السلام عليكم... عضوه يديده واستفسارات عديده :)

[kuwaitia]

السلام عليكم

انا عضوة يديده وحبيت هالمنتدى عندي سؤال بالنسب حق قطوتي بيكي

مكتوب بجوازها انها ايرانيه بس مادري اي فصيله صورتها موجوده و عمرها سنه ... انا كلش يديده بهالسوالف ولا عمري ربيت قطاوه ولا اعرف اتصرف معاهم

بس انا مستغربه منها.. اول شي ما تلعب ... كله نايمه او متكوره بزاويه وقاعده

شاريتلها العاب على فيران ماكو فايده .. عندي الخيط اللي وراه سمجه تطالعه بس ما تلعب.... جربت عفست لها اوراق طلعت تطالعهم ... حتى كور وادحرجها صوبها هم ماكو فايده... وهل هالشي طبيعي؟؟؟

والشي الثاني ما تاكل... تشمشم الاكل وتمشي بس تحب الدراي فودد اللي جنه بسكوت.. بس هم تاكل شويه يعني 4 حبات بالكثير وخلاص... انا خايفه عليها

والشي الاخير ما تخلي احد يقرب منها الا انا... وساعات من اقرب منها تشمخني وبتعضني بعد.. يعني وانا اخذ لها هالصوره شمختني مرتين

ودي اوديها طبيب عشان يوصف لها فاتح شهيه او شي لانها يا حرام احسها تعبانه ولما تتنفس تطلع صوت بس ماعرف غير الدهماء... ولما وريتها اياه قال ما فيها شي مع انها كانت تعاطس عنده بط جبدي... فبلييز اللي وين احصل بالكويت غيره ؟؟؟؟

ومتى لازم احممها... انا ما عرف كلش ... اصلا اهي ما تخليني اشيلها... فيصير انطر وايد.. اهي تقريبا عندي من جم اسبوع


وشكرا وادري اني مصختها

[قطو_Q8te]

السلام عليكم
حياج الله بينا اختي ونورتي ..
انتي شاريتها يديد؟
يعني بعمر 1 سنه؟
اذا اي ..
القط الكبير صعب يتربا ويتعود على أي شي اللهم بس صاحبهـ ...
اما شاريتها منا هي صغيره تقدرين ادربينها ..

وعن طريق الاستحمام
عبي صطل ماي دافي وجم نقطه من الصابون الخاص بلقطاوه تتكون رغوه وصبي عليها شويه بعدين اخر شي بطلي الماي وسبحيها فيه ونشفيها بلفوطه .. بعدين السشوار
في حال خافت وهاجت من صوت السشوار ... مالج الا اتنشفينها بلفوط (( اصعب شي ))

عموما قطوتج من النوع الشيرازي والشيرازي معروف عنه انه كسول ماراح ينفع معاج غير قلم الليزر تحركينهـ هذا الوحيد راح يجدد نشاطها
وروحي على مركز لولو هايبر ماركت يم المشاتل في شي اسمه Catnip " مشرفتنا وذردروز قالتلي عنه "" ايخلي القطاوه الصعب ترويضهم والكساله ............. شياطين

عموما قطوتج الواضح مثل ماقال البيطري مافيها شي من التنفس يمكن شعر ساد بطنها
في بمركز سلطان منتج اينزل الشعر والاخت Catty حاطه صوره للمنتج تقدرين ادورين عنهـ ..
بنظري الدهماء اقرب شي واحسن شي واسعاره مناسبهـ ..

عندج صيدليات بيطريه الي يم السوق الايراني فيها ادويه ودكاتره راح يفيدونج

والواضح عندي انه قطوتج هاف مون فيس على انقورا (( موعارف احدد نوعها بلضبط )) .. بس عفوا" امحلقه لها شعرها

[عسولي]

مرحبا بكي اختا بيننا وانشاء الله انك تستفيدين وتستفيدين

وانشاء الله يكون اخي قطو افادك

تحياتي للجميع

[kuwaitia]

شكرا واااايد على الرد اخوي قطو

صح انا شاريتها وهي كبيره عشان يعني من جم اسبوع عشان جذي مو قادره اسوي فيها اي شي ولا العبها

ادري باذيك معاي انا شريت لها من مركز سلطان مال الشعر وهو ياي على معجون بس من تشوفني ببطله تنحاش...ما ادري شلون اعطيها اياه والمشكله اني ما اقدر امسكها ما يحلالها البدي كير الا بيدي ههههههه

عسولي شكرا جدا على الترحيب

[قطو_Q8te]

السلام عليكم
اختي غلطتي غلطه كبيره يوم شريتيها الله يهداج جان شاورتينا ..
راح تتعذبين معاها وايد وصحيح راح تتروض وتتآلف بس مو مثل الكتنز تربينهم اهما وصغار ..
عالعموم المرهم ايوا هذا اهو طريقته تمسحين على ايدينها واهي تلحس ايدينها ...
بجم خذيتيها ومن وين؟

[kuwaitia]

السلام عليكم ومبارك عليكم الشهر ان شاء الله


شكرا اخوي على الرد مره ثانيه.... بالنسبه حق بيكي الله يسلمك اخوي شراها من سوق اليمعه ب25 وعمرها سنه

وانا للاسف ما عرفت هالمنتدى الا لما شريتها.... كنت في قبل لا اشتريها كنت احوش بالنت صوب فيدوجق وهالسوالف ما يابو طاري لا تربين قطوه كبيره....

ابشرك اليوم ورديتها الدهماء....عطوها ابره لان معاها فيفر وعليه... بس اشوفها استفرغت اللي ببطنها عزك الله

فوديتها البيطري الي وراه اسمه الري.... وااااايد احسن معاملتهم وايد ارتحت معاهم... ووصف لي شراب حق الحكه.. وقالي ان يور كات نييد بوي فريند ..عشان جذي قاعده تشمخ ... مسكينه مطلعه حرتها فيني... وسالفه الاكل قالي اجرب اعطيها اكل بيت
ومريت لولوهايبرماركت ما لقيت الكاتنب حسافه... بجرب امر باجر.... بس شريت لها الطوق مال البراغيث والتريت ... بس حسافه مع الشمس انعجن وصار كتله وحده
عاد انا اليوم لاني جوله في ربوع سوق اليمعه سحبت على الدوام ههههههههههه الله يستر من الخصم >>>> جني قلت قصه حياتي هههههههه

[قطو_Q8te]

ههههههههههههههههههههه
سوق اليمعه ولا سوق الحمام؟؟
مادري اذا فتحولهم فرع
الكات نب موجود صاير مثل جيس اصغير لونه احمر تلقينه بس بالتدقيق من كثر ماهوصغير مو واضح وايد..
رحتي بيطرة الري
نصيحه من اخ ..
ترا هالبيطره نصابين ومحد يمدح فيهم ولايروحون لها وبس يبون يسحبون فلوس موعارفين شلون وفوق كل هذا يطلعون علل الدنيا بالقطوه ..
سئلي عن البيطره بلمنتدى وشوفي شيقولون عن تجارب.
بخصوص بوي فرند لوووووووووووووول بيطري فصله
انتي ملاحظه عليها حركات ئرعا وتناوي بشكل مخيف؟؟

[kuwaitia]

هلا اخوي
ومادري سوق الحمام سوق اليمعه شدراني.... حدي غشييمه .. بس هذا السوق اللي متروس هنود p:
ومشكووووووور على النصيحه بالنسبه للبيطري بروح اسوي سيرج واشوف التجارب... وضاق خلقي على الري وانا مستانسه عليهم الحين خفت منهم ومن الادويه اللي غززوها... بس لانه فحصهاووصف لها دوا حق الكحه وحتى اظافرها قصصها بس بالدهماء ماسوو لها شي عطوها ابره ومسكينه استفرغت كلشي عاد قالتلي تعالي باجر عشان يعطونها حقنه ثانيه وانا كنت ناويه اكشت ....تنصحني اروح ؟؟؟
واسكت على سالفه البوي فريند قلته وي ار ان رمضان شي هاف تو ويت هههه بعدين قال لازم عاد قلتله ويت تو ماي نكس سالاري... مادري وين اييب لها بوي فريند هههههههههههه
بس حرام اهي ما تطلع صوت ساكته وما تسوي ولا حركه نص جم هي بس تشمخ وتنام
ههههه

عاد مسيكينه من رديت من البيطري وهي عايشه صدمه منخشه تحت الصوفا ومو راضيه تطلع.. ولما اناديها تخزني خزه وتلف وتعطيني ظهرها ومن اقرب تنحاش تنطرني امشي عشان تلبد تحت الصوفا مره ثانيه...كرهتني وعليه

[قطو_Q8te]

السلام عليكم
اي سوق الحمام
الدهماء انتي اول ماتدشين قولي ابي اقص وشنو تبين .. الري بس يبون يطلعون فلوس يعني قصة الاظافر يايه عشان فلوس مو خدمه منهمـ ..
لاتستغربين اذا حالتها حرجه ترا هالبيطره تسوي هوايل.. ومحد يمدحها
اذا بتروحين حق الدهماء قوليلهم انج رحتي مناك وخيشوفون الدفرت شخذت تطعيمات
عشان تعالجين الصدمه
وكليها بايدج جبن سلايز او مرتديلا ومسحي على راسها وتحت رقبتها ليما تعود عالشيله

وأي اوامر ثانيه حاضر

[kuwaitia]

مشكووور اخوي وما قصرت


وشكلي برد اوديها الدهماء بعد الفطور لانها قامت تمشي وترجف و اخلاقها تغيرت وايد وصايره خايفه بطريقه غريبه صارت من تشوفني جنها شايفه عدوها تنحاش وانا مو قادره اصيدها كلش ولا حتى امسح عليها ولا حتى احط لها معجون الشعر لانها وعليه وايد تكح وتتنافظ ...ومن تصير صوبي بس تركض حتى ما تشمخ بس تنحاش.. انا اتوقع لانها لما كانت تعافر وهم يقصون اظافرها ويفحصونها عنهم كانت عيونها بعيوني فالحين خايفه مني

ومشكور على نصيحه المرتديلا هذا الشي الوحيد اللي كلته... بس حسافه كلت شريحه وحده وبس... بس احسن من ولاشي


صراحه مشكووور وايد وايد وايد... انت مو متخيل شكثر انا شاكرتلك وصج استفدت من نصايحك