش بتسوي ! بتدخل منتدى دينصورات وتسال المشرفين او احد الهواه اللي يكتب دايم او عضو قد نزل موضوع وقال كم كلمه عن الدينصورات !

وخلاص تاخذ برايه وتعتمد عليه وتصير معلوماتك كلها من هالمصدر !

لو لقيت ولد عمك عنده طير رحت سالته واستشرته وخليته يختار لك الطير والخ وهو تلقاه شاري الطير وراميه لاخوانه ولا درى عنه ابدا ! ولا عنده اصلا اي معلومات صحيحه

طيب هل هم فاهمين فعلا ! هل عندهم الخبره الحقيقيه اللي تفيدك ! حتى وان كان مشرف موب شرف يفهم يمكن يكون منصب تشريفي اكثر من انه فاهم !

ومع احترامي للمربين والهواه جميعا طبعا .. اذا الشي ما اخذته عن دراسه فعليه وقراءه في مصادر موثوقه عمرك ماراح توصل للمعلومات والاحترافيه بالتربيه

ومثل ماقالو الجاهل خصيم نفسه .. والثقه الزائده بالناس مشكله


يجيك واحد تطن براسه يشتري طير يروح للسوق وهالشريطيه يقوله تكفى عطني احسن طير عندك ويجيك شاري كاسكو على انه صقر ! وبالاخير يدعي على اللي ضحك عليه !

طيب هل كلفت على نفسك تقرى قبل لا تقتني ! هل فكرت يصير عندك معلومات عن الاهتمام والاكل وطريقه التربيه لو اساسيات قبل لا تقتني هالروح وتموت عندك !

مشكلتنا ماعندنا حب حقيقي للهوايات .. نظل ناس تبعيين تزور صديقك تشوف عنده حوض سمك يقعد يسولف لك شوي عن السمك من بكرا رايح تشتري !

تزور قريبك يكون عنده طيور كناري ولا بلابل والخ من بكرا وانت مطقم معه !

شوي وتمل منها ويا تمرض او تموت من قله اهتمامك ولا تعرضها للبيع !


في مكان اخر غير عندنا ..الهوايه تكون بدم الانسان حتى انهم يصرفون عليها بشكل كبير من اموالهم الخاصه وعندهم قانون يقاضي اي انسان يهمل في تربيه حيواناته الخاصه .. غير الاماكن التطوعيه اللي تعالج الحيوانات الظاله او السائبه او المريضه او حتى اللي يتخلى عنها اصحابها وكل هذا بدعم خاص منهم !

يتبنون اي حيوان مريض ويعالجونه لين يرجع لصحته وتجي عائله تتبناه من جديد ! موب عندنا حيوانات متهالكه وبصحه يرثى لها فعلا ..


امس رحت محل حيوانات في الرياض ولقيت كم هائل من الكاسكو كل اربعه بقفص صغير مساكين وبعض الاقفاص فيها 3..وتحت هالاقفاص قفص قرد جالس يسحب اقفاص الكاسكو على شان يطيح عليه شي من اكلها !

من يوم ماشفت القرد اصلا مع الطيور غسلت يدي انا طبعا رايح اتفرج لا يمكن اشتري من هنا اساسا .. انا من يوم اشوف قرد يتبادر لذهني مباشره انه مريض .. ومعروف عن القرود حملها للامراض وخصوصا عندنا اللي تدخل الحيوانات محد يفحص ولا يدري عنها ! فمادري كيف حاطينه مع الببغاوات وهو كل شوي يسحب اقفاصها ويروعها..

وغير اصوات الصراخ والريحه وعدم الاهتمام ! بالله كيف يجي للواحد خاطر يشتري منهم ! ناهيك عن الطريقه اللي وصلت فيها هالطيور اكيد بكميات كبيره وهل اختلطت مع طيور مريضه ! هل هي اصلا سليمه ولا فيها شي ! وبالاخير تتفاجأ بالسعر !

طيب تبي تبيع طير بسعر غالي على الاقل افحصه على شان تبيعه للزبون سليم موب يومين ويموت !

المشكله عندنا كل شي الماده وهوايات وانتشار وكل شي لكن تستغرب ليش هالنقص في المعلومات والمراكز الطبيه للحيوانات والخ

حتى جمعيات ماعندنا ! جمعيه علميه مختصه مثلا بنوع معين من الحيوانات تروح لهم وتحصل عندهم كل المعلومات الصحيحه على الاقل بعيد عن اجتهادات الهواه المزاجيه !

مانبي منهم اكثر من كذا واكيد في اي هوايه تجد فيها هواه عندهم امكانيات مختلفه .. اللي سافر وخاض تجارب مع ناس اكثر خبره واللي يتمتع بلغه يقدر يترجم والخ تتظافر الجهود ويحطون مثلا كتيب او موقع مو مهم الطريقه اهم شي معلومات صحيحه ومن خبراء وتجارب صحيحه ..


الآن بالخارج لو رحت لجمعيه تهتم بنفس نوع حيواناتك او شخص هاوي وطلبت منهم مثلا طريقه الانتاج والتفريخ والخ .. تلقاهم يساعدونك بالغالي والنفيس في سبيل ان هالحيوان ينتشر ويكون له مهتمين كثيرين ..

هنا لو تروح لواحد يفرخ تقوله ولاعليك امر علمني الطريقه ودي افرخ .. اول مايجي في باله مباشهر انك بتقطع رزقه وانك بتنافسه وانك بتخرب عليه السوق ! على طول الحسد والانانيه تشتغل والمشكله تحصل انتاجه مو ذاك الزود يعني عاديه جدا

مايدري ان السوق يدخله الاف من الطيور المستورده وان انتاجه لو كثر عشر ولا عشرين بالسنه ! يعني محد بيشاركك في رزقك لكن وش المشكله اننا نتشارك المعلومات والانتاج حتى تنتشر هالهوايه بيننا ونستغني عن الاستيراد اللي اغلبها مريضه وتموت !


اخر شي احب اتطرق له هم الشريطيه او التجار بشكل عام ..

اتمنى من كل قلبي تعرفون الفرق بين الهاوي الفعلي والتاجر .. عمره التاجر البحت مايكون هاوي لانه يشتري ويبيع هذا اللي يعرفه لا تعامل مع الحيوان بشكل فعلي ولا صارت له تجارب معه ولا يعرف الا بكم يبيعه وبكم يشتريه ! مجرد عنده مصدر يجيب منه او تاجر جمله وياخذ منه ويبيع .. لكن هل يملك المعلومات الفعليه !

مثل اللي يدخل محل ويسال الهندي اللي بالمحل وش احسن شي عندك ! وش يدريه هو مجرد عامل ينظف الحيوانات وياكلها ويتعامل مع كل الحيوانات بالمحل ..

الهاوي الفعلي مايبيع طير نادر ومايتفوت .. اما اللي يبيع ماخذها بيع وتجاره فلاتتوقع ان عنده المعلومات الصحيحه .. عن التربيه واحسن طير والخ

كلامي هنا ليس للتعميم وانما للتوضيح .. لكن اللي يقهر انه لما يتحول كل شي بالهوايه الى تجاره بحته يعني بس بيع وشراء حتى معلومه صحيحه بكل صعوبه تحصلها وكل واحد للاسف يدعي العلم

ومازال بالخاطر كثير بس نكتفيه المره وياليت الكل يشارك مايكتفي برد بسيط

[طير جارح]

اولا اهنيك جدا على هذا الموضوع من زمان ما شفنت مثل هذي المواضيع المفيدة مع احترامي لجميع الكتاب و الاعضاء
بالنسبة للخبرة انا اخالفك الرأي ممكن تكتسب بشكل غير علمي الخبرة و اللي مو خبرة واضحين
مثلا انا عندي دراية بالببغاوات قديمة جدا تقريبا لي 12 عام من يوم كنت بالابتدائي و مر علي ببغاوات كثيرة و انواع كثيرة اكيد راح اكتسب خبرة و فيه كثير من الاعضاء بهالشكل .
و اذا تكلمت بشي و عطيت لعضو رأيي بمشكلة معينه اكيد مار علي نفس مشكلته قبل .
لاكن اذا كان قصدك بالاشخاص اللي من اول ما يشتري ببغاء يفتي و يعطي معلومات فانا معك 100 %
وبالنسبة للغرب ما في داعي تقارننا معاهم
هم وين و حنا وين:D:D
يعني تخيل عندهم لكل شي و لكل هواية جمعية او هيئة تجمع الهواة عشان يستفيدو من بعض


اهنيك مرة اخري على هذا الموضوع و اشكرك حبيبي

[غسان الاشقر]

اولاً اشكرك من كل قلبي على الطرح الجميل وخصوصاً مثال الديناصور للتمويه :rolleyes::p

صدقنى المشكله ماهي بالي مسوى نفسه فاهم المشكله بالمتلقين الى يسمعون له الناس صار عندها عجز رهيب جدا لدرجه انك لو تاخذ لفه بالمنتدى لتجد نفس السوال يتكرر يوميا من عشره اشخاص ماعاد فيه وقت الناس تبحث او حتى تفكر تبي الشي جاهز.

كما ان الاشخاص الى ما تعاملوا مع الطيور بالسابق لا يحاولوا ابدا ان يتعلموا او يتفقهوا بل يشتروا وبعدين يجي العلم والتجربه والخنبقه والحوسه حتى يموت الطير وهو مكانك سر.

بعدين ترى معظم الناس مع الخيل ياشقراء يعنى يجمع من هالطيور لدرجه انه ما يفرق بين الكنارى والببغاء بس الا العيب احد يساله ويقول ما عندى النوع الفلانى.

كما ان هناك مشكله وهى ان جزء كبير من المجتمع لم يتربي على قول لا اعلم او بالعامى ما ادرى فتجد الكل يعرف والكل يفتى والكل يتفلسف من عنده :mad:

انا واعوذ بالله من قوله انا لم اجمع بين طيرين قط رغم انى ربيت اكثر من 40 طير والسبب بسيط جدا وهو ان " صاحب البالين كذاب".
يعنى طير واحد اربيه تربيه حسنه وادربه على كيفى حتى يصبح مثل ولدى خير من الجمع بين الطيور فلا تدرى من تدرب او تربي او تعالج او .......الخ.

اتمني من الجميع ان يقراوا ويثقفوا انفسهم ويحاولوا جاهدين فتح ابواب النقاش نحتاج الى النقاش والصراخ حتى لا يهم المهم ان نتعلم ونستفيد.

يجب ان يكون لنا دور فعال فى اثراء المواضع فمتى نتعدى مرحله الله يعطيك العافيه او شكرا على الموضوع او تقبل مروري. اذا دخلت موضوع وحاب تكتب شى ناقش واطرح افكارك حتى تعم الفائده اكثر واكثر.

اسف على الاطاله وللحديث بقيه :freind:

[شاهيـن]

شكرا على الموضوع

بصراحة النقاش يطول ولكن الخلاصة أننا العرب أشخاص لا نحب أن نقرأ
يعني أعطيني المعلومة جاهزة و ريحني بالتأكيد هاهي المشكلة
لأن المعلومة عندما تتلقاها من شخص خبير أو غير خبير تكون مبنية على تجربة و ظروف محيطة
تختلف عن ظروف الشخص السائل فيأخذها كما هي و يطبقها

[زياد الغامدي]

بسم الله الرحمن
اشكرك على الموضوع اكثر من رائع والصراحه الموضوع متكامل من جميع النواحي بالنسبه لسوالك عن طيور الخارج لماذا تعيش فترات اطوول فهذا السوال لايحتاج له اجابه لا نه لايوجد مقارنه حقيقه بيننا وبين اهل الخارج هم لديهم الامكانيات التي تعالج لهم طيورهم ومن هذا الخ..... وانا ايدك في كلامك عندما تقول ان الذي يريد ان يشتر ببغاء يجب ان يكون لديه درايه وانا ايدك في هذا الموضوع والصراحه كلامك صحيح عندما اتيت بموضوع الروح لا انو صراحه الحيوان مخلوق من مخلوقات الله واذا اقتنيناها يجب العنايه بها لا اننا مسؤلون امام الله وبالنسبه للمحلات والطرق العشوائيه التي يعملون فيها مافي بيدنا حيله والصراحه يحزنني ان ارى هذهي المناظر للطيور وللحيوانات جميعا وبالنسبه للناس الي يشترون الطيور ويحطونها بالبيت ومايدرون عنها فهاذي تحصل كثير بس وش تبغانا نسوي ناس ماعندها خوف من الله ولا ضمير اشكرك اخي على توضيحك الاكثر من رائع وعلى اجتهادك وعلى كل من رد على موضوعك تقبل مروري ولك مني اسعد الاماني زياد الغامدي

[ابو سفر]

ماقصرت على الموضوع الصحيح والواقعي

هذا الي عندي ...بالتوفيق جميعا

[ابوميسون]

بيض الله وجهك ماقصرت كلامك في محله والاخوان ماقصروا الله يحفطكم بحفطه

[hnoo]

صااادق

للأسف بعد الي يجونك يتفلسفون .. اذا سألهم احد مايقولون ماادري لا
يروحون يتفلسفون ويتوقعون .. عشان يصيرون كشخه انهم يعرفون لحيوان معين ..

او يكتبون سؤالك في قوقل ويناظرون اول اجابه تطلع لهم

يقولونها لك ..

وانت لاحظ ان هالحركه ماتكثر الا في الحيوانات الي مو منتشره عندنا كثير ..

ويجيك واحد يسمع عن الحيوان ويروح يكذب على خلق الله ..
__________
واما الي يشتري حيوان عشان عياله يااااكثررررهم بس ..

لا وللأسف يجي فتره ويتمنون انهم يذبونه او يتخلصون منه بأي طريقه

ومايعرفون قيمته ولا اي معلومه عنه وحتى نوعه مايدرون وش هو !!!

اعرف لك ناس عندهم ببغاء الماكاو الاحمر ويتكلم بعد .. ويبغون

يتخلصون منه بأي طريقه

مايحبونه يقولون مزعج .. ومايدرون اصلا وش اسعاره عشان يبيعونه !!!!!!!! ناس تقهرررر



ومثلهم مثل الي يشترون لعيالهم مثل ماقلت .. يخلي البزر يعذب الحيوان حتى يموت ويقوول عادي

بشتري لك غيره .. بس المهم ان ولده يوسع صدره !!!! للأسف بعض الناس تفكيرهم متدني كثييييييير
______
بالله كيف يجي للواحد خاطر يشتري منهم

لا والله بعض الناس يلقون طيور ميته في نفس القفص ويشترون عااااااادي عندهم

واذا قلت لهم خير ممكن بكون مريض؟ قال اذا كان مريض خله اذا مات اشتري احسن منه ..

قله ادب صراحه وسخافه بعد ... واذا جيت انت للهندي وقلت

خير وشذا العنايه الشينه؟ قال لك اذا يبغى اشتري

اذا مايبغى برا ..<<< يقول كذا عشانه عارف ان فيه ناس

اغبياء راح يشترون منه .. لو نوقف هالهنود عند حدهم ماصار كذا ..
___________
ومشكله التقليد ياشينها بس ..

خاصه اذا كان عندك حيوان غريب مثلا او انك اول واحد يجيب هالحيوان في عائلتكم

يبدأون كلهم يقلدون .. ثم يجونك .. حيواني مدري وش فيه ومدري ايش ,, ليش تقلد من الاول !!



اغلب المواضيع والحلول والافكار تجارب شخصيه بعيده تماما عن التجارب العلميه المثبته والصحيحه .. ومو شرط انك جربت شي ولا مات طيرك معناته انه شي صحيح ..

وابغى اقول في هالنقطه بعد شي

احيانا يجونك ناس يترجمون مواضيع انجليزيه عن حيوان معين ..

وتلاقيها كلها اخطاء ×اخطاء مافيها اساس من الصحه ابداااااااا

اما ان يكون الخطأ من المترجم نفسه .. مايعرف يقرأ او مادري عنه.

او الخطأ اصلا من المصدر ..

واذا جيت ونفيتها وقلت خطأ عليهم قالو اقول لاتتفلسف هذا مترجم !!

ليش الاجانب مايغلطون ؟ ماشاء الله كل شي صح عليهم

واذا جيت انت ونزلت موضوع مثلا انك اكتشفت ان الحيوان كذا وكذا ..

وهو صح عليك وانت متأكد كثييير ومجرب على حيوانات واجد ..

يجونك ويقولون اقول من وين المصدر؟ ممكن نعرف .؟ وش الدليل انه صح عليك؟

وهذولا يبغون بس كلمه منقوول ولا مترجم ..

مايبغون شي من عندنا ابدا .يقالهم مايثقون وحريصين !

وفي الاخير ابغى اقوول ..

لاتشتري حيوان قبل ماتعرف وش سالفته ..

وجـــــزاك الله خـــــــــــيـــــر ع الموضوع الــــرائع جداا

.... واسفه ع الاطاله ..

[LoveNight]

طير جارح


تسلم حبيبي ..وحياك الله احترم رايك وخبرتك وخبره اي انسان مارس الهوايه سنوات على عيني وراسي .. بس اللي اقصده هل ممارستك لهالهوايه حتى وان كانت لسنوات على اساس صحيح ! ام انها اجتهادات شخصيه ! انا مو ضد الاجتهادات بس اتوقع جا الوقت اننا نكون على مستوى مرضي بالهوايه مقارنه بكميات الطيور اللي تدخل عندنا !

وبالنسبه للي من اول مايشتري خلاص يعتبرونه خبير هذي المصيبه اللي صايره هنا للاسف ولا فيه امل تروح .. عندنا عقده اننا تبعيين زي ماقلت

الله يعطيك العافيه على مرورك واي اضافه بالموضوع راح تخليه يستمر والكل يشارك ويقول رايه ..

تحياتي لك ويعطيك الف عافيه :)


غسان الاشقر

الشكر كله لك يا الغالي على مشاركتك وتعليقك على الموضوع بهالشكل الجميل

وكلامك تتمه للموضوع واضافه له الكثير ومثل ماقلت سابقا المشكله في الجهل عندنا .. ومانحط اعتبارللشي اللي نقتنيه ولا يعتبرونه روح فيها اجر وذنب .. يعتبر حيوان اذا مات بكيفه نجيب غيره بس على شان العيال الصغار يستانسون ..ومعروفه القصص والاحاديث عن حرمه تعذيب واهمال الحيوانات وكيف انه ممكن تدخل النار بسببها ..

اتمنى فعلا يجي اليوم اللي يكون عندنا ناس محترفين لايبخلون على اي انسان هاوي ومبتدىء باي معلومه ..ولا تعتبر الهوايه فيها اسرار ولا ماصارت هوايه وتحولت الى مافيا .. ولاننسى انه هناك جانب من الموضوع يعتمد كما قلت على المتلقي اللي ماعنده استعداد يبحث ويثقف نفسه لو شوي

تحياتي لك ويعطيك الف عافيه واتمنى تستمر معنا بالنقاش
تسلم حبيبي :)


شاهيـن

تسلم اخوي شاهين على كلماتك المختصره والتي اصابت صلب الموضوع .. يعطيك الف عافيه

تحياتي لك :)



زياد الغامدي

الله يعطيك العافيه اخوي زياد على مرورك وكلامك الجميل .. وشاكر لك توضيحاتك ومثل ماقلنا مافيه شي ناقصنا لو تفتح عياده متخصصه على مستوى عالي من الخبره اكيد بنروح لها كلنا بس اهم شي يبعدون عن الطمع .. مو عيب انهم يربحون بس على الاقل يخافون الله في امانتهم .. وهالشي مو صعب بس مين مستعد

تحياتي والله يعطيك العافيه :)


ابو سفر

الله يسلمك ابو سفر يكفي مرورك وان شاءالله تشاركنا بشي ثاني
وتقبل تحياتي
:)


ابوميسون

وبيض الله وجهك تسلم ابو ميسون وحفظك الله وين ماكنت
تحياتي :)


hnoo

الله يعطيك العافيه تسلمين على كلامك الطويل حنا هذا اللي نحتاجه ماراح تفيدنا الاختصارات ..

وكلامك حقيقه اضاف للنقاش الكثير .. هذي المشكله مازال يعامل الحيوان على انه جماد تشتريه بس على شان الصغار يلعبون فيه وينتقون ريشه ويموت مسكين .. وبالاخير يشتري لهم شي ثاني وعلى هالطريقه لين تتراكم على ظهره الذنوب .. حرام حقيقه
لكن اتمنى يجي وقت نبعد عن موضوع التقليد والعشوائيه واذا حب الواحد يقتني شي يقتنيه من باب الحب لهالشي مو بس خطر في بالك وخلاص ..

مثال الطير الاعجوبه اليكس اللي في امريكا مدري وين طبعا مات بس شفتو يمكن كيف مستواه .. وش يدرينا يمكن مر علينا واحد بنفس ذكائه بس ماحصل من يدربه ! تلقينه عند اطفال عذبوه لين مات

للاسف الموضوع طويل بس نقول ان شاءالله تتغير بعض الامور عندنا

الله يعطيك العافيه وتسلمين على مرورك :)

[mur1415]

بسم الله الرحمن الرحيم
السلام عليكم ورحمة الله وبركاته
قبل ما ادخل بالموضوع احب اشكرك على الموضوع الجميل


بالنسبة الى موضوع الجمعيات انا من وجهة نظري انه نكتفي بالمنتدى افضل (لكن في حالة واحدة)
لانه بتحتاج الى ميزانية كبيرة ومن هو الي مستعد يضحي
الكل بيقول لك اخسر فلوسي على حيوانات
ولو فتحوا جمعية راعيها بيطلع روحك لانه كل يوم يقول احنا قاعدين نصرف مبلغ خيالي وما بيحرك ولاشيء كل ما تقول له شيء بيتهرب كما هو الحال في بقية الجمعيات واكبر مثال جمعيات التصوير
و لكن اذا كنا بنتبع المنتدى لازم الكل يبنتبه الى النقطة الي انت قلتها انه مو كل من هب ودب قام يعطي معلومات لا اساس لها .
والمشكلة انهم ما يتعبون روحهم يقروا المواضيع قبل ما يشتري حق لا ينصب عليه ويتعب في التدريب لجهله يعني الى الان ما شريت طير قبل ما اقرأ جميع المعلومات عنه بالعكس استفدت كثير لدرجة اني من ادخل محل اقوله ابي فرخ يقول لي هذا فرخ وهو عمره 9 شهور
واذا قلت له ما في اصغر كأنك ارتكبت جريمة يرفع صوته ويقول وش تبي اضغر من كذا !!
ويقعد يحاول يمشي بضاعته بأي طريقة يقعد يقول لك ما بتلاقي مثله في السوق وما في ميزة الا حطاها فيه هذا وهو توه يقول مو اليف وحتى لو ما يتكلم يقول لك احتمال يتكلم علشان يرفع سعره وعادة يقول لك كنت حاطه مع طيور تتكلم ويمكن تعلم منهم
ولكن لا حياة لمن تنادي المحلات الى الان مالقيت ولا محل مهتم بطيوره اهم شيء يبيع ودائما الريحة مقرفة .
واتمنى من وضع مشرفين على قسم سؤال وجواب للرد على الاسئلة وحذف المعلومات الخاظئة وطبعا تحتاج الى مشرف يدخل في اليوم اقل شي 3 مرات .
واسف على الاطالة
واحب اشكرك على الموضوع من جديد ويعطيك العافية اخوي
وان شاء الله نشوف تفاعل من الادارة ومن الاعضاء .

:freind:

[كاسكووووو]

ماشاء الله عليك موضوع متكامل ومعك حق بكلامك بس فيه اشياء وفيه اشياء

المحل اتوقع الي تقصده بطريق الامام حي الملك فهد

[نباله]

ياخوك

أنا جديد بالهواية وفعلا كل ما سألني أحد وش حادك عالطيور أقول هوايه

بصراحة قريت بعد ما شريت بس من وين من المنتديات

ولا أخفيك هناك تضارب و تعارض في نفس النقط من بعض الأعضاء

والغالب يقول على مسؤليتي !!! وين أدورك يالحبيب ؟؟

... بصراحة لما قريت الموضوع و بعض الردود حسيت أنك تقصدني

لأنه مالي غير شهر و نص تقريبا

و الحين بربي نوعين من الطيور وودي أي نوع أشتريه

ياشين الحماس لعطاك حد الدعسة !!


متشكر مسيوووو

ملاحظة الموضوع عجنبني مع العلم قد لا أوافق على كلّ ما ورد
لكن بصراحة يستحق التصفيق

براااافوووو

[nizarg]

أخي كلامك يتشال عالعين و الراس
و اليوم حصلت معي حاجة تسبت كلامك لقيت طيري يتنفس بصعوبة و لقيت موضوع عن هذا المرض و واصفين دواء اسمه tylan

المهم رحت عند البيطري و قلت له قصة الطائر و سألته عن الدواء فصار يضحك عليي و قالي هذا دواء للسعال :mad:

فيرجو التأكد من الأجابة قبل الرد و اسف انا لا أقصد صاحب الموضوع فهناك العديد من الأجابات ليس مؤكد عليها

و يعطيك ألف عافية

[nizarg]

في ناس كمان تقول جوع الطائر فهذا لا يجوز عند رب العالمين و هي فكرة غير صحيحة

[سكر]

موضوع بسيط في صياغته لكنه عميق في فكرته

ما شا ء الله تبارك الله

أهنيك على الطرح الرائع بارك الله فيك


تعليقي على نقطة المقارنة بيننا وبين الغرب هو ان تربية الحيوانات هي ثقافة تختلف بحسب نوع الحيوان وأهميته في حياتنا

بالنسبة للغرب مهتمين بسبب ثقافتهم الاجتماعية, واللي كلنا نعرف قد ايش علاقاتهم الاجتماعية وخصوصاً الأسرية فيها تفكك

فطبيعي يكون ولائهم للحيوانات عالي جداً, وبالتالي يكون فيه تركيز على بناء أسس وجمعيات تهتم بهذي الفئة,,

احنا في العالم العربي ما نحتاج في ثقافتنا اننا نتعلق بالحيوانات بشكل كبير لأن ضروفنا الإجتماعية مشغولة بعلاقات أسرية قوية وعلاقات اجتماعيه متعلقة بالدين وبالعرف, مثل الجيران والأصدقاء والأقارب,, الخ

هذي الروابط تخلينا نوقع في خطأ جسيم, اللي هو تربية الحيوان لفترة بسيطة فقط,, لحد ما تتغير ميولنا,,

يعني تلاقي المربي ربى الطائر أو القط أو اللي يكون فترة من حياته ثم تخلى عنه لأن ميوله تغيرت,,

والميول تتغير اذا زالت أسبابها أو تم تغييرها لميول أخرى,, لأنها غير أصيلة,, فنصير كل مرحلة عمرية ننتقل لنوع آخر من الهوايات يتناسب مع مستوانا الاجتماعي أو المادي أو الفكري ,, الخ

مع اننا مبدعين في بعض المجالات مثل تربية الإبل, والصقور, والأغنام, والنحل, وغيرها

ولكن انظر الى سبب ابداعنا,, ستجده متعلق بأهمية الحيوان في حياتنا, وسبب اقتنائه,, والمستوى الإجتماعي للمربي في حالة تربية الصقور,,

يعني هي ثقافة متأصلة في المربي نفسه ولها ارتباطات كثيرة تأثر في طريقة تعاطيه مع تربيته,,




بحكم قراءتي للكثير من المواقف, فهمت اننا نربي الببغاوات لفترة مؤقته,,

وأنا لا أمانع هذا السلوك, ولكن لدي بعض الإنتقادات مثل:

1/ اشتري ببغاء أليف. حتى في الغرب الناس ما يشترون الا الحيوانات الأليفة والمدربة, عشان كذا صار فيه مراكز للتدريب والتعليم, لكن عندنا في أسواقنا نشتري الغير أليف والغير مدرب, وبعدين نتورط,,

كيف تتوقع نفتح مراكز تدريب وجمعيات تربيه اذا كان كل واحد يعتمد على نفسه في التجربة والخطأ,,؟ خصوصاً ان التاجر راح يبيع ما دام فيه طلب,,

ولو كل واحد فينا اشترط انه يشتري ببغاء أليف ومدرب, صدقني راح نشوف التجار أجبرو على انهم يفتحو مراكز للتدريب ويستقطبون الخبرات في هذا المجال حتى تمشي تجارتهم. وبكذا راح تنتشر الثقافة على المدى الطويل.

2/ اشترط على كل بائع خصوصاً في المحلات الثابته انه يتابع معاك حالة ببغائك الصحية, ويقدم لك النصائح والتوجيهات الطبية والسلوكية, ويتحمل مسؤولية أي مشكلة صحية تواجه ببغائك الا اذا انت تجاهلت نصائحه.

وهذا يجبر التاجر على انه يتعاون ويوفر للمشترين طبيب بيطري كفؤ,, (طبعاً هذا الطلب صعب لكنه مجرد أمل)

3/ استشر أهل الخبرة في هذا المجال وراجع مصدر معلوماته,, وفي بعض المواضيع نحتاج اننا نسأل على أي أساس جبت لنا هذي المعلومة.؟

وسألت الكثير من الأعضاء في الأمور الصحية عن نوع معين من الاكل مثلاً, مثل الشوكلاته, ليش تقولون انها تسبب تسمم للطائر.؟ وعلى أي أساس قلتم هذا الكلام؟

لكن للأسف ما لقيت إجابة كافية,, ولا قدرت أقتنع بهذي المعلومة وغيرها مثل بذور التفاح,, الخ

وهذا مو معناته ان كلامهم خطأ, لكني ما أحب أمشي على أي معلومة تنقال مهما كانت قديمة,, خصوصاً اني اعطي طيوري التفاح كامل وأعطيهم شوكلاته, وحالتهم عال العال من سنين,,

يمكن أحد يقول ان هذا مضر على المدى الطويل, راح أقول له بما انك بدأت بكلمة (يمكن),,, فصدقني أجسام الحيوانات والبشر لها القدرة على التعامل مع الكثير من الأمور

ومثلها المياه اللي تشرب منها الطيور في الطبيعة, تتوقع انك تقدر تشرب منها.؟

أو الطعام اللي تاكله الببغاوات في الطبيعة, هل تعتقد اننا نقدر نتناولها ولا يصير لنا شي؟

بعض الاحيان من المستحسن اننا نترك القرار لطيورنا تحدد اللي تبغى تتناوله في حد المعقول,, بشرط توفير الخيارات المتعددة لها,, ولا يمنع اننا نحاول نوجه مسار العملية بشكل يضمن سلامتها.


ومن وجهة نظري الامور الطبية تحتاج لأساس يدعمها أو دراسه معينة للمجيب,, أما الأمور السلوكية فهذي خبرات ممكن نستقيها بحكم تجاربنا في الحياة أو في التربية أو في التعاملات,, ولو دعمناها بدراسات كان أفضل

فمثلاً انت ممكن تصير تاجر بالممارسة, أو تتعلم النجارة أو أي حرفة بالمتابعة,, وملازمة أهل المهنة,,

لكن ما ينفع تصير طبيب بالمتابعة أو الملازمة,, أو بالتجربة والخطأ مثل التجارة,,,

لازم دراسة خصوصاً في عصرنا الحالي,,

عشان كذا لازم نفرق بين المجالات اللي ننتقدها, هل هو مجال سلوكي والا مجال طبي,,

الموضوع شيق بصراحة وفيه ردود مميزة تستحق الإشادة,,

لكني أكتفي بكلامي في هذا الرد ولي تعليق آخر إن شاء الله


أشكرك على موضوعك وعلى شعورك الحار والنابع من القلب,,

تحياتي

[LoveNight]

اهلين

mur1415

وعليكم السلام ورحمة الله وبركاته .. هلا فيك اخوي وشاكر لك مرورك الله يعطيك العافيه ..

يا الغالي الجمعيه مفترض تكون مدعومه من قبل جهه معينه مثلا وزاره الزراعه او الثروات الحيوانيه .. وغير كذا الله يسلمك الجمعيه مو مطلوب منها تصرف بقدر انه يجتمعون مجموعه لديهم خبره ويفيدون الناس بمعلومات واستشارات .. مثلا يطلعون كتب او شروحات او اي شي يطور ويثقف الهواه .. ليس مطلوب منهم دفع مبالغ ماديه .. بس لازم تكون تحت هيئه رسميه حتى يكون لها اعتبار ونستفيد منها ..

وبالنسبه لمشكله الخبرات العشوائيه هذي اللي نعاني منها وسنظل نعاني منها .. خصوصا في الوصفات العلاجيه اعرف واحد مسكين ببغاه كان مريض وكل واحد قام يعطيه وصفه لين مات : )

الله يرحمه بس اهم شي الواحد يتعلم من الدروس صدقني بيجي وقت ماراح نشوف الكاسكو الا في ماندر بسبب الصيد الجائر وقله الخبره في التعامل معه .. تحياتي لك وتسمل حبيبي
تحياتي لك :)


كاسكووووو

هلا فيك حبيبي اكيد تبقى اختلافات الراي ووجهات النظر وارده .. صدقني ان هذا حال كل محلات الحيوانات بالسعوديه اهمال في اهمال .. بس الله لا يحملنا ذنوبها

تحياتي لك تسلم : )



نباله

هلا بك حبيبي .. عاد ديرتنا ديره المعقدين والمعقدات لو تحب لك هوايه معينه جوك الناس وشوله وليه الخساره ووش حادك .. يبونك مكينه بس تاكل وتنام وتشتغل .. على شان كذا الحمد لله والشكر الاغلبيه هنا معقدين وحالتهم حاله .. يستخسرون يعيشون حياتهم ببساطه .. لذلك سو اللي تبيه دامك ماتضر نفسك ولا تضر احد ولا عليك من الناس ..

التجربه مو مشكله حتى لو انك مبتدىء .. لكن من المهم انك تتعامل مع الطير بشكل كويس على الاقل على شان لا يموت .. وتكسب اثمه وشوي شوي بتجيك المعلومات الاساسيه على الاقل بس اهم شي تنتبه من الاشياء اللي قد تسبب له مرض ..

شاكر لك مرورك ومثل ماقلت الاراء قد لا تلتقي في الاغلب ولكننا نتفق على جزئيه معينه وهذا يكفي للتواصل

تحياتي لك :)



nizarg

هلا فيك حبيبي .. لاتاخذ بكلام احد وخلك في اهل التخصص .. التجارب العشوائيه هي اللي تدمر الهوايه .. مافيه زي الاطباء والبيطريين واصحاب الخبرات الحقيقيه .. وليست الاجتهادات الشخصيه .. ربنا يشفي طيرك :)

تحياتي وشاكر لك المرور



سكر

هلا فيك حبيبي وكلامك الجميل اللي اتمنى اتناقش معك فيه وجه لوجه لثرائه .. فعلا الظروف الاجتماعيه هي اللي تشكل اهتماماتنا في اشياء كثيره .. والمشكله الكبرى اننا ناس مزاجيين مثل ماذكرت بموضوعي .. يعني لو واحد يجلس مع قريب له يربي تماسيح من بكرا تحصله شرا تمساح .. يعني مجرد نزوه وبالاخير الضحيه الحيوان نفسه اللي يموت في فتره قصيره بسبب الجهل .. والعشوائيه في دخول الهوايه ..

حتى تربيه الجمال والصقور والنحل .. صدقني الاغلبيه هدفهم مادي بحت للاسف .. واكبر دليل وصول سعر حيوانات الى ملايين ومئات الآلاف من الريالات !!!!

ماننفي وجود سلالات نادره والخ لكن الموضوع تعدى الهوايه الحقيقيه واصبح ماديا بحت وهذا واضح جدا .. بالخراج يحبون الهوايه لذاتها بعيد عن اي شي بل بالعكس تحصلهم يدفعون الغالي والنفيس لتبني حيوانات والاهتمام فيها

مساله الامور الطبيه هناك حل بسيط وسهل التنفيذ .. لو المستهلك اجبر التاجر او المحل انه مايشتري منه اي حيوان سواء طير او قطط الخ الا ومعه شهاده طبيه تثبت حلوه من الامراض القاتله او الفيروسيه على الاقل .. والله هذا الحل مو صعب مجرد تحليل عند بيطري وممكن تطلع النتيجه . . بهالطريقه على الاقل التاجر خلاص يهتم بطيره لو انه مريض بيعالج ولا راح تشتي الا طير معافى وسليم .. ولا راح يستوردون طيور مريضه وراح يقل البيع العشوائي من الشريطيه والخ ..

اتمنى ان كلنا نتظافر لهالموضوع ونلغي فكره شراء طير بدون شهاده طبيه تثبت سلامته

تحياتي لك :)

[العقرب الامبراطوري]

اخي كلامك صحيح 100% فعلا لما تشوف واحد عنده طير ما تصدق تشتريه و انا وقعت بهذا الغلط بس حاليا اقرا اكثر من 10 مواضيع و اشوف فيديوهات و صور عن الحيوان قبل ما اشتريه
اما عن التاجر احترما لكل التجار في هناك تجار اسمحولي لازم هما التجار يتعاملون معاملة (( حقيرة ) لانه ما يعاملون الحيوانات حتى معاملة حيوانات و لا اي معاملة حرام القرد يحبسوه في قفص ايام ام يشيلون الطير من ريشه و انا لما اشتري السرطان يوقعه على الارض و التجار مثل هؤلاء ما عندهم احساس خاصتا الهنود اللي يبيعون في المحلات ما همهم و لا شي هذول ما اسميهم بالحقراء اسمحولي لانه فعلا شي يطفش في البلادان العربية لو تروح بلد اجنبي كل حيوان في المحل مدلل و اللي يبيع يعرف كلشي عنه
اما في البلادان العربية ... لا تعليق

[بادجي 2009]

وعليكم اللام معك حق وحق100% وما يبغاءلها كلام

اخوي المشكه احنا في قسم البادجي بعد نعاني من مثل هلاعضاء في مجموعه من الاعضاء الله يهديهم
كل الاسئله يكون ردهم واحد يعني مثلا
سوال شخص البادجي الي عندي مريض بالاسهال ؟

سوال ثاني
بادجي مريض بالتنفس؟؟

تلقاء كل اجابته
استحخدم ليمون
وش ذاء والحين اعرف عضو الى الحين وكل ما قابل احد الاعضاء قاله
استخدم فتامينات من عند البيطري تساعدهم على الانتاج والمشكه طيوره باقي عليها عشان تسير في عمر التزواج وليس الانتاج باقي عليها 7 شهور وهو يحطها ويقول حطويها

بالله مهو شيء يقهر !!

[LoveNight]

اهلين بكم من جديد حبايبي


مصطفى محمد مجد

شاكر لك مرورك .. ومثل ماتفضلت مساله المعامله السيئه للحيوانات هذي حدث ولا حرج وخاصه من العماله الوافده للاسف .. الله لا يوفقهم لانهم فعلا هم سبب كل المشاكل في بلادنا ويستغلونها اسؤأ استغلال
تحياتي لك وشاكر لك المرور : )


بادجي 2009

هلا فيك حبيبي .. هذي المشكله في كل الهوايات ,. وتحصل اللي يعطيك المعلومه اصلا ماجربها .. سمعها من واحد وهو جالس ولا من تاجر وخلاص صار ينقلها لكل شخص بنفس الهوايه .. ما اتوقع انه راح نتقدم بهوايتنا صراحه دام هالطريقه موجوده .. لازم من وجود متخصصين واماكن تعطي معلومات صحيحه وعلميه

تحياتي لك وشاكر لك المرور

[بادجي 2009]

ياليت توجد حقوق الحيوان لانها موجوده بدول اوروبيه كثير ويعيطك الف عافيه يويالت الاداره تعطي انذار لمثل هالاعضاء

[ابوالكناري]

مشكور وماقصرت ولا تبخل علينا من مواضيعك الله يجزاك خير تقبل مروري

[عاشق دبل هد]

يعطيك العافيه والف عافيه صراحه موضوع يدق في الوتر الحساس مره والله ومشكورين الشباب ماقصرو في ارائهم صادق اصبح معظمنا ان لم يكن الكل منا يريد المعلومه جاهزه ويحط في باله انها اكيد من تجربه ونفعت معه اكيد تنفع مع طيري كمان معليش الشباب في المنتدي الحين راح نبدأ البحث عن المعلومه من ناحيه علميه مربوطه بخبرات لدينا لكن اخوي والله ثم والله حالافي مجتمع يفرق عن الغرب بكثير جدا مافيه تعاون من الجهات المختصه ولادعم ولا تثقيف البيطري يبتز والتاجريبتزك والهندي كماذكر صاحبنا علا صوته لكن مانريده وهو الاهم الانزيد النقاش لكي لانقع في بوتقت اتفق العرب على الايتفقو عرفنا الان المشكله نفكر في حلها ولو على نطاق منتدانا صدقونا غدا ستكبر وستصبح عالميه ومشرفينا مو مصرين معنا بدايه الالف ميل بخطوه واسف على الاطاله ودمتم بود:confused: