مشكلة مع التماسيح [الأرشيف]

barood

28-01-2006, 11:59 PM

والله يا اخوان صارتلي مشكلة مع التماسيح و الحوض - مع العلم اني وضعت موضوع في قسم البيطرة من دون فائدة - وهي ظهور طفيليات في ماء الحوض على هيئة دوود صغير جدا بالكاد يرى بالعين لونه أبيض .

أولا ولله الحمد قدرت أتخلص منهم مبدئيا بوضع ماء ساخن بالحوض مع وضع كمية كبيرة من الملح لمدة ساعتين تقريبا و بعدها نظفت الحوض و غيرت الماء

بس المشكلة اني أتوقع رجوعهم بعد فترة لاحتمال وجود بعضهم عالق على أجسام التماسيح ولو اني حاولت غسلهم بالماء فقط و ما أعتقد انه ممكن يكون كافي :(

أو انهم يرجعون لأن سبب ظهورهم أصلا موجود و انا ما أعرفه و هذا اللي بسألكم عليه

شنو تتوقعون سبب ظهور الطفيليات ؟؟ ممكن يكون بسبب خروج التماسيح

و شنو ممكن أتصرف معاهم لأن أخاف يأثرون على صحة التماسيح و خاصة اني لاحظت ان احد التماسيح شهيته للأكل قلت و شاك انه أصابه الاسهال !! :(

بوفهد

29-01-2006, 07:28 AM

اخي الكريم باروود اعتقد ان المشكله تكمن في بقايا الطعام و خروج التماسيح فأنصحك بالتوجه الى البيطري ليقوم بالكشف عن تلك الديدان والطفيليات واخبارك بالعلاج اللازم لها

وسامحنا على التقصير يا اخي العزيز

بالتوفيق

barood

29-01-2006, 11:48 AM

مشكور اخوي بوفهد على المساعدة

لكن تعرف بيطري في الكويت ممكن يفهم في التماسيح !؟

لأني رحت حق أكثر من واحد كانو متخصصين بس بالقطط و الكلاب أجلكم الله

عاشق الحيوانات

29-01-2006, 03:02 PM

اولا انت حاط فلتر ؟؟؟

ثانيا تقدر تشتري كلور حق السمك راح تلقاه باي محل واسمه ( vbc-stress protection ) وهذا حماية للماء من البكتيريا والطفيليات وانشاء هذا يفيدك .

barood

30-01-2006, 01:48 AM

مشكور اخوي عاشق الحيوانات

انا حاط فلترين صغار

و دواء الكلور أقدر احطه مع وجود التماسيح بالماء ولا لازم أشيلهم قبل لا احط الدواء ؟!؟

قهوه مره

30-01-2006, 04:32 AM

هذي من خبرتي مع السلاحف لانها صارت معي ولما قمت اسوي هذي الطريقه ما قمت اشوق ديدان ولا شي من هذي الاشياء
طلعهم من الحوض خليهم يتمشون على الارض و غسل الحوض بالكلور وجففه وغسل التماسيح وجففهم و حط لهم مويه جديده و لا تترك الاكل داخل الحوض فتره طويله ولا تنسى تنضيف الحوض من فتره الى فتره حتى مع وجود الفلتر

barood

30-01-2006, 01:07 PM

مشكور اخوي قهوة مرة

انشالله اجرب طريقتك اذا شفت الدوود بينو مرة ثانية لأنها سهلة و مشابهة لطريقة الأخ عاشق الحيوانات

بس انت تقصد الكلور اللي ذكره الأخ عاشق الحيوانات ؟!؟ ولا أغسل الحوض بكلوريكس !؟

قهوه مره

31-01-2006, 06:57 AM

بنت =اخت
انا ما جربت الكلور
لكن الكلوركس جربته و لازم اغسله بمويه حاره
و اعرضه للشمس و اخليه لين تخف ريحته بالكثير يومين
وارجع اغسله بمويه حاره وانشفه
و اغسل السلاحف بمويه معتدله واحطهم في الحوض
واصب عليهم المويه بهدوء علشان اخلي ارتفاعه يناسبهم
وانا الي عندي سلاحف مو تماسيح يعني اقدر احطهم في اي مكان
لو تقدر تخليهم برا الحوض يومين يعني دور لهم مكان ثاني غير الحوض
و اكنها المره الثانيه الي تصير معك في ثاني حوض؟؟؟

barood

31-01-2006, 05:30 PM

مشكورة اختي قهوة مرة و آسف ما دريت انك بنت

والله العملية هذي يبيلها شغل شوي و خاصة اني ادبرلهم مكان يومين و خاصة اني ما اقدر احطهم في أي مكان !! لو تقولين ساعتين ممكن :)

حاليا انا ما اشوف دوود نهائيا بس انا خايف انهم يظهرون بعدين فممكن استخدام دواء الكلور يفيد كوقاية و طريقتك اختي تكون كعلاج اذا ظهر الدوود مرة ثانية :)

العابر

31-01-2006, 06:20 PM

ياخيوي يمكن عيال الناموس اوحشرات اخرى انصحك بوضع ادويه للماء

تو zoo

31-01-2006, 07:00 PM

شكرا للاخوان على الافادة

barood

01-02-2006, 12:35 AM

اولا انت حاط فلتر ؟؟؟

ثانيا تقدر تشتري كلور حق السمك راح تلقاه باي محل واسمه ( vbc-stress protection ) وهذا حماية للماء من البكتيريا والطفيليات وانشاء هذا يفيدك .

اكرر السؤال للأخ عاشق الحيوانات

دواء الكلور أقدر احطه مع وجود التماسيح بالماء ولا لازم أشيلهم قبل لا احط الدواء ؟!؟

مع الشكر لكل من اهتم للموضوع و شارك فيه :)

فطوم

02-02-2006, 12:24 PM

تقدر تروح مستشفى الوفره الدولي بالكويت يمكن يفيدونك وخل اتفلسف وادليك وين صاير يمكن ماتددل:P اطلع على الملك فهد وكمل سيده سيده سيده لين تيك لفت مينا عبدالله والوفره لفها بتلقى مطعم القبقب على يمينك المستشفى يمه :p

barood

02-02-2006, 03:18 PM

مشكورة اختي فطوم

بس ما تسوى اقطع الطريق هذا كله و بعدين يقولون مانعرف الا بالقطاوة و الكلاب !! أجلكم الله

انتي عارفة انهم يعالجون حيوانات ثانية ؟!؟

فطوم

04-02-2006, 02:15 AM

حسب علمي يعالجون كل انواع الحيوانات وهذي بالغالب مشكله تخص كل البرمائيات حسب توقعاتي مو بس التماسيح ولكن مستشفى الوفره غالي وايد بالمقارنه مع الدهماء والري وتقدر تروح جبال سوق الحمام يم سوق الايرانين في واايد صيدليات يمكن يفيدونك وتقدر تروح بسوق الحمام محلات السمج اسال عن واحد اسمه عباس اتوقع راح يفيدك لانه من سنين ييبيع تماسيح وسمج

barood

05-02-2006, 02:45 AM

مشكورة اختي فطوم على الاهتمام و المساعدة

حاليا الوضع مستتب ولله الحمد لأن كل كم يوم أغير الماء و حتى التمساح المريض صار لونه أفتح شوي من أول بس الحين الحمدلله رجع لونه طبيعي بس لازم أعرف بيطري متخصص بالبرمائيات مثل ما تقولين علشان اروحله وقت الحاجة ... و على طاري عباس راعي المحل ودي اروحله يمكن يفيدني بس يمكن انتي ما تدرين كم رقم محله أو على الأقل اذا تقدرين تقولين بأي شبرة الأخيرة اللي على اليسار ولا اللي قبلها .. و طبعا شنو جنسيته كويتي ولا هندي ولا من أصل عربي ؟!؟

و آسف على الازعاج و كثر الأسئلة :)

عاشق الحيوانات

05-02-2006, 07:44 PM

اسف على التاخير لا تحط الكلوركس ولا شئ حط الكلور الي قتلك عنه وعادي لا تشيل التماسيح ولا تكثر بالكلور حط كميه قليله وراح تشوفه بالمحلات السمك واذا تبي ترتاح اشتر فلتر ثاني واحذر من الكلوركس لانه راح يذبحهم .

barood

06-02-2006, 04:26 AM

مشكور اخوي :)

انشالله بشتري الكلور و أجربه

فطوم

08-02-2006, 03:40 AM

لا عباس هذا ايراني وفي واحد ثاني اسمه حسن هم ايراني يبيع تماسيح بس مادري اذا عنده خبره او لا بس عباس حسب الي اسمعه عنهانه عنده خبره بالسمج وهالسوالف اهو بالجبره الاولى اللي صايره صوب سوق القفاصه اعتقد اخر شي محلاته انت اسالهم قولهم وين عباس ويدلون عليه ومستشفى الوفره حسب علمي يعالج جميع انواع الحيوانات واكيد عندهم فكره عن هالسوالف

barood

08-02-2006, 05:30 PM

مشكورة اختي فطوم

انا انشالله بسأل عنه

و على البيطري آخر شي بفكر فيه الوفرة :(

بفتر على كل البيطرية اللي بالديرة أول :)

فطوم

08-02-2006, 09:13 PM

انشالله الله يكتب الي فيه الخير انا مثل ماقتلك في صيدليات يمكن يعرفون شنو الحل ويمكن في علاج او مضاد حق هالاشياء الي تتكلم عنها

barood

10-02-2006, 07:59 PM

اخوي عاشق الحيوانات

شريت دواء للكلور بس لمن رجعت شفت اسمه غير عن اللي انت قلتلي عنه

اسم الدواء اللي شريته Anti-chlorine Special

هل هذا يأدي لنفس الغرض ولا هذا شي ثاني ؟؟

اختي فطوم

رحت اليوم سوق الحمام ووصلت لعباس و كلمته بس قالي : انا ما شريت تماسيح ولا بعت تماسيح ولا أفهم بالتماسيح !! :(

يمكن خايف لأنه بيع التماسيح ممنوع

فطوم

10-02-2006, 08:13 PM

صج والله! انا اذكر اني كنت اشتري منه سمك صغار لتماسيح صديقتي وكان يقولي احسن سمك اهو القولد فش لانه في بروتين وايد وانا اعرف بالتماسيح وقالي اعرف المحلات الي تبيعهم ويعني كان يتحجى بخبره وهو يبيع سمج وسلاحف وسحالي يعني اكيد تصادفه نفس المشكله!!! عالعموم اذا مريت هناك في واحد ايراني اسمه حسن اشكناني وهذا مظمووووون يبيع تماسيح جدامي طلعلي ياهم من الكبت فيمكن عنده خبره وتقدر تروح حديقه الحيوان وتسال يمكن يساعدونك ومر الصيدليات الي يم سوق الحمام هم يمكن عندهم دوا يقتل هذي الطفيليات بس انا اقول اغسل الحوض وكل شي فيه اب ماي حار وملح وانشالله يصير كل شي تمام

barood

10-02-2006, 08:49 PM

ليش اذا كتبت مشاركة ما تطلع ؟!؟

barood

10-02-2006, 09:02 PM

مشكورة اختي فطوم على الرد

ما قدرت أقرى المشاركات الأخيرة الا مع الوضع المتقدم للرد

المهم انا ما خليته و سألته على الدود قالي بس غير الماء .. قلتله غيرته و مافاد .. قالي غير الصخر أو غسله عدل .. قلتله ماكو دواء للدود ؟؟ قالي لا مايحتاج دواء بس اغسل الصخر عدل !!

و على البيطرية .. رحت للي يم السوق الايراني معظمهم مسكرين و سألت واحد فيهم قالي ماكو احد يفهم بالتماسيح هني !! قلتله وين قالي شوف الدهماء ( أو بيت الإنماء ) انا مو متأكد بس اهو اللي قبال شبرات سوق الحمام .. رحتله شفته مسكر !! يوم الجمعة عنده نص دوام بس

بس شكلي بروح حديقة الحيوان !!

عاد تصدقين الوالد كان مسئول في حديقة الحيوان !! بس هالكلام قبل الغزو .. اخ لو ليلحين اهو هناك جان العملية صارت سهلة .. الحين الستاف اعتقد متغير كله و ما أدري اذا كنت اقدر أوصل للبيطري اللي هناك بس بحاول :)

و آسف على الاطالة و أشكرك مرة ثانية على اهتمامك :)

قناص

11-02-2006, 08:59 AM

الله يعطيكم العافية على النقاش

وأتمنى انكم وصلتو لحل لهذه المشكلة
وأيضا مساعدة الأخ barood على تفادي هذا الوضع

وأنا من رأيي اذا تضاربت الحلول فمن الأفضل مراجعة البيطري

وشاكر لكم اهتمامكم

السيزر_عزت

19-02-2006, 11:07 PM

يا جماعه اخوكم مبتدا ممكن اعرف مدي شراسه هذه التماسيح وكيفيه معاملتها

barood

21-02-2006, 10:27 AM

حياك الله اخوي في المنتدى :)

والله هذول مهما كانو صغار عضتهم قوية !! حاول انك ماتخليهم يعضونك

عاشق الحيوانات

23-02-2006, 03:52 PM

ان شريته من محل السمك ؟؟؟ من اي ماركة ؟؟؟ وشنو لونه ازرق ؟؟؟

barood

26-02-2006, 12:16 PM

الدواء شريته من محل سمك

ماركته Aquadene

لونه أزرق

انا ليلحين ماستخدمته !! اخاف يكون مو نفسه و يضر التماسيح ...

و انا ماهتميت وايد لأني كنت أغير الماء كل 4 أو 5 أيام و ما كنت أشوف أثر للدود

لكن !.!.!.!

أمس و أنا أنظف الفلاتر شفت دودة لونها أحمر كبيرة جدا مقارنة بحجم الدود اللي أتكلم عنهم

تقريبا كان طولها 1.5 سم !!!!

يعني الحين لازم أستخدم الدواء اللي يقضي عليهم

انشالله يكون يأدي لنفس المفعول أو اني أشتري واحد ثاني بنفس المواصفات اللي ذكرتها