تصرفات سيكو

[عاشقة الطيور]

السلام عليكم ورحمة الله وبركاته

عندي 3 أسأله بشأن تصرفات سيكو

بسم الله الرحم الرحيم
السؤال الاول:.
انا اذا اقدم له تفاح او برتقال يقعد يقطع ويفلت ولا ياكل واليوم حاولت معاه يالله يالله كل التفاح

السؤال الثاني:.
انا دايما ملاحظه عليه من اول يوم شريته طلعته برع القفص دايما يرفرف بجناحه قلت يمكن لان ماكانو يطلعونه في المحل ولليوم ماشاءالله عليه دايما يرفرف بالقوه وبعدها يتنفس بسرعه ويتعب

السؤال الثالث:.
ولاحظت عليه ان اذا حطيت يدي عند منقاره دايما يلف راسه بس احاول معاه واذا لمس منقاره صبعي يطلع صوت مثل صوت العطاس بس مايعطس

فلو سمحتو ممكن تفسرون لي تصرفاته؟

[classic]

بالنسبة للسؤال الثاني انا عندي نفس الشي صار لي الحين اسبوع اطلعه على الاستاند وكل مااطلعه على طول ينفض ريشه ويرفرف بجنحانه ويحكحك بمنقاره على الخشبة كانه مبسوط اخذ راحته مع العلم انه لي تقريبا 3 اسابيع شاري الببغاء ..... اما باقي الاسئلة انشالله يفيدونك اهل الخبرة

[كاسكو البحرين]

السؤال الاول:.
انا اذا اقدم له تفاح او برتقال يقعد يقطع ويفلت ولا ياكل واليوم حاولت معاه يالله يالله كل التفاح ج: شي طبيعي جداً لانه الطير ما كان متعود على هذه الوجبات بالذات وأغلب الطيور اللي من المحلات تكون مطعومه بحب دوار الشمس والفول السوداني وتقطيع الطير للتفاح او للبرتقال هذا كبداية تذوق الطعم ومع مرور هذه الوجبة اكثر من مرة راح يتعود مثل ما حصل مع طيرك ، حاولي تقديم هذه الوجبات مع رفع الأكل المتعود عليه قبل ساعة او ساعتين بالكثير
(ملاحظة:التفاح يتم تقطيعة بدون البذور لأنه البذور سام للطير)

السؤال الثاني:.
انا دايما ملاحظه عليه من اول يوم شريته طلعته برع القفص دايما يرفرف بجناحه قلت يمكن لان ماكانو يطلعونه في المحل ولليوم ماشاءالله عليه دايما يرفرف بالقوه وبعدها يتنفس بسرعه ويتعب
ج: صحيح كلامك يا عاشقة الطيور والكل يعلم عند ما يكون الطير في المحل عادةً الإهمال موجود وهذا يجي عن عدم تفرغ صاحب المحل بتطليع جميع الطيور خارج القفص لفترة معينة ، عموماً إظهار الطير خارج القفص في اليوم نص ساعة او ساعة مهم جداً جداً ، هذا يساعد على الحفاظ على صحتة الطير من الخمول والكسل ، أيضاً نرجع ونقول هذا تصرف طبيعي تحصل مع كل الطيور


السؤال الثالث:.
ولاحظت عليه ان اذا حطيت يدي عند منقاره دايما يلف راسه بس احاول معاه واذا لمس منقاره صبعي يطلع صوت مثل صوت العطاس بس مايعطس
هذا الصوت اللي يخرجه الطير (تعبير عن عدم القبول)
خذي عسل وخليه باليد وعند ما يقترب الى صبعك بحس بطعم مميز لدية وهو في نفس الوقت مفيد ، هذه الطريقة تستخدم عشان نعبر للطير ان اصابع الإنسان ليست مأذية فهي تحمل مذاق العسل :p وخاصة طيور البورت (البغبغاوات) تستوعب هذه الخدع والتعبير من الإنسان الى الحيوان
كرري هذه الطريقة اكثر من مرة وشاهدي النتيجة بعد اسبوع ، وللعلم لازم يكون الطير أليف معك لدرجة ممتازة عشان تقدرين تمسكين وتمسحين على المنقار لأنه منطقة حساسه بالنسبة له
ولكن إن فهم المراد والمقصود سينعكس حال الطير من الرفض الى القبول والمرح


بالتوفيق

[عاشقة الطيور]

مشكور اخوي classic على المشاركه وان شاءالله تستفيد من ردود الاعضاء :)

والله انك ماقصرت يا كاسكو البحرين كفيت ووفيت يجزاك الله خير

لا الحمدلله من هذي المنتدى الرائع والاعضاء الاروع عرفت ان لب التفاح وهي بذور التفاح سام له

والله اهو اليف بس شوي فيه عناد يعني ينفع معه طريقة العسل ولا ما ينفع؟

وان شاءالله مالوعت جبدكم بأسألتي الي ماتخلص:D

[Mr. MeMo]

كنت ابي اعقب على الموضوع

بس بعد كاسكو البحرين مقدر اعيد و لا ازيد

الله يعطيك الف عافيه

[كاسكو البحرين]

مشكور اخوي classic على المشاركه وان شاءالله تستفيد من ردود الاعضاء :)

والله انك ماقصرت يا كاسكو البحرين كفيت ووفيت يجزاك الله خير

لا الحمدلله من هذي المنتدى الرائع والاعضاء الاروع عرفت ان لب التفاح وهي بذور التفاح سام له

والله اهو اليف بس شوي فيه عناد يعني ينفع معه طريقة العسل ولا ما ينفع؟

وان شاءالله مالوعت جبدكم بأسألتي الي ماتخلص:D


التجربة خير برهان :)

اهلا وسهلا

[عاشقة الطيور]

مشكور اخوي وماقصرت
اليوم وانا ابي اجرب طريقه العسل حاولت معاه لكن مب راضي يعض صبعي رحت غسلت يدي ويوم رجعت كنت ابي اجرب احط يدي فوق راسه وتفاجأت انه خلني امسح على راسه واحكه ومضى الوقت وصرت امسح على راسه وظهره وحتى تحت منقاره:)