منتديات تو زوو - .×.كيفية تحضير الطحالب.×.

السلام عليكم

طبعا يا شباب كلنا عايزين الأحواض بتاعتنا تبقى بحالة جيدة و توفر بيئة صحية و آمنة للأسماك بتاعتنا أو بمعنى آخر إنها تبقى قطعة من طبيعة و بيئة السمك!
و طبعا كلنا بنسعى لده من خلال درجة الحرارة و الحمضية و عسر المية و توفير نباتات اذا لزم الامر و خلافه.
الأشياء دي كلها مهمة و لكنها بتعبر عن الأشياء المرئية و الملحوظ تأثيرها مباشرة
انما فيه حاجات غير مرئية و غير ملحوظ أهميتها للحوض و قد تكون مش من الأساسيات للجوض و لكنها بتبقى عنصر مهم للي يحب ان يبقى حوضة كامل من مجاميعة و مافيهوشاي حاجة ناقصاه.
و من ضمن الحاجات دي هي الطحالب و الانفيزوريا.

الطحالب(Algae):

الطحالب زي مانتو عارفين عبارة عن كائنات مائية بتعتمد في غذائها على التمثيل الضوئي زي النباتات بالظبط, و طبعا أحجامها بتتراوح من أحادية الخلية إلى متعددة الخلايا زي الطحالب الكبيرة وأعشاب البحر اللي بنشوفها في البحر.

و طبعا هي بتكون الغذاء بتحويل المواد الغير عضوية لمواد عضوية كغذاء ليها و ده بيتم بمساعدة ضوء الشمس و بكدة الطحالب بتلعب دور كبير و مهم في توفير مواد غذائية جيدة و عالية الطاقة للأسماك.

و الحقيقة وجود الطحالب في أحواضنا مش بس مهم كغذاء للسمك في حالة عدم وجود أكل انت بتقدمه ليهم, و لكن كمان(زي النباتات) بيستهلك ثاني أكسيد الكاربون و بينتج أكسجين!! و بالتالي تكون ضربت عصفورين بحجر لأنك وفرت مصدر أكسجين و مصدر غذائي في نفس الوقت لأسماكك بالاضافة للنمو الجيد و السليم للاسماك لتوفر العناصر و المعادن الضرورية لنمو الاسماك في هذه الطحالب.

و لكن لازم نخلي بالنا ان الطحالب بنسبة معينة مفيدة و مهمة انما كل شيء يزيد عن حدة ينقلب ضده, و بالتالي نسبة الطحالب لو زادت عن الحد ممكن تسبب أختناق للاسماك من خلال استهلاكها لكميات كبيرة من الاكسجين الموجود في الحوض!

طريقة تحضير الطحالب:

تجيب ورق خس( على سبيل المثال) او اي ورق أخضر او حتى قشر الخيار و تغسله كويس و بعدين تحطة في إناء و تحط عليه مية و تغليه, اول ما المية تغلي تطفي عليه و تصفي المية لوحدها و تحطها في ازازة بلاستيك او ازاز شفافة و تسيبها في الشمس لمدة 3 ايام و بعد كدة تضيف كوباية من مية الطحالب دي لحوضك مع غلق الفلتر لعدة ساعات و المهم ان يكون في حوضك اضاءة كافية عشان الطحالب تنمو و تتكاثر.
واحد يسألني طب و مصير الاوراق الخضرا دي ايه؟نرميها؟ اقوله لا طبعا السمكاوية ما يهدروش حاجة خالص, الاوراق الخضرا المغلية بعد ما نشيل العروق الناشفة اللي فيها هنحطها للسمك و خصوصا الفانتيل هيستمتع بأكلها جدا و هيدعيلك في كرشه... قصدي في سره!!

و محدش يقلق من التكاثر الزائد للطحالب لأن الكمية الموضوعة غير مضرة و كمان الفلتر طالما شغال مافيش اي مشكلة بمعنى التكاثر الزيادة هيروح في الفلتر, و بعد يوم او يومين من الاضاءة الجيدة هتلاحظ تكون طبقة خضراء على الاسطح الثابتة لحوضك فماتنزعجش و تفرح لأن التجربة تمت بحمد الله!

و بالهنا على قلوب السمك بتاعكم.

منقول