مهم: وجدت عصفور صغير

[Need not to know]

السلام عليكم
اليوم لقيت في الحوش عصفور صغير من النوع الصغير دا اللي يعيش في شوارع المدينة المنورة، ومني عارف إيش أسويلو، كيف أأكلو؟ كيف أشربو؟ إيش أحسن بيئة أحطو فيها؟

طبعا أفضل حل إني أرجعو لأمو، لكن مني عارف فين مكانها، ولو هيا جاتو (أنا تطبيقا للي اتعلمتو لو لقيت بسة صغيرة إني ما أمسكها مباشرة لازم بشي عشان ريحتها، سويت نفس الشي مع العصفور) كيف حتقدر تاخدو؟ مستحيل يطير معاها وهوا صغير، غير كدا إنو الحوش يجولو بسس فلو خليتو في الحوش عشان تجيلو أمو مصيرو يا إما ياكلو البسس يا إما ياكلو النمل.

دحين حطيتو في وعاء حق الزهور، ومعا غطاية علبة موية عبيتها موية، بس ما قرب منها، ومني عارف إيش أحطلو أكل، وهوا ياكل ويشرب بنفسو ولا بمساعدة؟ وكيف أساعدو في الأكل والشرب لو ما كان ياكل ويشرب بنفسو؟

يعني باختصار كيف التصرف اللي المفروض أتصرفو دحين عشان حياة العصفور؟