عندي ببغاء كاسكو الأفريقي ذو الذيل الأحمر أريد منكم حل ليترك العض والجعر والخوف

[محمد مبارك]

بسم الله الرحمن الرحيم

السلام عليكم ورحمة الله وبركاته أخواني الأعزاء عندي سؤال وأتمنى منكم تجيبوني عليه وبأسرع وقت
س1/ عندي ببغاء رمادي اللون كاسكو الأفريقي ذو الذيل الأحمر أعاني من مشكله معه صار له عندي مايقارب سبعة أشهر مازال يخاف مني ومازال يجعر ولاأدري ماهي الطريقه لجعله يترك هذي العاده وحتى مازال يعضني مرات يعضني بقوة ومرات يعضني عضات خفيفه أريد حلاً لهذه المشكله وأريد أن أروضه حتى يهدى ولايخاف مني وجزاكم الله كل خير أخوكم/ محمد مباااااارك

[عبادي1]

هلا محمد

اول شي خل الطير بمكان واحد تجلسون فيه دايم وتمرون من جنبه ويكون المكان مرتفع نوعا ما


لو تخرم بدريل وتعلق القفص افضل

اول اسبوع غير مويه واكل وتنظيف القفص إلين يتعود عليييييييييييييييك

وانت بتشوف بنفسك إن الجعير خف أو وقّف نهائيا

بعدها إبدا حاول تأكله من يدك شيل عنه الاكل ساعتين الى 3 ساعات وأكله بيدك

الله يعينك بتتعب لآني ابيك تحط يدك وماتشيله إلين يجيك الطير بنفسه ياخ الاكل من يدك ..لاتقربه انت واذا بعد عنك تلاحقه بيدك تبيه ياكلها غصب هههههه

اذا بدا ياكل من يدك هذي بتكون نقله ايجابيه


بعدها ابدا تأكله بيدك ولكن دخلها له داخل القفص


بإذن الله تعالى تشوف الفرق لكن الموضوع يحتاج صبر
احتمال شهر الى شهرين
وممكن أقل وهذي أمور يدخل فيها عمر الطير ومدى ذكاءه
والجعير بيختفي نهاااااااااااااااااااااااااااااااااااااائي
بعدها عاد تبدا تحاول تطلعه على يدك .. وافضل إنك تنزله على الارض وبتلاحظ إنه يبرم يدور مكان عالي يطلعله او يطلع للقفص
أنت ماعليك إلا تنزل يدك وتقوله إطلع

خل يربط بين الكلمه وطلوعه لليد

طبعا بيرفض الطلوع وبيعطيك كمّن عظه محترمه لكن استحمل الين يطلع وارفع للقفص

المره اللي بعدها لاتوديه القفص بسرعه خله شوي على يدك عشان يتعود الوضع وعلى هالوضع استمر

وخلي حك الراس آآآآآآآآآآآخر مرحله

[ksa-dhoom]

امسكه مع تحت بقماش وغط كل شي عاد وجه وحط يد قدامه ويد وراه ولمس راسه كرر الطريقة3ال4 مرات في اليوم