ردوا علي الآن الله يخليكم

[ـ قوتشي ـ]

الله يخليكم ردوا علي بسرعة نفسيتي تعبانة جداجدا

بسي قوتشي تعبان وقال لي الدكتور أن حرارته 41 وله ثلاث أيان

نوديه له وينظف اذانه ويعطيه أبرة فيتامينات ومن امس مايمشي

واليوم أكثر بس يطلع صوت حزين ولااكل ولاشرب .. وقال أنه في

دود وأعطاني حبة أذوبها مع جبنة وأعطيها إياه ..... وأخاف تسبب

له شئ مع الألم الذي فيه .......لأنه على كلام الدكتور يقول عنده

التهاب بالأذن وهذا من زمان وإلى الآن وهوتعبان ..

الله يخليكم لاتتركوني أحس أن بطنه كبير ومايتحرك من أمس

طلبتكم تطمنوني أنا تعبانة علشانه ولاأدري وش أسوي

لاتتأخرون أنا أنتظركم على أحر من الجمر .... الله يخليكم

من جد أنا أحب قوتشي عسى الله يشفيه

[الخبيرة ناديا]

طيب حبيبتي لاتخافين

اهم شي تخفضين حرارته اما بالابر او شراب.

لان واضح من وصفك له عنده حراره بدليل عدم قدرته على المشي والاكل

اذا تقدرين تروحين صيدليه بيطريه اقولك على شراب خافض للحراره

واذا ماعندك القدره ..لازم تاخذين منشفه وتبلينها بماء عادي وتمسحين على ظهر القط

كل شويه حتى تنخفض حرارته..

ثاني شي وهو الاهم اذنه ياليت توصفين لونها من الداخل وهل تطلع روائح او سائل اصفر؟

ولو صوره يكون افضل..

وكبر بطن القط بسببين اما ديدان منشره فيه او غازات وتلبك امعاء

ياليت تقولين لي كيف شكل برازه ؟ وكم مره؟

[أحبك توتو]

الله يشفيـه و و رآح اتفيدج ندوويـ لي رديتي على أسإلتهآ

[*Meme Love*]

الله يشفيه ويقومه بالسلامه

[ـ قوتشي ـ]

هلا وغلا نادية

حاولت أنزل صور ماعرفت لكن البراز لونه أسود الله يكرمك

والأذن لونها زهري خفيف ولافيه رائحة ولاسوائل والآن نزلت

الحراة عنده ..... لكن أبدا مايقدر يتحرك إطلاقا أنا خايفة أن

الأبرة أثرت عليه ..... وهو يحزن جدا لما يشوفني يصير

يطلع أصوات حزينة جدا قلبي يتقطع عليه .... بصراحة خايفة

عليه يابعد عمري قولي أي شئ علشان أرتاح ... وهو يرتاح

وهل إبرة الفيتامينات تؤثر عليه .... جدا متضايقة ... أخاف عنده

ارتفاع بضغط الدم لأن عيونه ماترمش وتنفسه سريع ... وإذا فيه

وش أسوي فيه ياقلبي أنتي معليش أزعجتك .... ياليتك تطمنيني

[الخبيرة ناديا]

شوفي انا عندي شك بالابره اللي يقولك البيطري انها ابره فيتامين

لان الفينامينات مستحيل تسوي الاعراض الخطيره الموجوده على قطك

انا اتوقع انها ابره الايفوماك اعطاها لقطتك حتى يعالج الديدان

لاكنها للاسف ماده خطيره على القطط وتسبب الوفاه في الغالب الا من رحم الله

وتستخدم للمواشي مثل الجواميس والبقر.

لازم تتاكدين من البيطري عن الابره وتسالينه عن اسمها..

لان للاسف اغلب بياطرتنا غير اكفاء واخطائهم كثيره وخاصه في الابر..

ومن متى اعطاه الابره من كم يوم؟

الان فقط خليك جنبه واعطيه سوائل بكثره مثل زبادي بعسل وحاولي تخليه ياكل

ومن بكره على البيطري تساليه عن الابره..حسبي الله ونعم الوكيل فيه

[ـ قوتشي ـ]

هلا وغلا حبيبتي

خوفتيني من جد ... بس المشكلة مايفتح فمه كيف أعطيه

وأشربه .... طيب إذا هي فعلا إبرة للديدان ليش يعطيني

حبة يقول ضعيها مع جبنة وخليه يأكلها علشان الديدان

معليش حبيبتي أزعجتك لكن أبي أحاول أعطيه أكل ...

[الخبيرة ناديا]

اعطيه الاكل بالسرنجه بدون ابره ( راس الابره ينزع)

ضعي السرنجه في طرف فمه وادفعيها على دفعات

لان قطك مافيه اعراض تدل على مرض معين عنده

والابره الايفوماك مشهوره عند البياطره ..

والحبه برضو علاج للديدان وهي الدرونتال ممتازه وماعليها خوف ابدا

ان شاء الله يتشافى ويصير احسن.

لاكن تاكدي من الابره

[سمكه فوشيه]

ياعمري الله يشفيه :(:(

ماشاء الله الحلوه ندو ما قصرت

[ـ قوتشي ـ]

أحبك توتو
mem love
سمكة فوشيه

الله يعطيكم العافية وعساكم ماتشوفون مكروه وشكرا على

وقفتكم الحلوة .... وفعلا الخبيرة نادية ماقصرت أبدا الله لايحرمني

منها ولامنكم .... بس دعواتكم لقوتشي أن الله يشفيه

[genan]

الله لايحرمك منه ويخليه لك طول العمر وسلامات مايشوف شر

[سارونه..]

يالله والله من جد حالته تحزن والله يشفيه وتطنينا عليه يارب

[طلال سعود]

الله يشفيه حاولي تودينه علي اقرب طيبي بيطري فاهم شغله

طمنينا عليه

[اخت امل]

اللة يشفية ويقومة بالسلامة وباللة طمنينا علية

[ـ قوتشي ـ]

الله يخليكم ويطول بعمركم ، كلماتكم كانت كالبلسم على قلبي

الجريح لفراق "قوتشي" والله العظيم والله العظيم ماهو يوم مر

علي اليوم ..... أناااااااااااا حزينة حسبنا الله على من كان السبب

مات قوتشي بعد معاناة تقطع القلب ... الله يخليكم لاتخلوني

أنا تعبانة نفسيتي ... ولولا غلاتكم مادخلت اليوم لكن أملي

بوجودكم اللي يسليني ....

[الخبيرة ناديا]

لاحول ولاقوه الا بالله

الله يجازيه البيطري اللي مايخاف الله

لازم تشتكيه ولاتتركين حقك يضيع ابدا

اللي صار معاك حيصير مع غيرك من القطط ..

الله يعوض عليك حبيبتي وانا عارفه شعورك والله..

ربي يصبرك يالغاليه

ودائما خذو الحذر مع الابر لانها من اخطر الاشياء على القطط

قلبي معاك

[ـ قوتشي ـ]

ياهلا بكل من شاركني مشاعري وعساكم ماتمرون باللي

مريت فيه أبداً أبداً .. والله وجودكم خفف علي الحزن .. لاتزعلون

مني لأني ماخصصت لكل واحد رد .... والله تعبانة وزعلانة جدا

وأعيد وأزيد وغلاتكم كان مادخلت ...........

حبيبتي ناديا

الله لايحرمني منك وفعلا كنتِ معي خير أخت الله يطول

بعمرك وتبقين بلسم هذا المنتدى الجميل بوجودك

لكن الله كريم حيث أخذ مني قوتشي و أعطاني

في هذه المحنة خير الأصدقاء الأوفياء ...........

[دلوعةقطوتي]

الله يصبررررك ويعوووضك خيررر
روووحي للدكتور وتناقشي معاه لاتسكتين لانه اللي سواه مع قوتشي بيسويه مع غيره
حسبي الله ونعم الوكيل