|
رد: هل لديك ببغاء متوحش وتريد ان تروضه ؟؟ تعال تعلم ...
بسم الله الرحمن الرحيم
الجزء الثاني
اتمنى من الجميع قراءة توقيع غسان بكل تمعن
لان بيننا ناس تريد ترويض الطير بين يوم وليله
وهذا صعب او قد يكون مستحيل ... لا تخسر طيرك بتهورك
حاول تكون متسلسل عشان تحصل على افضل النتائج للترويض
إذا مرت المرحله الاولى بنجاح فأنت قد اصبحت مألوف
وتذكر بالنسبه للطائر لازلت مصدر خطر
يعني لا تفكر انه اكل من يدك انك صرت صاحبه وتمون
وربي لو استويت له انه يعضك عضه يجيب مغ عظمك فيها 
وتذكر لا تسحب يدك بسرعه 
يعني لو قربت تحمل مايجيك
حاول بكل بطء تعطيه فستقه وتروح
ثاني مره تعطيه وتبعد بعد كذا بياخذها وياكلها قدامك وكأنك جنط قدامه 
يعني حاول على مراحل لو اضطريت جوعه عشان ياخذها من يدك عادي والسكر مره يخليه يحب يلعب بأصابعه حتى لو مافيها سكر لانه تعود الاصابع مانها خطر
خلصنا من الاكل
ندخل في كيف تحككه في كامل جسمه حتى تحت الجناح ومو انت ترفع جناحه عشان تحكه لا هو يرفع جانحه زي اللي يقول حك هنا يالحبيب
اتمنى تركز في الطريقه
وهذي طريقه مجربه وناجحه جدا في 99% من الببغانات
حاول بطريقه تنزله في الارض اي ارض سرميك فرش اي شي المهم طلعه من القفص
وخذ لك منشفه عاديه وقرب عليه وارمها فوقه طبعا راح يصيح وبعد اقل من عشر ثواني بيسكت تماما كنه ميت
شيله من الارض بالمنشفه بيديك الثنتين
اجلس وحطه في حضنك وانتبه تخنقه او تضغط المنشفه بالحيل وتجيب اجله
لفه عشان يحس انه ماله مفر بالمنشفه
الحين دخل يدك من عند ذيله وحكه في ظهره وبحنيه مو تحسسه انك بتفترسه
وتحت جناحه وبهدواء تدرج لين توصل راسه إذا وصلت راسه ركز على المنطقه اللي خلف العين
يعني عند اذنه وتحتها هو يحب المنطقه هذي
انت ابدا ابعد المنشفه ماراح يتقبل المره الاولى وبعد عدة مرات تلقاه بس تقول له راسك راسك ينزل كأنه يصلي عشان تحكه في راسه وخلك حنون وبلاش دفاشه
هنا يبدا يطمن لك بنسبة 70%
ولا تفرح 100% ما راح توصلها إلا بعد فتره طويله جدا
اللي هي كيف تشيله زي الحمامه من ظهره وتعلق رجوله في السماء وهذي يبي لها فتره بس تجي انت طبق كلامي بالتدريج واوعدك توصل لمرحله تدعي لي فيها
الجزء الثالث ترقبوا
كيف اطلعه على يدي !!!
نصيحة الجزء الثاني
اي غلط يفعله طيرك لا تضربه مهما كان
انت بس قول له لا... لا ....
وعاقبه بساعتين في الظلام وقفل باب القفص
هو بعد فتره يعرف انو لا يعني فيه شي غلط وبتعاقب عليه
وتذكر كل مره يجي يعضك قول لا وحاول ترفع صوتك شوي
عشان ينتبه انك زعلت وبكذا نكون قطعنا جزء مو بطال في ترويض طير بري
اسف ع الاطاله
لكن وجود طلبات ع الخاص بالتفصيل الممل اتمنى يكون الدرس وصل بوضوح بدون ملل
__________________
|