الكاسكو فيه التهاب

[حمدوف]

السلام عليكم
يا اخوان عندي كاسكو عمره 3 سنين و نص من اسبوع لاحظت انه كسلانو ما ياكل و عنده شيء مثل البلغم و المخاط فوديته البيطري قالي انه عنده التهاب في الجهاز التنفسي بسبب البرد و هو بالفعل موجود بغرفة باردة طو ل الوقت و عطاه ابرتين و بودرة صفرا احطها في الماي لمدة خمس ايام و بعدها اعطيه فيتامين اسمه هيدروفيت بعد يومين الطير تحسن فوقف الدوا بعد خمس ايام و قمت اعطيه فيتامين لكن اليوم اشوف انه كسول و دايما نايم و ما ياكل ف شو السبب

[حمدوف]

يا اخوان الطير تعبان الرجاء المساعدة

[حمد الفايز]

يا اخوي حمدوف اشوف انك لازم وبسرعه توديه لبيطري ثاني يعطيك مضاد او علاج قوي له

ويجب عليك اخي الفاضل تعتني فيه كثر ما تقدر اهتم فيه وخلك عنده

ونصيحتي عالاقل حاول توكله فول مع بازيلا مع حمص كلهم معلبات تلاقيهم بالبقالة حطهم علي نار هاديه لمدة ربع ساعه ولم يصيرون لينين حاول تهرسهم بيدك وتجبره علي الاكل

هذا عشان يتعدل وضعه طبعا وحاول تسويله عصير كوكتيل طبيعي يعني تحطله بالخلاط موز وتفاح وعنب ووو وتخلطه بالخلاط وتعطية ياه بالابره وحاول تخليه يشرب كثر ما تقدر مع الالتزام بالدوا اول باول

وحتي اذا قدرت شربه مويه من الابره لانه في هالحالة المرض يخليه يصير كسول وما يقدر يسوي شي

وطبعا بخصوص العصير ديربالك لا تعطيه بارد دافي

واهم من هذا كله عطه عسل بس مو علي الريق لا بعد ما توكله الفول والعسل اقوي حتي من دوا الطبيب .... حط بصبعك شوي وحاول تخليه ياكل ولو شوي بس

بس يكون عسل اصلي مو الصناعي الي فيه شكر وشيره

والعسل اهم شيء وشوي مو كثير والعسل مفيد جدا جدا

والله يشافيه يارب

[the_gostman]

اخي الكريم..

كان من المفترض ان لا تعطيه ابر .. فعلاج التايلان هو الافضل لامراض الجهاز التنفسي... استعمل التايلان لمدة 5 ايام وعند الشفاء تدعمه بالفيتامينات.

هذه صورة التايلان:
https://encrypted-tbn3.gstatic.com/images?q=tbn:ANd9GcTbp3u60qjNMAH4HvttDaPdFM40ngK4ccQY54Ptd585rK_kalafKQ


ما عليه الا العافيه
أخوك رمزي

[حمدوف]

مشكورين يا اخوان عالمساعدة و الحمدالله اكلت الكاسكو لكن للحين هو كسول
بس اريد اعرف هو تحسن فترة ليش مرض مرة ثانية مع انه في مكان دافي

[ProOoF]

اخي حمدوف طيرك مرضه ألتهاب تنفسي + مرض أخر

الإلتهاب ابحث عن التايلان مثل ماذكر اخوي رمزي

بالنسبه للمرض الأخر يعتمد ع الأعراض

هل الطير فضلاته سائله ولونها غير المعتاد

هل الطير به ضعف { تسسيف }

هل الطير فضلاته ملتصقه بمكان الأخراج

هل الطير أغلب اليوم يشرب الماء فقط

أسأل لله ان يشفيه لك

[حمدوف]

رجعت اعطي طيري المضاد الحيوي و حالته تحسنت بشكل كبير ولله الحمد و رجع ياكل و يتكلم مثل اول بس لاحظت انه يطلع منه صوت كانه يتنهد و صاير عصبي اكثر

اخوي بروف الطير فضلاته عادية و شربه للماء عادي بس ماكان ياكل و خمول