المساعد الشخصي الرقمي

مشاهدة النسخة كاملة : التربه الزراعيه

كويتية
30-07-2007, 10:47 PM
السلام عليكم ورحمة الله وبركاته

بستصلح تربة حديقتنا وأبي مساعدتكم وخبرتكم

شلون أعدل التربه أقلبها أول أو أجيب تربه زراعيه ومتى أحط السماد

انزين التربه الزراعيه من وين أحصله ؟

وشلون أشتريه أكياس والا اللي بالشاحنه ؟ لأن شفت بيت جيراننا جايبين لهم شاحنه فيها تربه زراعيه لحديقتهم بس أستحي أسألهم ما أمون عليهم

أتمنى تساعدوني وأكون شاكره لكم
3aloe
30-07-2007, 11:18 PM
اختي كويتية التراب تاخذينه من المشاتل

روحي المشاتل واسالي عن التربه في عندهم اكياس

والشاحنه يمكن هم عندهم والسماد يخلط مع التربه

ولما تزرعين النبات في مغذيات حق النبات ما اعرف اسمها

بس عمي كان يحطها حق النباتات الي بالمزرعه شكلها نفس الحبوب

ولنا بنفسجي فاتح او رمادي انتي سالي اهناك واظن كل شي عندهم
الطاير
30-07-2007, 11:36 PM
زي ما قال الاخ 3aloe

وعلى حد علمي النسب 50% تربة زراعية و50% سماد .....

يعني كل كيس تربة يقابله كيس سماد ...

بس لايكون السماد صناعي (يوريا) او اي منتج كيماوي اخر ...

الافضل السماد الطبيعي بانواعة وتاكدي انه خال من البذور الضارة ....


وبالتوفيق ,,,,



الطاير
كويتية
30-07-2007, 11:39 PM
انزين شنو أحسن سماد؟ لأن وصيت أخوي يسأل بالمشاتل قالوله أكو كيماوي وأكو سماد خرفان تكرمون

والكيماوي لايكون فيه ريحه لأن درايش البيت تطل على الحديقه

شكرا لك عالرد
كويتية
30-07-2007, 11:45 PM
الطاير

شلون بعرف اذا كان في السماد بذور مضره صعبه شلون أعرف ؟
الطاير
31-07-2007, 01:41 AM
لا الكيماوي .... ولاسماد الخرفان .......
ما اايد انا استعمال الانواع هذي .....
فالكيماوي مثلاً كثرته تعدم الارض وتخليها غير صالحة للزراعه .....
و براز الخرفان (وانتم بكرامة) جيد .. لاكن ريحته نفاذه وخاصة اذا تبلل ..
وعادةَ يجي مليااان بذور نباتات مضرة وتنتشر في المزرعة زي انتشار النار في الهشيم ...
وسبق واستعملته قبل سنتين او ثلاث والى اليوم يطلع لي نباتات غريبة في المزرعة !!!!
وحتى اذا قطفت النبته تكون قد وزعت بذورها وتطلع في 10 اماكن ثانية !!!!

فيه نوع ثالث هو الافضل .....
اسمة والله ناسية ....
لاكن في الصباح انشاء الله اروح اشيك عليه واديلك اسمه .....
يجي دائماً لون بين البني والاسود ....
وبعض انواعة ( الجيد منها )
يجي مكتوب على الكيس حقه (( خالي من البذور ))
هذا موجود في اي مكان لبيع الادوات الزراعية ....
لاكن الي بياخذ منه يتاكد من سنة الانتاج يعني يكون انتاج السنة هذي او الي قبلها ....
لان بعضه يكون منتج من زمان وفعاليته وجودته قلت ,,,,

تحية
الطاير
كويتية
31-07-2007, 01:54 AM
الطائر

مشكوووووور أخوي عالمعلومات المفيده

وبانتظار اسم السماد

وان شاء الله يكون متوفر عندنا بالكويت
هاوي زرازير
31-07-2007, 10:52 AM
اختي اذا بحديقتكم تراب كافي مو الا تشترين تربة زراعية بس قلبي التراب اللي عندج يعني

احريثيه جيدا لين تشوفين التراب يصير لونه بني غامق بعدين نطري جم ساعه عشان تهوين التربة

بعدين حطي السماد فوقها واخليطه مع التربه وبجذي تصير تربتج صالحه للزراعة واذا حبيتي تقوينها

اكثر رشي عليها من بودرة غذاء النبات..

واذا مالكم خلق ع التعب واللويه تلاقين التربه الزراعيه عند المشاتل اللي بالري وهي نوعين على

حسب الكمية اللي بتشترينها اذا شويه باكياس واذا وايد بوصلونها لبيتكم

وبالـــتوفيق ان شاءالله,,,,,,,,,
الطاير
31-07-2007, 12:21 PM
سماد عضوي ....

هذا نوع السماد ......
واكيد انه متوفر عندكم لانه يباع في كل مكان في العالم ....
فيه منه انواع واشكال ...

وبالتوفيق


الطاير
cute cat
01-08-2007, 01:34 AM
موضوع رائع واسئله اروع
مره استفدت منها ومعلومات حلوه والله
والاخوان الا جاوبو افادو الكل
كويتية
01-08-2007, 02:18 AM
هاوي زرازير

عدل كلامك حتى امي قالت لي نجيب واحد يقلب التربه وتصير خوش تربه مشكور عالمشاركه


___________


الطاير شكرا لك أخوي بسأل عنه السماد العضوي

_____________

أهلين كات

شكرا لج عالمرور
هاوي زرازير
03-08-2007, 02:38 AM
العفــــــوِ اختي.....

تقدرين تسوين سماد عضوي بس مو مثل اللي قاله اخوي الطاير شوي مثله

هذا السماد عباره عن قشره الفواكه او الخضروات او حتى الرز اللي تطبخونه بالبيت

يعني كل ما تطبخون يزيد من العيش بس بدون شوائب , وكذلك الفواكه والخضروات تجمعون قشرتها وتحطونها بدرام تخصصونه لهذا السماد العضوي جدا ومغذي جدا

وتحطونه على النبات ...

مافيه تعب ولا شي بالعكس جذي تقومين بإعادة تدوير للاكل.

(((((مُجَرّبْ))))))

اتمنى اني افدتج,,,,
كويتية
03-08-2007, 04:45 AM
هاوي زرازير خوش معلومات انزين جم المده اللي أجمع فيها قشور الفواكه

أقصد جم يوم أخليهم

قصدك لين يصيرون يابسين

عجبتني الفكره <<<< الشي اللي ابلاش حلو :)
كويتية
03-08-2007, 04:47 AM
نسيت أسألك عن العيش شلون أحطه على التربه وأهو لين والا أجففه بالشمس

ياليت توضح أكثر

وشاكره لك معلوماتك عجيبه
هاوي زرازير
04-08-2007, 03:38 AM
اختي اتني بس مايمتلي الدرام (يعني تشوفين الكمية كافيه) حطيه ع الزرع

اهو مو بس بلاش اهو خالي من المواد الصناعيه(الكيماويه) ويخليج تصيرين صديقه للبيئه لانج

جذي تقومين باعاده تدوير .

بالنسبه يابس او لين يفضل يكون لين او اذا كان يابس لازم تحطينه قبل ماتسقين الزرع بعدين

ترشينه بالماي. (العيش مع قشرة الخضرة والفواكه)

***هذي الطريقه تسوينها من 1-3 مرات بالاسبوع (الشي لي زاد عن حده قلب ضده)

هذا الرابط راح يفيدج http://www.zira3a.net/leaflets/march/making-manure.htm

والعفـــو اختي ,,

مثل ماتعرفين ان الزرع ينقي الهوا واحنا بالكويت ما كو واحد الا عنده سياره ...

(فالشجرة الواحده العاريه او الصغيره تنقي حوالي 25 كيلوغراماً من الملوثات من الجو سنوياً)

بالتوفيـــق اختي...

اتنمى اني افدتج,,,
كويتية
04-08-2007, 05:33 AM
هاوي زرازير

مشكوووووووووووووووووور الله يعطيك العافيه فعلا ماقصرت كفيت ووفيت جاوبت على كل أسألتي بالتفصيل الممل

وشكرا على الرابط فيه معلومات مفيده


أكرر شكري لك
هاوي زرازير
04-08-2007, 06:13 AM
العـــــــــــفو اختى

لا شكر على واجـــــــــــــب