مشكلة انغراز المخلب في قطي الكبير في السن

[وعد ~~]

السلام عليكم ورحمة الله وبركاته

طلبتكم ساعدوني انا عندي قطو بسم الله عليه راح يكمل 8 سنين واعراض الكبر حيل بانت عليه
في عندة مشكلى انغراز المخلب بيدة حاولت اقصهم له اكثر من مره بس مااحصل لي غير الجروح بس امسك ايدة ويشوف بايدي المقص حق المخالب بيخاف كثير حاولت فيه باكثر من طريقه اهديه لكن مافي فايدة وانا ما الومه لاني وديتة للبيطري مرتين بسبة هالحاله وذاق العذاب المر من الطبيب ما خدرة ولا شي وتعذب قطي كثير من الالم فهو الحين خايف مايبيني امسك ايده ابدا
المخلب للحين ماانغرز لكن قرب كثير من اللحم وغير كذا فيه انتفاخ وخراج احمر طفيف وواضح انه يألمه وانا عن نفسي مابي اوديه للبيطري مره ثانيه لسببين

مابي اذوقة العذاب مره ثانية وغير المادة ماتسمح لي العلاج مره غالي مااقدر عيله

لا تقولون لي انتي حاولي في البيت وربي تعبت ايديني راحو شمخني كثير جيته بالسياسة مافي فايده هو ذكي وعارف انا ايش بسوي فياخوتي الله يخليكم ساعدوني عطوني حل مابي يتألم وابي اساعدة

انا فكرت اعطيه مهديء عالاقل يسترخي واقدر اقص اظفرة واطهره لكن ماعندي اي خلفيه بإسم دواء معين مااعرف شي بهالمجال وغير كذا لما اتذكر كلام الطبيب البيطري انا طلبته يخدره لكنه رفض رفض شديد قال مو زين عالقطط واختار العذاب والالم احسن من التخدير انا مااقول هذا ظلم او شي بس اكيد له سبب ممكن يكون خطير وانا ماعندي علم فيه ياليت تعطوني سبب ليه رفض التخدير او حتى التنويم

وكمان ياليت تفيدوني بإسم مهديء معين لو كان مايضير وهل هو دواء حيواني او بشري وفين احصلة
ترا هالقط كبر معي من صغري واحبة حيل وياليت لما توصفون لي دواء تنتبهون مابي يصير فيه شي لا قدر الله طلبتكم واكون شاكرة لكم

[بسبس مياو]

هلا....
طبعا البيطري يرفض...اولا المسألة مش محتاجة والتخدير لاتحسبيه شي كويس...التخدير خطير ومانلجأ له الا في حالة العمليات
ثانيا قطك كبير بالسن والتخدير في هالسن جدا جدا خطر وممكن يسبب توقف للقلب ومايتحمله القط

عند اي بيطري رحتي...وليش تقولين تعذب...
قص الاظافر مايألم ابدا بس القطط تخاف وتقاوم
وديه البيطري ضروري لان الخراج اللي فيه لازم يتنطف قبل مايسوي التهاب وينتقل لباقي الاصابع واليد...
مافي حلول ثانية انسي التخدير ومافي شي اسمه مهدئ..ولو لقيتي بيطري او محل يوافق او يعرض عليكي التخدير ارفضي واطلعي من عنده

انتي بس لانك تحبينه ومتعلقة فيه تحسين انه يتعذب��
ترا عادي مافي اي الم في قص الاظافر بس يمكن المرة الاولى لانه كان منغرس....
اذا تقدري توديه عيادة الخبر البيطرية كويس....لاتهملي الموضوع وديه ينظفون الخراج ويطهرونه والف سلامة عليه

[توتة&تتيانا]

حسب معرفتي انو قص اﻻضافر مش مؤلم انا ما اقص اضافر قطتي ﻻنها تحب الخروج الى الشارع واخاف انها ﻻ تسطيع ان تدافع عن نفسها
حالا هية عمرها 8 الى 9 اشهر وﻻكن عندما كان عمرها 4 الى 5 كنت اقص اضافر استغل الفرصة عندما تكون نائمة
اذاكانت فلوس البيطري غالية حاولي ترحين لغير شخص ممكن يكون ارخص ورة مينضف الخراج وتنتهي المشاكل عندما يكون نايم استغلي الفرصة وقصي اضفرة لا تثولي انو راح يقعد من النوم
ﻻن اصﻻ مياذي

[عبدالله.q8]

انا كلمت طبيب اثق فيه بخصوص موضوعك

حبيبي التخدير خطر جدآ عليه والدكتور يقول انا اسوي عمليات للقطط بدون تخدير

واحس الي عندكم بالسعوديه غصابين مو دكاتره ومواضيع واجد بالقسم تثبت كلامي

وانا حصلي موقف اول ماشريت قطوتي رحت بوديها مستشفى يفصحونها قالوا لازم فتح ملف وفحصها نظري وبعدها مخبري الي هو الدم والبراز وانتم بكرامه وطلع المبلغ حول 1000 ريال تقريبآ وخليتهم وطلعت ولقيت اعلان بالنت عن بيطري يجي البيت واتصلت عليه ويوم وصل حتى مايعرف يتعامل مع القطط وانا شكيت بالموضوع وطلبت منه اشوف شهادته وبداء يرقع وقضبته الباب واخر مازهقت وديتها حق صيدليه للحيوانات وعطاني عنوان لعياده صغيره ووديتها وطلع صج دكتور وكويتي بعد وفحصها مجانا وطلع فيها عث بالاذن واعطاها ابره كل هذا بمبلغ رمزي وقال اذا ماعندك اعالجها بلاش جزاه الله خير

الي بأصوله في دكاتره صج وفي اي كلام او يكون مساعد بيطري ويسوي فيها البرفيسور وهو يعذب الحيوان وانت الي عليك تبحث بمدينتك واي انسان كلامه مايدخل العقل مو لازم تجامله على صحه الحيوان الي بذمتك

[وعد ~~]

اولا جدا اسفه عالتاخير في الرد

الف شكر لكل ردودكم فعلا افدتوني يعطيكم الف عافيه ماقصرتو بميزان حسناتكم ان شاء الله
انا كنت اخذ قطوي من عمرة شهرين" لصيدلية الجوزل" بالدمام واخذت كل التطعيمات منه وقطوي كبر معهم ماشاء الله الحين عمره 8 سنين المفروض يكون تعود عالطبيب بس مادري كلش عنيد مايحب احد غريب يلمسه عجزت اشيل هالعاده منه الله كريم

وعلى سالفة الالم انا لما وديته يقصون مخلبة طلع دم كثير وقت القص وقطوي من التعب بدأ يلهث وصراخ وضرب مساعد الطبيب وعض الطبيب وسوى بلوى لكم وصل حالة انسدح ماقام يتحرك وبدأ يلهث لهث شديييد من الخوف والالم ولما حط له محلول في ايده حسيت قطوي ارتاح كثير بس لساته كان منهار نفسيا وتعبان ماتحرك كثير وخفت عليه هو كبير بالسن خفت مايتحمل انا من شفته كذا بكيت عند البيطري حتى هو اشفق بحالي قال انا اساعده مااذيه لا تخافي هذي ردة فعل طبيعيه بس تعرفون لانه عاش معي عمر وربكم يعز علي كثير وماطيق اشوفه بألم وتعب انا شفته انهار انهيار كامل كلش مايحب البيطري ابدا ...

عالعموم اليوم رحت وانصدمت ان ماعاد يداوون القطط والحيوانات بمعنى انها صارت صيدلية ليست عيادة وماكان عندي مكان اروح له غيره للاسف..

وصف لي واحد عند سيهات وسيهات كثير بعيدة عن بيتي وانا اطلع مع سواقي واختي الكبيره مامعي رجال والطريق يخوف مستحيل اروح هناك
لو عندكم وصف لعيادة بيطرية بالخبر او الدمام زينه مجربينها وموثوقه تكفون طلبتكم علموني وانا اروح لها باقرب وقت
المخلب كل ماله ويقرب من اللحم مابيه ينغرز تكفون ساعدوني الله يجزاكم خير

[بسبس مياو]

الله يهديك اي سيهات؟ :)
الدمام والخبر فيها عيادات ...اساساجوزال من زمان عليها علامات استفهام
انا قلتلك في ردي الاول وديه عيادة الخبر البيطرية ....طريق الخبر الدمام السريع جنب وكالة سوني
عندك عيادة رعاية بلاحدود بالدمام الطبيشي قدام محل الاطفال
وعيادة اوكا طريق الملك فهد عبدالله فؤاد

ليش طلع دم لما قص المخلب!! تقصدي طلع دم من المكان المنغرز فيه
ولا من المخلب نفسه؟
ماشالله لك ثمان سنين تربين قط. ماتعرفين غير جوزال 😄

[وعد ~~]

اهلين شكرا عالرد ان شاء الله بروح باقرب وقت يعطيك العافيه
ايه الدم طلع اول ماقص المخلب من طرفين الطرف الاول اساس نمو المخلب والطرف الثاني المغروز فيه ,نمو المخلب كان مأذي الطرفين وشوي من الخراج كان بداخل المخلب نفسه واساسا هو كان منتفخ ووارم بس الحمدلله عدت على خير يارب لك الحمد


الله يهديك اي سيهات؟ :)

ماشالله لك ثمان سنين تربين قط. ماتعرفين غير جوزال 😄

مادري تتطنزين علي او ؟ الله اعلم لكن انا انسانه مااطلع من البيت كثير الوالد مريض بالخبيث ودوم معاه بالمستشفيات يا بالبيت او بالمستشفى معه فشي طبيعي ماعندي علم بمكان ثاني ^^ يادوب اسأل الماره ودلوني على جوزل :)

وشكرا لك مره ثانيه فميزان حسناتك ان شاء الله

[توتة&تتيانا]

الله بشفي ابوكي ويشفي قطك بس عندي استفسار هل طلع دن ﻻن انقص زايد؟؟وحاليا مد اتقدرين تقصي

[وعد ~~]

الله بشفي ابوكي ويشفي قطك بس عندي استفسار هل طلع دن ﻻن انقص زايد؟؟وحاليا مد اتقدرين تقصي

اللهم امين شكرا لك ^^
لا قص الظفر كان سليم بس لانو كان منغرز وكمان كان شكل الظفر شبيه بالزرار تبع الملابس و البيطري قض الظفر من الطرف بعدين بالملقط سحب الاظافر الميتة من الطرفين المغروس واللي نامي بطريقة غلط
وماشاء الله للحين ينمو ماعليه مشاكل لكن مشكلته مايخليني المسه حتى وهو نايم كايبيني المس ايدينه فأحتاج مساعده

شكرا لك مره ثانيه

[بسبس مياو]

لا حبيبتي ما اتطنز...بالعكس انا بس مستغربة لانك تربين من ثمان سنوات
وتعرفين الا مالواحد يحتاج عيادة في اشيا كبيرة زي عمليات او حاجات مهمة ...فتلاقي المربي يعرف كل العيادات ومار عليهم...
غير ان جوزال الصراحة مش كويسة وكثير يذموها فاستغربت انك ماتعرفين غيرها :)
مخلب القط له حد معين لو قصينا بعده ينزف لانه مكان اللحم
كيف يقص فوق اللحم ..هالشي مره مؤلم

الله يشفي الوالد يارب