منتديات تو زوو - قصتي مع الببغاء عجيبة . غريبة

بسم الله الرحمن الرحيم

كل سنة وانتم طيبين بمناسبة عيد الحج القادم واطال الله في عمركم على طاعته

نبدأ القصة من أولها

في مثل هذه الايام من السنة الي راحت قررت اشتري ببغاء بدون سابق معرفة أو تدريب أو تربية لأي نوع من انواع الطيور طول حياتي باستثناء الحمام . المهم توكلت على الله واشتريت ببغاء امازوني بلوفرنتد(جاكو) من محل بجدة وجبته للبيت وانا ما افهم في الطيور ولا شيء والفضل بعد الله للمنتدى واعضاءه الكرام والأخ حمزة الغامدي (سكر) الي ما قصروا بالنصح والإرشاد ولابد من تسجيل الشكر لهم .

الروابط الي تحت هي بداية مشاركتي بالمنتدى وبداية دخولي لعالم الببغاء المجهول بالنسبة لي في ذاك الوقت

http://2zoo.com/vb/showthread.php?t=287805

http://2zoo.com/vb/showthread.php?t=289264

http://2zoo.com/vb/showthread.php?t=288596

كانت بداياتي صعبة مع الترويض والتوليف لأنه للأسف كل المحلات تبيع بالتدليس والكذب وتقول انه الطير اليف وكلام كثير يدخل تحت خانة (الكذب) وهذا الي صادفته مع طيري الجديد طلع خواف وغير اليف ويعض ..لذلك كانت بداياتي صعبة ومرهقة ومتعبة بنفس الوقت. وما اخفيكم اني شاورت نفسي اني أبيعه واتخلص منه اكثر من مره بل بالعكس كنت اسبوعيا افكر أبيعه كل ما صادفت مشكلة أو تعب بالترويض أو عضة مؤلمة أو عناد وعدم استجابة من الطير لدرجة وصلت مرحلة اليأس التام من الطير.لكن بعد مرور ثلاث شهور من التعب والعض والعناد لاحظت هدوء بالطيروبداية ولافه فقررت الاستمرار مهما كلف الأمر وقررت اني اتخلى عن فكرة بيع الطير نهائياً .
(والحمد لله كان قرار صائب بفضل من الله)وللأسف في نفس اليوم (يوم الجمعة) الي قررت فيه اني ما أبيعه وفي صباح ذاك اليوم اثناء محاولة توليف الطير برا القفص طار مني وحلق بالسماء مع انه كان مقصوص الجناح لكن ارادة الله فوق كل شيء وبدأت رحلة البحث عنه من الساعة السابعة صباحاً حتى الساعة الواحدة ظهراً مشي على رجولي وبدون سيارة لعدم وجود سيارة في ذلك الوقت بسبب حادث حصل لي قبلها بيومين أخرج سيارتي من الخدمة نهائياً مع اصابة بليغة باليد اليسرى احتاجت للخياطة بثمانية رتب أو غرز. والحمد لله على كل حال ومع اصابتي وحالتي التي يرثى لها بحث بالحارة والحارات المجاورة والاشجار وما خليت اي انسان في الشارع وما سألته حتى الساعة العاشرة صباحا أحد عمال النظافة بالحي قال انه شاهدة بإحدى العمائر تحت الانشاء بالحي وكانت العمارة مسورة ومقفلة من كل الجهات وقررت اني اقفز فيها وابحث عن الطير لكن للأسف ما لقيت شيء. استمر بحثي عن الطير حتى سمعت اقامة صلاة الجمعة فقررت اني استسلم للقدر واطلب من الله العوض بالطير .وقررت اني الحق صلاة الجمعة قبل ما تنتهي. وفجاءة عند عبوري للشارع العام متوجه للمسجد سمعت صوت طيري ينادي (بابا.. بابا) والتفت يمين ويسار وانا واقف على الرصيف بين الخطين الطالع والنازل إلا اشوف الطير في ثاني شجرة على يدي اليمين . وبصراحه ما صدقت من الفرحة رحت لحد عنده .ومن الفرحة ما اهتميت بالناس ولا بالسيارات بالشارع جلست اكلم الطير وهو ينادي (بابا. بابا) وكان واقف اعلى شيء بالشجرة يمكن في حدود ثلاث امتار .قررت اني اتسلق واجيبه والحمد لله تسلقت وجبته بدون أي مقاومة منه . ورجعت فيه للبيت وكان عطشان جدا جبلته مويه وأكل وخليته يهدأ وينام لثاني يوم .بعدها تعلقت بالطير بشكل غريب وهو تعلق في كمان صرنا ما نفارق بعض لا على غداء ولا على عشاء حتى بالخرجات مع بعض وصار الطير هدد (طبعا مع شوية تدريب) وبعدها بدأ يتعلم الكلام ويحاول يتكلم .يعني تغير 180 درجة طبعا انا لا زلت متعامل معاه بالطيب واحاول اكسب ود الطير والحمد لله نجحت .والأن الطير عندي صاير هدد ويناديني بأسمى ووالف على البيت كله ويصحيني من النوم الساعة ستة صباحا بالصوت واذا كان باب الغرفة مفتوح يجي طيران لحد عندي ويصحيني .. والحمد لله والفضل لله في كل شيء ثم للتوجيهات من الخبراء بالمنتدى جميعا.

خلاصة القصة (اعطي الطير يعطيك.. والمعاملة الطيبة والاهتمام والحنية هي بابك لقلب طيرك طبعا مع التدريب المستمر وعدم الاستسلام واليأس مهما كانت الظروف)

اخوكم / عبد الله
نوع الطير/ امازوني بلوفر نتد (جاكو) العمر / سنتين