[صمت الأمل]

fahad5



أهلا وعليكم السلام ورحمة الله وبركاته .




أنت أشتريت الدجاج والديك من سوق الحمام أم من شخص موثوق فيه ..؟؟



والدجاجه أم الصيصان أيضا نفس السؤال .. من شخص تعرفهـ أم من سوق الحمام بالرياض ؟؟




وكيف كان تصرفها مع الكتاكيت ؟؟ هل كانت نافشة ريشها وتحميهم أو تاركتهم وهم يلحقونها بدون ماتهتم فيهم ؟؟




بصراحة لأني دااائما أزور هالسوق وأشوف الدجاج اللي تكون ام عيال حاطينها في قفص صغييير الصيصان ماهم لها . يعني مجبرينها تاخذهم .. وهي مستحيل ترعاهم اذا كانوا ماهم لها ..




واحتمال كبيير جدا هي بنفسها راح تقتلهم اذا جتها الفرصة .. لأنها وهي في القفص في السوق تبي بس تنحاش وتهرب ... بس اذا استفردت مع الصيصان وأزعجوها قتلتهم ..



بالنسبه لإختفائهم بدون أثر اذا كانو الصيصان متروكين مع الطيور المفترسة (( الغراب والعقاب )) فهم راح يصيدونهم وياكلونهم بدون ترك أي أثر أو راح تلقى ريش خفييف ..



اما اذا القطط شافتهم بدون أحد يحميهم فهي تصيدهم وتاخذهم خارج المكان اللي صادتهم منه ويروحون يتسلون فيها ويلعبون معها ثم يقتلونها بدون أكلها ..


لأن هذا اللي صار معي .. وآثار الجريمة غير موجودة ..


وأتوقع ان المتسببين عليهم في اختفائهم القطط مو الطيور الثانية .




القفص اللي شريته ما دخلو فيه أبدا أو يتمشون فيه شوي ويطلعون .. صح ؟؟



لأن هالقفص غريب عليهم بس اذا تبيهم ينامون فيه لازم تحبسهم فيه تقريبا شهر عشان يعرفون ان اكلهم وشربهم ونومهم في مكان واحد .



واذا فكيتهم بعد الشهر بإذن الله هم بنفسهم راح يطلعون منه في النهار وعلى المغرب راح يرجعون فيه ..



بس لازم تحط لهم فيه شوي أكل عشان يحبون هالقفص ومايعتبرونه سجن .. وحط داخل القفص بعد غصن شجرة كبير عشان يتكون عليه ..



انا حطيت لدجاجي في القفص عندنا خشبه طوييلة وعلقتها بالأسيام وتتمرجح .. وأقعد أضحك على الدجاج لأنهم هم يمرجحونها بأنفسهم .. يلعبون بها وعاجبتهم جدا . ويتزاحمووون عليها ومتكين فيها .



وتصرف الدجاجه أم الكتاكيت طبيييعي جدا .. دجاج عمي الله يحفظهـ يطلعون فوق أعلى نخله موجودة بالمزرعة .. لأنهم يحمون أنفسهم بهالتصرف من هجوم المفترسين في الليل .. مثل الجرذان أو البساس أو الكلاب .. أو أي هجوم جوي ..



بس اذا ماتبيها تتصرف هالتصرف ببساطة قص أجنحتها .. ترى عادي جدا مايأذيها وماراح تكرهكم مثل الببغاوات ..




والدجاج اللي ماباض بصراحة أتوقع لأن المكان لسى جدييييد عليها وخمس ايام فترة بسيطة جدا .. بس بإذن الله راح تتحسن نفسيتها بسرعة خصوصا من وصفكـ ان المكان كبير ومرتب ماشاء اللهـ ..




الأكل ممكن تعطيهم أي شيء ماتبيه .. مثلا خبز .. اذا كان يااابس فكسره لهم قطع صغيرة بيدك أو بالنجر وعطهم اياه .. اذا عندك مكرونه منتهي تاريخها اسلقها في ماء حار من السخان وعطهم .. راح ينجنووووون ..




باقي السلطه اللي فيه خل عادي ممكن تقدمهـ لهم بس اغسل السلطة بالماء عشان يروح الملح والتوابل منها . وعطهم اياها .



عندك حشرات أو خنافس أو دود مبهذلك في التراب أو تلقاهم تحت خشب أو بلكـ .. اتركها لهم وهم راح يقومون بالواجب .



أو بقى من الغداء رز كمية وما أحد يبيه عطهم اياه .. والإيدام اذا بقى منه أيضا كميه فصفيه من المرق وكبه لهم ..



أو كمية خضار مثل البصل أو الطماط أو خيار .. قطعه لهم وعطهم اياه .. أو ممكن تزرع البصل واذا نبت بيشوفونه وراح ياكلونه .. ترى مفيد لهم جدا من الأمراض .



يعني فيه خيارات كثيييرة جدا .. أنت شف وش المناسب لكـ .



أتمنى اني أفدتك ومعليش طولت عليكـ .. واذا فيه أي سؤال ثاني أو استفسار أو جواب ماشرحته زين فأتمنى تسألني بأي وقت ..




شكرا لكـ واللهـ يهنيك في دجاجكـ وتشوف منهم اللي تحبهـ ويفرحكـ فيهم ..