(كاسكو) هل ممكن الببغاء ابدا مايتروض؟

[Arashi]

السلام عليكم ورحمة الله وبركاته

رجعت بخصوص نفس الكاسكو اللي مأذيني من 4 شهور...وهالمره عندي سؤال واحد عشان أتخذ قرار نهائي بخصوص بيعه

هل توجد حاله ان الببغاء عمره ما يتروض 100% مهما المدرب يحاول معاه؟ (لو نقول ان العيب من شخصية الببغاء نفسه)

يمكن البعض يذكر اني كتبت انه كل اسبوعين ينسى اللي عملته ويرجع من الصفر عضاض ومؤذي وحتى مايرضى امسح على راسه...للتأكيد انا جربت التقرب اليه بالطعام المنوع والمفضل واللعب...جربت معاه المنشفه واسلوب مسح المنقار والبدء بالارجل وكل ماهو مذكور في المنتدى

اخيرا جربت طريقه نجحت مع اللي كانوا عندي قبله وهي اني احط راسه على كتفي او تحت الرقبه وامسح عليه...ومثل الباقي تقبلها بسرعه وحبها وصار هو يجي عندي بنفسه عشان امسح على راسه...لكن وبعد مرور 3 اسابيع اجوف بدا مستواه يتراجع وصار يعض ويعاند ومايرضى امسكه لدرجه اني فقدت صوابي اليوم وعطيته كف ورجعته القفص
تخيلوا حتى التصفيرات ماصار يصفر وصار يصرخ كأنه فرخ عمره 4 شهور

حاليا كمل 8 شهور لكني احسه بنفس غباءه وعناده لما كان 4 شهور (يعني رجعت للصفر)...والله اللي كانوا عندي تعلموا التصفير في عمر 5 شهور والكلام بدوا فيه 7 شهور...مسح عالراس اخذ منهم اسبوعين إلى شهر وتعلقوا فيني بجنون...الا هذا النحيس...والغريب انه مايحبني الا لما اعصب عليه او ابتعد عنه هني يحس بالذنب...لكن ايش الفايده اذا كل ما دلعته او احسنت معاملته يرجع مؤذي؟ يعني كل ما الامور تحسنت وصرت اعطيه اللي يبيه يبدأ شوي شوي يتمرد...فعلا امره غريب احس كأن جدامي طفل ادمي متمرد مش ببغاء يتروض وخلاص @@"

فسؤالي مره اخرى: هل في نوعيات ميؤوس منها؟ انا اللي أبغيه واحد يتروض 100%...يعني متى ما قلت له "راسك" او امد صبعي ينزل لي راسه (نفس اللي كانوا عندي)...لأني سمعت من احد المدربين ان مب كل الببغاوات توصل لهالمرحله..البعض يتراجع والبعض يظل عند مستواه معين غير مرغوب فيه طول ماهو عايش...فلو هذا احتمال يظل بهالمستوى أضطر أبيعه واشتري غيره (أتمنى اللي يجاوب يكون متأكد من المعلومه ^^)

[monybat]

السلام عليكم اخي الفاضل

دون الدخول في نقاشات طالما وصلت لمرحله انك طربته بيعه افضل لك وله لان في الاول طير واستيعابه مو مثل الانسان
اما بالنسبه للتدريب كل شي يدرب وياخذ وقت ولازم صبر

في موضوعك سألت وقلت ارجو ان اللي يجاوب يكون متأكد من الاجابه
انا متأكد من شي واحد طالما الطير عصبي ومزاجي ومتغير الطباع وقمت انت بضربه
فأكيد انك لو حاولت من اليوم لي اشهر قدام ما راح يأمن لك فارجو بيع الطير خذ واحد مدرب ترتاح من التدريب وهو يمكن يدرب مع شخص اخر لان عاده الطيور اذا اخذت موقف او تعرضت للضرب الخ لا تأمن لاحد بعد ذلك
تقبل مروري واسف على كلامي اذا ازعجك
بالتوفيق

[Arashi]

بالنسبه للضربه هاذي فالحمدلله ما أثرت......لما رجعته القفص رجع يناديني ومن شوي فتحت القفص وقام نزل لي راسها امسحه وطلعته وداعبته ونزل راسه لي على يدي وتقبلني على طول...والحين ابغي انزله من يدي مب راضي هههههه...يعني نسى الكف نهائيا ^^

هو متأكده انه يحبني ودايما يناديني لدرجه انه مايرضى يقعد مكان بدوني...يعرف صوتي من بعيد وحتى صوت خطواتي وتليفوني...لكن المشكله انه يستمر فترة اسبوعين أليف حبوب ومسالم وفجأه يتغير علي مع اني مدلعته بشكل كبير...ثم يرجع أليف وفجأه يتغير...كثير من المدربين ماقدر يساعدني واعتبر الامر غريب والبعض وصفه بالمستحيل

وشي ثاني غريب ان الضربه رجعت له صوابه...لكن لو كانت هاذي الطريقه الوحيده لتأديبه ماراح استمر جذي لأن حرام حتى لو الضرب هو اللي ينفع (اعرف مدرب في محل يضرب طيوره عشان يتروضون وطيوره ترويضها اوكي)

معاك حق في كل الاحوال بيعه أفضل بما انه من النوع العصبي وماله امان..تظن ماراح يتحسن بعد شهرين مثلا صح؟
يمكن في ناس تحب هالنوعيات لظن البعض انها تتميز بسرعة الكلام...لكن الكلام عندي اقل اهميه من انه يكون أليف

يالله توكلنا على الله ^^

تسلم اخوي ^^

[monybat]

في مثل يقول
خليك على مجنونك يا يجيك اللي اجن منه هاهاها

يعني هي رؤيتك انت في الاول والاخير بس اخاف تبيعه وتشتري اخر يتغير عليك او يكون مريض او او

فهذا نصيب اصبر فالصبر مفتاح النجاح انا كان
عندي امازون بلوفرونتد كلمة وحشي قليله عليه لدرجه انه بالقفص وخايف من نفسه هاها
والله العظيم ما كمل الاسبوع الا وكان طالع اليد واولادي يلعبو فيه لعب ورحت وبعته لصديقي عجبه جدا ولافته وخفت انه ينحسد طلبت مبلغ عالي والمسكله انه وافق وقالي ابيه فعطيته الطير
ما شاء الله الطير هدد في بيته ويتكلم ورائع
رحت اشتريت اخر فرخ ٣ شهور الا انه الان عندي ولا تكلم ويعض الاولاد وساعات يجعر
بس ميزته شكله لو لفيت ما راح القى نفس الشكل انا اسميه زرافه فرونتد وذلك لطول الرقبه جدا بشكل واضح بس تاعبني جدا من العض ويقف على صحن الاكل ويتبرز اكرمكم الله ويبهدل حوليه دوخني جدا

خلاصة الكلام ان الانسان يتعلم من تجارب الاخرين ولا داعي اني اخسر كي اتعلم
يارب تكون وصلت المعلومه لك
وبالتوفيق

[Arashi]

تبارك الرحمن اللي بعته لصديقك فعلا كان رهيب بما انه من اول اسبوع ركب عاليد وتوالف مع العيال الله يخليهم لك ^^ ذكرني بأول كاسكو اشتريته...صحيح كان متوحش ويجعر بس في خلال اسبوعين تروض والاسبوع الثالث بدا ينطق اسمي وتعلق فيني بجنون...لكن اختي صرخت عليه ومات من الحزن..عيبه كانت شخصيته وايد ضعيفه ):
اللي عندي الحين كف ما أثر فيه ما شاء الله ههههه يمكن الحين بديت افهم قصدك...احيانا العيوب هاذي تكون ميزه في الببغاء استفيد منها مستقبلا ^^

لفت نظري كلامك عن جلوسه عالصحن...انا اللي عندي نفس الشي كان مطلع عيني ما يجلس الا عالصحن وخفت رجوله تتأثر...تعرف ايش سويت؟ رخيت براغي الصحون عشان تلف فيه لما يحاول يركب...والحين يقعد عالخشب ولا يفكر يركب الصحن مره ثانيه XD ان شاء الله الطريقه تفيد ببغاءك ^^

بالنسبه للبيع فماراح أستعجل مثل ما نصحتني...فكرت بعد فتره اشتري واحد ثاني واروضه على صوب (بدون ما ببغائي يدري طبعا XD) وبعدها بقرر ايش اخلي وايش ابيع (عالاقل أستفيد لما ابيع احدهم بسعر عالي XD)

جزاك الله خير اخوي والله يوفقك في ترويض الزرافه اللي عندك ^_^

[monybat]

الله يخليك يارب وشكرا لك

[ramy01011]

انا لست خبير في هذا الموضوع لاكني قرأت منذ فترة ان الببغاوات في فترة معينة عندما تصل لمرحلة البلوغ فأنها تصبح عدوانية و متقلبة المزاج هذا طبعا بيكون لفترة معينة ثم تعود هادئة مرة اخري ممكن اخي يكون ببغائك يمر بهذة الفترة و الله اعلم

[monybat]

اخ رامي

بلوغ الببغاوات في سن الخمس سنوات عندما تكون العين صفراء

وما تقولة انت ينطبق على الامازونيات وان بعض الهواه يقدرون تمييز الذكر لانه في هذه المرحلة من العمر يتغير مزاجه
وبالتوفيق

[مح ـمد]

طيب بيعه وخذ لك واحد جاهز

[ramy01011]

اخ رامي

بلوغ الببغاوات في سن الخمس سنوات عندما تكون العين صفراء

وما تقولة انت ينطبق على الامازونيات وان بعض الهواه يقدرون تمييز الذكر لانه في هذه المرحلة من العمر يتغير مزاجه
وبالتوفيق

متشكر لك علي تصحيح المعلومة اخي الكريم

[dr.tooth]

من تجربة بسيطة
وفلسفة مقبولة

الحيوانات تحتاج الى شي يستهلك طاقتها
وفي الحبس تبقى الخيارات محدودة
--------------

انا الكاسكو اللي كان عندي اليف جدا ولعوب ومتكلم
لكن مشكلته العض ...
وبعد مراقبة ومتابعة

وضعت له حبل من حبال الجمال (صوف او قطن... المهم مش بلاستيك)
وبدا يعض عليها عض
ولاحظت انه ما صار يعضني

شلت الحبل منه فترة ... اصبح يعضني تاني
----

مثل البساس ... تحتاج شي تخربش عليه

[Arashi]

بالنسبه للعدوانيه اللي في عمر معين سمعت انها ايضا مشكله عند فروخ الدره...لكن هذا يحصل لهم في وقت مبكر ويروح بسرعه...الكاسكو عندي عمره 8 شهور ويقولون ان المفروض يكون هادئ بعد الست شهور...لكن هذا اللي عندي حاله خاصه هههه..بس أعترف انه شوي اهدأ من قبل شهرين لكن يرجع عصبي بين بفتره وفتره مب لاقيه السبب

اما العض واللعب فعندي يفضل اللعب وحتى المداعبه داخل القفص وفي الخارج يحب يتفرج علينا ويسترخي...واغلب الاوقات مايرضى اداعبه في الخارج.....في الخارج عادة يرمي العابه ويادوب يشدّه قرطاس او قطعة ورق (يحب الشي اللي يتنتف -__-") وفي الداخل كل شي يعجبه..فأظن هالشي يختلف من ببغاء لآخر والله اعلم.

لكن المشكله ان ظل على هالحال..توني اقرا في أحد المنتديات ان الببغاء لو ما تم ترويضه كامل في خلال 6 شهور من شراءه فراح يظل على هالمستوى على طول (يعني بقى لي شهرين)...فهل هالكلام صحيح؟

معليش يمكن أسئلتي كثيره لكن ناويه اوصل لمستوى المدرب المحترف واروض وابيع وهكذا ^^

[محمد الفلوجي]

السلام عليكم شباب انا عندي كاسكو شاري يطله عمره حوالي سنتين اشتريته وحشي وهو الان شبه اليف يعني اكدر امسح راسه ويطلع على الايد المشكله اولا صارله عندي ثلاثه اشهر وماتكلم بس يصفر وثاني شي الجعير من اتقريله يجعر بس اقل من الاول وثالث شي كيف استطيع تروضه تماما وجزاكم الله

[Arashi]

اللي فهمته انك شاريه كبير متوحش لكن قدرت تروضه....زين الحمدلله...ردك هذا عطاني امل ^^


بالنسبه للكلام فاللي عندي كلهم يبتدون بالصفير وعقب شوي شوي تكلمون
بالنسبه للجعير لما تقربه فقريت في اغلب المواضيع انك الافضل تحط قفصه جنبك وانت تشتغل عالكمبيوتر مثلا وتطنشه لما يجعر لين يتعود عليك (أنصحك تركب سماعات عشان لا تسمع صوته XD)

اما شلون يتروض تمام فهاذي أتركها لذوو الخبره ^^