|
رد: البادجي و الشتاء
وعليكم السلام
قلة الخبرة في التربية والإنتاج ماهي مشكلة
لأنك ممكن تتصفح المنتدى وتقرأ وتسأل وتستفيد وحتتعلم بسرعة دام الرغبة موجودة
بس الأهم قبل رغبتك في التربية تعرف دي روح ونحنا محاسبين عليها أمام الله
هيه طيور حلوة وممتعة صح بس كمان دامها روح يبغالها عناية من أكل وشرب وكمان علاج وقت المرض دا شيء
الشيء التاني لوحتشتري عندك خيارين ياتجيب زوج بالغ وجاهز من شخص ثقة وركز على ثقة
أو إنك تجيب زوج صغير في السن صح حتستنى وقت قبل مايجهزوا ويفرخوا بس أنا أفضل دا الخيار
لأنو في أغلب الأحيان البياعين يستنفذوا طاقة الزوج الجاهز في التكاثر عشان الربح
وفي النتيجة لمن تشتري الزوج الجاهز ممكن يبيض عندك عش وإلا إتنين وخلاص على كدا
أو يكون الزوج كبر في السن وماعاد يجيب فروخ وعشان كدا قولتلك خيار الزوج الجاهز لازم البياع ثقة
بخصوص سؤالك عن الشتاء والتدفئة والتفريخ
حسب المنطقة ودرجة الحرارة اللي حتكون في منطقتك وقت الشتاء
لا تقارن دفئ الغرفة بالبيت لأنو ممكن تكون كل الغرف باردة ودي أرحمهم
إنته ركز على الطيور حتقدر تعيش فيها ؟
المفروض جوها يميل للبرودة يعني معتدل لأنو دا الجو يخلي الطيور تحس إنها في الطبيعة ويخليها تحن للعش والتفريخ
سؤالك عن وقت الإنتاج طيور البادجي تنتج طول السنة متى ماتوفرت لها الظروف المناسبة
بس مومعناتو نرهق طيورنا بالإنتاج والمفروض نعطيها وقت راحة بين العش والتاني نعوضها فيه بالفيتامينات والأكل الجيد
كمان لو المربي في منطقة معروفة حارة في الصيف ينتبه لأنو الحرارة الزايدة تفسد البيض وممكن تموت الأنثى
أما سؤالك عن التوالف هوا شرط من شروط التزاوج والإنتاج بس التوالف مومشكلة طيور البادجي تتكيف بسرعة وتندمج
آخر شيء لوعزمت خلاص تشتري قبل ماتشتري إقرأ عن البادجي
وكيف تعرف البادجي السليم من غير السليم أو المصاب كمان كيف تميز الدكر من الأنثى
لأنو البياعة يشوفوا الواحد ماعندو خبرة يروحوا يبيعوا دكرين عساس إنهم زوج
عشان يخلص من الدكور اللي عندو ويقلل نسبة الضرر والخساير من المضاربات
__________________
سبحــان الله وبحمده سبحــان الله العظيم
شكراً " رونق حجازيه " على التصاميم الحلوة ♡♡
|