احترت فيه مدري وش اسوي

[شبابي]

السلام عليكم

يا اخوان ابقولكم قصتي مع طير الببغاء اللي عندي ، هو طبعا ببغاء أفريقي تفريخ هولندي، المهم اني شريته قبل سنة ونص تقريبا ووقت ما شريته كان عمره تقريبا سنة أو اقل شوي حسب كلام راعيه الأول

الزبدة ان هالطير ما قصرت معه، يوميا أغير الأكل له مرة واحيانا مرتين باليوم والقفص نظيف ولكنه رغم كل هذا عنيف جدا معي، هو من اول ما جبته وهو مهب أليف ولكن ما كان بهالدرجة

الحين لو ابي افتح غطاء القفص حقه بس نط على يدي وعضني رغم اني مثل ما ذكرت لكم ما سويت له اي شي يخليه يكرهني

العجيب في الموضوع انه مع اخوي أليف جدا رغم ان اخوي ما هو يمه ولا يعطيه وجه

الشي الثاني بالنسبة للكلام تعبنا معه حاولت اعلمه كلمات كثيرة بس ما نطق منها الا القليل

وبعض الكلمات ينطقها فترة بعدين يسكت عنها


الزبدة سؤالي للخبراء واللي أبخص مني في هالمنتدى الغالي:

طيري هذا فيه رجاء أو لا

لأني فقدت الأمل منه مع كل التعب اللي اتعب معه ولكن ما يتكلم كثير وعنيف جدا معي وش تنصحوني فيه ؟ أبيعه ولا أصبر عليه وأحاول أولفه؟

لكم كل الشكر وأنتظر ردودكم بفارغ الصبر

[كاسكـــو]

غريب ياخي الطير أفريقي تفريخ هولندي المفروض يكون زي الحمامه اليف

بس اعتقد انه اخذ منك موقف انت قاص جناح او قاص اظافره او مسوي له شي ؟ بما انه مع اخوك اليف شي يحير

وياخوي الزم على الانسان راحته وكلنا نبي طير اليف نتمتع به ونستانس عليه ونلعب معه الخ .....

اذا لك سنه ونص وطيرك معذبك بعه واشتر غيره

[طيري وياكل من يد غيري]

السلام عليكم اخوي بالعكس اذا هو وليف قبل يرجع لولافته بس اخوي اذا هالشكل انا افضل انك تقص جنحانه وتحطه على ستاند احسن لانه القفص الطير دائما يحس بقوته في القفص وانه مايبغي احد يتحكم فيه داخل القفص وجرب عشان لو حطيت ايدك وفوقها الثوب وتشيله ماراح يعضك وكرر راح يتعلم انا نصيحتي وهذا من خلال تجربه مع الوحوش وتقبل تحياتي

[ابو محمــد]

لانك ما روضته اقصد ما تجرات انك تروضة وتكسر الحاجز اللي بينك وبينه,,

نعم تستطيع انك تسوي اعاده تأهيل وتدربه من جديد لكن ارجع للمواضيع المميزه ,,

ويقولون اقعد على مجنونك لا يجيك .....

[شبابي]

مشكور أخوي كاسكو على الرد

بالنسبة لسؤالك بالعكس ما اذكر انه اخذ موقف مني

حتى بالنسبة لقص الجناح والأظافر مهب انا اللي قصيتهن له ، انا رحت به لمحل (فيفا) اللي بالرياض بشارع الستين وهو اللي قص اظافره وجناحه وكان معي اخوي اللي قلت انه أليف معه

وشكلي بأسوي مثل ما قلت أببيعه بس خايف ما يجيب لي نفس قيمته يوم أشتريه

[شبابي]

طيري وياكل من يد غيري مشكور على ردك وبالنسبة لكلامك صعبه اطلعه من القفص واحطه على ستاند لاني لو خليته على ستاند بيوسخ الارضية اللي تحت

واذا كان قصدك انه يحس بقوته داخل القفص، أنا أصلا أغلب الوقت فاتح غطاء القفص عنه ويصير هو متسند على اطراف القفص يعني ما احبسه انا

أخوي ابو محمد مشكور لردك
بالنسبة لكلامك وشلون تبيني أروضه او اتجرأ اني اروضه وهو يعضني ، احسها صعبة تروض طير يعضك، من أول ما جبته كان يعض بس كان اهون من كذا، العجيب انه مع اخوي اليف جدا سبحان الله العظيم

[fawzi]

اخوي المقصد من الاخ طيري وياكل من يد غيري انك تخليه على الاستاند افضل ليش لانه جميع الطيور تعتبر القفص مملكتها واذا حاول يعضك يااخي الطير معاه حق لانه يعتبر انك تهاجم علي مملكته هذا قانون الغابه وغريزه الطيور وبعدين انت قلت انو مو اليف معاي ومع اخوك اليف ياخي ممكن اخوك يجلس مع الطير وانت ماتجلس هو مو ضروري انك تقول انك كل يوم تحط اكل وماء لا اخوي انت غلطان البغبغاوات طيور اجتماعيه تحب ان الالفه والتجمع انا عندي بغبغاء مثلك من احط يدي في القفص يجعر بقمه راسه ياالله بس من يطلع بره القفص ماشاء الله كانه حمامه انا نصيحتي انك تخليه عندك هو طيرك وصدقني هو عارفك زين مازين لانه الافريقي سبحان الله يقرى افكارنا انت اصبر وش وراك الكاسكو يعيش من 50 الي 70سنه اذا انك اهتميت فيه يعني عندك سنه ونصف الطير يعتبر لسه صغير الله يعطيك العافيه والصبر زين اما من ناحيه الكلام غير الكلام ممكن انت تعلمه كلامات صعبه حاول فيه ابوع علمه كلمه اذا مانطقها غير كلمه غيرها وانا اكد لك ان الطير في مرحله تخزين للكلمات ماشاء الله الافريقي يحفظ اكثر من 800كلمه يعني انت تخيل الكم الهائل من الكلمات والمعاني والربط .تحياتي لك واسف على الاطاله وتقبل مروري

[شبابي]

مشكور اخوي فوزي على كلامك التشجيعي وانا ابصبر وأبحاول معه وعساه ان شاء الله يولفني

[MR.D]

الصبر مفتاح الفرج (14)

[أحبك توتو]

ما قصر الأخ فوزي

[@الزير@]

:p
الصراحه لو منك اجيب اخوي معاي بالسوق وابيعه وثانيا اول مره ادري ان قص الريش يسوي موقف

[القلم الجريء]

كلام الاخوان رائع وخلك وراه لحد ما يولف واعتبره تحدي لك وجرب معاه كل اسلوب

[طيري وياكل من يد غيري]

لعلمك الخاص اخي يالي تقول قص الريش ماينفع قص الريش يركد الطير ومايخليه يفكر انه ينزل من الستاند لاكن خله بريشه طالع شبيسوي فيك اذا بغينا الطير يثبت على الستاند لابد من قص ريشه وحنا ماجربنا طير ولا طيرين يعني يقول المثل اسال مو عيب وتحياتي