أهل الخبره يتفضلون

[كويتية]

السلام عليكم ورحمة الله وبركاته

الله يسلمكم رحت مع أهلي لسوق الحمام علشان نشتري سمك وطيور دخلنا كذا محل وعقب دشينا محل عجبني حوض واتفقنا على السعر ونقيت السمك ولما قص الهوز مال الاكسجين وجهز الحوض جان أقول له وين السمك ليش ماطلعته قال لامايصير تاخذون السمك والحوض بنفس اليوم لازم تشترين الحوض أول وتروحين للبيت تحطين الماي وباجر تشترين السمك !!!!!! ليش جان يقول علشان الماي اللي بالحوض تصير حرارته مناسبه للسمك والا السمك بيموت

عاد أنا يالله يالله رضوا أهلي يودوني سوق الحمام وقايلين لي هالمره آخر مره ماكو روحه لهالمكان مره ثانيه أخذي اللي تبينه مره وحده بس :( قلت للهندي خلاص مابي آخذ الحوض رجعه :(

وعقب طلعت ماشريت سمك بس شريت طيور وقفص كبير

سؤالي لكم كلام الهندي صج والا لأ ؟؟؟؟؟؟؟

[انجل فش]

اختي كلام الهندي تمااااااااااااام انا اشوف انو صح الحوض لازم بعد ما تحطي المويه ياخد وقت كم يوم كل ما زاد الوقت كا ما كان احسن تحطي المويه و الديكور وكل شي و تشغلي الفلتر و كمان تحطي كميه اكل صغيرة و تخليه وقت عشان الكلور يروح و الاكل عشان تتكون بكتيريا ان شاء الله اكون افدتك و اذا كان في شي غلط من كلامي الرجاء من الاخوة الكرام التصحيح

[كويتية]

مشكور أخوي عالنصيحه والرد

وبانتظار آراء باقي الأعضاء

[قطو_Q8te]

السلام عليكم والرحمه
والله كلام الهندي صحيح ماقال شي غلط .. واهو لمصلحتج بصراحه
جم طول الحوض وبجم عطاج ياه؟


لكن انا سويت مثلج
شريت الحوض والسمج كله بيوم واحد ..

الله يسلمج شريت الحوض وشريت من ستي سنتر محلول يقتل البكتيريا ويزيل الكلور ويحمي جسم السمج والنباتات سعره 800 فلس وبسوق الحمام ب دينار !
وصبيته بعد ماحسبت ابعاد الحوض وجم قطره احط
بعدين حطيت الحصى والزرع واخر شي حطيت اجياس السمج بلحوض مدة 15 دقيقه بعدين خلطت ماي الحوض مع ماي السمج وهديتهم 10 دقايق
وبعدين هديتهم بلحوض والحمدلله عايشينـ .. الحين صرفتهم عطيتهم حق رفيجي لاني بقلب الحوض لسمج لاحم "" سيكلد ""

اما حوض الدسكس شريته مخصوص للدسكس وبنفس اليوم لكن خذيت ماي من الحوض القديم وخلطته مع الماي اليديد وحطيت الدوا نفسه تيترا اكوا سيف والحمدلله للحين الدسكس عايشين عندي وكبرو بعد ..


وباجر لي روحه بأذن اللهـ ..

[كويتية]

حجم الحوض ما أعرفه بالسانتيمتر بس بقولك بالتقريب شفت حجم طاولة المدرسه ( الأبله ) أصغر منها شوي

أما جم سعره والله مادري لأن مو أنا اللي بدفع وأساسا كنت لاهيه أختار السمج بس أذكر سألته عن أسعار السمج شي بدينار وشي بدينارين وفي بعشرين

والله الهندي كان ينصحنا أما باقي الهنود شكلهم مايعرفون شي علشان جذي تشجعنا نشتري منه شكله فاهم بس ماشريت منه

[Lonely Hunter]

حسافه

الحين ماتقدرين اتروحين مره ثانيه الا اذا حنيتي ستين مره :(

في محلات ثانيه اذا تبين مو بسوق الحمام

يعني عندج مثلا في محل سمج بمجمع المثنى ... و فيه محلات بشارع عند لفة مركز الفنون اللي بالسالميه مادري الشعب ... بس اهيا المنطقه اللي جدام الرميثيه على الدائري الخامس



على العموم .. نرد للحوض و للسمج


تقدرين انج تشترين السمج و الحوض بنفس الوقت ... انا يامه شريتلي سمج و حوضي كان فاضي

مافيه لا ماي لا ديكور ولا بطيخ

كل اللي عليج انج اتحطين السمج (( مع الماي اللي بجيسهم )) داخل طشت او جدر او اي شي يييزيهم .. و تزيدينه المكان ماي اذا كان ناقص

و اتحطين الاكجسجين معاهم و اتخلينه ..... جذي السمج يقدر يعيش معاج و مايموت و ياكل و ماعنده مشاكل

و بنفس الوقت تزهبين الحوض و الماي و اتحطين داخله الادويه و كل شي على شان يكون جاهز للحوض

بعد خمس ايام تقدرين اتحطين السمج (( ماعدا الدسكس و كم سمكه دعله مثله ... يبيلهم ماء قديم عمره شهور و كان عايشين فيه سمج ))

بس

اخر مره سويت هالحركه قبل جم اسبوع .. مع بيرانا
كلش ماكان عندي حوض زاهب لهم
حطيتهم بحوض بلاستك بو دينار و نص على مايجهز حوضهم
و الحين ياحلاتهم .. قاعدين يقطعون بالسمج الميت اللي عندي :p

[كويتية]

ماشاء الله تبارك الله شرح وافي ويدل على خبرة بتربية السمك

كل هالمعلومات بحطهم بالاعتبار اذا شريتلي سمج ان شاء الله وعلى قولتك مولازم من سوق الحمام بدور بأي محل بالديره

شاكره لك اهتمامك وردك عالموضوع

[WaLeeD-q8]

كويتيه كلام الهندي مو مظبووووط

لما تشترين السمج والحوض فاضي وتعبينه ماي عادي مايكون فيه اكسجين
ولما اتشغلين الاكسجين يبيله على الاقل اربع ساعات على ماينتج اكسجين عدل
اشتري حوضج واشتري السمج بنفس اليوم وترسي الحوض نص ماي مو فل
وحطي السمج فيه اهوا ويا الماي اللي وياه لائن الماي اللي وياه فيه اكسجين وماراح يموت انشالله
وبعد اربع ساعات زيدي الماي بس اهم شي لازم الماي مايكون حار حيل يموت السمج لازم الماي معتدل ويميل للبروده افضل للسمج
نصيحه اخيره اختاري سمج بحجم واحد يعني مو كبيره وصغيره عشان الاكل ماتتوهقين فيه وحده تشبع والثانيه لا نص قفشه صغيره كل يوم

[hamood]

كلام الهندي صح

[Lonely Hunter]

waleed
مو كل السمج يقدر يستحمل الماي اليديد
و خاصه السمج العادي مثل القولد و البلاتي و النيون

و عن الحجم واحد .. اهوه مو المشكله بالاكل .. اللي ماشوفها انا مشكله اصلا لان كل وحده تاكل ليمه تطفح

المشكله بانه الكبيره تاكل الصغيره الا اذا عرفت اي حجم ممكن انك اتحطه مع بعض

اعطيك مثال

انا حاط اروانا طولها 20 سم مع سيكلد طوله 3 سم ;)

و حطيت معاهم بلاتي مره ماابيها طولها 4 سم و كلتها اول ماحطيتها

الشغله ماتعتمد على الحجم ..تعتمد على النوعيه بعد

[كويتية]

الله يعطيكم العافيه

شكرا لكم عالافاده

بصراحه أستفدت من نصايحكم

شاكره لكم مروركم