|
سلوك الانثى ..
السلام عليكم ورحمة الله وبركاته انا عندي انثى من انتاجي اليفه من كم يوم كملت السنه وحطيتها بقفص مع الذكر فالبدايه ماتبي القفص بعدين حبته وكله تدخل في البياضه اهي والذكر الذكر صار له عندي شهرين ونص ويدخلون البياضه مع بعض وياكلون مع بعض لا كن مايمسحون على روس بعضهم بالعكس لو واحد قرب راسه الثاني يضربه واليوم شفت الانثى مجنووووووووووونه تضرب الذكر وتعضه واطلعها برا القفص واسكر الباب وتطير للقفص تدور اي فتحه عشان تدخل ولما ادخلها تضربه وماتبيه يقرب من البياضه لاكن الحين هدأو وصارو عادي كأنه ماصار شي صورت لكم فيديو وهم يتضاربون وقولولي شو رايكم بالذكر ؟ وشو نوعه الانثى اهي اللي تضارب وشو معنى سلوكها هذا ؟ وترا اهي ما انتجت من قبل وترا ماصار بينهم تزاوج ماشفتهم ولا مره لانه مو متوالفين صح لاكن يدخلون البياضه مع بعض |
رد: سلوك الانثى ..
هذا النوع للجوز ما يبان جنسهم الا من التغريد
واعتقد والله اعلم ان الاثنين اناث ممكن تفصليهم في قفصين وتسمعي تغريدهم عشان تقدري تحكمي وتحددي جنسهم بالتوفيق |
رد: سلوك الانثى ..
اقتباس:
الطير اللي انضرب هذا ذكر 100 % كل يوم مزعجني بتغريده ماشاء الله تبارك الرحمن والثانيه انثى من انتاجي |
رد: سلوك الانثى ..
وعليكم السلام و رحمة الله و بركاتة
ماشاء الله الذكر باين علية ممتاز و جاهز للتزاوج (النوع مصبغ فراشة) (pearl pied) لكن الانثى شرسة و احتمال تؤذي الذكر لا سمح الله!! افصليهم عن بعض باقفاص متقابلة اسبوع او اسبوعين ورجعيهم وان شاء الله يتحسن الوضع.. اتذكر مرة قلتي ان في عندك ذكر حاول يتزاوج معاها لكنها كانت صغيرة ذاك الوقت لو الذكر موجود عندك خليه معاها بدل هذا الذكر المسكين.. -- بالتوفيق |
رد: سلوك الانثى ..
اقتباس:
الحين صارو هادئين مايتضاربون بس ماادري وش صار فيها امس والذكر الي قبل كان عندها يوم كانت صغيره الحين عنده انثى ثانيه شفت اخر الفيديو طلعت صورة زوج ثاني لونهم اصفر اللي على اليمين كان الذكر السابق والانثى اليوم اشوفها هادئه وماتضارب وتطلب التزاوج وطول الوقت بالبياضه شكرا على النصائح |
رد: سلوك الانثى ..
سلوك الأنثى متسلطه وتفرض نفسها بالمكان
الأفضل رفع البياضه مؤقتا حتى يتم تجانس وتودد وتوالف بينهم ثم ضعي صندوق البيض |
رد: سلوك الانثى ..
اقتباس:
مشكووور على النصيحه وجزااك الله خيراً وفعلاً شلت البياضه وفي البدايه الانثى ماتبي القفص وبعدين ماشاء الله بسرعه توالفو قبل يومين شفتها تنزل له راسها ويمسحون على روس بعض بعدين شفتهم صار تزاوج وهادئين ماشي ضرابه ورجعت البياضه وكلهم بأثنينهم داخلها بدون مشاكل واليوم اشوف ارضية القفص وانتو بكرامه البراز سائل وكثير اعتقد انها علامات وضع البيض والا شو رايكم ؟ |
رد: سلوك الانثى ..
الانثى اليوم كله كسلانه وتسكر عيونها خوفتني كله تنام داخل العش او على فتحت العش وبرازها وانتو بكرامه كثير وسائل انا ماني شاطره في الانتاج وايد لاني بس مره وحده قبل سنه طيوري السابقه انتجو عشان كذا حالة الانثى تخوفني لانها طيري المدلل واول مره اخليها في القفص للانتاج وماادري لما مسكتها كأنه فيها انتفاخ او أنا اتوهم ان شاء الله يكون هذا كله بسبب الانتاج ومايكون فيها شي ثاني |
رد: سلوك الانثى ..
ترا الانثى تعبانه واخاف اخسرها كله منزله اجنحتها شوي وأكلها خفيف بس بالعش واخذتها عندي لغرفتي وحطيت الاكل قدامها وأكلت اما بالقفص مااشوفها تاكل شو اسوي لها ؟ هل هذا كله طبيعي في وقت الانتاج والا ممكن يكون فيها شي وانا مو منتبهه . حتى امس العصر طيرتها برا خليتها تروح قلت يمكن كسلانه من الحبس لانه انا مو معودتها على الحبس ورجعت المغرب ونفس الحاله كسلانه بالعاده نشيطه وكله تلعب |
رد: سلوك الانثى ..
كل الاحتمالات واردة
لكن من ملاحظتي لـ طيوري ان وقت الانتاج يكونو خاملين و البراز كبير و حتى الاكل مايأكلون الا قليل.. ان شاء الله تكون مجرد اعراض الانتاج اتمنى من بقية الاعضاء الخبراء ابداء الرأي |
| جميع الأوقات بتوقيت GMT +3. الساعة الآن 11:26 AM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو