هستيريا الرمادي >>>> بعد قص الجناح

[أبو طيف]

بسم الله الرحمن الرحيم

أسعد الله صباحكم ومسائكم أخواني بكل خير

أرجو المساعدة من اخواني ذو الخبرة في الرمادي حيث اني قمت بقص جناح طائري الرمادي واتبعت الطريقة الصحيحية في ذلك وقبل القص كان الطير مثل العجينه في يدي اقلبه امسح على راسه اقلبه على ظهره وامسح بطنه ولا يقوم باي ردة فعل بل بالعكس هو يقوم بسحب يدي حتى اقوم بمداعبته لكن للاسف في خلال 5 دقائق انقلب الطير الي مسعور ومتوحش وانا مستغرب من ذلك حتى عند اقترابي من القفص لايجعر ولكن يقوم بتحريك جناحيه ويصدر صفير ورعشة قويه جداً واذا حاولت انا امسح على راسه هاجم وقضم بكل مايستطيع من قوة.


مع العلم انا الطائر له ثلاث سنوات معي وفقدته منذ 45 يوما حينما طار من المنزل ووجدته وارجعته بعد معاناة ودفع جزيه مقابل استرجاعه :( وكان في حالة مزريه جداااااااا


نرجو المساعدة في طريقة استخدمها في تهدئته مع العلم اني حاولت بكافة الطرق دون جدوى لمدة ثلاثة ايام


وهذا مقطع فيديو عندما استرجعته وهو في حال مزرية ولكنه تعرف علي


http://www.youtube.com/watch?v=49WWY6cAkW4

[خالد المهيري]

والله ياخوي بعد ماشفت كم موضوع وعن تجربه شخصيه ..
حاول تعزل الطير في غرفه هاديه وغير له قفصه القديم وقدم له الاكل بإيدك بهدوء وحاول انه تكون ردود افعالك تجاه اي تصرف عدواني منه هااااااااااااديه ومطنش ..
اعتقد انك اذا خليته كم يوم في الغرفه روحه تأكله وتلعبه وتزوره وتجلس وتخليه في حظنك تلعب بشعره وتهديه ان شاء الله راح تضبط .. لان الكاسكو عندي صارت له حال غير شوي لكن كان يعض ومايحب يقترب منه ..

كنت انزله على الارض في زاويه الغرفه واخليه يهدى شوي .. واروح اوقف له وانزل بمستواه شوي شوي بحيث اني ما احسسه اني محاصرنه .. وابدا امسح راسه الى رقبته الى بطنه .. شوي يهدى واشيله احطه في حظني وانا جالس .. ابدا امسحه وامسحه لين مايهدى وارجعه مكانه على هذا الحال ظليت يومين الى 3 ايام وتغير تغيير جذري .. حاول تأكله بيدك وحاول تناديه بإسم واحد بحيث انه يعرفك ..

انا عني .. عاملته كطفل خايف وكنت حذر معاه الين ماصار الحمدلله يلعب ويصعد عليي ويطلع اصوات ..

اتمنى تجربتي تفيدك :)

[r_3ly]

والله يخوي انا اسف اذا انت قصيت جناح الطير بنفسك وشافك عدل انسى الطير وبيعه واشتر غيره لانه كرهاك ومافي طريقة ترجعة مثل قبل
مثال :كانك قاص شعر وحدة حلوة بالموس

[ابو سفر]

اخوي يمكن زعل عليك عشان قصيت جناحه ...لاكن حاول تعطيه اكل من يدك تفاح وجزر يعني فواكه

دلوعو شوية عشان تروح الزعلة منو ...وبالتوفيق,,,

[سكر]

اخوي ما قصر خالد المهيري.

لا تلعب كثير مع الطير اليومين هذي, اعتبر نفسك مجرد جرسون في مطعم, تجيب له الأكل وتوديه بس.

خلي علاقتك رسمية

وكلها فترة يهدا وينسى وبعدها ارجع العب معاه.


وعلى فكرة لو تقص أرجوله مو بس جناحه, تقدر ترجعه مثل اول وأحسن بعد.

هذا مجرد طير, وعندنا القدرة اننا نروضه مهما كان.

تحياتي

[مجنون عويشق]

السلام عليكم

أخطاأت خطا كبير

المفترض جعلت شخص اخر يقص جنحانه

لانه الطير كبير بالعمر ..وبالتالي يفهم كل شيء يحدث حوله ..


ولكن لاتحزن ...قم بالتودد اليه ...حاول تحط له كل مايرغب من الاكل ...

تغير الجور له ..وتكلمه بطريقه هاديه

وسيعود

[لوتيه]

مسكين شكله يكسر الخاطر كم يوم تم برا ؟؟؟؟
وليش جناحه متقطع من جدام ؟؟
انا عندي كاسكو فرخ اطير بس مش وايد مره الخدامه مسكتها تبا تقص جناحها و ماخليتها تقصه و لين يومك كل ماتشوف الخدامه تبخ عليها و تعضها اذا قربت منها :)

[أبو طيف]

شكرا للجميع وبارك الله فيكم وسوف أطبق كل توجيهاتكم وإنشاء الله يعود كما كان وأفضل

لكم أجمل وأرق تحية

[كاسكوكيه]

والله يخوي انا اسف اذا انت قصيت جناح الطير بنفسك وشافك عدل انسى الطير وبيعه واشتر غيره لانه كرهاك ومافي طريقة ترجعة مثل قبل
مثال :كانك قاص شعر وحدة حلوة بالموس

من قال مافي طريقه؟؟؟ اخوي خل عندك تفاؤل.. ولو انته اتظن انه مافي طريقه.. حرام عليك تخلي الريال يحط في باله انه يفقد الأمل..

:@

اذا ما كان عندك شي تقدر تقوله و يشجع الريّال.. يمكن يكون احسن انك ما تقول شي.. و ان شاء الله الأمور بتتصلح ..

بس ع طول كل رد يكون.. خلاص بيعه !!!!!!!!!!!!!! :confused::eek:


وبالتوفيق لصاحب الموضوع :D

[أبو طيف]

يعطيك العافية كاسكوكيه بصراحة أنا ماحبيت أرد على الاخ الغالي r_3ly

لأن هذا رأيه الخاص وأنا أقرأ بتمعن شديد ردود وإقتراحات أخوتي المهتمين بالطيور وخاصة ذوي الخبرات والتي تشهد مواضيعهم بذلك وأقوم بتطبيقها عملياً والنتائج خير برهان

أشكر القائمين على هذا المنتدى الرائع وموفقين دائماً

[سكر]

أبو طيف قبل فترة اعطاني أحد الأعضاء ببغائه وكان كاسيكو كبير في العمر ومتوحش بشكل فضيع.

أول ما دخلت البيت قصيت جناحه وهو يطالع فيني.

كلها كم ساعه وصار يطلع على يدي وبعد يوم صرت امسح على راسه وبعدها ما صار يجعر ولا يصارخ وصار هادي الطباع.

يعني تروض بعد ما قصيت جناحه.

صدقني تقدر اذا ربي وفقك انك تروضه وتولفه عليك أكثر بس يحتاج عزم منك وتوكل على الله.

هذا رابط الموضوع حق الببغاء اللي قلت لك عليه وفيه القصة كاملة وبالصور

http://www.2zoo.com/vb/showthread.php?t=93408

تحياتي

[أبو طيف]

أخوي الغالي سكر بارك الله فيك بس أنا المستغرب ان الطير كان معاي من سنتين واخذته فرخ صغير وربيته على يدي وبعد ماضاع وحصلته كان برضو عارفني ومقطع الفيديو بأول الموضوع يوضح ذلك بس بعد القص أختلف بعدين .

أخوي سكر عندي سؤال وياريت تجاوبني عليه

الطير كان يتكلم بطلاقة وينادي كل اهل البيت بأساميهم ويغني ويرقص وكلام كثير بعد ماضاع علي اخذت 45 يوم تقريباً وانا ابحث عليه حتى عثرت عليه حتى الآن له تقريبا اسبوع لم ينطق بأسمي أو لم يقول اي كلمة من الكلمات التي كان يقولها يعني معقول كل تعب السنتين راح .. يعني فقد الذاكره

وبالطبع راح أقرأ القصة التي ذكرتها

ولك كل التقدير والأحترام

[سكر]

صراحة أنا حريص إني ما أرد إلا عن تجربه أو دليل واضح
وفي حالتك للأسف ماعندي جواب مبني على تجربه عاصرتها
لكن إعتقادي إن المسألة مؤقته ويرجع مثل ما كان لأن الإفريقي حساس كثير
ويتأثر بسرعة
وأغلب مشاكله تعالج بنفس طريقة المعالج النفسي
يعني فيه أساليب بناء الثقة وأساليب محو الماضي

لي رجعه إن شاء الله وأكمل
تحياتي