سؤال عن تبويض القطه بلا ذكر

[براءه شريره]

السلام عليكم ورحمه الله وبركاته

عندي سؤالين حابه تفيدوني فيهم

اول سؤال عندي انثى عمرها 8او9 شهور وهي تاني مره تجيها فتره الشبق كل الفترتين قريبه من بعض فضحتني بصراخها وقبل فتره انا عقمت انثى قبل منها فماعندي امكانيه هلا اعقمها كان عبالي ماحتكبر دحين :mad:

دورت حلول ولقيت هون بالمنتدى انو اعملها بالترمو متر عشان يحدث تبويض بلا حمل عملتلها تلات مررات والانسه لهلا ماسكتت بدي اعرف قديش المده اللي لازم اعملها هيك لتسكت وتنتهي الاعراض هي اللي عندها ونتيجه دا الترمومتر بتطول يعني ماحترجع بعد اكم يوم من تهدا وترجع تصرعنا صريخ ...؟!!!


تاني سؤال عندي كتن تاني ذكر اخدتو من الشارع صارلو فتره عندي لكن ع طووول بطنو تعبان بالاول فكرت انو لازملو فتره ع مايتعود الاكل عندي ويصح بطنو من اكل الشوارع لاكن مازال هيك
مرات يكون اخراجو سليم ومرات لاء يكون الاخراج عندو اسهال ومرات مايقدر يمسك حالو بقوم لاقيه عادم الدنيا
ع طوول بعطيه بيتاموكس تلات ايام ويرجع الاخراج سليم فتره وبعدها يرجع يتعب وع دا الحال ..!

نظامي في اكلهم
اكل منزلي بالغالب سواء اله ولا للي اكبر منو والاكل المعلب كنت اعطيهم قليل بس ادا ضاق الوقت معي وهلا بطلتو بالمره وجبت من رويال ويت فود دجاج ورز صرت اعطيهم ياه وقت يضيق الوقت اما الدراي فود من رويال للكتن انا مابحب ااكلهم ياه كتير لاكن باليوم بعطيهم مره منو او مرتين بالاضافه للاكل المنزلي:confused:

[بسبس مياو]

وعليكم السلام ورحمة الله

طريقة الترمومتر انا جربتها زمان قبل ما اعقم قططي ومانفعت ابدا :)
حاولي قدر الامكان انك تصغطي نفسك وتعقميها مافي غير هالحل لان الابر مثلا ضارة جدا...وكثرة فترات الشبق من غير زواج مش كويسة لاعلى صحتها ولا نفسيتها....انتي فين تعقميهم ؟ وبكم؟

بالنسبة للكتن...احتمال عنده ديدان فلازم تبدأي تعطيه حبوب الديدان
واحتمال ماخذ برد او تحمميه كثير.... الحليب يسبب اسهال...وكثرة الويت فود كمان
ايش لون الاسهال؟ كيف قوامه؟
اعتمدي عالدجاج المسلوق اكثر شي ولا تعطيهم اكل مبهر او فيه صلصات وطماط ...السيريلاك يسبب اسهال
ركزي على كل شي ياكله يمكن السبب من الاكل
اذا القط عمره فوق الشهرين ابدأي معاه علاج الديدان
لاتكثري مضادات حيوية لانها ماتستخدم باستمرار ...وهو مش مريض علشات نعطيه مضاد...لو تعود جسمه عالمضاد حيصير مايأثر فيه حتى لو كان مريض فعلا

عطيه زبادي هالفترة يوميا...الزبادي كويس للاسهال ولمشاكل الامعاء
خليكي الاسبوع هذا معتمدة عالدجاج المسلوق وممكن تضيفي سوي ويت فود بين فترة وفترة والزبادي ملعقة باليوم وانشالله بيتحسن
شوفي ايش ادوية الديدان المتوفرة عندكم سواء بيطرية او بشرية وقوليلنا وحنا نعلمك ايش المناسب وكم الجرعة

[براءه شريره]

بستي سكتت والحمدلله بس ما اعرف من الطريقه اللي عملتها ولا خلص الجنان اللي براسها ،،!

اما التعقيم انا من الطايف ماعندنا دكتور مؤهل يعقم لاكن قبل فتره جا دكتور من المدينه وعقملي وحده ب 500 ولو اعطيتو اكتر من بسه كان حيخليها ل 400

واكلهم والله اطبخو لهم مخصوص لاصلصه ولا بهار والحليب قاطعتو عنو لانو فكرتو هوا السبب رغم انو كان حليب خالي اللاكتوز كنت ومازلت اشرب منو اي كتن اخدو من الشارع وعاشو وبصحه والحمدلله
التحميم ،،، اصلا انا مابحمم قططي حتى وقت اجيبهم من الشارع هما وقت يرتاحو ويشبعو ينظفو نفسهم ويطلعو اخوات المتحممين بالشكل :shy:

قوام الاخراج عندو غير متماسك سائل جدا واللون افتح افتح درجات البني ،، اصلا حتى وقت يكون اخراجه سليم ومتماسك زي القطط السليمه يكون لونو فاتح زي لمن يكون سائل ،،،!!

والحبوب لسا ماسالت لانو اصلا مومتاكده من عمر الاستاذ لازم اوديه للدكتور يشوفلي عمرو ،،اخدتو صغير بالحجم صغر واضح عن بستي اللي عمرها دحين ب 7 او 8 شهور كان ادا كبرتو كبرتو عمرو حيكون تلاته شهور ماكمل اسبوع الا الفرق اختفى ودحين يمشي جنب منها وكانو اخوها التوام مره مقارب لها بالحجم وتبين هيا اصغر منو كمان ..!!!:confused:

[بسبس مياو]

خليكي عالدجاج المسلوق والزبادي وحبوب الديدان مدة اسبوعين وانشالله حيختفي الاسهال
اذا ضل مثل ماهو و عندك امكانية تسويله تحليل وضائف الكبد يكون افضل..

[براءه شريره]

جبتلو شراب من الصيدليه البشريه اسمو Vermox بعد سالت الدكتور
واعتبرنا انو عمرو ٤شهور قديش اعطيه

[بسبس مياو]

فيرموكس 1مل لكل كيلو....
اذا عمرها فعلا 4شهور نقول وزنها 2كيلو ..يعني 2مل مرة باليوم
لمدة ثلاث ايام...وبعد اسبوعين نكرر الجرعة...بعدين تصير كل شهر او شهرين لحد مايصير عمرها سنةتصير الجرعات كل اربع شهور