[مخاوية قطاو]

دلع قطوتك
أفكار بسيطة لصنع لعبه لقطك
...........................................
..
.
.
.
.
.

كرتون حق العاب شي لا يقاوم عند القطط أتحدى إنها تشوفه وما تلعب به. وتقدر تقص الكرتون وتسوي باب وطاقه عشان يكون يوسع الصدر أكثر.
__________________________________________________________________________



الصنوبر المخروطي الشكل مثل ما انتم شايفين يعتبر وسيله جيده لمرح أكثر بتقولون لي وشلون.أنا أقولكم وشلون انتم اربطوا في طرفها الأعلى خيط أو صوف وشوفوا وشلون بيكون اللعب. أحيانا تكون الأفكار البسيطة أفضل من ألمتكلفه وتكون ممتعه أكثر.
__________________________________________________________________________



هذي كوره من القصدير معفطه لين قالت آمين.
تقدرون تسوون زيها بأنكم تعفطون القصدير على شكل كوره.ولمرح أكثر دخلوا في الكوره عود عشان يصير كأنه ذيل فار بس صمغوه زين تعرفون عفاشة القطاو.
__________________________________________________________________________



اصنع عنكبوت من اللي يربطون بها أكياس الخبز وموجودة أكثر شي في خبز التويست عرفتوها شوفوا ألصوره وتذكروا.
__________________________________________________________________________



الجرائد وما أدراك ما الجرائد.أنت بس افتح الجرائد زي الشكل اللي في ألصوره وشف قطوتك وش راح تسوي. ماراح تشبع لعب ابد وأحسن حل عشان توقف لعب انك تشيل الجرائد منها.
__________________________________________________________________________



جمع مجموعه من الجرائد وربطهم من النص بحبل
أو بصوف .امسك الحبل ومررها بسرعة من قدام قطوتك .والله إن تنهبل عشان تمسكها
__________________________________________________________________________

فيه بعد لعبه حلوه بتستانس عليها القطوه وهي انك تجيب لك عصا أو أي عود طويل زي سنارة السمك أو اللي عنده سنارة السمك يكون أفضل.المهم تربط خيط أو صوف (تلقونه مع أغراض خواتكم اللي في الابتدائي أشكال وألوان من الصوف بس أنت طب واختار). تربطه في طرف السنا ره أو العود ,بعدين شفلك لعبه بشرط إن يكون فيها شعر زي الدببة ألصغيره بس لما تاخذ أللعبه لا تشوفك أختك لأنها راح تسويلك حرب عليها. اربط أللعبه في طرف الخيط.بعدين دودلها(يعني اجعلها تتدلى أمامها) قدام قطوتك وشف وش راح يصير. معليش ما فيه صوره.
__________________________________________________________________________




طبعا مثل مانتوا شايفين شاشة تلفزيون بس وش في ألشاشه؟ هذا السؤال.؟؟
فيه شريط DVDينباع فيه حركات تحبها القطاو فأنت ماعليك الآانك تشغل الشريط في DVD والباقي عليهم.بس ياليتكم تشغلونه في الليل واخوانكم نايمين لاتسألوني ليه.
__________________________________________________________________________



هذي اللعبه مثل ما انتم شايفين علبه فيها حشرات والعلبه هذي فيها مروحه لماتشتغل المروحه تطير الحشرات اللي فيها واللي يشوفها يقول ذي الحشرات حقيقيه.
العلبه تكون على قاعده متأرجحه فلما تضرب القطوه او تمسك بلعلبه ماراح تنقلب او تطيح, راح ترجع لوضعها الطبيعي لأن قاعدتها متأرجحة.
__________________________________________________________________________



هذي اللعبه انا اسميها لعبة القطط المرجوجه سميتها ذا الأسم لانها تنط(تقفز),وتلتف, تتمايل ,وتقفز لما القطوه تهجم عليها. يعني راح يسوون هي والقطوه حرب في البيت اهم شي تشيلون الأثاث المصنوع من القزاز عشان ماتنطلها امك في الشارع<<اقصد القطوه مب اللعبه لأن اللعبه اخرتها في يد اختك الصغيره. ولما القطوه تمسك اللعبه بأظافيرها راح تمشخها ولما تمشخها راح تطلع اللعبه رائح تسمى CATNIP .ومع هذي الرائحه اللي تصدرها اللعبه مع كل مشخه من القطو صدقوني ماراح تفكها القطوه الا بلقوه يعني ياقاتل يامقتول..
__________________________________________________________________________



هذا الكيس متحرك.صمم لإظهار غريزة الملاحقه عند القطط,هذ الكيس متين ويتحمل كل شي تسويه القطوه من مشخ وعض وضرب يعني ماينشق يعني له قدرة تحمل.وارجع واقول البزارين الله يكافينا شرهم .يعني لايشوفونه والله لو شافوه بينشق من اول يوم.
__________________________________________________________________________




اللعبه اللي في الصوره هذي جزء من خيمه والخيمه متصل فيها هذا الشكل الأسطواني اللي في الصوره انتم افصلو الأسطوانه هذي عن الخيمه .والقطوه راح تلعب فيها ياداخله ياطالعه والأحسن لما تكون عندك قطوتين او اكثر تشوف اللعب كيف راح يكون انا لما اشوفهم يلعبون مع بعض اقول ياحظكم مستانسين تشوفونهم ركض وركيض.وناسه.<<<شوي وتقول ياليتني قطوه
__________________________________________________________________________



هذي اللعبه سهل انك تسوي زيها تجيب عود ودورك من هنا ولا من هنا (من العاب اخوانك)
كوره بلاستيك خفيفه عشان يكون من اسهل انك تخرقها. تدخل الكوره في العود لين يبان طرف العود وتلصق الريش بصمغ قوي انا ارشح صمغ الخشب جربوه والزين فيه انه لما ينشف يطلع شفاف. وانشالله راح تحبها قطوتك.
__________________________________________________________________________



نفس طريقة اللعبه الأولى لاكن بدون كوره اهم شي انكم تلصقونها زين يعني اذا بتصلح شي صلح زين ولا لاتصلح. اهم شي كثروا الريش
واذا كان عندكم اللي يطلع رائحة الCatnip رشوا على الريش من هذي الريحه.
__________________________________________________________________________

وبس
واتمنى انكم تسوونها عاد والله سهله بس تحتاج للمزاج يعني اذا مزاجك رايق اغتنم الفرصه واشتغل فيها اما اذا كان مزاجك مب رايق لاتشتغل فيها لانك بدال ماتصلح راح تخرب ماراح تصلحها صح.
تحياتي لكل محبين مخاوية قطاو