ارجو منكم المساعدة هام جدا ( ارجو دخول ابو محمد )

[الوسام الذهبي]

السلام عليكم ورحمة الله وبركاته

طبعا اكثركم تعرف على صديقي الجديد ( الفرخ الافريقي )

طبعا انا وعدت الشباب الي نصحوني بفحص الطائر اني راح اخذه للبيطري وفعلا اخذته وفي قرارة نفسي اقول ياريتني ما اخذته للبيطري

في البداية احب اوجه لكم سؤال

هل من الممكن لبيطري مهما كانت عبقريته انه يحكم على طير انه مصاب بالأسهال من تبرز واحد اطلقه في العيادة مع ملاحظة ان التبرز كان اخضر اللون جامد مع سائل ابيض


الان احكي لكم الموقف الة صار

ذهبت للعيادة دخلت على الدكتور وكان صديقي في القفص سألني شفيه قلت له الحمد لله مايعاني من اي شي لكني جايبه على شان جيك اب وعلى شان اخذ منك نصائح طبية يعني شوف وزنه شوف جسمه ضعيف او لا شي جدي

طلب مني اني اطلعه من القفص طلعته بهدوء وحنان ومسحت على راسه والاطفه واهديه وعطيته للدكتور الة اخذه بعنف حتى الطير صرخ وفي الحقيقة اول مرة اسمع طيري يصرخ ( صرخة خوف تبع الفروخ مو جعير ) انصدمت من طريقته طبعا بحكم تجاربي السابقة مع الطيور اعرف ان الطير لما يكون مطرب او خايف واهو على يد شخص يتبرز واول ماتبرز مباشرة قال لي الطير يعاني من الاسهال قلت له لا الطير مايعني من اسهال قال لي انا اقول لك الطير فيه اسهال شوف التبرز اخضر جامد مع سائل شفاف وابيض المفروض تكون كلها كتلة وحدة

طيب ياحضرة الدكتور ماسألتني شنو ماكل شنو طبيعة برنامجه الغذائي مباشرة حكمت عليه

قال لي واضح انها بداية اسهال وانه بحاجة لمضاد ومباشرة جاب الابرة وعطاه مضاد في حلقه بدون اي مقدمات وبدون ما ياخذ رايي

وقال لي استمر على هالمضاد لمدة 5 ايام وامنع عنه جميع انواع الاكل واعطه مجرد حب عباد الشمس مع بطاطس مسلوق و صفار بيض مسلوق ومرني بعد 5 ايام اقول لك شتسوي

قلت له طيب ممكن اقص اضافره والله يأثر عليه قال لي مو مشكلة وسحب قصاصة اضافر ويبي يقص اضافره وانا موجود قلت له لحضة لحضة شلون تقصهم وانا موجود قال لي عادي ما انتضرت مباشرة طلعت من الغرفة مع ملاحظة انه مسك الطير بطريقة وحشية ولما رجعت كان خلص لاحظته انه يخلي قطن على رجله ولما طليت عليه لاحظت ان القفص مليان دم ورجله تنزف بغزارة قلت له رجله تنزل قال لي عادي راح يوقف النزيف لحاله

انا اعرف ان في وريد يغذي الظفر بالدم واذا وصلنا له بالقصاصة ماراح يوقف الدم قلت له ماراح يوقف الدم شوفه شلون ينزف بغزارة قال لي الحين اوقف وحاول يوقفه بمحلول وماوقف استمر النزيف بغزارة قال لي يحتاج الى كي وجاب جهاز صغير وكواه في اضفره

طلعت من العيادة وانا مصاب بأحباط من الي جنيته على صديقي العزيز ومن كلام الدكتور كيف صديقي مريض ماكان فيه شي وكان برازه طبيعي في القفص وشنو هالي عطاه اياه آمن او لا وبعدين طمنت حالي انه مجرد مضاد ويفيد مايضر

رجعت البيت وحاولت الاطفه وانسيه المعاملة القاسية من الدكتور

واذا بالصاعقة الطير يرجع ( يستفرغ من فمه ) مادة لزجة شفافة مع قطع صغيرة من الطعام

ادخلته القفص لان مشواري استمر معاه من الصبح لين الساعة الواحدة فقلت اكيد جوعان وخليت له حب عباد الشمس بدون اي شي مثل ما اوصاني البيطري قرب على وعاء الطعام ومسك حبة عباد الشمس وهو خامل جدا وبعدين القاها ووقف يطلع في وعاء الطعام قلت يمكن مو متعود فرجعت له الخلطة المعتادة و ما اكل منها وضل واقف خامل في القفص طلعته من القفص وقمت الاعبه واستفرغ مرة ثانية

رجعته للقفص وتركته وقمت اراقبه وقام يسوي حركة كانه يبي يغر طير واستفرغ مرة ثالثة هني انا صادتني حالة هستيرية مو عارف شسوي قمت الف في الغرفة اقول انا شسويت ومباشرة رحت قريت الة على علبة الدواء اهو قال لي انها مضاد حيوي وانصدمت ان مو مكتوب عليه مضاد حيوي وانها صناعة الاردن

اسم الدواء
إنرسول-20

ENROSOL-20

دواعي الاستعمال :
الدواجن : الرشح , الكولاي , تيفوئيد الطيور , وانواع السلمونيا الاخرى ( ويستخدم ايضا للعجول والحملان والارانب )

الحين ابي نصايحكم اقطع عنه هذا الدواء لو شنو ارجوكم ساعدوني

[لوكالوكا]

حاجة ترفع ضغط الوآحد..

ربي يصبركـ اخوي ومسكين الفرخ ما يستحمل كل هذا

والله عورت قلبي بكلامك وليت اقدر افيدك باي شيء غير الدعاء

[بلبول 18]

والله فعلاً حالة تعور القلب

الله يخليه لك يارب

انتظر رد الخبراء أخي العزيز

وانصحك ألا تذهب لهذا البيطري مرة ثانية شوف بيطري ثاني

[ابو محمــد]

انسى اللي سوااه الجزار وقلي الحين الطير وش وضعه,,

يأكل ولا ما يأكل والنزيف وقف والا لا؟؟؟

[medozoom]

اخي ما يصير كذا الله يهديك

طيرك ما فيه شي ولو ودك تكشف عليه وديه مكان عدل وديه مكان يستاهل

كان من المفروض لما شفت الدكتور ماسك الطير بوحشيه طوالي توقفه وتاخذ طيرك وتمشي من عنده مو تجلس تتفرج فيه

معليش اخوي الخطا خطأك وليس خطأ الدكتووووووور تعرف ليش؟

لانك سمحت للدكتور من البدايه انه يكمل الطريقه الشنيعه

انا لو قلت لي اقص اظافير الطير وانا ما اعرف ما راح اتهور واسوي الي سواه

لكن وقسم بالله اني مقهور من الي صار وكانه طيري

يا جماعه مو اي واحد دكتور يعني لو محل الطيور الي اشتريت منه كان قص اظافر الطير احسن من الدكتور

الطير فرخ يعني ما يتحمل هذي الضغوطات والقسوه

اعتذر لو كنت تكلمت بأسلوب متسرع لكن والله من القهر

اتمنى من الاخوان يفيدوك بالموضوع

اما الدكتور الله لا يسامحه

[مشاعل الكويت]

اخوي الكريم

افضل مضاد حيوي بالعالم كله

صحن ماء مال الكاسكو تحط فيه ماء وتاخذ فص ثوم واحده فقط تقطعها قطع صغيره وتضعها في الماء + نص ليمونه تعصرها بالوعاء اللي فيه ماء

طبعا هذي تعملها ورة وحده في الاسبوع فقط ( اذا كان الطير مريض )

ومره بالشهر اذا كان الطير ما فيه شي

لا تاخذ مضادات حيويه من الطباء لانهم فيهم مواد كيمياويه و يبون يبيعون سلعهم ويستفادون

ونصهم ما يعرفون شي نهائيا ( طبعا مو الكل )

اما بالنسبه الى طيرك ( صديقك ) ان شاء الله ما فيه الا العافيه

وخبرنا باللي يصير معاك اول بأول

[الوسام الذهبي]

اشكرك على مشاعرك ومروك اخي الكريم لوكالوكا وان شاء الله الطير مافيه شي

شكرا على مرورك اخي العزيز بلبول 18 الله يسلمك ان شاء الله

اخي العزيز ابو محمد كنت انتظر ردك ونصيحتك بفارغ الصبر الطير اول مارجع على البيت مارضا ياكل وكان خامل فسويت له ابرة بسكوت الاطفال فارليز واقبل عليها بشره والحمد لله بعدها حسيته تحسن لكن ماقرب على الاكل والماي الا وانا قاعد اكتب هذا الرد لما شلته من القفص وخليته على الستاند وبالنسبة للنزيف وقف اول ماكواه الجزار بالجهاز الة عنده بس مادري شنو راح يكون وضع الضفر بعد هالي صاده وبالنسبة للدوا الة عطاه الطير في حقله اقدر اوقفه بكل بساطة ؟ لان في شخص قال لي في ادوية دام عطيته لازم تكمل معاه الفترة العلاجية كاملة لانك اذا قطعتها راح يتأثر حتى لو كان مافيه شي قبل اخذ الدواء فأتمنى نصحيتكم اوقفه او لا ؟

اخي العزي medozoom بصراحة استاهل الاسلوب الة كلمتني فيه واستاهل اكثر لكن للأسف انه الدكتور الوحيد الخاص عندنا وقالو لي عن وحدة اجنبية في منطقة بعيدة فمارحت لها او في البيطري الحكومي وسمعته جدا سيئة والكل يقولون انهم يقتلون الطيور بدال مايعالجونهم لكن والله ما اعتقد انهم اسوء من هالدكتور الي رحت له وان شاء الله يطلع منها الفرخ بعد الي صاده

مشاعل الكويت اشكرك جدا على مرورك ونصائحك الطيبة


ملاحظة الطير لازال مو على طبيعته عادتا حيوي جدا ولعوب اما الان فهو خامل بالنسبة لوضعه السابق

[ابو محمــد]

وقف الدوااء فورا ما دام الطير يرجع,,

لان المضاد تركيبته قويه ع الطير,,

واذا اخذت اسبوع راسلني ع الخاص وانا راح افيدك اكثر.

[مجنون الامازون]

اخي العزيز (الوسام الذهبي)

كلنا في القسم موجودين لخدمة بعض .. وكان افضل انك عرضت صورة الطير واخذت اراء المختصين اول .. لان الجزارين البيطرين (الله لا يوفقهم) همهم الفلوس ..


عموما الله يعينك ويقوم طيرك بالسلامة ان شاء الله ويرجع مثل اول واحسن ..


بالنسبة لقص الجناح او قص الاظافر في طريقة سهلة انت بنفسك تقدر تسويها وخصوصا ان طيربك فرخ .. شوف الرابط الي تحت ..

خاص بطريقة قص الجناح
http://2zoo.com/vb/showthread.php?t=128678


خاص بطريقة قص الاظافر
http://2zoo.com/vb/showthread.php?t=128849


دائما وابدا يا اخي العزيز حاول انك تبتعد عن (الابر) والمضادات الحيوية .. وخليك على الامور الطبيعية .. وحاول توقف المضاد حالا لان لانه اقوى من ان يتحمله فرخ ..

تقبل مروري

[الوسام الذهبي]

مشكورين ماقصرتون

اخي العزيز ابو محمد تشكر يالغالي والله ماقصرت

اخي العزيز مجنون الامازون مشكور يالغالي وماقصرت

وان شاء الله غلطة وماراح تتكرر

واحب ابشركم من ملاحظتي له خلال الساعة الي راحت الطير قاعد يسترجع نشاطه وشقاوته المعتادة وطاح فيني تعضض طبعا مو عض مال خوف عض مال مزاح مع صديقه ههههههه موته العض في الاضافر يحب يقرمشهم لاعبته واجد واحسه واجد فرحان ومفرفش