سؤال للمحترفين في التعامل مع الثعابين السامه

[عاشق عود]

السلام عليكم ورحمة الله وبركاته

يا شباب انا قرتت اصير انتحاري

وانتقل من الأصلات للثعابين السامه

لكن ودي اتعلم كيف اقدر اتعامل معها

وأهم سؤال عندي كيف أشيل أنيابها
وهل يزول الخطر اذا انشالت انيابها او لا ؟؟

[مجرد شاطف]

الثعابين الغير سامه انواعها كثير وحاول انك تربي اكبر عدد منهم
لكن نصيحه مني لاتقرب السام , ماراح يزول الخطر لين تموت . لن مهما تقلع انياب الافعى , راح يخرج انياب اضافيه
وانت الله يهديك كأنك حاط موضوع وتقول كيف اعذب الثعبان ؟
انت غير مجبور انك تعذب الثعبان على حساب وناستك
وهالموضوع قد تطرق له واحد من الاعضاء واغلقوه . .

[jassim99]

اذا شلت انياب الثعبان السام ماراح ياكل

لان الثعابين السامه ماتعصر مثل الاصلات والبوات

يوجد طرق لأزالة انياب الثعابين السامه لكن تعتبر تعذيب لانه بيمتنع عن الاكل عشان كذا مانتطرق الى مثل هذي المواضيع في منتدى توزوو

بالتوفيق

[عاشق عود]

اهااا
جاني صل أسود
وبصراحه شكله مغري ويعجبني الحماس والوحشية اللي فيه
وودي اشيل انيابه واطقطق عليه

لكن لو اخليه بأنيابه هو بيطقطق علي

بعدين يا اخوان هذا يعتبر من الفواسق اللي اذا صادفتك اقتلها في الحل والحرم
وهذا شي عن الرسول صلى الله عليه وسلم وانا بصراحه ما احفظ الحديث
لكن الحية من ضمنها

وانا لو ما شلت انيابه
اباخذه للبر وانهي حياته هناك

يعني هو ميت ميت الله لا يعوق بشر
بس كان ودي اتسلى عليه قبل يموت

[yazo]

اخوي طالما انك تقول ميت ميت ...
ليش تعذبوا من الأساس وتقتلوا وهو اصلا ما صادفك في طريق او آذاك ؟
خلاص طلعوا البر وسيبوا يشوف رزقوا ^_^

[Octopus]

هل قراءت معلومات عن هذا الثعبان السام جدا ؟

متفق مع جاسم

و على فكرة يستخدم هذا الصل سمه لقتل الفريسة عن طريق العض كما يفعل قريبه الكوبرا

وعلى فكرة لا توجد مناعة ل سمه حتى الحين

و حتى لو قتلته بيكون بلا فائدة

[بلاك بيري]

ما انصحك اخوي بهذا النوع من الثعابين لأنه لا يمزح ولا يعرف الا اللدغ
وانا كطبيب شفت حالات بسبب لدغات ثعابين سامه وللأمانه وبكل صدق في حالات ما قدرنا نلحق عليها وتوفت بسبب التسمم
انتبه على نفسك وانا اخوك تراها ماهي لعبه الخطر خطر

[|| PyTHoN ||]

مثل ما قالولك الأخوان القرار بإيدك ،
السام ما يتغشمر و بحاله انك إنعضيت تقريباً انسى حياتك
السبب مستشفياتنا عادةً لو ما كان دائماً ماهم مستعدين
لحالات نفس هاذي لأنه نادره ..

و حتى بعض السموم مافيلهم مصل مضاد له عندنا ، فإبعد
عنهم قدر المستطاع و السميه لا تعدي الكوبرا الكاذبه و ابو
سيور ، لو انك حاب الشرس و الخطير و هالأشياء في منهم
غير سامين ، أمثال الرات سنيك من أكثرهم عدوانيه ، و ممكن
الأصله الشبكيه أو الأناكوندا ..

و بخصوص انك تقتلها فعلاً يجوز لكن مو انك تروح تدورها و تروح
لمكانها بس عشان تلقاها و تلعب فيها بالأخير تذبحها ما يمشي
هالكلام ، تشوفها اهي مثلاً دخلت ببيتكم مكان فيه ناس او هالأشياء
أما هي بمكانها و انت الي رايحلها فـ لا

بالتوفيق ،

.
.

[عاشق عود]

كلام جميل
ومعاكم حق انا قريت عن الصل الأسود وعرفت انه نوع خطير جدا

لكن أنا عندي أصلة بورميه
فيها بروووود عجيييب
اشيلها واقلبها وانزلها عالارض
وتتحرك بكل هداوة

ودي بشي شرس شوي
علشان أحس بمتعه وانا اتعامل معاه

وللأسف الأصلة الشبكيه والاناكوندا نااااادر تلقاها
وان حصل ولقيتها تلقى سعرها غالي جدا
والرات سنيك اول مره اسمع عنه


لكن الصل الاسود متوفر ببلاش في جحور الضبان
وأبشركم قتلته بعد ما فكيته شفت قدامي وحش ما بقدر اشيل انيابه
فقتلته على طول
وأخذه اليماني اللي يشتغل بالمزرعه وأحرقه
قلت ليش ؟؟ يقول ان الدواب بتجي على ريحته

مدري هذا كلام صحيح ولا بس معتقد عندهم

المهم ألف شكر لكم عالنصح
أنا بحاول أدور لي ابو عيون يمكن يكون حار شوي
اذا فيه احد عنده ويبي يبيعه يتواصل معي

[مجرد شاطف]

الاصلات بشكل عام بطيئه الحركه
لاتمسك الاصله اللي عندك كم اسبوع وبعدها راح تشوف كيف تكون شرسه معك ..
الكوبرا العربيه اتوقع ممكن تلقاها بالبر وممكن تشتريها بسعار ارخص من الاصله ..
ابو عيون بعد ممكن تلقاه بالبر وسعره رخيييص جدا

[Octopus]

بالنسبة ل الكوبرا الكاذبة او كما تسمى ب ابو عيون هي من الثعابين ضعيفة السمية يعني سمها غير قاتل للبشر فقط قاتل للحيوانات الصغيرة مثل القوارض وغيرها:)

[|| PyTHoN ||]

خلك من الرات سنيك و هالأشياء عندك الأرقم ممكن تحصله بالبر
او لو تشتريه رخيص 300 ريال حده لو كان كبير ، شرس و عدائي