مساعدة لقطة صغيرة

[بشورة]

السلام عليكم اخواني ....

ادخل بالقصة عطول

مبارح وأنا طالعة برا البيت شفت قطة صغيرة بجانب الحاوية ..

قطة صغيرة جدا يعني المفروض تكون لسا مع امها لكن هي لوحدها امها متخلية عنها..

كانت جوعانة كتير ومتوسخة جدا وتنوي بصوت عالي .. وتدور بين الزبالة على اكل ..

رجعت للبيت اخدتلها نصف قطعة نقانق دجاج لإنها خفيفة كتير يعني بظن هضمها سهل,,

ولما وصلت عندها حطيت القطعة قريب منها

دارت وجهها على جهتي لاحظت حولين عيونها في اشي غريب .. ما شفتو منيح بس كل حول عيونها وتقريبا كل وجهها لونو احمر ومنفوخ الظاهر انو التهاب ,,

صارت تدور على القطعة هي ادامها بس ما شافتها ,, لحد ما اجا تمها عالقطعة صارت تاكلها بشراهة ,,,

انا خفت عليها كتير وضليت اروح اتفقدها وأكيد جننت اهلي عياط وبدي اخدها على دكتور ومو راضيينلي

بعد بشوي رحت وما لقيتها ففكرت يمكن حد اخدها يعتني فيها ولا اشي مع انو مستبعد جدا

اليوم لما طلعت ما كنت متوقعة اشوفها بس كانت بجانب الحاوية برضو تنوي بصوت عالي ولسا وجهها بنفس الشكل

طول اليوم وهي موجودة بس لما رحت بالليل اتفقدها كانو قطط الحارة محتلين مكانها وهي مش موجودة

اخييييييييييرا بعد طول عناء اهلي وافقو بكرا اخدها على دكتور لو لسا موجودة .. لكن ما حد بده يساعدني فيها فراح اقوم بكل شيء لحالي ,,

لهيك انا اطلب استشارتكم ,, ايش ممكن العيادة البيطرية عنا تفيدها؟

خاصة انو الاطباء البيطريين اللي عنا كلهم بس بيعالجو الغنم والبقر والدجاج وهيك لإنهم بس للمزارع ..

وكمان خايفة الدكتور ما يساعدني وما يرضى يسويلها اشي ..

وايش ممكن يكون اللي حولين عيونها؟

لو نظفتها منيح واعطيتها تطعيمات واعتنيت فيها بيكون الوضع جيد؟

خاصة انو هي قطة شوارع يعني ممكن تشفى لوحدها مثلا؟ اقصد يعني ما بيكون في ضرورة لتدخلي ولا كيف؟

رجاء ساعدوني ما اعرف شو اسوي وطول النهار ابكي عليها واخدت الموافقة اني اخدها على دكتور لهيك بدي انها تشفى وترجع منيحة .. راح اعتني فيها لحد ما ترجع منيحة لهيك افيدوني رجاء

شكرا لكم