أسباب تجعل الشانشيلا حيوان خارق بالنسبة للقوارض

[ChinchillaKW]

بسم الله الرحمن الرحيم

العلماء مترددين بإطلاق أسم قارض على الشانشيلا وذلك لتشارك صفات كثيرة منها مع الثديات وفصائل أخرى ولحد الأن يبحثون أسم جديد يطلق الشانشيلا غير اسم قارض,

الشانشيلا يعتبر أذكى قارض على وجه الأرض او بالأحرى قارض خارق بالنسبة للقوارض الأخرى :-

1) عندما تلد الشانشيلا الام فأن الشانشيلا الأب يساعدها في الرعاية وتربية الشانشيلا الصغيرة, بل يجب عليك أن تضع الأب مع الأم بعد 15 يوم حتى تستجمع قواها الأم لان بمجرد وضعك الذكر مع الانثى تحمل الانثى, بعد 15 يوم يكون لزام عليك وضع الأب ليساعد الام بالرعاية لانها ماتقدر بروحها على تربية الطفل أو بالأحرى راح تتعب فمحتاجه الأب علشان يساعدهم ويدفيهم ويحميهم ويدخلهم داخل البيت معاها .

2) الشانشيلا الأم لن تقتل صغارها عند لمسهم بداية ولادتهم بالعكس ينصح بحمل الطفل في الثواني الاولى لكي يتجانس مع يد الإنسان مستقبلاً .

3) الشانشيلا الأم أم حنون لصغارها حتى لو ضربوها وتخاف على عيالها أكثر من نفسها, اللي عنده شانشيلا وولدت راح يقولكم أن الام إذا بعدتوا عنها طفلها تصارخ وتتوتر وتعفس القفص فوق حدر :p .

4) صلة الصداقة بينك وبين الشانشيلا يمكن ان تصل إلى مدى قريب جدا تتفوق على صداقتك مع قطك بكثير ( يعني تطيح الميانة بينكم :p أكثر من أي حيوان ثاني مع الوقت بشكل ماتتصوره ) .

5) الشانشيلا ذاكرته خارقة ويتذكر سنين ونظرته ذكية جداً ويفهم لغة الجسد والعين, نظراته تشبه نظرات انسان أو بالاحرى كل اللي طالعوه قالولي دير بالك هذول مسكونين لووول ويقولون أعوذ بالله من الخبث والخبائث

6) الشانشيلا القارض الوحيد اللي يطلع من المتاهات بدون أي وقت أو خطأ عكس القوارض الثانية اللي تحتاج إلى محاولات وتفكير شديد .

7) الشانشيلا يقدر يستوعب كلام الإنسان ويقدر يعبرلك عن اللي يبيه وتقدر تفهمه بسهولة مثل إذا يبي رمل يفرك نفسه جدامك وإذا يبي ياكل يعض أيدك وإذا يبي تشيله يطب عليك وإذا يبيك تدلكه يجي تحت ايدك .

8) الشانشيلا إذا استانس يحرك ذيله مثل القط بالضبط يمين ويسار .

9) الشانشيلا يستانس بصحبة الإنسان ويتفاعل مع الموسيقي ويرقص معاها بعد لوول .

10) الشانشيلات يغارون من بعضهم ويتهاوشون إذا اهتميت بواحد وتركت الباقي ويحاولون جذب انتباهك بشتى الطرق .

والكثير الكثير من النقاط

وحاليا احنا بصدد نحط فيديوات قوية للشانشيلات بس محتاجين شوية وقت وتشجيع منكم

مع أجمل التحيات

[%لوب ذهبي%]

مشكور اخوي على الموضوع الرائع والشانشيلا صراحه حيوان رائع وانا احد المعجبين به ولكني لا اعرف عنه اي شئ <<خايف من عضته <<<

لكني اتوقع بانه احد انواع القوارض

تقبل مروري :)

[محبه الحيوانات]

يعطيك العافيه

[Fate88]

خاطري في شانشيلا

بس كم اسعارهم تقريبا؟

ماادري وين احصلهم في البحرين

لازم اسال عنهم خخخخخ

ممكن تحط صور للشانشيلا اللي عندك؟

[عاشق الموت]

الله يديك العافيه

[أحبك توتو]

جزاك الله خير حبيبتي بغيت أعرف من وين شاريتـها لأني من الكويت و أبي أعرف لأني أفكر و شككـرااا ع المعلومات الحلوة

[الـــــكادي]

بجد حبيت هذا الحيوان ودي اشتري لي واحد :)

موضوعك رائع و شيق جدا اشكرك على جهودك :)

[ChinchillaKW]

مشكور اخوي على الموضوع الرائع والشانشيلا صراحه حيوان رائع وانا احد المعجبين به ولكني لا اعرف عنه اي شئ <<خايف من عضته <<<

لكني اتوقع بانه احد انواع القوارض

تقبل مروري :)


لاتخاف منه اهو من ذكائه يستوعب أن عضته تعور الإنسان يعض خفيف حييل إذا كان جوعان أو يبي يلفت إنتباهك

ونورت الموضوع بمشاركتك :)

[ChinchillaKW]

خاطري في شانشيلا

بس كم اسعارهم تقريبا؟

ماادري وين احصلهم في البحرين

لازم اسال عنهم خخخخخ

ممكن تحط صور للشانشيلا اللي عندك؟

مو أقل من 50 هذا إذا حصلت الحين

أنا لو ألقى شانشيلا الحين أشتريه :)

وبخصوص الصور في موضوع حاط بعض الصور دوري بملفي الشخصي عن مواضيعي وراح تحصلين فيديوات بعد

وراح أحط صور جديدة الأيام الجاية إن شاء الله + هالفترة راح أحط فيديو جديد حقهم ويمكن اليوم أحطه إذا لحقت

وشكراً على المشاركة

[ChinchillaKW]

جزاك الله خير حبيبتي بغيت أعرف من وين شاريتـها لأني من الكويت و أبي أعرف لأني أفكر و شككـرااا ع المعلومات الحلوة

أهلا وسهلا

بخصوص وين تحصلينهم أنا شريتهم من قبل 7 سنين أو أكثر ماني مثبت

وقبل 3 سنين هم شريت صغار بس ماكانوا من النوع الزين فماتو حصلتهم بسوق الجمعة

أما الحين ماأتوقع في شانشيلات

ماعدا الشانشيلا اللي عندي حملوا طفلة جديدة قبل 8 أشهر

لو ألقى الحين أروح أشتري

[ChinchillaKW]

بجد حبيت هذا الحيوان ودي اشتري لي واحد :)

موضوعك رائع و شيق جدا اشكرك على جهودك :)


أهلا وسهلا

نورت الموضوع بردك وترقب المزيد :)

[m7mad_87]

السلام عليكم

يعطيك العافية على الموضوع

واذا لك خاطر تبيع هذا رقمي 97998788
ونادطر ردك


شكراا

بوشاهين

[ChinchillaKW]

هلا و الله الله يسعدكــ على المعلومااتــ الروووووعهـ بس عنديــ سؤاااااالــ مهمممــ

ولأنيــ قبلــ سنين أبغا شانشيلا أنا عنديــ حساسيه عاديـ ؟؟؟ يعني من القطط ( البسس ) أول ما امسكهم

أعطططســ وأقعد أحكــ عيووونيــ وو إلخـ إلخـ .......


الشانشيلا أنظف حيوان بالعالم مافيه لاريحة ولاحساسية هاذي نقطة

النقطة الثانية أنه مايعادي أمراض ومايحتاج تنظيف بس حطيله رمل خاص كل أسبوع مرتين أو ثلاث يفرك نفسه ويسبح فيه :)

وشكراً على المشاركة

[ChinchillaKW]

السلام عليكم

يعطيك العافية على الموضوع

واذا لك خاطر تبيع هذا رقمي 97998788
ونادطر ردك


شكراا

بوشاهين

وعليكم السلام

الله يعافيك

والله أخوي مالي خاطر بالبيع

تشرفت بمرورك :)

[m7mad_87]

افاااا ليش عاد:wao:

ماشاء الله تقول عندك يوز وولدو نثية خل اليوز عندك وبيعني النثية لان عندي فحل من سنة ادورله نثية وماراح نختلف على السعر :12:

[ChinchillaKW]

افاااا ليش عاد:wao:

ماشاء الله تقول عندك يوز وولدو نثية خل اليوز عندك وبيعني النثية لان عندي فحل من سنة ادورله نثية وماراح نختلف على السعر :12:

لو بيدي من عيوني

مو بس أنا متعلق فيهم حتى اليهال


إذا لقيتلك محل سواء بسوق جمعة أو غيره يبيع راح أعطيك خبر لأن حتى أنا قاعد أدور شانشيلات ....

متى شريت الشانشيلا مالتك ووين ؟

وشلونه معاك :)

[m7mad_87]

يعطيك العافيه وماقصرت ولد عمي والله يبارك لك بعيالك ويصلحهم ان شاء الله ويخليلك شانشيلاتك


ومالي انا ماخذه من سوق الحمام قبل 5 اشهر تقريبا و عادي حاطه بقفص امسح عليه واوكله من ايدي وكنت اهده بس هالفتره قام يطيح شعر مادري ليش؟؟!!

وسؤال الله لا يهينك ابي عياده تفهم فيهم حق علاج ولا تطعيم

وشاكرلك يا الغالي

[صمت الحزن]

مشاء الله حيوان رائع يسلمو

[ChinchillaKW]

مشكوووووووووووووووووووور جدا جدا والله انكــ رهييييب ماشاءالله

بســ أنا عنديـ حسااسيهـ شديييدهــ متأأأأأكد إنتا لأنو في عندنا في السعوووووديةــ كثير وأنا بأشترريـ أرجوا

أتأكد ميه بالميه ورد بليز ؟؟ مو بعدينـ أشتريــ وأعططططططس وخشمي يـحمر وينقطـ خخخــ وأحكحك عيوني

وعيوني تدمعـ وتحمممممررر

حياج الله اختي

لاتخافين مو مثل القطط يسوون حساسية أنا عندي شانشيلات من 7 سنين

لو فيهم حساسية كان ماشريتهم

[ChinchillaKW]

يعطيك العافيه وماقصرت ولد عمي والله يبارك لك بعيالك ويصلحهم ان شاء الله ويخليلك شانشيلاتك


ومالي انا ماخذه من سوق الحمام قبل 5 اشهر تقريبا و عادي حاطه بقفص امسح عليه واوكله من ايدي وكنت اهده بس هالفتره قام يطيح شعر مادري ليش؟؟!!

وسؤال الله لا يهينك ابي عياده تفهم فيهم حق علاج ولا تطعيم

وشاكرلك يا الغالي

الله يسلمك حجي

بخصوص الشعر يطيح يمكن أنت مو طالبله رمل خاص ؟ أو قفصه مو نظيف ؟

لان شوف القفص أول ماخذيته سويت شبك رفيع شوي حق الفضلات والبول مكرم السامع يروح تحت القفص ويظل في طبقة نظيفة فوق

والنقطة الثانية ترا أي رمل سواء شاطيء أو بر تحطه للشانشيلا يخرب فروهم ويجيب لهم امراض لازم رمل خاص تطلبه

شوف راح أتأكد من عنوان معين وراح أعطيك أياه اهني هالجم يوم اهو محل بشويخ يطلبلك كراتين فيهم درازن أكل جودتهم عالية + أنواع الأعشاب الخاصة للشانشيلا + الرمل الخاص للشانشيلا

أطلب كيلوين رمل + كرتونين أكل وكرتون اعشاب وراح يظلون معاك سنتين وأكثر وأدعيلي

وماراح يكلفك وايد بالعكس راح يوفرون عليك وايد

وهالجوم يوم بعد بدور شانشيلات بسوق الجمعة وبت هاوز إذا لقيت شي راح أقولك

وخذ مني نصيحة وتجربة الشانشيلا راح تحسه مكبوت إذا ماهتميت فيه

إذا تتفاعل معه كل يوم على الأقل نص ساعة راح تشوف منه عجايب ماتتوقعها

وإذا على العيادات فهني مايعرفوله بس سمعت في ايطالي بوفرة يعرفلهم ماني متأكد وكذلك في عيادة كبيرة بالكويت يعرفون شغلات بسيطة عنهم وعندهم ابر لهم اتوقع خل اجيك بالايميل اشوف

اهو شوف اهتم فيهم وبالجو حواليهم وإن شاء الله مايمرضون لانهم أقوى من القوارض الثانية كبنية وتحمل

تحياتي

[ChinchillaKW]

مشاء الله حيوان رائع يسلمو

الله يسلمك حياك الله

[ChinchillaKW]

مشككككككككوووووووووووووووووووووووووووووووووووووووووررررررر طمنتني :p

بســ سؤالــ ثانيــ خخــ معليشــ تعبتتكــ معايا مممممممــــ هلــ الشانشيلا يروحــ الحمامــ ؟؟ :D

أنا شفتــ إنو عندو حمامــ خااصــ على شكل شانشيلا صغير عرررفتوا ؟؟ المهمــ كيفــ أعودو على انو ما يسويها

فيـ أيييييييـــ مكااانــ :shy::shy: ؟؟؟؟ ولا هوا على طوولــ يرفــ ؟؟ :12::12:أوكــ ومشششكوووووووووووووووررر مره أخررررررررى ههههههههـــ ,.,.,.,,
:o:o:o:o:o


مايميز الكلب والقط انه نظام طرد الفضلات مرتبط باحساسهم

اما الشانشيلا فلا فهم مايحسون انهم يطردون فضلات مكرم السامع وهذا ليس بقلة ذكاء

والفضلة اللي يطلع منهم ناشف ومايسبب وصاخة وصغير جداً

وحياج الله

[m7mad_87]

قواك الله ولد عمي

بس ياريت لو تعطيني عنوان او رقم المحل اللي تقول عنه

و شنو فايدة العشب اللي تقول عنه ... داخل جيس ينباع ولا قوطي لاني شايف شي مثل العشب ينباع داخل جيس علىه صورة شانشيلا

و شنو افضل اكل حقهم ؟؟

و اسمحلنا كثرنا عليك بالاسأله

[ChinchillaKW]

قواك الله ولد عمي

بس ياريت لو تعطيني عنوان او رقم المحل اللي تقول عنه

و شنو فايدة العشب اللي تقول عنه ... داخل جيس ينباع ولا قوطي لاني شايف شي مثل العشب ينباع داخل جيس علىه صورة شانشيلا

و شنو افضل اكل حقهم ؟؟

و اسمحلنا كثرنا عليك بالاسأله

اليوم بروح المحل إن شاء الله وباخذ رقمه وعنوانه عدل ومايصير خاطرك إلا طيب

افضل ماركة للشانشيلا واللي مستمر عليها سنين اهيا ماركة prestige لانها ماركة جودتها عالية جداً

اهي اللي اطلب منها الاكل والاعشاب بانواعه والرمل

والعشب مثل ماتفضلت ينباع داخل جيس

ومفيد حق الفرو والبدن ويزيد المناعة والنشاط والذكاء بعد ويزيد العمر

وأخذ راحتك بالاسئلة أسأل قد ماتبي :)

[m7mad_87]

ما قصرت ولد عمي وبنتظار العنوان ان شاء الله