المساعد الشخصي الرقمي

مشاهدة النسخة كاملة : دوره تدريبه -2 - كيف تعلم الطير يطير الين عندك!

كاسكوكيه
07-10-2008, 11:13 PM
السلام عليكم و الرحمه
أخباركم؟ عساكم بخير و عافيه ^^
اليوم في موضوع $تجربتي$ كتب احد الأخوه عن رغبته في انه يبدأ يعود طيره يطير و يجي عنده

اطلعت على مجموعة فيديوهات بتساعدكم انكم تخلون الطير يطير صوبكم

انا بحاول احلل الفيديوهات و اعطي بعض النصايح على ما يقدرني عليه ربي و الباقي عليكم :rolleyes:

نبدأ بسم الله

أول شي لازم يكون طبعن الطير متعود عليكم و موالفكم... و لازم الموضوع يبدأ بالتدريج.. فمن عقب انه موالفكم... و يكون موضوع الألفه مفروغ منه بينكم... عليكم تعلموه انه يركب على ايدكم

كيف...؟

اول شي علموه على فعل معين .. بنقول مثلن علمو طيركم لما يسمعكم تقولون "فوق" أو "هوب" أو "أركب" أو "تعال" يطلع على ايدكم ... و معاكم هالفيديو و الحرمه تحاول انها تعلم طيرها هالشي

http://www.youtube.com/watch?v=WKOeWZwkbWc&feature=related

و الشي الثاني... علم الطير على مستوى ثاني من الأفعال اللي علمتها اياه.. مثلن هات عصا او الاستاند.. و علمه انه يطلع على الاستاند و من الاستاند على ايدك.. و طبعن خلك مع نفس الأمر لو استخدمت "فوق" خلك على نفس الكلمه.. عشان الطير ما يتلخبط معاك... حاول انك تراجع معاه الموضوع و الأمر الي تريده ينفذه .. و بخليكم مع الفيديو الي تحاول فيه الحرمه مع الطير عشان ينقز من فوق العصا

http://www.youtube.com/watch?v=ufzKFjK4Dho&feature=related


و أخيرن من بعد ما تحس انه الطير صار متعود كل ما تقول له "انقز" مثلا يطلع على ايدك.. او يركب على الستاند.. جرب معاه الطريقه التاليه:

حط الطير على الستاند.. و قرب ايدك منه وايد لدرجة انها تكون ملامسه لصدره.. و اعطه الامر اللي هوه متعود عليه.. "أنقز" و خله يوقف على ايدك.. و كرر العمليه... و بعدها بعد ايدك مسافة قصيره جدا و اطلب من الطير انه يطلع عليها... و كل مره باعد في المسافه الين ما تكبر و الين ما يقدر الطير انه يطير.. طبعن هالمحاولات لازم تكون في غرفه كبيره و لكن مب مفتوحه .. احتمال يستحلي الحريه و يطير عنك :)

و بخليكم مع الفيديو اللي تحاول فيه الحرمه انه الطير يطير الين عندها

http://www.youtube.com/watch?v=86UYXNyFVgc&feature=related


أهم شي أهم شي كل ما سوى الطير شي انته تريده منه لا تنسى المكاااااااافأه



ان شاء الله تقدرون تطبقون الموضوع و تستفيدون منه :D
والسموحه على القصور :o

موفقيـــــــــــــــــــــن خير امين
كاسكوكيه
08-10-2008, 12:48 AM
أدري انتو مشغولين تقرون الموضوع لانه طويل شوي ;)

بس انا وراكم وراكم الين ما اقرا "تجاربكم" عشان بعدين اتطبب في شامبيه :D
طير حر
08-10-2008, 12:52 AM
موضوع مفيد جدا للمبتدئين
-----------------------------

مسكين شامبيه بيتعب من كثر التجارب
كاسكوكيه
08-10-2008, 12:53 AM
:)

الي في الجدر ما يطلعه غير الملاس.. و التجارب بتثبت لي انه شامبيه قدها ^^
عاشق الببغاء 2
08-10-2008, 01:48 AM
بارك الله فيك وتسلم أناملك ياغالية على الموضوع.................
كاسكوكيه
08-10-2008, 06:31 AM
تسلم ربي لا هانك ع المرور الطيب :)
عسولي
08-10-2008, 06:50 AM
مشاء الله عليك ياشعلة المنتدى


موضوع موفق بكل المقايس

بنتظار جيد ابداعاتك

تقبلي تحياتي
كاسكوكيه
08-10-2008, 08:09 AM
تسلم :)

=")

أخجلت تواضعي والله

انتظر الدوره التدريبيه الثالثه قريبن :D
المري1
08-10-2008, 08:11 AM
الاخت كاسكوكيه

ماشا الله عليك

مجهودات جبارة تشكرين عليها
كاسكوكيه
08-10-2008, 11:01 AM
أخوي المري 1

تسلم ع المتابعه و التشجيع :)
ابو وائل
08-10-2008, 03:03 PM
موضوع جميل
كاسكوكيه
08-10-2008, 03:04 PM
تسلم ع المرور و ان شاء الله تكون استفدت :)
نونو الصغيرة
11-10-2008, 02:19 AM
مشكورة على الموضوع الخطير
الحين نونو تركب على يدي بس ما تطير
رايحة وقاعدة لها قعدة
عشان تجيني طيران
:cool::cool:

والله يعطيج العافية وما ننحرم من مواضيعج الحلوة :D:D:D:D:D
كاسكوكيه
11-10-2008, 08:04 AM
تسلمين ع المرور العسل :)

و ان شاء الله نونو بتطير ألين عندج .. بس الصبر الصبر الصبر :D