سلسلة تجربتي مع الببغاء السنغالي (بوبي)المتوحش الجزء الثاني
 

السلام عليكم..

بعد كتابة تجربتي الاولى مع الببغاء السنغالي (بوبي) شفت في تفاعل من الأعضاء واقترح علي عضو جزاه الله خير أني احول هالتجربه الى ورشة عمل وانا بسميها(سلسلة ترويض بوبي المتحوش)

بِسْم الله الرحمن الرحيم

كل يوم يمر اكتشف شي جديد بترويض(بوبي) طبعا الان صار 50٪اليف،بس عنده مشكله انه يخاف بوجود اشخاص غيري وانا اخاف أني أطلعه من القفص بعد تجربتي الاولى بس قررت اكسر حاجز الخوف..

كالعاده رجعت من دوامي الساعه7 الصباح وبدأت انظف الاقفاص (الكروان-البادجي-الروز-بوبي) واحط اكل وماء لهم..طبعا من ادخل بوبي انواع التصفير نزلت قفص على الارض وجلست قدّامه وجالس أسولف معه هنا قلت بفتح القفص من فوق وكنت متخوف انه يكرر التجربه الاولى الهرب..

فتحت القفص وحسيته توتر وخايف وهالشيء اعرفه من بؤبؤة العين المهم تركته ورحت العب مع الكروان وكان فمكانه ثابت للحين مافي تفاعل مع الخروج من القفص بعد ربع ساعه بدا يتلفت ويحك منقاره بالقفص وتسلق وصار فوق القفص انا هنا استانست وصار ينظف ريشه قلت ما ابي استعجل وأقرب له واخوفه خصوصا ان موضوع الخروج شي جديد عليه،الا بدا يصفر هنا حسيته مرتاح وواثق بديت اقرب للقفص بهدوء عشان ما أخوفه واشوفه عادي،جلست قدّامه وهو يقرب لوجهي لين صار منقاره عند خشمي وهالسبب لأَنِّي احيانا أحط الاكل بفمي وهو يجي يأكل بصراحه شعور جممممممميل،بس انا خايف لان الوضع مختلف هالمره هو برا القفص،طبعا جالس يطّلع فيني وبدا يسوي حركته المعتادة يهز براسه وينفش ريشه انا اضحك كل ما اشوف هالحركه،وبدات أعطيه حب وهو ياكل والوضع تمام ،بس قلت يمكن وجودي هو الي يخليه ما يهرب ابي اجرب اذا طلعت وتركته يهرب او لا؟

طلعت برا وسكَّرت الباب وانتظرت 5دقايق ورجعت فتحت الباب الا هو بمكانه هنا فرررررحت لانه ما هرب او راح الأقفاص الثانيه وصار الوضع تمام اروح أجي وهو بمكانه يلعب يعني تجربة الخروج من القفص نجحت وبنتيجه ممتازه..


الخطوه الثانيه وهي التخلص من الخوف من الغرباء وهم(الأهل):

بعد أسبوع من نجاح تجربة الخروج من القفص الحين نبدأ بالتجربه الثانيه:

فتحت القفص من فوق وهو بسرعه تسلق وطلع على القفص وركبت له عصا تريح له من أطراف القفص
وجلست أعطيه اكل دخل اخوي وهو بسرعه حذف الاكل ونزل داخل القفص خليت اخوي يوقف بمكانه عشان ابيه يحس ان وجود هالشخص ما راح يأذيه بعد ساعه بدا يرتاح ويتحرك وطلع فوق القفص وجاء اخوي وجلس جنبي ويمد له حب وهو يحذفه انا أمد له واقوله(بوبي)يجي ياكل بعدها بدا ياكل من يد اخوي فالبداية متخوف والحين بثقه وصار وجوده ما يخوفه ابدا.


من خلال هالتجربتين اكشتفت شي دايم يتخوف يمن الأشياء الجديده مثلا العصا يوم ركبتها له فوق القفص كان خايف منها وبأصبعي أطق على العصا جاء ووقف عليها ما ادري هو حس بالامان ولا إِيش بالضبط والشي الثاني عضه عن عضه تفرق مثلا يوم ابي احاول المسه يعضني بقوه لأكن يوم امد يدي قدّامه يعضها خفيف كأنها بطريقة لعب او يبغى مني العب معه وبعدها يبدأ يرفرف بجناحه ويهز براسه ..

ويوم أتكلم معه يمد راْسه كأنه يفهمني..

وهذي بعض الصور ل(بوبي)

http://www.2zoo.org/uploads/14413592061.jpg
هذي ألطريقه الي ابتكرتها لترك العض أحط حب بيدي وأقفلها وأتركها مفتوحة من فوق وهو ينجبر انه يواجه يدك ويدخل راْسه ايضا عشان ياكل وبنفس الوقت تكون فرصه للمس منقاره

http://www.2zoo.org/uploads/14413595111.jpg

http://www.2zoo.org/uploads/14413596381.jpg

اذكروا الله وأتمنى ينال اعجابكم..

رد: سلسلة تجربتي مع الببغاء السنغالي (بوبي)المتوحش الجزء الثاني
 

رائع جدددااا و أرجو الإستمرار, هناك فائدة عامة لأصحاب السنغالي في النت عموما لأنه و للأسف لا توجد مصادر كافية عنه بالعربي, مغ العلم أن المصادر بالإنجليزي متوفرة و بكثرة

رد: سلسلة تجربتي مع الببغاء السنغالي (بوبي)المتوحش الجزء الثاني
 

رد: سلسلة تجربتي مع الببغاء السنغالي (بوبي)المتوحش الجزء الثاني
 

ماشاء الله تبارك الرحمن
استمر ولا تحرمنا من المعلومات وآخر اخبار هذا الطائر الجميل لأنه مثل ماقال أخونا نهر الامزون لاتوجد مصادر بالعربي .

أتمنى لك التوفيق

رد: سلسلة تجربتي مع الببغاء السنغالي (بوبي)المتوحش الجزء الثاني
 

ما شاء الله