تنظيف الاحواض من الالف للياء

[ahmed_alrwsh22]

السلام عليكم




هنقسم عملية التنظيف دى لعدة مراحل


المرحلة الاولى


تجهيز المياة التى سنقل اليها السمك اثناء التنظيف


1- ناخد ربع مياة الحوض فى اى حاجة كبيرة تستحمل حجم المياة دة
و تكون نظيفة جدا مفيش فيها اثر للمواد الكماوية مثل الصابون و وسائل التنظيف الاخرى



2- نقوم بنقل السمك بحرص الى الوعاء الجديد المؤقت



3- نحط سكرية فى الوعاء الجديد دة عشان لو الموضوع طول
شوية نبقى عاملين حسابنا


4- وضع السمك فى مكان مظلم شوية عشان السمك يهدى و ينام
عشان الوعاء الجديد ممكن يكون اصغر من الحوض
و السمك لسة مش عارف هو فين



المرحلة الثانية


تنظيف الحوض نفسة


المرحلة دى فيها شقين


الشق الاول لو كان السمك سليم مافيهوش اى امراض الحمد لله


الشق الثانى لو كان السمك لاقدر الله فية اى امراض كفانا الله شر الامراض



الشق الاول لو كان السمك سليم مافيهوش اى امراض الحمد لله


1- نفضى الحوض بهدوء و واحدة واحد مش عايزين تسرع
لان المكان حول الحوض دلوقتى بقى مليان مياة من جراء نقل
السمك و خلافة


2- نشيل اللعب و الديكور المحطوط من صخور او خشب متحجر
و خلافة او نباتات صناعية او طبيعيه

3- نغسل الحاجات دى كلها فى محلول ملحى عشان التطهير مش لازم الغلى
لان الحوض الحمد لله مافيهوش اى امراض



4- الجرش
نشيل الجرش فى اى حاجة ألمونيوم
و نغسلوا كويس
معلش هايكون فية حاجات غريبة لكن معلش
نعديها يعنى ماهو لازم تكون فى حاجات كدة مش
السمك كائن حى و بيخرج بقايا الاكل


و بعد كدة نغلى الجرش لزيادة التاكيد على النظافة
فى ناس ضد مبداء غلى الجرش
لان غلى الجرش بيقتل كل انواع البكتريا
الصديقة و الغير صديقة
بمعنى اصح
البكتريا النافعة و البكتريا الضارة
فى مياة الغلى نضيف ملح و ذلك لزيادة التاكد من التطهير


5- نظافة جسم الحوض نفسوا
الزجاج


نشيل الحوض بالراحة و يفضل فى هذة الحالة
يكون فى مساعدة من اخ او اى حد عشان
يكون فى اتنين بيشيلوا الحوض
خاصة لو كان الحوض حجمة كبير
و وزنة تقيل


احنا ممكن مانحتجش نحرك الحوض من المكان لو كان فى امكانية
التنظيف فى المكان و دى ممكن تكون مش متوافرة لكل الناس
لان احواض السمك موجودة داخل الشقة
حرام يعنى نغرق الشقق بتاعتنا مياة


هانطرد من البيت كدة
و احنا قاعدين بالعافية اصلا



تنظيف الحوض يكون باستخدام
الملح الملح


و خصوصا الملح الخشن
لانوا مطهر كويس لاى
بكتريا او طحالب قد تكون موجودة داخل الحوض


او هى موجودة اصلا جوة الحوض
تحذيييييييييييييييييييييييييييير


ممنوع استخدام اى مطهر كيماوى
ابدا ابدا ابدا


المطهر الوحيد المسموح باستخدامة هو


الملح


بعد كدة نقوم بغسل الحوض جيدا بالماء البارد او الساخن ماتفرقش


و نزيل اثار الملح و يكون الحوض نظيف تماما



و نرجع الحوض تانى مكانوا


بس خلى بالكوا


ننشف الوجة الخارجى للحوض لانوا هايكون علية مياة
و المياة لاقدر الله ممكن تخلى الحوض يتزحلق من الايدى


و نستعين بنفس الشخص الى استعناة بية فى نقل الحوض
عشان الشيل


مش مشكلة لو دفعت فلوس لاى حد من اخواتك عشان يساعدك


كل دة فدا السمك


او ممكن تجيب البواب لو عندك بواب و تديلوا خمسة جنية



كدة الحمد لله انتهت اصعب مرحلة
وهى نقل الحوض و غسلة


فى اثناء غسل الحوض
الجرش كان على النار بيستوى قصدى بيغلى و بقى تمام


نغسل الجرش مرة تانية بعد الغلى لان الجرش هايكون سخن جدا
و نخلى بالنا و احنا بنفضى المياة السخنة عشان خطر الحرق لاقدر الله


عملية الغسيل دى هاتنضف الجرش كويس من اى فضلات موجودة لسة
و هاتخفض درجة حرارة الجرش المغلى




الشق الثانى لو كان السمك لاقدر الله فية اى امراض كفانا الله شر الامراض


فى الحالة دى هانضطر نغلى كل حاجة فى الحوض و نستخدم فى مياة الغلى
ملح بس


اكرر مرة تانية ممنوع استخدام اى مطهرات كيماوية


و بعد كدة نغسل الحاجات الى قمنا بغليها دى كويس
بالمياة العادية


و بكدة تكون انتهت المرحلة الثانية و هى
تنظيف الحوض و تطهيرة جيدا

المرحلة الثالثة
اعادة تنسيق الحوض و وضع الجرش مرة تانية


و طبعا الى عندوا فلتر ارضى هايحط الفلتر الاول قبل
ما يفرش الجرش و يظبط الدنيا تمام
و يظبط كل الديكور



المرحلة الرابعة
دى بقى اخطر مرحلة لان هانقوم فيها باعادة السمك للحوض


طبعا احنا ما رميناش المياة الى كان فيها السمك كلها
فى ربع السمك موجود فية
و ربع تانى احتفظنا بية و احنا بنفضى الحوض
لان المياة دى غالية جدا جدا جدا


لية بقى غالية
لان هى فيها البكتريا النافعة الازمة لبقاء السمك
والى تاخد وقت على بال ماتتكون و تعيش


و احنا هانكون قبلها بيوم جهزنا مياة تانية عشان الكلور يكون
طار من المياة و المياة تكون كويسة للسمك و مافيهاش كلور


وبعد كدة نصب المياة للحوض بالراحة عشان
ما نبوظش الديكور الى عملناة


و لو احنا فى الشتاء نظبط درجة الحرارة قبل وضع السمك


و دة عشان السمك ما يحصلوش صدمة
وننقل السمك بنفس الطريقة الى حنا بننقلوا بيها
و احنا جايبينوا من محل السمك


نحطوا فى كيس لمدة 10 دقائق
و نصب كباية من مياة الحوض
فى الكيس عشان السمك مايحصلوش
صدمة من تغير تركيبة المياة



و بكدة نكون ظبطنا الحوض تمام و كلوا عال العال


اتمنى من الله انى اكون وفقت فى الموضوع دة
و افدت اخوانى السمكاوية


و طبعا لو فى اى حاجة انا نسيتها
عذرا


ولو فى اى حاجة غلط ياريت تصلحهوا بردودكوا


اتمنى ان الموضوع يعجبكوا و يكون فية فائدة لكل السمكاوية
الخبراء و المبتدئين

[نياز]

مشكور اخوي على هالمعلومات والطريقة التفصيلية لكيفية تنظيف الحوض ,, بما أني اريد ان أنظف الحوض كله وأغير الماء بكرة ,, صج هالمعلومات جت في وقتها ..
أشكرك أخوي بس ممكن نضيف الماء مباشرة في الحوض وبعدين نضيف عليه مزيل الكلور..؟؟

لان انا ما عندي عدد كافي من الاحواض...؟؟؟؟؟

ومشكورين

[النمر الجليدي]

يسلموو على الموضوع الأكثر من رائع بس ما هي السكرية






.....

[roromody]

مشكور يأحمد على الموضوع الجميل .
واسلوبك الرائع المبسط.

[roromody]

مشكور يأحمد على الموضوع الجميل .
واسلوبك الرائع المبسط.

[أمير البحار]

الله عليك مشكوووووووووووووور

[عفريت القرش]

مشكور وماقصرت شرح واضح

واسلوب اكثر من راااائع

تحيااااااااتي لك

[Bo FaHaD]

موضوع كامل وباسلوب جميل

يعطيك الله الصحه والعافيه وما قصرت

بس سؤال

شنو اهي السكريه

تقصد الغطاء ولا السكر ؟؟


وبالتوفيق


شكراً

[ahmed_alrwsh22]

الف شكر علي الردود الجميله وتشجع علي جلب المزيد من المعلومات


اما بالنسبه للسكريه
هي عباره عن كوره ملونه يوجد فيها فتحات صغيره جدا بنضع فيها خرطوم الهواء بنضعها في الحضانات (الاحواض الصعيره)
بنقول عليها سكريه في مصر

[أمير البحار]

بالنسبة لسؤال السكرية فهي شيء مكور يشبه الفلين و يكون مخرم و يوصل بانبوبة الهاواء و تستعمل في السمك الصغير