العناية بفرخ الكاسيكو محتاجه مساعدتكم

[دلع بحريني]

قوووووووووة


عندي فرخ كاسيكو صغير ولون عيونه سوده بس مشكلته ريشه مب نظيف وفي ريش طايح في ريله ((منتوف)) قالي صاحب المحل اسبحه بماي بحر عشان يتطهر وينظف ريشه!!


هل صح هذي المعلومه ؟؟


وعندي سوال عن اكله هل ااكله سريلاك بالابره مع العلم انه اهوه قالي صاحب المحل قالي ياكل برروحه؟؟

بس احس لو عطيه حب شمسي ما راح يفيده حق صحته لانه فرخ

فا ابي اعرف شنو الاكل المفيد حق صحته لانه احس جسمه ضعييييف

[Kuwaite]

الاكل المفيد هو السيريلاك .. + النخي .. وتقدرين اختي توكلينه بايدج وهذا بالنسبه لي احسن ..

لانه راح يتعلم .. اهم شي الدفا للكاسكو .. والبرد ضار عليه .. اذا شفتي فيه سهال راجعي الدكتور ..

مع السيريلاك عطيته ماي شويه ..

وبالنسبه للتسبح بماء البحر مادري عنها الصراحه لكن تو الناس على الفرخ بالتسبح انا عندي فرخ لكن ماسبحته لحد الآن .. وخايف عليه ..

اتمنى اني فدتج قليلاً وهذا واقع خبرتي في الكاسكو الفرخ لانه توني شاري واحد ..

وانا اكلمج نط علي يبي يكسر احرف الكيبورد لوول

لكن على فكره احلى عمر هذا لكن يبيله عنايه شوي .. ويحب يلعب ودايما يبي حنان لانه يحس انه اللي معاه اهو والدته ..

[دلع بحريني]

هلا والله


مشكور اخوي على ردك السريع ... هههههه وان شاءالله ماتعور الكاسيكو عقب النطه ... الله يحفظه لك ان شاءالله

وصدقت عن سالفه اليوم اللعب والحركه ما شاءالله عليه من اطلعه من القفص ييلس تحوس مني ويتعلق مناك ويناطط من كرسي لي كرسي :p

انزين بالنسبه للأكل شلون اعطيه السريلاك ... يعني اشلون ادخله في حلجه ؟؟

والنخي شلون مهروس مخلوط ويا ماي ولا شلون ؟؟


ومشكور مره ثانيه على ردك ما قصرت تسلم لي

[Kuwaite]

اختي بالنسبه للسيريلاك اخذي شويه بإيدج وعطيه واهو راح ياكل .. انتي بتستانسين واهو كذلك ..

اما بالنسبه للنخي النخي المطبوخ ..

وعلى فكره السيريلاك جدا مفيد له ولا تنسين الفيتامينات .. روحي اقرب صيدليه بيطريه واخذي فيتامينات للطير فهي مفيده جدا ..

والله يخليلج طيرج ويخليلي طيري ..

[دلع بحريني]

همممممممممممم


اللي فهمته منك انه اعطيه السريلاك جذي هد ....


يعني خالي بدون ماي >>> ناشف

ماعلي بنجرب ... انا كان ودي اوديه اليوم البيطري بس مسكر ما لحقت عليه باجر من الصبح بوديه البيطري


مادري عندي ملاحظه جذي صغيره على الكاسيكو انه ما يعرف ياكل بروحه عدل

احسه بس جذي يقرض مب عارف شلون :(

واهوه مو متعود ياكل من اليد يعني مب مربى في مزرعه


بحاول وياه وان شاءالله على خير


وتسلم لي والله يخليك لك طيرك وطيرررررررري اميــــــــــــــــــــن ^____^

[tedll]

الـلـه يـخـلـيـلـكم طـيـوركـم و يـخـلـيـكم لــهــا

:( ذكـرتــوني في الذي مـضـى:(

و تـقـبـلـوامـروري

[دلع بحريني]

شباااااب بليز محتاجه مساعدتكم

ابي خلطات اكل مهروسه مفيده حق صحت فرخي

ما يعرف ياكل عدل وللحين مب متعود ياكل من يدي خايفه على صحته


امس حطيت له ذره لقيته ماكله بس مادري احسه بس جذي يعضضه ما يبلع شي

مادري هل اهمه جذي طريقه اكلهم ولا شلون ؟؟

اهرس له بيضه مفيوحه واعطيه بعود ينفع ولا لا ؟؟



بليييييييييز ساعدوني :(

[Mr. MeMo]

اختي الكريمه


اذا تعرفين محل عزام في البحرين

اذهبي هناك سوف تجدين هذا النوع

http://www.pusup.com/uploads/8116d835e4.jpg

و ما عليك الا ترطيبه بالماء و تقديمه للطائر
فهو مفيد جدا و مغذي خاصه الفروخ

واتمنى لك التوفيق

[دلع بحريني]

هلا اخوي Mr. MeMo


في وين ذي المحل ؟؟ اي منطقه


انا اليوم عطيته بستوك اطفال شفته وايد حبه واكل منه ... تعتقدون مفيد حق صحته

وحاولت اعطيه سريلاك ويا شويه ماي بس ماعجبه ... لكني غصبته ياكل منه شوي

واليوم وديته البيطري توني راجعه من شوي عطاني فيتامينات حق صحته احطها له ويا الماي وعطاني مضاد حيوي بعد


وتسلمووووون لي على الردود الطيبه ^___^

[Kuwaite]

هلا والله .. سوري على التأخير ..

اختي السيريلاك عمره ماصار بدون مااي :|:|:|

اكيد لازم مع ماي والفرخ مايحبه يابس يحبه شوي طري يعني كثري شوي الماي ..

بالنسبه للأكل قتلج .. النخي (حمص) .. بطاط مهروس .. الذره يحبها .. الفيتامينات مفيده جدا مع المضاد الحيوي .. اعتقد لونه اصفر المضاد مثل اللي عندي

السيريلاك في انواع .. فواكه .. قمح وحليب .. عسل .. جربي معاه ..

انا اللي عندي يحب ياكل السيريلاك .. وتعود عليه .. لانه السيريلاك افيد شي للفرخ بهالعمر ..

وبالنسبه للكاسكو انه مايعرف ياكل .. هذا شي طبيعي لانه فرخ ومو متعود ياكل وحتى لو تلاحظينه لمه يمشي بالقفص يتعثر شوي لانه توه صغير لوول

[دلع بحريني]

هلا والله اخوي Kuwaite

اليوم حاولت اعطيه سريلاك بس شكله ماعجبه لكني يلست اعطيه غصب عنه

وصدقت عن سالفه انه ما يقدر يمشي عدل في القفص ... والله نفس مالي بالضبط كل خطوه يشير فيها


بس ملاحظه عليه انه يحب ياكل وينام !!!

هل هذا طبيعي لانه فرخ ؟؟

[Kuwaite]

لا انا العكس

من ياكل يبدا يلعب .. لمه توكلينه اختي .. خليه فوق القفص وحاولي تلعبين معاه وشوفيه شيسوي ..

:>

[Mr. MeMo]

اختي محل عزام

في شارع البديع

[دلع بحريني]

اوكي مشكور اخوي مستر ميمو على المساعدة ^___^

في ميزان حسناتك ان شاءالله ياربي


وانا اليوم فرخي اكل سريلاك وبستوك واكل نخي حسيته شهيته وايد مفتوحه هالايام

مشكورين ويعطيكم الف عافيه ياربي

[دلع بحريني]

شباااااب

احد يعرف مكان يبيع بستوك حق الطيور ؟؟؟


لانه فرخي مينون في شي اسمه بستوك قلت لو احصل مخصص حق طيور فيه فيتامينات وكل شي بيريحني في سالفه الاكل

ومشكورين

[Kuwaite]

احسن شي اختي التنويع .. والبستوك مادري شقصدج فيه اعتقد يمكن قصدج بسكوت ؟؟؟

لوول العاميه تختلف شي لكن احسن شي التنويع ولا تعودينه على شي واحد :)

تحياتي لج اختي

[دلع بحريني]

هههههههههههههههههه

اي اقصد البسكوت ... بس احنه نسميه بستوك بالبحريني


وعندي بعد سوال اذا يصير اعطيه روتي مبلل بماي شوي ؟؟؟

[Kuwaite]

لوول روتي شنو ؟؟ خبز ؟؟ لوول ننطر الترجمه علشان نشوف ..

[عاشقة الطيور]

السلام عليكم ورحمة الله وبركاته

انا بوضح كلام دلع .. روتي مبلل (( صمون في كميه من الماء))

[Kuwaite]

مشكوره اختي عاشقه الطيور ...

نعم اختي مفيد للفروخ وهو جيد للفروخ