و الله لو يحط رجل على رجل ما شريته بها القيمة !!

[محمد الرياض]

إخواني ..

حبيت أنقل لكم ما حصل معي اليوم الخميس ..

في البداية طرا على بالي ألف على محلات الطيور أشوف و ش من جديد عندهم ..

و كنت حاط في بالي لو لقيت جوز كروان طيب أشتريه ..

على فكرة .. حاط إعلان مطلوب جوز كروان في قسم الشراء و إلى يومك محد رد علي

و ردفته بإعلان ثاني لعل و عسى << المهم مالكم بالطويلة ..

نرجع لموضوعنا .. دخلت على أحد هالمحلات و أقول في نفسي إن الدعوى صيف

و لاحولك أحد حول الطيور هاليومين و أكيد إن أسعارها في النازل ..

دخلت المحل و شيكت على الكناري من باب اللقافة ..

ثم على طول على الكروانات .. المهم ارتز لي البنغالي يحتريني أسأل << مسوي

خدمة خمس نجوم ( مايدري إن هالشي يضايق الزبون -على الأقل بالنسبة لي- )

المهم و أنا اللي أشوف جوز كروان في قفص ، و أسأل عن سعره ( سعره=قيمته=its price )

وياليتني ما سألت !! ( نصيحة / اتصل على 997 قبل ما تسأل )

يقول إنه بـ ( 1700 ريال ) ؟!

المهم حسبت الرجال مضيع و قلت له القفص هذا مهوب اللي بجنبه اللي فيه الرمادي .

قال : أيوه هازا كروان 1700 هازا هولندي ..

و أنا اللي شوي و يغمى علي ..

ويييين ؟؟ أعوذ بالله و ش هالأسعار؟؟

قلت طيب مانبي هالهولندي عطنا المتوحش ..

و تأتي الطامة المطممة ( الفرد المتوحش بـ 400 ريال و ليس الجوز )

لا حول و لا قوة إلا بالله ..

يا إخوان .. أنا من قبل قريت مواضيع تستنكر أسعار المحلات و الأخوان أخذ و عطا في هالمجال

اللي يقول مالهم حق و نصابين و .. و شوي و يطلعهم من الملة << (صيغة مبالغة)

و اللي يقول احسب ايجار المحل و المحل فاتح للتجارة و .. و ..

ما علينا .. المهم عشان نطلع بنتيجة ، ليش مربين الطيور و الهاوين ما يكسرون سوق هذولا

ماتلقى الواحد منهم إلا بصعوبة و لازم تصير معرفتك به شخصية عشان يطلعلك

الأقل من المتوسط من انتاجه لو نوى يبيعك ..

الواحد من الاحباط وده يترك الشغلة كلها ..

لا تواخذونا في ما جاء في بعض هذا المقال ، و لكنكم خير أصدقاء يفضفض لهم الواحد

و دمتم بود