بعد تجربة امس واليوم الحمدلله تحسنت حالة الكاسكو

[ماكسيموس]

السلام عليكم ورحمة الله وبركاته

اولا اود ان احمد الله سبحانه وتعالى وان اشكركم جميعا على توجيهاتكم لي ودعواتكم للببغاء

الحمدلله وبفضل من الله سبحانه وتعالى حالة الكاسكو تحسنت تقريبا

في الامس كانت الفضلات اجلكم الله سائله واليوم اصبحت متماسكه تقريبا

طبعا الكاسكو كان يعاني من الاسهال وكان بنفس الوقت فاقد للشهيه كان يرفض اي وجبه تتقدم له

حتى لو كانت بالاجبار كان ياخذها بمنقاره ويرميها مره اخرى

حتى لمن طحنت له الذره مع الشعير وحاولت اوكله بالغصب هم كان يرفض ياكل ...

ولاحظت ان الكاسكو بس كان يشرب ماء ، فخطرت على بالي فكره امس اني اشتري مكمل

غذائي وفيتامين بنفس الوقت وفعلا رحت الصيدليه وطلبت من الصيدلاني اعطائي مكمل غذائي

وفيتامينات لطفل عمره شهر (( pediakid النوع شراب )) واخذت منه ابره ليتم القياس

ووضعت كوب ماء كامل و خمسه ملي من المكمل الغذائي والفيتامينات في كوب الماء وخلطتهم

جيدا ،، ووضعت الماء في الكوب الخاص بالكاسكو .

وفي الساعه الرابعه فجرا لاحظت تحسن حالة الكاسكو ولله الحمد .

وفي نفس اليوم الساعه 8 الصبح توجهت الى العياده البيطريه وشريت كفوف و اعطاني ادويه توضع

للببغاء في الماء ووصفلي الوصفه و شريت بعد سيريلاك خاص بالببغاء .

رجعت البيت ولبست الكفوف ووضعت السيريلاك للكاسكو غصبا عنه وخليته ياكله غصبا عليه

وانا لابس الكفوف وكل ماكان يعض الكفوف كنت احط السيريلاك بحلجه وبعد فتره تقريبا 10

او 15 دقيقه صار يقترب مني من نفسه وصار الكاسكو اهوا الي يطلب مني السيريلاك للأكل

وفي الساعه الرابعه عصرا لاحظت فضلاته اجلكم الله متماسكه تقريبا ولله الحمد .

ولكن في مشكله صغيره ان الكاسكو للحين تعبان شوي ولاحظت ان حرارة الكاسكو مرتفعه اتمنى

تفيدوني ............ وشكرا لكم

اود ان اشكر كل من ساعدني كل عضو ووجهني من امس لغاية اليوم
الله يعطيكم الف الف عافيه
واشكر كل عضو دعالي
وانا ادعليكم من كل قلبي عسا الله يوفقكم يارب

[الامل]

مشكور ع نقل تجربتك
لكن حبذا لو وديته بيطري اولاتعطيه سيريلاك لان لسيريلاك بصفه عامه مو زين للطيور لان في نسبة حليب
وهذا يسبب الاسهال وياريت الي عنده خبره يفيدك اكثر مني بهالموضووووع لكن كون انك فكرت تنقل تجربتك هذا شي اكثر من رائع واصل اكثر من كذا

[alfageeahsami]

أخوي الله يحفظك ويحفظ طيرك من كل شر ممتاز اللي سويته ولاكن ارتفاع حرارة الطير دليل لوجود التهاب او زكام ابداء بمعالجة المشكلة الأساسية اترك الطير بمكان دافي بعيد عن الأزعاج ولا تحاول الظغط النفسي على الطير بأختصار ريح الطير حسسه بالأمان اكثر ( اكل بالقوه لا ممكن يدخل الأكل بمجرى النفس ويختنق الطير) استمر بالفتمين مع الماء نوع بالأكل فواكه و خلافه راجع مواضيع التغذية استخدم ادويه بشرية خاصة بالأطفال (للأسهال والزكام ومضادات حيوية بنسب معقوله حسب قوة العلاج

[Animal-5-Lover]

| الحمد لله على كل حال

بس انتبه ، مو كل مرة تسلم الجرة ،

يعني مو تجرب الادوية وزي كذا ، الواحدْ يحاول يتجنب الشي هذا

وكمان السريلاك ، مو كويس والطير زيادة تعبان ..

الله يحفظك ويحفظه لكْ
.

[ماكسيموس]

مشكورين يا شباب والله يعطيكم الف عافيه بس انا قاعد اعطيه سيريلاك خاص بالببغاء --- طيب شنو اعطيه اذا اهوا رافض يأكل كل شي ؟؟ اتمنى تفيدوني الله يخليكم

والله يعطيكم الف الف عافيه
بعد هذي اخر مره اشتري فيها فرخ كاسكو توبه مره ثانيه اشتري فرخ بو 9 شهور صج تربيتهم متعبه هذولا الفروخ ويحتاجون واحد متفرغ ومايكون عنده دوام
عموما الله يعطيكم الف عافيه شباب

لكن اذا السيريلاك الخاص بالطيور مو زين طيب انا شنو اعطيه واهوا رافض الاكل --- الله يخليكم فيدوني للاهميه وشكرا

[ماكسيموس]

شباب ممكن تعلموني شنو اعطيه اكل غير السيريلاك ؟؟ -- مع العلم اليوم سويت له نخي ورفض ياكله --- وسويت له جزر وهم رفض ياكله ----- موراضي ياكل غير السيريلاك الخاص بالببغاء ----- شنو الحل ابي رايكم الله يخليكم

طبعا الجزر فحته بالماء حتى يكون لين عليه وهم ما اكله

[نادر وجودي]

الله يشفيه ويبريه
انا ماعندي خبره بالفروخ
الله يكون بعونك يارب

[Animal-5-Lover]

| أخوي اذا تبغى تغره ، تقدر تسلق خضار

وتخلطها في خلاطْ ، وتغره ..

او عندك الخبز ، تغمسه فالماي وتعطيه ،

وألفْ هنآء وشفاء ^^
.

[ولييد1122]

ياااعسل اذا السرلاك خاص بالببغاااء عااادي غره ولا تتردد وانا اقولك الفرووخ لاتكثر عليها خضااار يجيها اسهاااال وتبلش معاااه خلك على السرلاك ولا الشعير مع الذره والعدس اطحنهااا زي الدقيق وصفها واعطه بالعاااافيه

[ماكسيموس]

مشكورين يالغالين ماقصرتو --- انا قريت موضوعك وليد الخاص بالفلازول وطبقته وايضا بخصوص حبوب الشعير مع الحبوب الذره طحنتها وكل شي وتالي خلطتها مع الماء وحاولت اغره لكن كان رافضها تماما مايحب الا السيريلاك ما ادري يا اخي امه متوحمه على مصنع سيريلاك بهدلني