اكبر سوق في الشرق الاوسط للطيور

[adobe]

الاخوة الاعزاء
بعد زيارتي لاسواق الطيور في اكثر من بلد خليجي وعربي وحتى اسيوي
اتضح لي ان اكبر سوق للطيور في الشرق الاوسط هو سوق الطيور بالرياض وذلك من حيث التنظيم والمساحة الكبيرة وعدد محلات البيع وتنوعها والمستوردين والاعداد الغفيرة من الرواد من باعة ومشترين وهواة واحيانا سياح عرب واجانب وخاصة الخميس والجمعة
و تعرض اغلب انواع الطيور والحيونات الاليفة وغير الاليفة ووحتى النادرة والغريبة
واسمحوا لي اذا زعمت انه لايوجد اطلاقا مقارنة او مقاربة لبقية الاسواق في المملكة على وجه الخصوص وبقية الاسواق على العموم مع سوق الرياض فالسوق مفتوح طوال ايام الاسبوع من الساعة 8 صباحا وحتى الساعة 11 ليلا وليس كبقية الاسواق اما اسبوعي او حتى جزء من اليوم والمحلات مشتتة هنا وهناك
فبقية الاسواق متواضعة اذا قورنت بسوق العزيزية بالرياض .
المجال مفتوح للنقاش .
دعوة لم هم خارج المملكة او الرياض العاصمة بزيارة السوق ويرى بام عينه
والله من وراء القصد

[UAE_CONDOR]

يلة لو تحط صور للسوق
وشكرا

[تفاحه حمرا]

يمكن صح كلامك .. لانه نحن عندنا في الامارات اغلب المحلات متفرقه في اماكن عده ..وانتو عندكم كل المحلات في مكان واحد وهالشي حلوو يعني الواحد مايتعب لين يدور..والشي الثاني يخلي المحلات تتنافس في ارضاء الزبون من ناحية الاسعاار ...

[ابو اياد]

السلام عليكم ورحمة الله وبركاته
يا ريت تمتعنا وتوضع لنا الصور اذا امكن لانه بصراحه شوقتني لمعرفة الاسواق في السعوديه
مع الشكر

[بو ناصر]

السلام عليكم ورحمة الله

الحمدلله على السلامة اخوي adobe صارلك فترة قاطعنا عسى المانع خير ان شاءالله

وبالنسبة للسوق فعلا كان من افضل الاسواق التي زرتها وقد زرته عدة مرات
وشكرا اخوي

[Mr.Mo7al]

يعطيك العافية يا :) ادوبيadobe :)
وشكراً على هالمعلومات
بس لو تحدد لنا موقع السوق في الرياض
نكون ممنونين;)

[كاسكو البحرين]

شكراً على المعلومة
ونسأل الله لنا ولكم زيارة هذا السوق :D
بالتوفيق

[امير الحيـــــونات]

يسمون المحل(سوق الحمام)

[possessed]

mashkor oo ya36eel 1000000000000000 3afya :P

[مدرب الأفريقي]

ودي اروح سوق الرياض

[AL-MOHANDES]

هذا سوق وليس محل اخوي امير الحيوانات .. ;)


بالنسبه لتحديد موقع السوق يا أخ Mr.Mo7al

تعرف مخرج 15 بالدائري الشرقي ؟ ( اللي فيه مسجد الراجحي الجديد )

اذا عرفته كويس

خله على يسارك وامش ( وجهك جنوب ) خل ايكيا على يمينك وطواااااااااالي لمى يجيك مفرقين قدام الخرج ويمين يدخلك على الدائري الجنوبي روح يمين يصير على يمينك الصناعيه الجديده امش ووجهك غرب 3 نفق ادخل يمين مع الإشاره رح يسار امش 400 متر تشوف السوق على يسارك ( انت ادخل من عند النفق ) :) :) ...

وشكرا ...,,,,...

أخوكم :
AL-MOHANDES

[الجااارح]

تعليق بسيط على رد أخوي AL-MOHANDES للتوضيح ومع :
بالنسبة للمفرق اللي يقصده أخوي الكريم بعد إيكيا هو مخرج 18 طريق مكة
بعد ما تخش من طريق مكة هو الدائري الجنوبي وامش إلين ما يجيك شارع البطحاء وهو اللي يقصده أخوي AL-MOHANDES وتخش معه يسار وامش إلين ما يجيك كبري مشاه تلقى السوق على يسارك اطلع الكبري حق المشاه واعتبر نفسك في السوق


أخوي AL-MOHANDES
أعتذر لو تدخلت ولكن أردت التوضيح فقط لا غير و يعطيك العافية

[الطاير]

الاخ adobe ,,,,,,

زرت انا اسواق واجد ,,,, الا سوق الرياض باقي مارحت له ,,,

سمعت كثييير عن السوق هذا وصراحة ,,, يبغاله روحة قريب

شكراَ لك على اللفته والمعلومات وانشاء الله يكون لي تقرير قريب عن سوق الرياض ,,

بس اذا ممكن تحدد لي مكانه بالزبط لاني كل مارحت للرياض اضيع اهناك ساعتين ثلاث مادري من وين اروح !!!!! كل الشوارع زي بعض وصراحة مايخشخش وضعة الا الي عنده ماجلان في السيارة .


تحية
الطاير

[adobe]

شكرا للاخوة الفضلاء على الردود والمداخلات
اما بالنسبة لمكان السوق الاخوان ماقصرو بالوصف واحب اضيف ان السوق اسمه سوق الطيور المجاور لسوق الاغنام بالعزيزية جنوب الرياض امتداد شارع الملك عبدالعزيز ( البطحاء ) من ناحية الجنوب وايضا قريب من الحراج المسمى بحراج ابن قاسم واللي يخاف يتوه ويضيع ولا يعرف الوصف الطريقة انك توقف سيارة اجره ( تاكسي - ليموزين ) وتقوله روح قدامي انا وراك للسوق وعطه المقسوم واختصر الوقت والجهد وهاذي عادتي انا اذا رحت اي مكان ما ادل فيه .
اخوي ابو ناصر الف شكر على سؤالك عني
المانع خير انشا الله وانا شبه يومي امر واقرا مواضيع المنتد ى والاخوان ماقصروا تطرقوا لاهم المواضيع والجاي احلى.
بالنسبة للاخوان اللي طالبوا بصور للسوق احاول اني اصور وذا فيه احد معانا من اهل الرياض بهالموضوع يقوم بالواجب الله يعطيه العافية لاني بصراحة ماعندي كاميرا رقمية حاليا لكني باحاول ان اصوره مقاطع فيديو بالجوال

[كناري عشقي]

ما شاء الله
وانا من المتواجدين فيه بكثره ايام الخميس و الجمعه

واسم السوق (( اسواق التحسين للطيور ))

الله يعطيك العافيه وان شاء الله اخوي اقدر افيدك بصور بس يومي الخميس والجمعة .لان يكون الناس مليان و الأشكال تختلف من الحيوانات ....

[t'evez_10]

ممكن تحطون صور للسوق والمحلات

[Mr.Mo7al]

الف شكر للجميع......
المهندس , ادوبي , الجارح , كناري عشقي
على الوصف وعلى كل المعلومات المفيدة
وانشاء الله الاسبوع القادم نشوف السوق
واذا الله رزقنا وشفناه
ما راح ننساكم من الصور لكل ما يحتوي من طيوووور
اكرر شكري

[الكسيكوالدره]

مشكور على الموضوع
والصراحه انا سمعت كثير عن سوق الرياض وكل واحد راح له يمدحه
واتمنى ازوره باقرب وقت

[هيبه اسد]

السوق كبير ومنظم صراحه لكن الكلام على الطيور الي فيه مادري انا ..كثيره,, قليله؟ انا من زمان مارحت للسوق:)
شكراللجميع

[الجنتل100]

السوق يعتبر كبير ولكن الببغاوات المعروضة تعتبر قليلة وغير متنوعة قياسا بحجم السوق واكثر ما تجد فية الافريقي ويمكن تحصل ثلاثة او اربعة امازوني ما بين المحلات والحراج و المكاو نادر ما تحصلة انا لي اكثر من شهرين وانا ادور مكاو نظيف ما لقيت الا عند واحد في الحراج وللاسف مو ثقة . وعلى فكرة كنت موجود فية الاسبوع اللي راح وحصلت فروخ افريقي من هولندا عين سودا بس اسعارها نااااااااااااااار

واي استفسار حاضرين للطيبين وسلامتكم

[adobe]

شكرا للجميع على المداخلات والردود
الاخ الكريم كناري عشقي
الف شكر اذا تقدر تحط صور عن السوق وماتقصر
بس اذا بتصور السوق ياليت تصور المحلات والممرات وساحة الحراج يوم الجمعة وايضا صور للسوق من بعيد ومن جميع الزوايا قصدي تكون صور تخلي اللي ماشاف السوق يراه حقيقة ماثلة من خلال الصور واكرر الف الف شكر وانت قدها :) .
الاخ جنتل 100
بالنسبة للمكاو احيانا يكون السوق مليان من المكاو بانواعه وحتى الانواع النادرة زي السكارلت والعسكري وتجي مواسم . وبالنسبة للامزون فيه بس قليل صحيح وهذا على مستوى العالم ايضا الامزون الصح غالي ولايباع في السوق تحصله معروض عند اصحابه اما بقية الطيور والببغاوات فهي بكثرة على مدار العام .. شكرا لمداخلتك

[AL-MOHANDES]

مشكور اخوي الجاارح على التعليق ..
ومافيه اي خلاف

[TIGER]

مشكور اخوي بو هشام ومن جد السوق حلو وفيه مساحه جيده بس يبي لها تنظيم زي منت شايف يوم الجمعه يصك الحاره الجوا لو تنظم شوي تكون احسن ويعطيك العافيه ,,,,
الا على فكره...:)
وش اخبار الأمزونيات ;)

[adobe]

هلا اخوي TIGER
صحيح كلامك الجمعة يصير زحمة وخاصة السيارات تتعب ما لقيت موقف
والحقيقة ان المفروض الساحة تكون خميس وجمعة فقط وبقية الاسبوع تقفل
اما بالنسبة للامزونيات مثل ماتحب زيييييييييييييي العسل ياعسسسسسل .

[صويب الرمش]

انا اعتبر كل سوق وله مواصفاته يعني كل سوق يتميز بشيء عن غيره ...

انشاء الله يكون لي زيارة لسوق طيور الرياض اذا يسر الله بس وش رايكم في سوق الحسا ؟؟؟

يقولون انه زين ما ادري وش تعليقكم عليه ؟

[adobe]

انا اعتبر كل سوق وله مواصفاته يعني كل سوق يتميز بشيء عن غيره
كلامك صحيح اخوي صويب الرمش بس سوق الرياض يغرد خارج السرب اما سوق الاحساء بالنسبة لسوق الرياض ا لله يرحم الحال... هذا وين وهذا وين .
الله يحييك بالرياض ومرررررررررررررررراحب وليس من راى مثل من سمع

[yasert]

يعطيك العافية

[yasert]

ياليت اذا في احد من مدينة الرياض ويعرف بائع ثقة يدلني عليه
ابغى رمادي فرخ

[ابوماجد]

يعطيك العافيه يالغالي

[يعقوب افريقي]

السلام عليكم

كلام اخوي صحيح سوق الطيور في الرياض من أكبر الأسواق في المملكة وانا من ناحيتي كل اسبوع لازم ازوره لأنه قريب من سكني تقريباً بالنسبة لحراج الطيور يقام بعد صلاة العصر خلف السوق هذا في الايام العايدية اما في رمضان بعد صلاة الترويح مباشرة واحذركم من ( الشريطية ) يعني الي يبيعون ويشترون في الطيور انتبهو ترى يلعبون في الاسعار خاصة الي ما يدري الا من هدى الله منهم على العموم انت وخبرتك في الطيور تقدر تطلع الطيور الزينه وبأحلى الاسعار .
والسوق يقع جنوب الرياض على طريق الدائري الجنوبي مخرج حراج بن قاسم أو مخرج الحائر مشهور بها الأسمين وانت متجه جنوب بعد ما تاخذ المخرج تقريبا كيلو واحد ويجي على الجهة اليسرا ونت رايح جنوب واضح جداً ما يضيع وأيضا هو موجود بجانب سوق الغنم . لو تسئل اي واحد هناك من اي جنسية يعلمك علطول موقع السوق .

[يعقوب افريقي]

السلام عليكم

نسيت أعلمكم بعض الآسعار في السوق هذي الاسعار جديدة بتاريخ 15/9

فرخ الأفريقي غير الأليف 400 الي 500عمره ثلاث شهور تقريباً موجود بكثره

فرخ الأفريقي الأليف 550 إلى 600 عمره ثلاث شهور اربعه قليل في السوق

فرخ الأفريقي الكيني ( التمنة ) 350 الى 400 موجود بكثره

الافريقي الجامبو غير الأليف 800 ريال إلى 900 موجود بكثرة

الافريقي الجامبو الأليف بس ما يتكلم 1500 الى 1800 موجود

الافريقي الجامبو الأليف ويتكلم 2000 الى 3000 ريال على حسب الكلام الي يقوله ويصل أكثر من هذا المبلغ .

الافريقي الكيني ( التمنة ) الغير اليف 600 ريال الأليف 900 الي يتكلم 1300 تقريبا

الببغاء الامزوني من 2500 وطالع ما تحصل اقل من كذا وهذا السعر لللأمزوني للغير اليف ولا يتكلم وكبير في العمر بعد فوق السنتين وأنا حصلت المزوني يلو هد يتكلم بطلاقه بـ9000 ريال

الكناري على 140 ريال تقريباً .

الحسون بـ200 ريال تقريباً .

البندور 250 ريال تقريباً .

المينا الي تتكلم تصل إلى 2000 ريال والي ما تتكلم 800 الى 900 ريال

[الصوري]

وين الصور؟؟؟؟؟؟؟؟؟؟؟؟

[abady]

وماذا عن سوق الطيور اللي بالدمام او في الاحساء ؟

سوق جدة فقط يوم الجمعه نشيط وباقي ايام الاسبوع خامل خاصةً بعد أن تغير موقعه وصار الموقع الجديد بعيد عن الكثير رغم أنه منظّم.
تقبل مروري...

[مشاكس]

صح لسانك بس

لكنهم غشاشين شوي

واكثر طيوره وخاصة الحب والبادجي

تلقى فيها امراض واكثر مرض منتشر هو انه يكون ريش الطائر منتف


ومشكووووور يالغالي
وماقصرت

يسلمو الايادي




تحياتي
مشاكس

[راعي محل]

الاسعار الجامبو الهولندي بسعر 2000 الى 2300 يدون كلام نهائياً وبعضهم يبيعونه ب3500 بدون كلام

الافريقي الجامبو اذا درجه اولى جامبو 1200 ريال
الجامبو درجه ثانيه من 850 الى 750
الكلاسيكو بسعر 700 وتحت
الكنيي بسعر 250 ريال بالكثير الفرخ العين سوداء


الامازونيات غاليات بالحيل

اليلوناب الي عنده كلام يصل لل7500
البلوفرونت 3500للفروخ المحجله واليوم تم بيع طير محجل ب2500

[محمد الرياض]

الكنيي بسعر 250 ريال بالكثير الفرخ العين سوداء

عطني رقم المحل اللي يبيع بهالسعر على الخاص

[الأفريقي]

من نااحيتي اناا ..فعلا سوق الرااايااااض ....من افضل الأسواااق ..الي دخلتهاا .. واناا اييد كلام اخووي .. بحيث انا السوق فيه تنظيم بترتيب المحلاات .... وتنظيم ايضاا في بيع كل نوع من انواع الحيواناات مثلا بيع الطيور والكلام والزواحف والقطط والجماام والدجااج وغيرهاا ... صررااحه سوق على مستوى واشكرك على طرحك لهذا الموضوع .. ولاتحرمناا من موااضيعك ..

[اللايق]

ماشااءلله الله يبارك لكم فيه,,

ان شاءالله قريبا ازوره مع اني في جده..



ياليت لو تحط لنا صوووور