مات أغلى كروان والسبب !!

[طير الهوى]

السلام عليكم ورحمة الله وبركاته


ابدأ بالسالفة مباشرة ،،


عندي طائرين كوكتيل .. وكل واحد ماشاء الله احلى من الثاني .. وكل واحد تغريده احلى من الثاني

اعمارهم 3 شهور .. أليفين وطيوبين ويرقصون ويغنون .. والحمدلله صحتهم زي الفل

طبعا شي اسمه قفص انا ما احبه .. لان الطيور اصلا ما تحبه ..

كل طير حطيت له ستاند خاص فيه وصنعت له العاب بنفسي .. وطبعا كل واحد في غرفه

علشان تعليم التصفير والكلام ..

اليوم وانا جالس على الجهاز .. صفرت لطيري لانها عادة .. كل ماصفرت له يصفر وراي ..

يوم صفر وبدا يكح ويعطس دم .. إيــــــــــه دم .!!!

والله يا جماعة الخير بيني وبينه مترين .. والدم وصل ثيابي .. امتلى الستاند دم .. وصحن الستاند .. والكنبات اللي حوله والطاولات بعد !!

علطول دقيت على الاستعلامات وطلبت رقم اقرب طبيب بيطري .. دقيت عليه وشرحت له الوضع وانه الدم يطلع من فمه وخشمه وبكثرة شديده .. وانا خايف على طيري

سالني الدكتور وش لون الدم ؟؟ احمر غامق والا فاتح ؟؟ قلت لا والله فاتح مثل دم الانسان

قال لانه لو غامق يعني انه مرشح .. وداخله برد ..

لكن لو فاتح معناته ان الدم جاي من جووووا .. مو اي كلام !!

هالكلام الساعه 9 وربع .. سألته متى تقفلون قال 11 الا ربع .. وقال : جب الطير بسرعه قبل يفوت عليك

علطول شلت الطير ورحت للدكتور .. سألني الدكتور هل طيرك أليف ؟؟ قلت اي والله اليف بس شف وش سالفته .. الحق عليه

مباشرة .. فتحت القفص للطير وقلت له كالعاده ( يالله ) وطلع على يدي .. عطيته للدكتور .. اول مابدا يفحصه .. صرّخ الطير والصرخة هي الصرخه !!

تمايل راسه يمين ويسار وودّع الطير .. !! ماااااااااات ..!!!

دموعي بالكاد حبستها .. ونفسيتي بجد تغيرت وتغير وجهي.. أمي وخواتي الثنتين يراقبون اللي يصير من ورى الباب الزجاجي للعيادة .. التفت عليهم وبحركة بيديني عطيتهم اشاره ان الطير مات ..!!

الجميع ما تمالك نفسه .. من كثر مانعشق هالطير ،،

الدكتور قال اكيد ان فيه نزيف داخلي .. والا مايطلع كل هالدم .. هل ودك نسوي له تشريح نشوف سبب الوفاة ؟؟

قلت ايه .. ودي استفيد من هالتجربه واحافظ على طيري الثاني لا تصير له نفس المشكله

الدكتور مسك المشرط وفتح شق من رقبة الطير الى قصبته الهوائيه وهنا كانت الطامة الكبرى !!

لقينا بحلق الطير ( دبّوس ) من الدبابيس اللي يحطونها في دباسة الورق .. الطير اكلها وتسببت بجروح بليغة في حلقه وسببت سيلان دم ووفاة للطائر !!


من وين جاء هالدبوس ؟؟ وكيف وصل ؟؟ ما دارت هالسؤال براسي الا بطريق العوده للبيت ..

وصلت وقررت اني افتش في أكل الطير .. وهنا وقعت الطامة الكبرى الثانية !!

لقيت دبوسين آخرين بالأكل .. ورحت علطول للطير الثاني اشوف أكله .. والحمدلله هانت مالقيت الا حصى بس !!


مات الطير !! كنت ابحث عن كل شي آمن له وأوفره .. وكنت اخاف عليه من نسيم الهواء .. والمصيبة صارت بمكان غير متوقع وهو الأكل ..!!

قررت من اليوم ورايح ما اشتري اكل للطير من الطاحونه بالكليو ولا احط أكل للطير الا وانا فاحصه حبه حبه .. ومفتش فيه مضبوط

علشان لا يجي يوم لا قدر الله واخسر طير ثاني :(

والا اشتري من الاكل اللي يجي جاهز بكراتين عند التميمي وارتاح نفسيا !!


هذا درس لا يمكن انساه ابدااااا


اتمنى ياجماعة الخير انكم تهتمون بهالشي من هالناحيه .. انتبهوا لاكل طيوركم قبل تحطونه وفتشوه زين .. والله العظيم خساره اكبر خساره تتعب بالمحافظة على طيرك ثم تتفاجأ ان الاكل هو المشكله ..


اترككم مع الصور وماتبقى من طيري العزيز :

http://alturaief.com/up/mat1.jpg

http://alturaief.com/up/mat2.jpg

http://alturaief.com/up/mat3.jpg

http://alturaief.com/up/mat4.jpg

http://alturaief.com/up/mat5.jpg

http://alturaief.com/up/mat6.jpg



انا لله وانا اليه راجعون


تحياتي ،،

[diiie_hard]

ولا تزعل نفسك اخي

يمكن عين عليه وراحت

الي يجي في الريش بقشيش

[mex]

والله قصة مؤلمة جدا

الله يعوضك خير

لكن اقول يمكن احد من الصغار عندك حط الدبابيس في الاكل او الطير نفسه كان يلقطها من الغرفة لانه اكيد حتسمع صوت او تلاحظ الدبابيس وانته تحط الاكل في الصحن تبع الكروان

[صرقوع المصرقع]

وربي قصتك شيء مؤلم و ادمعت له عيني

الله يرحمه يارب ويهون عليك و ان شاء الله تتعوض بـ طير أحسن منه بألف مرّه ..

و غلطه الـ شاطر بـ ألف .. لازم نتعلم منك وتتعلم مننا

و مشكور أخوي على مشاركتك لنا قصتك المؤثره ..

.. و تحياتي ..

× صرقوع ×

[عسولي]

الله يكون بعونك

وهون على نفسك

وانشاء الله ربي يعوضك بداله خير

قصه من جد مؤثره

والحمد لله انك عرفت السبب

وذكرته لنا لاني انا شفت كذا مره دبوس حق الكيس

ولا اشيله احسب ان الطير يقدر يميز

لاكن بعد قصتك

بخذ حذري

وفقك الله اخي

واشاء الله ربي يعوضك

[Capt.HuSsEiN]

قصه مؤلمه بالفعل الله يعوضك عنه بأحسن منه
و ما قصرت عالموضوع نبهتنا لهالشغله
و التجربه ان شاء الله نستفيد منها و لا يقع فيها احد ثاني
جزاك الله كل خير و شكراً جزيلاً

[طير سارة]

طير الهوى

عيشتنا بموضوعك نفس الجو اللي مريت فيه وخليتنا نشاركك في حزنك :( بأسلوبك في سرد القصة

واكيد راح نستفيد من تجربتك

الله يعوضك بطير احسن منه قل آمين


مشكور يالغالي على هذه المشاركة القيمة ولو انها حزينة


تحياتي

[THE END]

الحمد لله على كل حال

ومعوض خير ان شاء الله

وان اشكرك واشد عليك

في مثل هذي المواضيع البعض قد يصيبه الغضب او الاحباط فيترك التربيه او يكتمها بنفسه

جميل جدا ان اخرجته لنا وللاخوان كلهم بهالطريقه

حتى يتعلم الجميع قدر الطير عند صاحبه

على العموم الله يبارك لك بطيرك الثاني

وتفرحنا بكلامه ان شاء الله

[Mr.Khaled]

الله يعوضك خير

[الكروان الاسود]

لا حوله ولا قوى الا بالله .الله يعينك اخي.

[ابو عابد]

لاحول ولا قوة إلا بالله

الحقيقه قصه محزنه

والله يعوضك خيرا منه

[غزل]

الله يعوضك بالثاني خير

وبالفعل أنا ما احب الاكل اللي بالكيلو وما احب إلا المعلب أحس انه انظف والحين صار عندي سبب ثاني لتفضيل الاكل المعلب

وسبحان الله كنت دايم لما اشتري اكل من بره وفيه دبوس على الكيس دايم كنت اشيلة ... كنت دايم اخاف ان يلعب فيه طيري ويبلعه بالغلط

وبقصتك ذي تخليني احاسب أكثر واكثر عليه ... فمثل ما عشت جو الحزن على قصتك ما اتخيل اشوف كرواني بالحالة هذى والله ما عرف شنو بيصير فيني

وشكرا لك لمشاركتنا قصتك لنستفيد منها

[طير الهوى]

،،

معليش ياجماعة الخير تاخرت عليكم بالرد ..

يعلم الله اني ما اتأخر يوم عن المنتدى

لكن ضايق صدري عقب السالفه .. وكل ماجيت ادخل يضيق صدري


الله يعطيكم العافيه .. اهم شي مثل ماقلت انكم تستفيددون من هالشي

وانتبهوا لطيوركم .. والله الواحد محد يعرف قدر الشي بجد لين يفقده .. والله لا يجيب هاليوم اللي تجربون فيه هالاحساس


موفقين يا جماعه ،،

[البطريقه]

لا حول ولاقوة الا بالله:(:(
ياحرام والله قصه محزنه جدا:(
وصور جدا مؤلمه وتعور القلب:(

[مجب البادجي]

الله يعوضك خير.

[sarab99]

انا لله وانا اليه راجعون

[الهلال و20وبس]

اتمنى تستفيد انت وانا وجميع الاخوان والاخوات

[فتفوته]

لاحول ولا قوة الا بالله
من جد حادثة مؤلمة وصور مفجعة

الله يرحمه ويعوضك خير اخوي ,,

من بعد ما قريت سالفة الطير حرمت ببغائي من الألعاب خايفة عليه يبلعها ,, وتركته يقضم في القفص ,,,

:(

[طير الهوى]

حياكم يالغالين


فتفوته لاتحرمين طيورك من الالعاب .. هي طيور لعابه مره .. وانا كل فتره اسوي لها العاب بنفسي ..

لاني اذا سويتها بنفسي اتعمّد اني ما اسوي اي شي فيه خطر لها

كل الزوايا منحنيات ولا فيه قطع ممكن انه يقتلعها ويبلعها او يعبث بها .. وغالبا ما احط له اشياء مطاطيه او اقلام او اي شي ما فيه امل ياكل منه شي

بس اهم شي لاتحرمينه من العابه وخليه دوم مبسوط .. لانه يحب يقرض كل شي



ومشكورين على مروركم ..

[هاوي الببغاوات]

الله يعينك على فراقه انا مادري ايش بسوي لو كرواني في مكان كروانك بس انت ليش تشتري من المطحنه حق المعلب احسن ومشكل كمان ونظيف الله يعوضك

[the bird king]

لا حوله ولا قوته الا بالله العلي العظيم انشاء الله الثاني ما ايصيبه اي مرضه ويتربه ابعزك

[بنت البحرين وكلي فخر]

وعلييييييه عور قلبي والله... لاتزعل انشالله بتلاقي واحد نفسه
واحسن منه وبدربه وبتحبه... انا ماتوقع اصير هشي بالاكل
بس من يوم ورايح راح احط بالي على الاكل مابي اخسر اطيوري احبهم وايد

مشكور اخوي انك قلت لنه قصتك المؤثره ونبهتنه عن هشي

يعطيك العافيه
بحياتي لك
بنت البحرين

[الطير الاحمر]

الله يعوضك باحسن منه

[ابو وائل]

الله يعوضك باحسن منه