[طير الهوى]

،،

هلا بك اخوي ملك الجنون ..

بالعكس يالغلا .. الموضوع مفتوح للجميع ..

بالنسبة لأسئلتك بجاوب عليها .. ولو حصل تعليق وتعقيب من أحد الأخوة الأفاضل ومن هم أخبر وأعلم مني ياسلام سلم ..

بالنسبة للفضلات .. المينا والبلبل قريبه من بعض من هالناحية .. كلها سبحان الله فضلاتها كثيره ورائحتها مقرفة وتنرفز .. ولازم التنظيف أول بأول .. أما هل تغطي قدرة المينا على الكلام على مسألة الفضلات .. هي على حسب نظرة الشخص .. يعني انا عندي بلو فرونتد امازون .. ومتكلم وبدرجة الامتياز .. وعندي كروان متكلم بعد .. وعندي 2 كناري .. و 2 بادجي .. وبرضو فرخ بلبل تبنيته بعد ماتخلوا عنه اهله .. يعني عندي طيرين يتكلمون وانا ماني بحاجة المينا بس علشانه يتكلم !! وماهمني مسألة فضلاته لاني متعود عليه من قبل وعندي بلبل وربيت بلابل قبل كذا وكلهم نفس الشي .. لكن هي مسألة حب للطير .. انا احب المينا .. واتحمله بكل مافيه .. بإيجابياته وسلبياته .. مجرد حبي للطير يعطيني سبب لامتلاكه بوجهة نظري ^.^ وهي تختلف من شخص الى آخر .. بس للعلم .. بالنسبة لرأيي الشخصي .. مسألة فضلات المينا الناس عطتها اكبر من حجمها بكثير ومن بغى الدح ما قال أح .. ( مثل شعبي ) ..

بالنسبة لإخراج الفضلات خارج القفص .. نعم فيه إخراج فضلات خارج القفص .. والطير جوا القفص وبرا القفص نفس الوضع .. وانا عندي كل الطيور كذا حتى البلوفرونتد امازون .. برا القفص يخرج فضلات .. بس طبعا بتعاني من المينا لان فضلاته اكثر وأخيس .. وغير كذا بيعذبك لأنه حتى بإخراج الفضلات .. ممكن يرمي الفضلات خارج القفص وهو داخل .. سبحان الله يرميها رمي ..

اما تعليم الكلام .. فالمينا يمتاز انه مايحتاج للتلقين مثل باقي الببغاوات .. من حاله يتعلم ويلقط الكلام .. ماتدري الا وهو يتكلم .. يعني ماراح يعذبك من هالناحيه ..

العمر المفضل لاقتناء طير المينا هو بعمر اسبوعين ونصف على كلام اخونا ( طائر المينا ) ..

أما أنواعه كثيرة .. لكن المتعارف عليها عندنا واللي ممكن تلقاها منتشره .. 4 أنواع تقريبا ..

1/ الاندونيسي وبعضهم يسمونها ( جاويه نسبة الى البلد " جاوا " ) :



وهو الافضل بلا منازع .. من ناحية النطق والشكل والحجم .. وسعرها بالبحرين 600 ريال .. لكن عندنا هنا اشوفه معروض بـ 1200 ريال

2/ المينا ذو الوجه الاصفر :



حجمه كبير .. وشكله مميز .. لكن قدرته على النطق ماتوصل لمستوى الاندونيسي بناء على كلام اخونا فوزي الله يحفظه .. وسعره بالبحرين 1200 ريال .. ولا قد شفته هنا بالسعوديه ابد ..


3/ الباكستاني :



حجمه صغير بالنسبة للاندونيسي .. وقدرته على الكلام ممتازه .. يشبه المينا الشائع لكن شحم وجهه احمر على برتقالي .. تاخذه فرخ تقريبا بـ 300 ريال ..

4/ المينا الشائع ( المستوطن لدينا الآن ) :



برضو حجمه صغير بالنسبة للاندونيسي .. وقدرته على الكلام ممتازه .. وسعره برضو 300 ريال تقريبا للفرخ ..


ان شاء الله اكون قدرت افيدك بخصوص المينا يالغلا .. وياليت لو عندي بعض الاخطاء ان يصححونها لي الاخوان فوزي وطائر المينا خصوصا ً بأنواع المينا لأني كتبتها بناء على خبرتي المحدودة جدا مقارنة بهم ..

وبالتوفيق يالغلا ^.^

،،