مشكله مع الرمادي (حدثت فجأه)

[خالد المهيري]

السلام عليكم ورحمه الله وبركاته ..
اخواني الكرام .. انا متابع لهذا المنتدى الطيب واعذروني اذا كان اشتراكي متأخر واعرف اني مقصر واتمنى انكم تعذروني :) ..

عندي كاسكو جامبو خذته تقريبا من اسبوعين ..
عمره مابين ال 5 اشهر الى 7 اشهر .. (حلقه العين رماديه)
اول اسبوع كان متفاعل ويتقبل تلاعب الاخرين به وياكل من الايد ..
للعلم اول اسبوع عزلته في مكان بحيث انه يتعود على العايله وبالفعل صار يلعب مع الكل ..
المكان الي هو فيه فيه حياه وحركه والي رايح والي جاي يلاعبه ...
اكثر شي اسويه اركبه على كتفي وادور فيه البيت وامشيه في الحديقه .. اعتقد كمبتدئ اني ماشي على الخطوات الصحيحه ..

ولكن فجاه .. صار الكاسكو شبه عدواني كتصرفات لكن مايؤذي .. عند اقتراب اي شخص منه يفتح فمه ويظهر صوت كانه خايف ويوم تعطيه صبعك يعضه لكن بمزح .. طبعا هذا يعطي انطباع شراني للبغباء ولكن انا اعرف انه مايؤذي ..لكن تصرفاته شوي هجوميه
صار صعب تمسحه على راحه كانه خايف ومب عارف السبب يلحق صبعي وفاتح فمه كانه بيعض لكن هو مايعض عضه الم ..

ممكن سبب ارتباك الكاسكو وخوفه من الناس .. مع العلم مازال يركب على كتفي واحوط فيه ومايؤذيني لكن مازال يخاف واحسه يدافع عن نفسه ..

بانتظار الجواب اخواني .. محتاج العون لانه بعده فرخ ومابغيه يتعود على العدوانيه

[سكر]

أولا ألف مبروك على الطائر الجميل.

وما شاء الله عليك وعليه.

سلوك ببغائك طبيعي في هذي المرحلة, لأنه يحب يعبر عن نوع من الهيبة والسيطرة, والاستقلالية.

أكثر المبتدئين خصوصاً من البنات لما يشوفو هذا السلوك يخافو من الببغاء وبعد فترة يصير فعلاً عدواني بسبب ردة فعل المربي نفسه.

انت ماشي في الطريق الصحيح, لأنك ما خفت ولا بطلت تلعب معاه.

مازلت مستمر وهذا هو الصح.

فترة ان شاء الله بسيطة تقدر تخليها يوم واحد اذا أصريت ويرجع زي أول.

كل مافي الموضوع انك لازم تذكره مين الرئيس في البيت.

لأنه كل ما كان الببغاء في مكان عالي كل ما شعر انه المسيطر ويحب يستعرض قوته من فترة الى فترة.

نزله تحت وخليك أعلى منه ولا تتحرك وانتظر 10 دقائق ولاحظ الفرق وشوف كيف يصير خاضع.

أتمنى أكون وصلت الفكرة.

تقبل مروري

[zaherdb]

هلا بك حبيبي مشكلتك في الأطفال
إذا عندك أطفال بالبيت فهم السبب الرئيسي لوحشية الببغاء والسبب نشاطهم الزائد جنب القفص أو الإستاند يعني يلعبون بخشونه جنبه او يركضون او يصطدمون بالقفص او الإستاند او يضربون على الشبك او يهزون الإستاند
ويكفي لعبهم وصراخهم جنبه لأنه أساسا طائر حذر ويفقد الثقة بسرعه مع اي غلطة
*نصيحة اذا كان عندك اطفال ارفعه عنهم في مكان ما يوصلون له ويقدر يشوفهم منه ويحس انه في مأمن منهم.
أما اذا ما كان عندك أطفال
فالسبب الأغلب أنك تتركه لفترات طويلة لوحده أو حتى لو كان جالس قدامكم بس تكونون متجاهلينه
ففي هذه الحالة يلجأ لتقطيع الجرائد او العض الخفيف وأحيانا قوي شوي او الصراخ بطريقة تخويفيه
والحل انك تلازمه وتحاول تتواصل معاه حتى لو بالتصفير كل كم دقيقة علشان يحس ان فيه احد مهتم فيه لأنه طير اجتماعي من الدرجة الأولى وإهمال صاحبه له يسبب له الأمراض والوحشية وكثير من الأحيان يموت او ينتف ريشه وان شاء الله انك ما تشوف اي من هذه الأعراض
أتمنى ان اجابتي تكون واضحة لك
واي استفسار انا بالخدمة
تحياتي

[مجنون عويشق]

السلام عليكم

اخوي الغالي

اول شيء ..

لاتحط الطير في مكان عالي بحيث يشوف نفسه فوقك .!!

ولكن حطه على طاوله بحي اي شخص يقدر يشوفه

ومسالة المزح الدفش هذي عاديه جدا ..واحيانا ماتقدر تتفادها لانها احيانا تكون غريزه عند الطير ..وهومزحه مع بني جنسه على هالمنوال

وانا حاول لاتخاف منه ..يفتح فمه حط اصبعك في فمه ..!!!!!>>>وحده بوحده ..

وهكذا ..


وبالنسبه للاطفال ....انا طيري صار يكره ولد اختي ..لان ولد اختي يجي جنبه ويصرخ والحين صار مايطيقه من يشوفه يخاف منه ..ف..لان البزران بيني وبينك اغبياء ....يصرخ في وجه الطير ..

فحاول تبعد عنه الاطفال
بالتوفيق لك

[خالد المهيري]

حبيت اشكركم اخواني جميعا على تفاعلكم معاي وشاكر لكم اوقاتكم للردود ..

الكاسكو فعلا كان في قفص على ستاند ولهذا السبب اعتقد شاف نفسه شوي والمفروض يراجع نفسه ويعرف منو هو البوس خخ ..
نزلت القفص .. وخذت الكاسكو لغرفه هاديه ونزلته على الارض .. لاحظت انه انعزل في زاويه و وقف بدون حركه .. عشان يثبت في راسه موضوع السيطره لمنو ..

وراح اعوده ان شاء الله انه يمشي على الارض واخليه يلحقني واعوده على الاماكن النازله واللعب الزايد :) ..

كفيتوا و وفيتوا خواني :)

[لوتيه]

الحمد الله الاخوان ماقصرو وياك قصر عنهم الشر ...
اذا كان رصاصي عمره اظن 7 او 8 شهور
لاتحطه عند اليهال نصيحه انا لي عندي كانت تحب الكل و تحب تنخش تحت ريول اي حد لاكن مع حشرة اليهال فالبيت احسها توحشت و صارت تعض الكل الا انا يوم تشوفني كنها معيده من عقب صوم :) بس قبل كانت حبوبه الكل يحبها الحين للاسف لا يحبون الثانيات لي مايعضن لا تهملها و حطلها العاب حق تعضضهن على كيفها هذا السن احس يحبن العض لي عندي ماشاء الله عليها ماخلت ديكور ماقصته و لا خلت جريده ماكلتها اي شي جدامها تحب تقطعه تقطيع