منتديات تو زوو - حك راس الكاسكو في 4 أيام.....

تحية طيبة لكم جميعا أخواني الأعضاء جميعا
وهذا أول موضوع لي معاكم في المنتدى وإن شاء الله يكون خفيف عليكم..
فيه مقوله تقول إن اللي يربي الرمادي ويتركه لابد ويرجع له مرة أخرى في يوم من الأيام
قبل سنة كان عندي ببغاء أفريقي رمادي من النوع الجمبو وكان وحشي بشكل لايتصوره إلا من عانا مثل مشكلتي وبالرغم من محاولاتي بالتقرب منه إلا إنها باءت بالفشل الذريع وركز على كلمة الذريع بمعنى اللي ما عنده صبر على الرمادي لايشتريه لأن راسه أعند من الخرسانه المسلحه بس مافيه باب إلا وله مفتاح والشاطر اللي يلقاه...
المهم بعد تقريبا 3 أشهر صار أليف ولا أحلى منه وأضطرتني الظروف إني أخليه عند صاحبي لمدة أسبوع علشان عندي شغل في منطقة ثانية المهم ما أطول عليكم صاحبنا عنده حديقة مغلقه بس سقفها من الخشب وسوا فيها معلم وفتح الباب للرمادي علشان يتمشى في الحديقة والأخ ما صدق خبر وطاح لك أكل في هالخشب اللي بالسقف الين سوى له فتحه وطار منها المهم قررت إني الغي قصة الرمادي من حياتي وأظل على الدرة المطوقه نعرها وتعرفنا وسهل ترويضها........
قبل عشرة أيام من اليوم نزلت على سوق الطيور في الشارقة واشتريت لي فرخ درة لونه أصفر فاقع عمره تقريبا 6 أشهر بس وانا اتجول شفت فروخ الرمادي وفز قلبي ما قدرت اصبر اخذت لفه عليهم وسعرتهم وتحرشت في كم واحد منهم وأخذت درتي ورحت البيت وقلبي معلق في السوق ماني قادر انسى شكل فروخ الرمادي وفوق ذلك كان فيه فروخ تقريبا أعمارها من 6 الى 8 أشهر تسحر القلوب قبل الأنظار المهم أسبوع وانا راجع للسوق مرة ثانية وكان في بالي محل معين بس غالي شوي ورحت له وصمم على 2500 درهم للفرخ المحجل قلت له بآخذ لفه في السوق وأرجع لك...
وأنا أتجول لقيت فرخين بس واضح إن حالتهم تعبانه مرة وهزيلين وريشهم مغطى ببرازهم (أجلكم الله) وريحتهم واصله لآخر المحل فتحت باب القفص تفقدت العيون والخشم والصدر وكانوا تمام ولله الحمد سألت البياع الآسيوي بكم قال لي مافيه ضمان فلوس ما يرجع!!!!
قلت له بكم انا سألتك ما سألتك عليهم ضمان والا لا الضامن رب العالمين....
قال 1800 درهم انا قلت 1500 تبيهم والا باطلع قال طيب
المهم طلعت الفرخ برا وقلت له نظف لي الحجل جلس يطالع فيني مستغرب ليش ابيه ينظف الحجل..المهم جاب فوطه ومويه ونظف الحجل وطليت على الكود الموجود عليه شلت الفرخ ورحت البيت والفرخ المسكين في حاله لا يعلمها إلا الله من سوء معمله وتجويع ووسخ واليوم له عندي أربعة أيام بالضبط وهذي صورته من أول يوم إلى أن كتبت هذه الأسطر واسمحوا لي على الإطالة ولكن (سالفة تجر سالفة)....
ولا تنسوا ذكر الله

http://www.djzaher.com/images/1.gif

http://www.djzaher.com/images/2.gif
http://www.djzaher.com/images/3.gif
http://www.djzaher.com/images/4.gif
http://www.djzaher.com/images/5.gif
http://www.djzaher.com/images/6.gif
http://www.djzaher.com/images/6.gif
http://www.djzaher.com/images/7.gif
http://www.djzaher.com/images/8.gif
http://www.djzaher.com/images/9.gif
http://www.djzaher.com/images/10.gif
http://www.djzaher.com/images/11.gif
http://www.djzaher.com/images/12.gif
http://www.djzaher.com/images/13.gif
هذا كل شي واسمحوا لي على الإطالة وإن شاء الله لي عوده لكم في مواضيع أخرى تخص حبيب قلبي الرمادي الأفريقي.
تحياتي لكم جميعا ولا تنسونا بردودكم الطيبة
:):):)