الميني مكاو

[هذال العراقي]

هل للميني مكاو القدره على النطق والتكلم

[يوفاوي الكويت]

اي نعم متكلمه ممتازه

بس اهم شي التلقين الجيد

[ndman]

اي نعم .. واذا تبي للبيع ادخل بقسم البيع تلاقي واحد نظيف

وحلو للبيع اليف

[جعفر السامرائي]

اخالف الاخوة اللي سبقوني ، شفت في بغداد بالسوق شخص كان جايب ميني مكاو يريد يبيعة بـ800 دولار مع انه كان جدا أليف وجميل ونظيف الا انه لا يتكلم سوى سبعة كلمات ، وصاحبه يقول حاولت ألقنه بعدد أكثر من هالسبع كلمات ما توفق مع أنه استخدم ذات الطريقة التي لقن بها الكلمات السبعة : حبيبي ، مرحبا ، بوسة ، جوعان ، عطشان ، يا رب سترك ، فقط هالكلمات كان يقولها بوضوح

انصح تشتري الكاسكو صغير بالعمر وتعلمه كل شيء بنفسك

سلامي

[هذال العراقي]

يا حبيبي جعفر رحت لبغداد (سوق الغزل ) كنت ناوي اشتري كاسكو عمره من ست الى ثمانية اشهر

لكن مالقيت شفت ميني مكاو عند صاحب محل كان يريده ب250 دولار فرخ ليس اليف ولا متكلم

وبالنسبه للاخوه مشكورين على المرور

[fawzi]

الميني مكاو ليس بمتحدث ممتاز نسبه تعلمه للاكلام جيده اما بالنسبه الي تعمله الحركات البهلوانيه ممتاز

[جعفر السامرائي]

عزيزي هذال مثل ما قال الاخ فوزي ، الميني مكاو ممتاز في تعلم الحركات البهلوانية
أما بالنسبة للكلام مو متحدث ممتاز
وصراحة الكاسكو موسمه الان انتهى ، يعني كل اللي تحصله كبير بالعمر
انا اخوك ادور اكثر من ستة شهور يلا حصلت لي واحد وبسعر 600 دولار ، عيونه رصاصي غامق كان
لازم تتعب يلا تحصل.
وأكو مشتل في ساحة ميسلون ببغداد ، مشتل الدكتورة آلاء ، ممكن توصيهم يجيبون لك

سلامي

[هذال العراقي]

انا هم لقيت اصغر كاسكو موجود عمره 11 شهر

عاملت عليه قلي نهايته 550 دولار

[جعفر السامرائي]

هم زين بس لازم ادور اكثر حتى تحصل اللي تريدة

[هذال العراقي]

افتريت كل سوق الغزل

[جعفر السامرائي]

سوق الغزل صراحة اسميه سوق الحرامية
انا ما اخذت طيوري من سوق الغزل
اذا تريد اسألك على كاسكو

سلامي

[هذال العراقي]

لا اخي مشكور ان شاء الله راح اخذ زوج دره مطوقه افضل

[الافندي]

اهلاً اخي هذال انا مع اخي جعفر في بعض الامور بس بالنسبة انك تقول انه سوق الغزل سوق الحرامية فأنك بهاي الحالة حكمت على كل الناس البي وهذا شيء غلط بس مو كل اصابيعك سوى المفروض اتكول اكو نااااااس واني اييدك بهاي الشغلة بي نااااس احنة انكول عليهم بالعراقي قفاصة او يغنون بالاسعار .بس مو معنى انهم كلهم حرامية لا بهاي مو وياك وبالنسبة لاخي هذا تدري احنة بالعراق هسة شويا الناس او الاهواة بدو يلتجئون لتربية الببغاء لانه طائر ذكي وشكله جميل واذا كان من النوع المتكلم كان وجوده في البيت هوى متنفس للبعض لانه بسبب الظروف الي دنمر بيها اكيد الواحد يكضي كل وكتا يمهن اكو ناس تستورد ومتعرف شنو السالفة يعني اذا اتكلة اريد مثلاً كاسكو صغير يكلك هذا اتباوعة تلكا عيونه صفرة يعني عمرة فوك السنتين يعني لازم اول شيء تكون عندك فد معلومة ولو بسيطة حتى ما تنغلب واذا اتحب اكو مشتل بمنطقة المنصور مجاور نادي الصيد عندة خوش كاسكوات وضغار بس هذا اشويا اسعارة غالية بحككم المنطقة طبعاً واذا اتحب روح لمنطقة الحرية اكو بيها سوك ما هيج امور واكو طبعاً كاسكوات انتاج محلي ورخيصة وحلوة وهم عمرها صغير واي شيء اني بالخدمة .........

[هذال العراقي]

مشكور يا اخويه بس انا اخذت زوج دره مطوقه افضل من الكاسكو ومن الميني مكاو

[الافندي]

مبروك عليك الزوج اخي بس من ناحية الكلام ماكو احسن من الكاسكو والامازوني تحياتي

[هذال العراقي]

اعرف يا اخي بس ما لقيت امازوني واسعاره غاليه فلذلك اخذت زوج دره

ومشكورين تعبتكم ويايه

[جعفر السامرائي]

مبروك عليك صديقي وان شاء الله يتربون بعزك وترتب لهم القفص الزين بالبيت والمكان الحلو وتداريهمحتى يبيضون لك وينتجون
بالنسبة للاخ افندي ، اني وياك طبعا الناس الزينة على صفحة ، بس المشكلة يا ما اقلهم بسوق الغزل ، الاغلبية قفاصة ويغنون بالاسعار.
واكيد اكو زينين ، فالزين يبقى زين.

والافندي اذا تندل احد ببغداد يبيع امزونيات و موقفاص وشغلته مضمونه اعطيني خبر :)
او يبيع العاب للببغاوات ، لأني ما شفت هالشكل في سوق الغزل

سلامي