الحقوني قطي يستفرغ من أمس الصباح بشكل متواصل

[Say]

السلام عليكم

قبل كم يوم كتبت عن قطتي الصغيرة اللي كانت مريضه والحمدلله طابت بس المشكلة أخوها من أمس تعبان ويستفرغ كل ساعه او ساعه ونص بشكل متواصل حتى هذه اللحظة

امس وديته مرتين للدكتور واعطاه ابر ومحاليل وحبوب ديدان وللحين ماتحسنت حالته
كان يستفرغ اول شي سائل اصفر بعدين صار فيه رغوة والحين استفرغ زي المويه مائلة للاحمرار ومعاه رغوة اخاف يكون دم
المهم استفرغ اكثر من 20 مره تقريبا ساعدوني
خايفة عليه لا يموت ايش اسوي ؟؟ :(((

[Say]

دلوني على طبيب كويس في جدة

[Say]

القط الحين صار يستفرغ مويه كثيير فيها دم مع انو له يومين ما أكل ولا شرب من وين جات المويه ؟

[سعودي تايم]

المويه هذا عصاره هضميه والله اعلم


ودية للبيطري بأسرع وقت

[فاتـــو]

وديه طبيب ثاني غير هالنصاب خليه يكشف على المعدة ممكن يكون عنده قرحة

كيف لون برازه ؟؟


وحاليا جيبي له موتيليوم من اقرب صيدليه توقفين الاستفراغ

1ونص مل مره باليوم وبعد نص ساعة تعطينه اكل بالسرنجه

وطمنيني عنه

[Say]

ماتبرز من يومين وتبول مره وحده اليوم بس

بخصوص المعده امس الدكتور سواله اشاعه للبطن يقول مافيه شي في بطنه سليم
طيب اذا سليم ليه يستفرغ .. اعطاه ادويه غير اللي اعطاه في الصباح وقال على مسؤوليتي ماراح يستفرغ واول مارجعنا البيت استفرغ ولازال الى الآن

[فاتـــو]

طيب عطيه علاج الاستفراغ واكليه هو ماسواها لانه ما اكل

وجيبي كمان مضاد حيوي ايموكس وعطيه نص مل كل 12 ساعة

ضروري ياكل قبل المضاد الحيوي

واذا مايشرب جيبي له محلول جفاف

[Say]

اليوم رحت للدكتور مرة ثالثة :(

قلت له انت ماعالجته وشخصته غلط واعطيته ابر بس كذا لازم تشوف لي حل معاه لانو اول اعطاه ابر مضادات حيويه وللاستفراغ والحرارة وبدون فايدة وصورت له الاستفراغ وشافه
قام سوا له اشاعه مره ثانية بعدين قلي احتمال عنده قرحه في المعده واعطاه محلول ابره واعطاه محلول في سرنجه مع بودره بيضا وشربها للقط قال هذا العلاج للقرحه والمحلول عشان ماياكل ولا يشرب وهذي بديل لها قلت له طيب ابغى تعطيه علاج للاستفراغ قال لا لاني امس اعطيته ابرتين للاستفراغ ولو كثرت له منها ممكن تضره :((

اعطاني في سرنجه مطهر لونه زي البيتادين قال بكرا الصباح شربيها له وفي العصر جيبيه نسوي له اشاعه كمان عشان نشوف تحسن او لا

وقال لي احتمال كمان يستفرغ :((((

اشرايكم في كلام الدكتور

[سعودي تايم]

والله صراحه اخي انه يتعلم علي حيوانات الاليفه حقت الناس

[KoKo10]

يآخوي/اختي .. ما في شي اسمه " يمكن " !!! خصوصاً بعالم الطب ..
اذا ما كان متأكد من الشي لا يعطيه ! .. و القطط ما تستحمل اساساً ,,
وديه بيطري ثاني خله يفحص بطنـه ..
و الرغوة معناها احتمال يكون تسمم ,, لكن الان فيه " دم " يعني احتمال قرحة او من كثر ما استفرغ تجرح ,,
ربي يشفيه

[mostafa attia]

قادر ربى ان يشفيها لكن بس تروحى لدكتور بيطرى كويس ويكون عنده خبرة ممكن تسألى اصحابك لو عندهم حيوانات وبيروحوا لطبيب

[Say]

استفرغ الان :(( وبرضو فيه قطع دم مع الاستفراغ
واخوه كمان استفرغ سائل اصفر مع رغوة شكله انعدى

لاحول ولا قوة الا بالله

[فاتـــو]

الدكتور مو واثق من العلاج ولا من التشخيص من الاساس وهذا مايصلح ابد

ارجوكي لاتسمحين له يعطيه ابر ثانيه كفايه عليه

اذا استفرغ مره ثانيه حضري له زبادي دافي بالعسل

واذا في عياده ثانيه وديه وخليه يسوي له اشعة اخرى للمعدة بدون مايعطيه علاج خليه يتأكد من صحة التشخيص الاول ( قرحة بالمعده )

اذا كلامه صحيح تبدأين بعلاجه بمضاد احماض مع علاج منزلي بقولك عليه مع محاليل اذا كان مو متقبل الاكل ابد

[فاتـــو]

الحين عطيه زبادي بالعسل

وحضري له عرقسوس ويفضل بالبيت

وعطيه منه بكرا بعد النقع بيعالج القرحة ويلئمها

وطمنيني عنه

[Say]

المشكلة مو راضي اعطيه شي مو راضي يفتح فمه :(
والعرقسوس وين احصله

[فاتـــو]

تحصلينه عند العطار هو على شكل اعشاب جافه

تنقعينها بالمويه يوم كامل وتعطينها للقط بالسرنجه بكره لا تعطينه مقدار كثير نص السرنجه كفايه

[جوري33]

خليك على زبادي بعسل
او مرقة دجاج بالسرنجه

[بسبس مياو]

صوميه 12 ساعة ضروري او تأكدي ان معدته خالية من الأكل بعدين عطيه موتيليوم نص سم
يمكن مايتقبل طعم الدوا فحطي على اصبعك شوي عسل واول ما يبلع الدوا ذوقيه العسل
الدوا لازم يبلعه (امسكيه وارفعي راسه لأعلى وهوا جالس وقفلي فمه عشان يبلع)
واتركيه ربع ساعة لو ما استفرغ ممتاز ابدأي عطيه زبادي مع شوي عسل وبس
بعد نص ساعة عطيه بيتاموكس نص مل ....
جيبي بيبي لايت وعطيه كل شوي بالسرنجة

[Say]

رحت اليوم لعيادة ثانيه ودكتور غير

فحص الثلاثه كلهم قال هذا فايروس ناسيه اسمه بس قلي هذا مو خطير بس تأثر حلق القط والتهب عشان كذا ينزل دم لما يستفرغ وعشان كذا مايقدر ياكل او يشرب

اعطاهم ابرتين بيتاموكس وابره ثانيه وقلي جيبي لهم من الصيدلية البشرية شراب للقيء اسمه بريموزان اعطيهم واحد ونص مل ثلاث مرات وشراب بيتاموكس ملي واحد مرتين في اليوم

اعطيتهم قبل شويه الشراب حق الاستفراغ وبعدها بشوي استفرغوه .. ايش الحل معاهم تعبت مررره مررره مررره نفسيا وجسديا ساعدوني

[هانم4]

انا عندي نفس القصه لقطتيين قط وصف قرحه في معده وقط التهاب المهم الان الترجيع علشان يقف منعت الاكل والشرب تمام واخد محاليل وريد لمدة ثلاث ايام مع حقن زنتاك لان لو اخد اي شئ في الفم هيرجع ابمعده بتكون ملتهبه جدا والحمد الله منع الترجيع ولسه ماكلوش والاكل بالسرنجه وبقالهم اسبوعيين المهم دلوقتي الترجيع يفف وممنوع اي دوا من الفم الاعتماد الكلي على العلاج بالمحاليل والحقن

[Say]

فعلا معاك حق احس علاج الفم ماينفع مع الحالات هذي اصلا الدكتور قال جيبيه بكرا اعطيه مغذيه في الوريد
اساسا البس حقي مايبلع حاولت اعطيه الدوا حق الاستفراغ بالسرنجه ومابلع يطلع على طول يعني مو زي اخوانه هم يبلعونه هذا وبعدين لاحظت فيه حاجه هو لما يستفرغ ويخلص يجلس يمضغ شي مدري ايش هو المهم يجلس يمضغ ويلحس بعدين يجلس عادي
اساسا احس حلقه مسدود يعني الحين وهو جالس يطلع من فمه ماده لزجة بيضا ورغوه بدون سبب .. ايش معناها؟ :((

[Say]

بسألكم كيف طريقة المغذي اللي في الوريد يعني يخدر القط بعدين يحطها او كيف الطريقة

[Say]

القط حقي من امس يطلع من فمه رغاوي بيضا بشكل مستمر ايش معناها وهل بتفيده العلاجات :((

[بسبس مياو]

اتوقع هذي اعراض تسمم من الأدوية او الحقن
لازم ياخذ محلول مغذي تحت الجلد علشان يتخلص جسمه من السموم

[Say]

اخذ تحت الجلد ومافاده فقال الدكتور لازم في الوريد

[بسبس مياو]

اخذ قبل التسمم انتي تقولين انه من بعد مارجع من البيطري يطلع رغاوي والى اليوم صح كذا؟
يعني القط حاليا يلزمه يتخلص من السم اللي في جسمه
هل مازالت الرغوة؟

[Say]

ايوه موجوده واليوم استفرغ دم صافي كله دم

[Azado]

غيري البيطري.. حسبنا الله و نعم الوكيل

[Say]

وديتهم اليوم للبيطري ورفض يستقبلهم قال اخاف على القطط اللي عندي من العدوى قلي روحي بيطري ثاني كان تصرف اناني منه حسبي الله عليه ونعم الوكيل
رحت للعيادة.. وقالو كلام جديد كل بيطري يقول كلام من عنده ورفض يعطيهم مضادات اعطاهم بس مغذي تحت الجلد قال اذا ماتحسنوا جيبيهم بكرا

شكل بساسي بيموتون والدكاتره خايفين يقولولي هالشي عشان كذا يصرفوني

يارب رحمتك مالي غيرك

[شاهستا]

الله يصبرك

اتفائلى خير وان شاء الله هيبقى كويس

حاولى تدفيه

ووقفى كل العلاجات دلوقتى

[جوري33]

شوفي بستي كانت كذا وقفت الادويه عنها
واعطيها زبادي بعسل وكل بعد شوي اعطيها بالسرنجه مرتين
ومحلول بيبي لايت من الصيدليه احطلها شوي الماء او اذا ماشربت اشربها
وانظم وقتي معاها بالاكل وقت نومي لين الحمدلله اتحسنت كانت تستفرغ اصفر ورغوه واسهال والحمدلله اتحسنت ياربي لك الحمد

[فاتـــو]

وقفي كل العلاجات

وديه لطبيب يعطيه محلول مغذي في الوريد ولو عنده علاج استفراغ ابر خليه يعطيه

الاستفراغ المستمر سبب تهتك بجدار المعده وزيادة الدم علامه خطيره

لازم الاستفراغ يوقف باي شكل حتى يقف النزيف

و نبدأ بعلاج جدار المعده والقرحة اللي فيهاا

الله يعينك ويشفيهم :(

[بسبس مياو]

روحي
العيادة الاوربية ضروري،قطك ماخذ عدوة واتوقع انها بانلوكوبينيا عشان كذا العيادات الثانية رافضة تستقبله ، شكله مش
مطعم،ملفي علاج الا بالمغذيات يوميا وابرة كورتيجين توقف الاستفراغ ومحلول
زنتاك والمضاد الحيوي بالحقن ممنوع اي شي بالفم هذا هو العلاج وانتبهي يعطونه مسكنات لانها بس تخفي الاعراض بينما
القط ينتهي من جوا ضروري يدفا الحين بأي طريقة لفيه ببطانية اليوم جمعة
ومافي الا الاوربية اتوقع في طوارئ

[Azado]

طمنينا

[Say]

حسيت قبل امس انهم تحسنوا مع الدوا والاستفراغ كميته صارت اقل يعني استفرغوا مرات عديدة بس الكميه قليله بعكس أول
امس وديتهم موعد للدكتور وانبسط من هالشي وقام اعطاهم ابره للاستفراغ واعطاهم برضو محاليل وحبوب يقول عشان ماياكلون ويشربون هذي تعوضهم
وعن ابرة الاستفراغ قبل يعطيهم قال لي ترا الابره حاررة عليهم اللي فهمته منه انها راح تحرقهم يعني شكلها كانت مؤلمة او شي
المهم بعد مارجعنا للبيت صاروا البسس بس جالسين مايتحركون مو زي اليوم اللي قبل .. والحمدلله ماعد استفرغوا من امس لليوم

الكارثه كانت اليوم لما صحيت لقيت واحد منهم اللي هو أول واحد تعب تبرز دم ومعاه قطع براز عاديه بس الدم كان أكثر مع العلم انه ما اكل ولا شرب من ٧ ايام تقريبا .. واخوه الثاني كمان تبرز بس مو دم براز عادي وكان مبهذل نفسه والثالث تبول على السيراميك مع ان قدامه الليتر بوكس بس ماراح فيه وهذي اول مره يسويها .. وحركتهم ما اقول طبيبعة بس افضل من اول يعني يمشوا ويقاوموني يبغوا يخرجوا من القسم اللي حطيتهم فيه عشاني عازلتهم عن امهم. واخواتهم يعني شوي فيه حركة الحمدلله بس خوفتني مسألة البراز هذي
وبرضو الريحة جدا جدا كريهة ومزززعجه. :((
سؤالي هل هذا الأمر خطير او مؤشر ان السموم اللي فيهم خرجت عن طريق البراز او ايش المشكله بالضبط لاني بصراحه محبطه جدا وجالسه احاول امني نفسي :(

ملاحظة يا اخوان واخوات انا سويت امس حركه بقولكم عليها بس ياليت بدون استهزاء او شي لكن للامانه بعد ماقفلت معي وحسيت بالعجز سويتها .. لي يومين تقريبا اقرأ على البساس وأشغل عندهم الرقية الشرعية باستمرار طوال أمس وقبله ورشيتهم مويه مقري عليها ونقطت لهم في الحلق كمان من نفس المويه ...

انتظركم

[بسبس مياو]

قرأتي ردي !! لازم مغذيات يوميا ضروري المحاليل البراز مع الدم مؤشر مو كويس روحي العيادة الاوربية

[Say]

ياحبيبتي انا لي يومين اروح العيادة الاوروبيه ..ياخذون مغذيات كل يوم بس تحت الجلد يقول الدكتور مايحتاجون في الوريد وياخذون حبوب ودوا زي الجل
والقطط كلهم مطعمين الحمدلله

بس اللي استغربه ماكانوا يتبرزون ويستفرغون وبعدين صار العكس
مدري ايش الشكله

[Say]

اليوم وديت البساس للدكتور وقلتله على سالفة البراز وصورته له وشافه وتكلم كلام كثير صراحة ما اقتنعت فيه
بس هو قال ان التبرز اهون من الاستفراغ
قلي القطط عندهم فايروس ماقال ليش هو لما سألته يقول لازم لهم تحاليل ومدري ايش قلت طيب سوي لهم تحاليل للدم قال لازم ارسل عينه لامريكا عشان يشوفون ايش اسم المرض ويبلغوني ومره غالي عشان كذا مو لازم نسويها بعدين قلي ممكن يكون كورونا قلت الكورونا خطير ومعدي وهو الدكتور يمسكهم عادي يعني لو كورونا يخاف و مايمسكهم قال خلاص اعطيهم العلاجات هذي واذا عازلتهم عن امهم واخواتهم عادي بعد اسبوع فكيهم مع بعض .. من الآخر حسيت الدكتور ماعرف التشخيص وصرفني بطريقة خذي العلاجات ولاعاد نشوفك :((

هذا الكلام من افضل عياده بيطريه في جدة ..
بصراحة جاني احباط كبيييير جدا .. لكن أملي وثقتي في الله كبيرة ومالها حدود ويارب يشفيهم ويخليهم لي وكلت امري وامرهم له سبحانه

استفسار

العلاجات اللي اعطاني هي .. انازول شراب مرتين في اليوم ( دكتور ثاني قال لا تعطينهم انازول راح يقطع معدتهم لان عندهم قرحه في المعده ) انا محتااااارة ياناس .. وحبوب نص حبه في اليوم اسمها losec mups .. تنصحوني اعطيهم هي ولا اتركها

قططي لهم ايام ما اكلوا ولا شربوا كيف اتعامل معاهم في البيت كيف اقدر اعطيهم اكل واخليهم ياكلون في البيت الدكتور يقول لا تعطينهم دجاج ولا بطاطس ولا شي بس اطحني لهم دراي فود ومويه مع بعض واعطيهم وماني عارفه ايش اسوي .. البيطريين ذبحوهم بالابر وانا تعبت نفسيا من هالشغله خاصة انهم يتألمون كثير وبدأوا يكرهوني لاني اوديهم كل شوي ويعطونهم ابر

ساعدوني الله يخليكم

[بسبس مياو]

انا مش عارفة ايش اقولك :(
الكورونا اعراضة ارتفاع جامد في الحرارة يعني توصل 40
وانتفاخ في الجسم (احتباس سوائل) والقط يمشي يترنح والتهاب كلى وكله هذا في ثلاث ايام ويموت القط
بس ما اتوقع قططك فيها الاعراض هذي
استمري في القراءة عليهم وعطيهم زبادي وعسل راح يطهر معدتهم بدل الفلازول وعطيهم مضاد بيتاموكس بعد الاكل
حاولي بالسرنجة تأكليهم ..ما ادري وش اقول هذا كل اللي اقدر عليه
الله يشفيهم يارب في اسرع وقت

[Say]

حتى انا استبعدت الكورونا اصلا باين ان الدكتور كان يصرفني
راح نسوي اللي علينا والله كريم

[Say]

البقع السوداء اللي تظهر على لسان القطة دلالة. على ايش وايش ممكن يكون علاجها؟

ما رأيكم في شراب أنازول ينفع للقطط ؟

[شاهستا]

اتمنى تطرحى سؤالك بموضوع جديد + التوضيح ولو فى صوره
يغلق