هاوي جديد مع كاسكو

[Souls-1]

السلام عليكم و رحمة الله و بركاته

أولاً أشكر لكم هذا الموقع الرائع الذي يعني بالحيوانات الأليفة ، و لو لا الله ثم انتم لم تمكنتم من طرح أسألتي و العثور على الكثير من الأجوبة للكثير من الأسئلة التي صادفتني عندما اشتريت طائر الكاسكو ... ,

أنا شريتها يوم الاثنين و حتى الآن هي عندي و عمرها على كلام الهندي سنة و شهرين و لاحظت عينها مع اني ماني خبير بالعمر و حجمها و سواد العين يشير الى انها سنة و شوية ، لما شريتها كانت متوحشة ، من اقرب من القفص تصارخ ، بس نفذت طريقة قرأتها كثير ، اني أوقف ولا كانها تصارخ ، و هي بتسكت

بعدها قامت فقط تصرخ لما اقرب ايدي منها ، و نفس الحكاية بقيت ايدي قريب منها لين ما سكتت

المرة الثالثة حاولت المس منقارها و نفع ، ما قامت تصارخ و تقعد هاديه ، الآن اقدر احملها بالغطا تبع القفص و لا تصارخ و لا شيء ، و اقدر اقرب صبعي من منقارها من دون لا تصارخ ، بس تفتح فمها شويه و احسها بتصارخ بس تسكت و تخليني امسح ع منقارها ، بس واضح انها خايفه ، كيف أزيل هذا الخوف عنها ؟ مع اني صار لي 3 ايام على نفس الحالة ، تخاف من المس منقارها

ما هي الأمراض التي تنتج من وجودها ؟ لاني حاطها بالغرفة معاي و فيه شوية ريش و برازها يكون موجود ، فهل تنصحوني أطلعها و لا عادي أخليها بالغرفة و انظفها بشكل مستمر ؟

أنا عارف اني شريتها بأسوء فصول السنة و الي هو الشتاء الآن ، لكن شو الي اقدر اعمله عشان ادفيها اكثر ؟ قرأت كثير يقولون ان الطائر الي يقعد برجل وحده يعني سليم ، و آخر يقول لا يدل على المرض ، لكن من الي فهمته انهم يقصدون لما ينام و اهو برجل وحده يعني سليم ، واذا كانت صاحيه و برجل وحده يعني مريضة ، ما مدى صحة هذه المعلومة ؟ و أنا حاولت أحطها تحت لمبة برتقالية بغرفتي ، بحيث لا نامت أحطها تحتها و اطفي كل الانوار تدفيها شويه ، بس احس للحين ما يكفي .

و خبرني أحد الشباب انه يعرف درجة برودة الكاسكو تبعه من لمس الأرجل ، هل هذا صحيح ؟

أنا أحس الي شريتها شويه هاديه ، بس بدايتها كانت متوحشه حتى انا اندهشت [ ما شاء الله ] بسرعة تركها لجعير ، يعني خلال بس ثلاثة ايام و هي عندي تركته بالكامل ، و اليوم الصباح اول مرة اسبحها ، عارف انه مو زين بالشتاء لكن لاني توني شاريها و مغبره شويه فـ قلت ضروري و صراحة خفت لما جيت اروشها لاني قريت كثير من الأشخاص عانوا معاناة مع طيورهم عشان تتقبل الماي هي ع طول كانت تحاول تطلع من البانيو ، من رشيت عليها الماي رجعت و قعدت قريب المرش ارش عليها ماي و تشرب شويه منه و كنت ارش ع صدرها و اجنحتها و احط شويه بيدي ماي و اكبه بخفيف ع وجهها عشان لا أبالغ ، تركتها شويه تنشف روحها بعدها رجعتها الغرفة قعدت ساعتين او 3 ، و بعدها وديتها السطح تتشمس ، تقريباً اسوي كذا يومياً ، لما يجي الساعة 12 الظهر ، اطلع السطح اخليها تستانس ، تمشي و تصفر .

و يب ملحوظة مهمة ، أنا من شريتها عمري ما حطيتها بالقفص ، ع طول من دخلت غرفتي فتحت لها القفص ، و من وقت لوقت اشلها و احطها ع الطاولة جنبي أو يم قفصها تمشي و لا فوقه

ملاحظات لاحظتها عليها ، أحسها كثير تنظف روحها ، ما كو نتف ريش ، بس أحس فيه شيء بأجنحتها متيبس لانها كل مرة تحك منقارها بجناحها احس فيه شيء أبيض ميبس الأجنحة ، و نفس السالفة مع ذيلها الأحمر ، فيه شيء مثل العصا الصغيرة ابيض طالع ع فوق صغييييييييييييير

عارف قرقرة كثير ، بس صراحة كان نفسي بكاسكو بالغرفة يونسني خاصة ان شغلي أكثره ع الاب =) و لما تكون جنبي و تقعد هي ع الطاولة انواع التغريد ، تهبل ، بس لما تكون فوق قفصها تاكل و لا واقفة فيه ، ما تصفر ابداً ، و للحين ما شريت ألعاب للقفص ، رحت لمحل شفتهم كلهم من قماش و لا خشب يتكسر بصبعي ، أخاف تاكلهم و لا شيء

أرائكم و اقتراحاتكم =)

[فيصل المبارك]

بالنسبه للعض هاذا شي طبيعي راح يختفي مع اطمئنان الطير والجعره ايضا تختفي مع دخوله وانسجامه مع اجواء البيت بس ابعده عن الاطفال وخليه ينام وياخذ وقته وغطيه عن البرد بالنسبه لنضافة بشكل يومي خصوص الاكل والشرب وفيه طريقة مجربه بس يبغالها مزاوله وبستمرار وبمعدل مره باليوم لمدة عشر دقائق حاول تحط عسل او مربي في اصبعك وخله يتذوق الشي هاذا علشان يطمن الطير ويتخلص الطير من الخوف الي فيه من يدك موفق اخوي

[Souls-1]

تسلم أخوي فيصل على ردك

و بالنسبة لأني اعطيه عسل أو جام ، صراحة خايف اسويها ، لان تدري فيه مليون عسل و جام ، اي واحد فيهم بالذات هو الي استخدمه ؟ جام يختلف عن آخر و كذلك العسل ، فـ أبغا أتأكد من نوعهم

و بالنسبة لتغطية بحاول معاها

و مشكور

[fawzi]

اخوي بالاختصار الصبر ثم الصبر وطوله البال انت استمر على الحال الي عملة وان شاء الله مع مرور الوقت الطير راح يطمن لك اكثر واكثر

[محب الحياة البرية]

بالنسبة للوقوف بالرجل الواحدة المعنى من هذه الحركة يعني انه مطمئن وهادئ

إلا اذا سوا هذي الحركة الربعة وعشرين ساعة وقلب راسه ونام هذا يعني انه مريض

[فيصل المبارك]

اخوي بالنسبه للعسل او مربى عندك مربي الفواكه حلواني هذا حلو بس لاتكثر علشان الاسهال