الفطريات حتموت قطتى .. عايزة مساعدة ارجوكم

[Dody taha 2017]

مساء الخير على الجميع
انا بجد اتشرفت بأنضمامى لمنتدى جميل ومفيد ومحترم زى ده
ارجوكم اتحملونى فى اسئلتى
انا عندى اربع قطط .. منهم قط صغير 3 شهور ( ولد .. نوعه شيرازى بيور ) جاتله من اسبوعين فطريات ووديته مستشفى الشعب ووصفوله دهان بيتادين مع خل .. وبخاخ لامزريل .. وشراب ايمولانت .. بالاضافة الى جرعة اسبوعية من اقراص مضادة للفطريات اخد جرعتين على اسبوعين .. والحمد لله خف .. بس عندى تخوف من ان تحصل ليه انتكاسة .. ودلوقتى حميته اول مرة بعد الشفاء بشامبو بيتادين .. وربنا يسترها

بس المشكلة انى عندى 3 قطط كبار .. فيه 2 للأسف اتعدوا منه ..
منهم واحدة اصابتها كبيرة جدا جدا مستحوذة على اكتر من 85% من جسمها (بنت عمرها حوالى 11شهر ووزنها حوالى 2كيلو .. ونوعها شيرازى خليط ) ومش عارفة ايه هو سبب انتشار الفطريات بالشكل الرهيب ده .. والقط التانى اصابته الحمد لله بسيطة مجرد بقعة خلف الاذن (ولد عمره حوالى 10شهور ووزنه حوالى 4كيلو .. نوعه شيرازى خليط ).. والثالثة لحد دلوقتى ماظهرش عليها اى حاجة الحمد لله ( بنت عمرها سنة وشهرين ووزنها حوالى 3كيلو .. نوعها شيرازى خليط ) ...

انا عزلت اللى اصابتها كبيرة وحلقت ليها كامل شعرها عشان اعرف احط لها الدواء .. علاجى ليها هو 3سم من دواء التراجريسوفلين صباحا ومساء لسة بقالى 3 ايام ماشية عليه .. علما بأن وزن القطة حوالى 2كيلو .. وبدهن لها خلطة عبارة عن بيتادين وخل عادى وخل تفاح مع غطاء بيتادين غسول الفم .. 3سم من دواء ايمولانت مرة واحدة يوميا .. وبخاخ لامزريل مع دهان من لسيون كانديستان ...
اما القط الثانى اللى اصابته خفيفة .. نفس العلاج برضوا .. بس الفرق انى بديله التراجريسوفلين جرعة واحدة فقط باليوم على حسب وزنه
......... فهل العلاج دا صح ولا غلط ؟؟؟!!!
وكمان بتقابلنى مشكلة دهان البيتادين لانى بعد ماببحط البيتادين بتبقى كأنها استحمت بالظبط .. فأعمل ايه استمر على كدا ولا فيه حل افضل
خصوصا هى بتتعذب بجد وانا بحكلها البيتادين لدرجة حبيبتى بتعمل حمام على نفسها .. بجد انا محتاسة بشكل رهيب ومخنوقة جدا
مشكلتى الكبيرة كمان انى فى دور ارضى والشمس عندى شبه معدومة .. وكمان الشقة كبيرة .. وهما منتشرين فى كل مكان .. والعزل شبه مستحيل .. لانى لو حبست حد بيفضل ينونو ويصحى الميتين لأنهم متعودين على وجودهم معايا !!! بس بعد ماوجدت ان اصابتها كبيرة اضطريت انى اعزلها والنهاردة ثالث يوم في العزل
سؤالى هو ...
هل فيه تطعيم ضد الفطريات ؟ ولو فيه اسمه ايه ؟

وهل الحقن الروسية للفطريات جيدة ولا كلام فاضى (لانهم بيقولوا بتعمل وقاية وعلاج ) !؟

وهل فيه حقن بترفع المناعة اسمها (جاما فيت ) روسية برضوا هل هى مفيدة ؟

انا بديهم ايمولانت بجرعة يومية 2سم للقطط الكبيرة مرة فى اليوم .. وبديهم هالورانج بجرعة يومية 2سم للقطط الكبيرة مرة باليوم .. والقط الصغير 1سم ... هل كدا كويس ولا فيه تعارض بين النوعين .. علما بأن انا بدأت اديهم الجرعات دى مع يداية المرض اى من اكثر اسبوعين فقط
بس فى الاستشارة الدكتورة قالتلى ان الاتنين مكملين غذائيين وماينفعش يتخدوا مع بعض .. بس البيانات اللى مكتوبة على كل دواء غير التانى ومختلفين عن بعض .. بس سمعت كلامها وبقيت اديهم ايمولانت فقط
هل ينفع ياخدوا الاتنين مع بعض ولا لا ؟؟

وفى انتظار افادتكم لى على احر من الجمر
بارك الله لكم جميعا ويجعله الله فى ميزان حسناتكم